Arrogancë deri në Japoni

[master2006]

Artikull i publikuar sot (28.11.2011) ne www.koha.net

Mu duk interesant dhe mendova ta ndaj me anetaret e forumit.



Na ishte një deputete nga shteti fqinj i Shqipërisë, që me veturën private të së motrës deshi ta kalonte kufirin për të hyrë në territorin e Kosovës, pa u legjitimuar fare, për shkak se kishte pasaportë diplomatike. Meqë policët kufitarë të shtetit të Kosovës nuk mjaftoheshin me faktin se ajo, pa leje, i tejkalonte të gjitha shenjat e trafikut, e besa edhe kufirin, e ndaluan. Dhe i hëngrën plot të shara nga më të ndryshmet, dikush-dikush po thotë nga më të fëlliqurat. Për pasojë, shoqen deputete e përcollën në Gjykatën Komunale për Kundërvajtje në Prizren, ku iu shqiptua dënimi prej 250 eurosh.

Piskama shkoi në kupë të qiellit dhe duke nxituar dhe duke i paragjykuar që të gjitha, kryeministri i Kosovës e thirri kryeministrin e Shqipërisë për t’i kërkuar falje “për incidentin”, duke i fajësuar kështu, me automatizëm, policët. Intensiteti i piskamës vazhdoi aq, sa u aktivizua mekanizmi i Inspektoratit Policor që propozoi suspendimin me pagesë të policëve përderisa zhvillohen hetimet, gjë të cilën, pa një - pa dy, e zbatoi drejtori i përgjithshëm i Policisë. Kështu që tash kemi një deputete që mund të fryhet se hyn në histori si ajo që ka shkaktuar problemin e parë që përshkallëzoi në incident serioz ndërkufitar/ndërshtetëror ndërmjet Kosovës dhe Shqipërisë; një kryeministër, të Shqipërisë, të cilit kosovarët ia ushqejnë sedrën; një kryeministër, të Kosovës, që me kërkimfalje të nxituar mohon sovranitetin e Kosovës dhe katër policë, që duke kryer detyrën me përpikëri dhe duke mos pranuar që t’u shkelej dinjiteti nga dikush që nuk ka treguar të ketë as edukatë elementare, ani që bart pasaportë diplomatike – suspendohen me rrezik që të mbesin pa punë.

Në vend se të pritej përfundimi i procedurës gjyqësore (ekziston Gjykata e Lartë për Kundërvajtje – ku mund të parashtrohen ankesat nga të dy palët) e që ajo përfundimisht të përcaktojë se kush pati faj në këtë ngjarje, Kosova çohet e kërkon falje për ndalimin e dikujt që nuk ka dashur të kalonte nëpër procedurat e domosdoshme kufitare. Ajo do të duhej ta dinte më mirë se të gjithë ne, se kontrolli i rreptë ndërkufitar është kusht pa të cilin nuk bën të arrihet te liberalizimi i vizave. Për të është lehtë të na shesë mend, sepse hem ka pasaportë diplomatike, hem mund të udhëtojë pa viza që nga java e ardhshme. Për ne, pos që kemi mbetur getoja e Evropës, është vështirë që të gëlltisim ofendime, posaçërisht nga ata “që kanë mall për vendin nga i kanë rrënjët”. Shoqes deputete nuk i ka hije – dhe fakti se jemi të një rrënje nuk e bën atë superiore, në asnjë aspekt.

Shpresoj shumë se Gjykata për Kundërvajtje nuk do t’u nënshtrohet presioneve politike dhe se do ta shqyrtojë lëndën me neutralitet dhe duke u mbështetur në dëshmi. Dhe po qe se gjykata e shkallës së dytë vërteton fajësinë e deputetes arrogante, atëherë drejtori i Policisë do të duhej, fillimisht t’ua hiqte suspendimin dhe t’i shpërblente policët për profesionalizimin e treguar; kryeministri i Shqipërisë do të duhej t’i kërkonte falje homologut kosovar dhe në fund, deputetja do të duhej të dilte publikisht e t’u kërkonte falje atyre që i cilësoi “bisha” dhe të mësohet të presë në rend – mund të jetë paksa e mërzitshme, por nuk bën zarar.

