Dhjetor 2010: Rezultati i zgjedhjeve parlamentare ne Kosove

[Rina_87]

Konteston rezultatet e KQZ-së


Kryetari i Lidhjes Demokratike të Kosovës, Isa Mustafa ka kontestuar rezultatet që ka dhënë Komisionin Qendror i Zgjedhjeve, duke pohuar se nuk është e mundur që Partia Demokratike e Kosovës të ketë një përqindje kaq të lartë.

Me këtë rast, ai nuk ka thënë nëse LDK-ja, është fituese e zgjedhjeve. Po ashtu Mustafa, konteston edhe rezultatet e zgjedhjeve në Skenderaj dhe Drenas, ku kanë dalë të votojnë më shumë se 90 për qind e atyre që kanë të drejtë vote.

Kryetari i LDK-së, Isa Mustafa po ashtu ka thënë se kryetari i PDK-së, Hashim Thaçi me deklarimin e hershëm të fitores së tij ka rrezikuar sigurinë e qytetareve, duke shkelur njëkohësisht rregullat zgjedhore.

Mustafa tha se kanë dërguar një sërë ankesash në PZAP dhe pritet rezultati i tyre në mënyrë që LDK-ja ta jep përgjigjen përfundimtare për zgjedhjet.

Po ashtu, Mustafa ka mohuar mundësinë e dhënies së dorëheqjes, tash kur partia e tij nuk doli fituese. Ai tha se nuk ka arsye të jap dorëheqje, kur partia ka pas ngritje. /Telegrafi/

[Rina_87]

Rezultati i KQZ-së, i manipuluar

Përfaqësuesja e AKR-së, Mimoza Kusari - Lila, ka deklaruar se rezultati i KQZ-së për zgjedhjet e 12 dhjetorit, është i manipuluar. Ajo theksoi se fitorja e PDK-së është një festë e parakohshme.

“Sot kemi një rezultat paraprak ku janë mbi 50 për qind e fletëve të votimit të numëruara nga komisionerët tanë. Ne kemi të dhëna të ndryshme nga ato të KQZ-së. Janë informata që kanë ardhur në qendrën tonë. Mund të ketë probleme apo anulim të votimit në Drenas dhe Skenderaj, por ka pasur probleme edhe në Malishevë, Gjakovë etj. Partitë e tjera nuk do ta kenë mundësinë të manipulojnë të dhënat”, është shprehur Lila.

“Rezultati i KQZ-së është i manipuluar. Ajo që është deklaruar si fitore e PDK-së është një festë e parakohshme pasi kjo parti nuk ka shanse për të fituar në situatën ku ndodhet Kosova”, theksoi ajo. /Telegrafi/

[Rina_87]

DV: Ka bazë për anulim të rezultateve në Skenderaj e Drenas

Rrjeti i organizatave joqeveritare “Demokracia në Veprim” ka publikuar të dhënat preliminare për ecurinë e përgjithshme të zgjedhjeve parlamentare dhe ato për komunën e Skenderajt dhe të Drenasit.

Për shkak të parregullsive të evidentuara nga vëzhguesit e këtij rrjeti këto dy komuna ishin përjashtuar nga rezultati preliminar për zgjedhjet e 12 dhjetorit.

Në një konferencë për media kreu i “Demokracisë në Veprim”, Ismet Kryeziu foli për llojin e shkeljeve që janë bërë në Skenderaj dhe Drenas. Ai tha se ka bazë për të kërkuar anulimin e rezultateve në këto dy komuna dhe të kërkohet shpallja e rivotimit.

Kryeziu tha se duhet të pritet shqyrtimi i ankesave nga Paneli Zgjedhor për Ankesa dhe Parashtresa. /rel/ /Telegrafi/

[Disa]

AAK fiton Rahovecin me 11 % epërsi karshi LDK-së
Ibrahim Kryeziu i ka uruar fitoren Smajl Latifi. Ai ka thënë se humbja e tij ka qenë e thellë, por ka pasur shumë paregullsi.

