Në SHBA është zbuluar një mashtrim shumë i madh me paratë e fondeve gjermane të dëmshpërblimeve të viktimave të nazizmit. Rreth 30 milionë euro, janë përdorur për qëllime të tjera.
E prekur nga skandali është "Jewish Claims Conference" (JCC), e krijuar në New York në vitin 1951, një organizatë që ka dëmshpërblyer me para gjermane viktimat hebreje të regjimit nazist. Sipas të dhënave te Prokurorisë Nju-Jorkeze, e cila ngriti ditën e martë (9 nëntor) padi kundër 17 personave të akuzuar për mashtrim, në një periudhë 16 vjeçare janë keqpërdorur para në nivelin e 30,5 milionë eurove. Mes personave të akuzuar ndodhet edhe ish drejtori i fondacionit dhe gjashtë bashkëpunëtorë të organizatës. Të akuzuarit rrezikojnë të dënohen me deri 20 vjet heqje lirie.
Biografitë e viktimave të nazizmit janë falsifikuar sistematikisht
Mashtrimi është bërë sipas 'New York Times', në bazë të së njëjtës skemë: Nëpërmjet gazetave në gjuhën ruse në SHBA janë rekrutuar emigrantë nga Rusia. Me ndihmën e bashkëpunëtorëve të fondit, aplikuesi falsifikon biografinë, sikur të ketë qenë i dëbuar apo ish banor i getove. Por shumë prej përfituesve të parave kanë lindur pas vitit 1945, pra pas përfundimit të regjimit nazist. Sipas të dhënave të prokurorisë janë përdorur pasaporta të falsifikuara, dokumenta zyrtare të falsifikuara, por edhe njohuri të detajuara për Holokaustin, të punonjësve të JCC. Pas pagimit të shumave të dëmshpërblimit, aplikuesit është dashur t`i jepnin një pjesë të parave punonjësve të fondit, që i patë ndihmuar. Mashtrimi ra në sy kur u vunë re aplikime gati identike të personave të ndryshëm. Dimensioni i skandalit habiti edhe vetë autoritetet e drejtësisë. Ata kanë zbuluar 5 000 aplikime të falsifikuara.
Tmerr dhe indinjatë
"Nëse ekzistonte një organizatë që mendohej të ishte e paprekur nga mashtrimi dhe kuria, kjo ishte 'Claims Conference', e cila ka ndihmuar çdo ditë mijëra viktima", deklaroi prokuroria. Edhe kryetari aktual i Claims Conference, Julius Berman, shprehu indinjatë. Jewish Claims Conference përfaqëson interesat e hebrejve ose trashëgimtarëve të tyre, që jetojnë jashtë Izraelit, kryesisht në SHBA.
Me marrëveshjen e Luksemburgut të 1952-it, Gjermania ishte e detyruar sipas të drejtës ndërkombëtare t`i paguante dëmshpërblime viktimave hebreje të regjimit nazist.
Në vitet që pasuan iu paguan 3,5 miliardë marka Izraelit, dhe JCC si dëmshpërblime për ndekjen, skllavërimin dhe shpronësimin e hebrejve gjatë sundimit nazist. Pas ribashkimit të Gjermanisë, 'Claims Conference' mori sërish pagesa dëmshpërblimesh nga Gjermania, meqenëse viktimat hebreje që kishin të drejtë dëmshpërblimi ishte e vështirë të gjendeshin. Aktualisht rreth 53 mijë persona që kanë mbijetuar Holokaustin marrin në muaj ndihma prej 291 eurosh, para që paguhen që prej vitit 1992 në bazë të një marrëveshjeje të qeverisë gjermane me Claims Conference. Në kuadër të pagesave njëherëshe, që prej vitit 1980 janë paguar nëpërmjet 'Claims Conference' 340 mijë viktima të terrorit nazist me para gjermane në nivelin e gati 1 miliardë eurove. Qeveria gjermane duhet të paguante në vitin 2007, 250 milionë euro të tjera në kuadër të një programi pensionesh të JCC.
Në SHBA jetojnë rreth 6, 5 milionë vetë të besimit hebre. Shumë prej tyre janë pasardhës të imigrantëve nga Evropa, ose vitet e fundit direkt nga Evropa lindore.
Autor: Daniel Scheschkewitz/ Aida Cama
Redaktoi: Esat Ahmeti
http://www.dw-world.de/dw/article/0,,6226317,00.html
Përgjigju Duke Cituar
Postuar më parë nga x_njeri
Ngase te gjitha veprimet e kryera nga kta nuk kane kurrefare lidhje me etiken.
Krijoni Kontakt