E se nxitja është diçka e zakonshme te kryeministri kosovar, e dëshmoi “puna shtetërore” të cilën e kreu në ditën e diel, kur mbaheshin votimet në Rahovec. Atë ditë kur i informoi arsimtarët se qeveria të cilën ai e udhëheq po ua rriste rrogat 50 për qind. Pa specifikuar se a bruto a neto, tha se rritjet do të zbatoheshin nga 1 janari i ardhshëm, edhe pse e dinte shumë mirë që asnjë dokument buxhetor i miratuar nga qeveria e tij dhe kuvendi ku e kishte shumicën, nuk e kishte paraparë këtë mundësi. Për më tepër, kësaj radhe s’i shkoi kujt në mend ta përmendte Fondin Monetar Ndërkombëtar. Vetëm u tha se kjo diferencë do të paguhej nga grantet për komunat. Thuajse grantet bien nga Jupiteri, e jo nga buxheti i Kosovës, të cilin, sa për informim, nuk e miratoi Kuvendi para se të shpërndahej.

Kështu, u ngut me thënë “unë jam ai që ua solli krejt rritjet” (ani që me këtë thënie e pranonte se shumëkujt ia kishte rritur edhe tensionin e gjakut) – sepse i nevojiteshin votat si për Rahovecin ashtu edhe për zgjedhjet brenda dy javësh. Me këtë, shkaktoi këtë situatë: po qe se ai do të jetë mandatari i ardhshëm i qeverisë, do të detyrohet të gjejë burime të tjera për pagesë – për shembull dividendin e PTK-së apo paratë e privatizimit... në të kundërtën, do të ketë një konfrontim me FMN-në për shkak se shumë zor do t’ia dalë të mbledhë më shumë para për buxhetin, ashtu që linja e pagave të mbetet te 25-përqindëshi i kërkuar nga FMN-ja. Po qe se nuk është mandatar, do ta sjellë mandatarin/mandataren e ri/re në situatë të palakmueshme, meqë në mungesë të parave, ky/kjo do të mund të deklaronte se ky vendim është i pazbatueshëm. Që për start, do të mund të shkaktonte nisjen e qeverisjes së re me një grevë arsimtarësh, sepse ata do të konsideronin se premtimin ua dha Qeveria e Kosovës e jo Hashim Thaçi.

Shikuar kështu, ky vendim i kryeministrit është shumë parazgjedhor – ashiqare. Është evidente se pas tij është një ekip këshilltarësh që po dinë t’i shfrytëzojnë zbrazëtirat ligjore – në mungesë të Ligjit për qeverinë, që do të duhej të parashihte se çfarë vendimesh do të mund t’i merrte një qeveri në dorëheqje e çfarë jo, u proklamua vendimi i së dielës së shkuar. Ani që mbështetur në përvojat e shteteve me demokraci më të avancuar, vendimet që e prekin buxhetin, nuk janë vendime që një qeveri e tillë do të mund t’i miratonte. Dhe ani që do të mund të thuhej se fajin për mungesën e një ligji të këtillë e kanë pikërisht kjo qeveri dhe deputetët, të cilët e kanë kthyer prapa një pako të madhe të ligjeve në qeveri, për shkak se kanë qenë shumë “busy” duke u marrë me punë më të rëndësishme – me beneficionet që ua kanë siguruar vetes.

Dhe në vazhdën e premtimeve parazgjedhore erdhi një tjetër – ndërtimi i tunelit që do të na çojë në Azi. Lexues të dashur, ju me siguri nuk e dini këtë, por këtë e keni pasur ëndërr prej kohësh dhe ja që një javë para fushatës zgjedhore, po e kuptoni se çfarë ka fshehur nëndija juaj gjithë këta vjet. Rruga do të jetë 55 kilometra e gjatë dhe edhe pse nuk është përmendur çmimi, kjo rrugë ka gjasa të na kushtojë, paj nja dy miliardë euro. Plani është që rruga të jepet me koncesion, prandaj neve garant na bie hise me “hy dorëzanë” me nja gjysmë miliardi a qashtu diçka, për t’i shpronësuar tokat, që për shembull do mund të ishin ato që tash janë objekt të një gjykimi që po zhvillohet në Gjykatën e Qarkut në Prishtinë.