E diel 19 Dhjetor 2010 21:18


Fitoren e Smajl Latifit të AAK-së në Rahovec e ka shpallur edhe Demokracia në Veprim. Gjatë një konference për media, DV ka dhënë rezultatet preliminare, ku Latifi i AAK-së ka fituar 10 401 vota apo 55.72%, dhe Ibrahim Kryeziu i LDK-së ka fituar 8263 vota apo 44.28%.

Kandidati i LDK-së, Ibrahim Kryeziu i ka uruar fitoren kandidati të AAK-së, Smajl Latifi. Ai ka thënë se humbja e tij ka qenë e thellë, por ka pasur shumë paregullsi.

"Kanë qenë të gjithë bashkë, me PDK-në, me Vetëvendosjen. Ka qenë dita e mobilave dhe e pompave të benzinës", ka thënë Kryeziu.

Smajl Latifi, kryetari i ri i Rahovecit, e ka shprehur entuziazmin e tij për fitoren. Ai ka thënë se procesi ka ecur në përgjithësi në rregull dhe pa incidente.

"Është një fitore e popullit të Rahovecit, dhe i dedikohet Ramush Haradinajt", ka thënë Latifi. /indeksonline/

[Llapi]

Kryeprokurori urdhëron ndjekjen e keqpërdoruesve të votave

Publikuar: Sot, më 23 dhjetor 2010
Kryeprokurori urdhëron ndjekjen e keqpërdoruesve të votave


Prishtinë, 23 dhjetor - Kryeprokurori i Kosovës, Ismet Kabashi ka paralajmëruar ngritjen e mundshme të padive ndaj personave që kanë bërë keqpërdorime gjatë zgjedhjeve, nëse gjenden prova ndaj tyre. Ai ka urdhëruar shtatë prokuroritë komunale që të bëjnë mbledhjen e materialeve që kanë të bëjnë me procesin zgjedhor dhe të fillojnë ndjekjen penale në të gjitha ato raste ku gjenden dëshmi të mjaftueshme për këtë.
Në një intervistë për BBC-së, Kabashi tha se prokuroritë komunale kanë afat 15 ditë për të raportuar për punën e tyre dhe më pas do të shihet nëse ekzistojnë dëshmi për të nisur procedurat penale ndaj individëve të caktuar. Ai ka thënë se prokuroritë kanë ushtruar kallëzime penale edhe për zgjedhjet e vitit 2007 dhe ato të vitit 2009, mirëpo nuk ka pasur vendime gjyqësore lidhur me ato akuza. Sipas tij, kjo ka ndodhur jo pse nuk ka pasur prova ndaj tyre, por gjykatat nuk i kanë marrë në punë ato çështje. Thënë ndryshe, “janë konfirmuar aktakuzat, mirëpo nuk është shkuar më tutje”, ka theksuar kryeprokurori Kabashi.

[Brari]

Dr.Isa Mustafa: “Bota Sot” të mos shfrytëzohet nga mercenarë politikë!

Intervistoi: Nefail MALIQI

Për zgjedhjet e fundit në Kosovë, për koalicionet dhe unifkimet eventuale te LDK-se me partitë si motra në Kosovë, për Ukë Rugovën, Bukoshin, Sejdiun e Dacin flet njeriu numër një i LDK-se dr.Isa Mustafa në intervistën ekskluzive dhënë kombëtares “Bota sot”. Në këtë interviste po ashtu z.Mustafa shprehet për aferën “Dick Marty”, për atë se viti viti 2010 ishte vit i brishtë për Kosovën apo jo si dhe për diasporën shqiptare si dhe për shqiptarët e Preshevës, Bujanocit dhe Medvegjës komuna me të diskriminuara dhe më të prapambetura në Evropë
Interviste ekskluzive me dr. Isa Mustafa, kryetar i LDK të Kosovës

“Bota sot”: Z. kryetar, fillimisht një pyetje që përfaqësuesit e mediave e shtrojnë vazhdimisht në prag të numërimit të motmoteve. Si e vlerësoni vitin 2010 ishte vit i Kosovës apo pas largimit të Fatmir Sejdiut nga presidenca gjerat e morën tatëpjetën ku erdhi deri tek paralizimi i institucioneve të Kosovës duke u reflektuar negativisht si ne bllokimin e proceseve te njohjeve te reja ashtu edhe tek investitorët e huaj. E ndani ju këtë mendim ?

Dr.Isa MUSTAFA: Problemet dolën në shesh me rastin “Zanzibari’ kur krerët e PDK-së vendosën të prishin në nga kafeneja koalicionin në pikë të natës, por në mëngjes i ndërruan fjalët. Ishte ai një koalicion i paqëndrueshëm dy “partnerëve” të cilët nuk i besonin njëri tjetrit. Ndodhi që Gjykata Supreme të merr vendim ndaj presidentit Sejdiu, i cili reflektoi sjellje institucionale duke ofruar dorëheqje nga kjo pozitë. Unë jam i bindur se ishte PDK-ja ajo që organizoi tërë këtë rrëmujë, me qëllim përfundimtar të iniciojnë zgjedhje të parakohshme, me pasojat të cilat po shihen tani dhe do të shihen edhe më vonë.

“Bota sot”: Zgjedhjet kaluan si kaluan, dikush nga këto zgjedhje fitoi. Jeni ju të kënaqur nga këto zgjedhje dhe si e vlerësoni ju ato dhe mendoni në koalicion t'i ribashkoheni ish-aletët te juaj (e kam fjalën te LDK-se) partise fituese te ketyre zgjedhjeve PDK-se, megjithëse një gjë te tille ju e keni kundërshtuar vazhdimisht , madje ju jeni edhe të parët që keni kërkuar prishjen e "kurorëzimit" me PDK-ne ?

Dr.Isa MUSTAFA: Unë dhe partia ime mendojmë se në këto zgjedhje nuk fitoi askush, por patëm humbje të mëdha. Në një proces zgjedhor në të cilën pati mbushje të kutive jashtë vendvotimeve, votime të individëve deri në 50 herë, 3 komuna dhe shumë

vendvotime në të cilat do të ripërtërihen votimet, shitblerje të votave, keqpërdorim të buxhetit nga kryeministri i shkarkuar për efekte fushate dhe shumë dobësi tjera, humbën qytetarët e Kosovës dhe Kosova. Nga një proces, për të cilin u vlerësua se kishte vjedhje industriale të votave nga Partia Demokratike e Kosovës nuk mund të rezultojë qeverisje e qëndrueshme dhe institucione të qëndrueshme. Ndërsa LDK në asnjë rast nuk bën koalicion me askënd, për të legalizuar këto parregullsi.

MUSTAFA: NE JU KEMI OFRUAR UKE RUGOVES, AI NUK DESHTI

“Bota sot”: A do t’ju kishte ju penguar juve z.Mustafa personalisht, sikur emrin e Uke Rugovës ta kishit radhitur në dhjetë vendet e para të listës së LDK-se, apo ndoshta edhe sikur të kishit dashur ju, apo keni pasur presion apo divergjenca në këtë drejtim?

Dr.Isa MUSTAFA: Unë i kam ofruar z. Ukë Rugova të jetë në listën tonë. Nuk kemi biseduar në asnjë rast për radhitjen në listë, sepse kjo nuk ka qenë preokupim yni. Për këtë kam pasë mbështetjen e Kryesisë së LDK-së dhe të Këshillit Qendror. Z. Ukë Rugova nuk e ka parapëlqyer këtë ofertë , ka kërkuar vende edhe për anëtarët e tjerë të listës si dhe hapësirë për futjen e tyre edhe në Kryesinë e LDK-së. Kjo ka qenë e pamundur të bëhet pas përfundimit të zgjedhjeve në LDK dhe konstituimit të organeve të saj.

“Bota sot”: Nëse ky vit paska qenë i brishtë për Kosovën, mendoni se viti i ardhshem do të jetë i mbarë, sidomos në unitetin e partive dhe shqiptarëve në përgjithësi? Pritni ju ndonjë afrim të juajin apo te akademik Dacin në partinë tuaj ?

Dr.Isa MUSTAFA: I kam marrëdhëniet e mira me akademik Dacin. Do të angazhohem, po ashtu, të jenë të mira edhe marrëdhëniet ndërmjet dy partive tona, sikurse edhe me partitë dhe subjektet e tjera.