E mbasi ky është investimi publiko-privat, neve si planifikues të shkëlqyeshëm që jemi, do të na bjerë hisja t’i paguajmë tunelet, mbikalimet e nënkalimet, kurse investitorit privat do t’i bie hisja t’i mbledhë pagesat për mirëmbajtjen e rrugës. Për ndërtimin e rrugës do ta angazhojmë firmën e cila e ka bërë projektin dhe e cila nuk do ta publikojë kurrë kontratën, për shkak se ajo do ta realizojë ëndrrën tonë të kamotshme – që nëpërmjet të një tuneli 2,2 kilometrash, t’i afrohemi Japonisë. Eeeee, sa vizionarë i kemi premtuesit tanë zgjedhorë – kush e kishte paramenduar se një imtësi e këtillë (tunel, më!) do të na çonte aq larg (eee, në Japan!)... aty ku do të mund ta formojmë koloninë e më taze të azilkërkuesve shqiptarë... e që kështu të përmallohemi më shumë për rrënjët tona...


flaka@koha.net

[ASrock4u2]

..edhe mua m'u duk shume interesant dhe mendova t'a lexoj..
..e lexova..mendova se dicka i mungonte dhe e lexova edhe ne sajtin e gazetes..
por te me falni..nuk e kuptoj lidhjen me Japonine.

Ndoshta eshte gjeografike..qe jehona e arrogances eshte aq e madhe sa eshte degjuar ne ..Japoni..??

Nuk e dij..nuk bej dot lidhje..me Japonine.

[Duaje Siveten]

SHEKULLI, 02/12/2010

1 herë në 100 vjet apo 100 herë në vit?

A.DUSHI |
Se çfarë po ndodh në Shkodër mund të shihet fare mirë në foto apo në filmimet, por edhe mund të kuptohet nga fjalët e vetë banorëve të kësaj zone. Se sa është fajtor shteti për atë që po ndodh, mjafton të dëgjosh krerët e tij duke folur dhe duke shpjeguar se sa të aftë kanë qenë për të shmangur një situatë të tillë që ka nisur që prej 2 janarit të këtij viti dhe që ende vijon.

Më 13 janar të këtij viti, në mbledhjen e zhvilluar në Shkodër dhe në takimet e tij me banorët e zonave të përmbytura, kryeministri Berisha theksoi:

Situatën e paprecedentë

- Edhe një herë dua t'i rikthehem përmasave të motit, të cilin të gjithë observatorët më seriozë të vëzhgimit të motit dhe përmbytjeve, cilësuan si shkak reshjet e mëdha, cilësuan si intensitet, atë të shkallës së dytë që përsëritet më rrallë se 1 herë në 100 vite.
- Reshjet e papara dhe shkrirja në janar në 24 orë e borës së të gjithë masivit të Alpeve, krijoi një situatë të paprecedentë.

Ndihmën për çdo banor

- Pra, u ndala në këto raste për të treguar se pasojat janë të thella, por unë jam sot në Shkodër, bashkë me qeverinë, për të garantuar çdo qytetar të këtij rrethi dhe këtij qyteti, se qeveria do të zhdëmtojë dhe askërkujt nuk duhet t'i rëndojë dhimbja e mallit të dëmtuar, sepse ne do ta kompensojmë atë një për një.Për ne rëndësi vendimtare ka shpëtimi i i jetëve njerëzore dhe, mundësisht, gjësë së gjallë.

Programet pas kalimit të situatës

- I parë dhe kryesor është operacioni i shpëtimit dhe ndihmës, por secila ministri, në kuadrin e emergjencës, duhet të bëjë me shpejtësi programet e planet e post emergjencës. Të mos harrojmë se kjo zonë nuk është shkretëtirë, por një nga zonat më pjellore, më të pasura të tokës shqiptare dhe ka një rëndësi të jashtëzakonshme rehabilitimi tërësor i saj, infrastruktura e gjithanshme, shkollat, qendrat shëndetësore, rrugët, kanalizimet çdo gjë.