UNITETI DHE FORCIMI I SHTETIT TE KOSOVES MUND TE BEHET VETEM ME FILOZOFINE E DOKTOR RUGOVES

“Bota sot”: Z.kryetar Muastafa, sikur të ishte gjallë presidenti historik i Kosovës dr.Ibrahim Rugova a do të kishin ndodhur për të mos thënë këto marrina, kjo rrëmujë politike, ky regres politik dhe ekonomik, ky kaos institucional dhe përqarjeve të skajshme mes liderëve dhe partive. pajtoheni se ujku gjuhët tufës së deleve, kur ato janë pikë e pasë, rasti i fundit me Dick Marty.

Dr.Isa MUSTAFA: Është vështirë të paragjykohet, sepse kanë ndodhur ndryshime të mëdha në krahasim me kohën kur presidenti Rugova ishte gjallë. Në proceset e tanishme të shtetndërtimit, Kosovës i nevojitet një përgjegjësi dhe përkushtim maksimal për qeverisje të mirë dhe për shtet ligjor. Korrupsionin, krimin e organizuar dhe abuzimet me votat janë punë të cilat duhet t’i zgjidhim ne. Kjo mund të bëhet edhe pa Rugovën, me filozofinë dhe përgjegjësinë rugoviane.

“Bota sot”: Sikur mediumet zvicerane ashtu edhe ato botërore i kanë dhënë jehonë të madhe raportit të senatorit zviceran Dick Marty, saqë edhe shefja e diplomacisë zvicerane znj.Calmy-Rey ka anuluar një shpërblim nga i ngarkuari i Thaçit në Bernë. Si i vlelësoni aferën e fundit me Dick Marty?

Dr.Isa MUSTAFA: Është e padrejtë dhe e papranueshme që ky raport të atakoj luftën çlirimtare të Kosovës dhe Kosovën në tërësi. Nëse Dick Marty ka fakte, të cilat nuk i ka ofruar, për individë të caktuar atëherë është punë tjetër. Raporti duhet të shqyrtohet në rrafshin e drejtësisë. Sjellja ndaj këtij raporti nuk duhet të jetë fushatë për konsum të brendshëm. Raporti është prezantuar në Këshillin e Evropës, prandaj ky është vendi ku duhet ta demantojmë dhe të kërkojmë përgjegjësi ndaj autorit të tij.

“Bota sot”: Tash me ra ndërmend edhe një pyetje mjaft interesante z.Mustafa. Ditëve të fundit kemi lexuar diku një koment rreth jush se "Isa Mustafa po nxitka luftë civile ne Kosove" ?! Opinioni juaj z.kryetar rreth këtij shkrimi ?

Dr.Isa MUSTAFA: Ditën e zgjedhjeve, kur Thaçi filloi të kremtoj fitoren, para se të dalin rezultatet preliminare nga KQZ unë ftova simpatizantët e LDK-së që të përmbahen dhe të kthehen në shtëpi. Për fat të mirë u evitua konflikti, i cili mund të na kushtonte shumë. Unë lexova një artikull të Teki Dervishit, në të cilin akuzohesha për nxitje të luftës civile. Rrallë se kam lexuar artikull më të ndytë dhe më të ulët, pa asnjë argument, por me qëllime dhe paramendime shumë të këqija. Jam i bindur se vetëm me para të mëdha porositen dhe shkruhen artikuj të tillë. Më vjen keq që Bota Sot të shfrytëzohet nga mercenarët për luftë politike.

“Bota sot”: Kur shumë vende botërore që në kuvend apo institucioneve vendore posedojnë përfaqësuesit e vet nga diaspora, pse edhe Kosova nesër t’mos këtë një përfaqëuesues të tillë, aq më tepër kur dihet mirëfilli roli i diasporës shqiptare qoftë në Zvicër po gjetiu në botë ?

Dr.Isa MUSTAFA: Është kjo çështje e cila duhet të mendohet seriozisht. Bashkatdhetarët tanë në botën e jashtme kanë dhënë kontribut të madh para lufte, gjatë saj dhe në rindërtimin dhe zhvillimin pasluftës.

NE DIPALOGUN E ARDHSHEM MES PRISHTINES DHE BEOGRADIT PATJETER EDHE PRESHEVA

“Bota sot”: Dhe në fund z.Mustafa për gjthë shqiptarët në Gadishullin Ilirk është gjetur një lloj zgjidhje, një stabiliteti ndoshta edhe i përkohshëm dhe kanë shënuar progres si në Shqipëri ashtu edhe në Kosovë e deri diku në Maqedoni e Malit të Zi. Por, duke sikur tek shqiptarët e Kosovës Lindore (Preshevë, Bujanoc dhe Medvegje) ka hasur sharra në gozhdën e Beogradit. Derisa pakica serbe në Kosovë është e privligjuar, ndërsa në Preshevë ngjet e kundërta, popullata ndihet e diskminuar. Për tejkalimin e kesaj situate mendoni z.Mustafa se ne dialogun e ardhshëm teknik mes Prishtinës dhe Beogradit duhet inkuadruar edhe çështje e shqiptarëve të Preshevë?

Dr.Isa MUSTAFA: Ka shumë çështje të cilat meritojnë të jenë objekt i bisedave. Prandaj, çështjet teknike nuk mund të diskutohen vetëm për komunitetin serb në Kosovë por edhe për shqiptarët jashtë kufijve të Republikës së Kosovës, siç janë ata të Preshevës.

[veli44]

Hajnia e bandes se Thaçit po e qon Kosoven ne anarki.Gjykata Supreme e Kosoves vendos per rivotime te reja shkaku i degradimit te procesit zgjedhor nga kjo mafi shtetrore.

Informata te reja se shpejti.

[ARIANI_TB]

Selvije Bajrami | 07-01-2011 11:57 CET
Përfaqësuesi civil ndërkombëtar, Pieter Feith përmes një kumtese të lëshuar dy ditë para mbajtjes së rivotimeve në Skenderaj, Drenas e Deçan ka kërkuar proces demokratik duke vlerësuar se mbajtja e rivotimeve është mënyrë për t’i korrigjuar parregullsitë që kanë ngjarë më 12 dhjetor.

Kosovës, sipas Feith, i duhet një qeveri e re jo vetëm kredibile por gjithashtu e pastër dhe e aftë, e gatshme për t’u ballafaquar me sfidat e vështira para saj, në partneritet me bashkësinë ndërkombëtare.

“Votimet e 12 dhjetorit të vitit të kaluar janë mbajtur në një atmosferë kryesisht konstruktive. Megjithatë, ka pasur parregullsi. Qytetarët e Kosovës, institucionet e Kosovës dhe bashkësia ndërkombëtare, përfshirë Bashkimin Evropian, nuk mund t’i pranojnë këto parregullsi. Rivotimet e pjesshme të urdhëruara nga Paneli i Zgjedhjeve për Ankesa dhe Parashtresa është një mënyrë për t’i korrigjuar ato. Kosovës i duhet një Kuvend kredibil dhe një Qeveri kredibile”, thuhet mes të tjerash në deklaratën e Faith.

Bashkësia ndërkombëtare e në veçanti përmes misionit të Vëzhgimit të Zgjedhjeve, sipas tij, do të përcjellë se çka do të ndodhë të dielën.


“Zhvillimi i këtyre zgjedhjeve do të ketë ndikim të drejtpërdrejtë në reputacionin ndërkombëtar të Kosovës”, ka vlerësuar ai.

Udhëheqësit politik të Kosovës, sipas Feith, kanë përgjegjësi të veçantë dhe personale për të parandaluar mashtrimet dhe kërcënimet.

“Përfitimi afatshkurtër në llogari të reputacionit ndërkombëtar të Kosovës është i pamatur në veçanti në kohën kur Kosovës i nevojitet përkrahje e mëtejme ndërkombëtare dhe evropiane. Qytetarët e Kosovës me të drejtë orvaten për kushte më të mira jetese. Prandaj, është e nevojshme që këto zgjedhje t’i përcjellë një atmosferë konstruktive për të cilën kontribuojnë të gjithë aktorët politik”.