Thellimin e lumit Bunë

- Dhe ne do të bëjmë gjithçka, si me thellimin e Bunës, një projekt ndër më të kushtueshmit dhe më madhështorët për vendin; me by-passin që nuk do të jetë më një rrugë e zakonshme, por do të jetë një argjinaturë e ngritur për t'ju mbrojtur nga liqeni dhe çdo gjë tjetër, që ujërat të jenë mrekullia e Shkodrës dhe të mos shndërrohen në përmbytje dhe fatkeqësi

Ngritjen e argjinaturave

- Duhet të studiojmë edhe njëherë argjinaturën e Dajçit që është më kryesorja, të Anës Malit, të Obotit dhe kudo, sikundër një studim urbanistik duhet të bëhet, ku të përcaktohet se nuk duhet të ndërtohet aty ku rreziku është i madh. Të shihen të gjitha këto së bashku dhe ta shndërrojmë këtë fatkeqësi natyrore në sfida të mëdha për të zgjidhur.

Mashtrimin që i është bërë Shkodrës

- Shkodra ka një shpirt të pamposhtur dhe thelbi i shpirtit të saj qëndron në një raport të vetëm dhe kryesor të njeriut të qytetëruar dhe ky është raporti me të vërtetën. Ata që duan t'i servirin Shkodrës trillime dhe mashtrime, duhet ta dinë se qyteti ka një epitet për ta "sherr budallë"

Në mbledhjen e zhvilluar në Shkodër më 30 nëntor 2010, kryeministri Berisha theksoi:
Herën e parë në histori që Valbona del jashtë parashikimeve
- E vërteta është se prurjet e Alpeve tejkaluan çdo lloj parashikimi, pasi Valbona, nuk ka pasur ndonjëherë në histori prurje prej 1500 m3 kub në sekondë dhe pastaj këto masa kanë qenë prurje të lumenjve të tjerë, Kiri po kështu nga ana e tij. Kësaj here ishte liqeni me burimet dhe prurjet që vazhdoi rritjen pandërprerë të nivelit.

Fuqia e shtetit për evakuim

- Parashikimet sinoptike, ashtu siç i ndiqni vetë nuk janë dhe aq të favorshme, por ne kemi mundësi të plotë të kalojmë pasojat e ujërave të shumta që mund të shtohen gjatë ditëve që vijnë dhe që në fakt nuk janë të pakta sepse edhe sot lumenjtë e Alpeve, nga Valbona deri në Përroin e Thatë janë në rritje të ndjeshme, duke shtuar edhe Drinin, por i kemi të gjitha kushtet, forcat e rendit, forcat e ushtrisë, forcat e emergjencës civile, duke nxjerrë këtu të gjitha ekipimet e nevojshme, automjetet, varkat, transformatorët, pompat të instalohen dhe kalojnë të gjitha në gatishmëri.

Askush nuk do të ndihet i braktisu

r

- Ndërkohë, Shkodra problematikën e madhe e ka në Nënshkodër, por dhe në zona të tjera që përballen me vështirësi serioze. Duke ardhur këtu nga Boga më vjen një mesazh. "Jemi në një situatë shumë të vështirë" ndaj dhe ne duhet të jemi të gatshëm që aty ku është emergjenca, aty të jemi edhe ne. Nuk mund që askush të ndihet i braktisur në këtë situatë, përkundrazi i kemi të gjitha mundësitë që t'i gjendemi çdo familjeje, kudo që ndodhet ajo dhe ta ndihmojmë.

Më 1 dhjetor 2010 kryeparlamentarja Topalli theksoi në Shkodër:
Fryrja e liqenit, si asnjëherë tjetër

Prej dy muajsh ka një shi që nuk pushon ditë e natë. Jemi në kushtet e fryrjes së liqenit të Shkodrës si asnjëherë tjetër, edhe në krahasim me një vit më parë. Jemi në kushtet e çmendurive të lumenjve, që rrethojnë qytetin e Shkodrës.

Asnjë qytet tjetër, asnjë pjesë e rajonit të Ballkanit si pjesa e Shkodrës nuk është e vendosur në mënyrë të tillë, që të gjitha shkarkimet nga gjysma e Ballkanit të derdhen në këtë pjesë të basenit të Shkodrës.
Kjo është historia e Shkodrës

Me sa duket kjo kohë do të vazhdojë, dhe ne duhet të jemi të përgatitur pasi kjo situatë e rënduar do të vazhdojë edhe për një kohë të caktuar. Kjo situatë ka ndodhur gjithmonë në Shkodër, kjo është historia jonë. Shteti është në këmbë për të mbështetur me të gjitha nevojat familjet në vështirësi, në komunat në vështirësi