[Brari]

I ndalet “sahati” Teuta Sahatqisë edhe në LDK

Marie Nikolla - Bota sot

Sipas burimeve tona të sigurta Teuta Sahatqija, Eqrem Kryeziu dhe Lutfi Haziri, janë disa nga zyrtarët e lartë të LDK-së të cilët nuk kanë kaluar “pragun” zgjedhor të deputetit.

Burime të sigurta të gazetës tonë bëjnë të ditur se mbetja jashtë Kuvendit të Kosovës e disa emrave të LDK-së, madje edhe atyre që janë pjesë e Kryesisë së kësaj partie ka zgjuar reagime brenda kësaj partie. Ndonëse, zyrtarë të LDK-së thonë se derisa KQZ-ja nuk del me rezultatet e zgjedhjeve, ata nuk kanë të dhëna se kush nga kandidatët e listës së tyre ka marrë vota të mjaftueshme për t’u bërë deputet e kush jo, burimet e gazetës bëjnë të ditur se disa nga emrat e kësaj partie nuk kanë arritur marrin votat e mjaftueshme për të fituar ulësen e deputetit për këtë mandat. Por këto burime bëjnë me dije se kjo ka revoltuar ata të cilët gjatë këtij mandati do të jenë jashtë Kuvendit të Kosovës, madje edhe duke akuzuar kandidatët e listës së partisë së tyre se ua kanë vjedhur votat. Po këto burime bëjnë të ditur për favorizimet që i janë bërë kandidatëve të caktuar për t’i votuar ata dhe jo disa të tjerë ka zgjuar revoltë të “të vjetrit” apo te “të mëdhenjtë” e LDK-së. Kështu fakti se Arben Gashi një “autsajder” i LDK-së por një bashkëpunëtor i afërt i Isa Mustafës ka dalë i treti për nga numri i votave të fituara, pas Isa Mustafës e Sabri Hamitit, ka zgjuar një revoltë të brendshme brenda strukturave të larta të LDK-së që mbase mund të shpërthejë pas publikimit të rezultateve të përgjithshme të zgejdhejve të 12 dhjetorit.

Gjithnjë duke iu referuar burimeve të gazetës, të cilat bëjnë të ditur se Teuta Sahatqija, edhe pse është nënkryetare e LDK-së nuk ka arritur të fitojë vota të mjaftueshme për t’u bërë deputete e Kuvendit të Kosovës. Poashtu janë edhe dy emra të zyrtarëve të lartë të kësaj partie, Eqrem Kryeziu dhe Lutfi Haziri të cilët në mandatin e ardhshëm nuk do të jenë deputet. I kontaktuar nga gazeta, Eqrem Kryeziu, lidhur me këtë thotë se nuk ka informacion se a ka grumbulluar vota të mjaftueshme për të fituar një ulëse në Kuvendin e Kosovës.

(Më gjerësisht tekstin mund ta lexoni në numrin e nesërm të gazetës “Bota sot”)

[Llapi]

“DnV”: PDK prin në katër nga pesë komunat

Prishtinë, 9 janar 2011 (Kosovapress) Koha 23:41

"Demokracia në Veprim" ka publikuar rezultatet preliminare të përsëritjes së procesit zgjedhor në pesë komuna të Kosovës. Rezultatet sipas komunave janë: Deçan AAK-ja 58.63 për qind, PDK 10.58 për qind, LDK-ja 22.03 për qind. Në Skenderaj PDK 96.40 për qind, LDK 0.98 për qind, AAK 0.25 për qind. Në Drenas PDK 92.08 për qind, LDK 2.46 për qind, AAK 0.99 për qind, Vetëvendosje 0.7 për qind. Në Malishevë PDK 81.24 për qind, LDK 9.62 për qind, Vetëvendosje 4.95 për qind dhe AAK 3.05 për qind. Në Lipjan PDK 89.34 për qind, LDK 4.25 për qind, AAK 2.45 për qind dhe Vetëvendosje 1.99 për qind. Pjesëmarrja e votuesve në Skenderaj është 57.97 për qind, Drenas 57.77, Deçan 33.79, Lipjan 53.06 dhe Malishevë 36.30 për qind.