Babai më guximtar në botë
15/11/2010
34-vjeçari britanik, Craig Le Sauvage, do të martohet me gruan që ai dashuron, edhe pse ajo ka 15 fëmijë nga martesa e mëparshme. Pak rëndësi ka, ai është i dashuruar kokë e këmbë me të
Gazetat britanike e kanë cilësuar si njeriu më kurajoz i Britanisë së Madhe, për shkak të zgjedhjes për t’u lidhur me një grua të divorcuar me 15 fëmijë. Shumë mendojnë se Craig është njeriu më guximtar në botë, të tjerë se është më i dashuruari. Megjithatë Craig Le Sauvage, 34 vjeç, koordinator i një qendre për kohën e lirë, nuk duket se i trembet kësaj sfide. Shoqja e tij, Joanne Watson, 39 vjeçe, tregon se është gruaja më e lumtur që mund të jetë mbi tokë. Mes të tjerave, falë Craig do të bëhet mama për herë të 16. Çifti, në fakt, pret një fëmijë që duhet të lindë pas 14 javësh, edhe pse look-u perfekt i zonjës nuk të lë përshtypje fare se ajo është bërë nënë 16 herë. Edhe në të kaluarën, kjo grua kishte qenë pjesë e mediave britanike për shkak të frekuentimit aq shumë të shpeshtë të maternitetit. Në Britani ajo njihet edhe me nofkën “supermamaja”.
Njohja
Ata njihen prej 15 vjetësh, duke qenë se kanë qenë fqinjë me njëri-tjetrin. Por dashuria mes të dyve lindi disa muaj më parë, në atë që sipas tyre nisi si një flirt veror. Ishte data 28 qershor kur gruaja vendosi të ndryshonte statusin e saj në rrjetin social “Facebook”, duke kaluar nga singëll në “in a relationship”. Kur gruaja hapi profilin e saj në “Facebook”, ishte e ndarë prej të paktën një viti. “Jam nëna e 15 fëmijëve dhe tani jam në kërkim të një burri ose të një miku të ri”, shkruante ajo.
Ndryshimet në jetë
U tha, u bë. Miqësia me Craig nisi të forcohej çdo ditë e më shumë, deri sa u bë një lidhje e qëndrueshme. “Është vërtet argëtuese se si ndonjëherë, jeta të vë përpara zgjedhjeve që ti kurrë nuk i ke menduar. Kështu rashë sërish në dashuri, me një njeri të cilin e kam pasur fqinjë për 15 vjet me radhë. Kjo më bën për të qeshur. Tani jam në javën e 15 me fëmijën e tij dhe do të bëhem nënë për herë të 16”, tregonte ajo po përmes postimeve të lëna në “Facebook”. E në fakt Joanne mezi po priste të dinte nëse fëmija i 16 që do të lindte, do të ishte vajzë apo djalë. “Mezi po pres të bëj ekografinë për të njohur seksin e fëmijës sonë”, tregon ajo. Me pak fjalë, historia e saj të ngjason me atë të një telenovele, ku çdo njeri mund të ndjekë serinë pasardhëse në internet. Joanne, Craig dhe pesëmbëdhjetë fëmijët, nga të cilët nëntë vajza që ngjasojnë shumë me njëra-tjetrën dhe gjashtë djem janë treguar gjithmonë të gatshëm për t’u fotografuar dhe intervistuar nga media të ndryshme vendase dhe jo vetëm. Interesi i medias ka qenë me të vërtetë i madh.
Supermamaja dhe superbabai
Joanne, nga ana tjetër, mund të jetë dëshmitarja më e mirë për ndonjë organizatë pro jetës: “Nuk e ndiej veten aspak ndryshe kur jam shtatzënë. Unë e dua shumë trupin tim kur jam shtatzënë, sepse më jep energji”, tregon gruaja 39-vjeçare për tabloidin britanik “Daily Mail”. E në fakt, nuk ka si të jetë ndryshe për të, duke qenë se kujdesi për familjen nënkupton vënien e 56 lavatriçeve në javë dhe përgatitjen e të paktën 35 vakteve për ata që shkojnë në shkollë. Mosha e fëmijëve shkon nga 2 vjeç, e cila është Indianna, e lindur në kohën kur gruaja e kishte ndërprerë marrëdhënien e saj me ish-bashkëshortin kur ishte në muajin shtatë të shtatzënisë, deri në 21 vjeç, që është vajza e madhe, Natasha. Jo më kot shumë i kanë ngjitur nofkën, supermamaja. Në të njëjtën mënyrë, tani edhe Craig duhet të bëhet një superbaba dhe një supergjysh, duke qenë se dy vajzat e mëdha dhe djali i Joanne kanë edhe nga një fëmijë. Ai është gati për t’i hyrë kësaj sfide dhe si një i krishterë i mirë beson në vlerat e familjes dhe të kishës. Për këtë arsye, ka vendosur të jetojë në shtëpinë e gruas që do, vetëm pasi të ketë bërë martesën me Joanne. Për momentin, data nuk është vendosur ende.
shqip
Përgjigju Duke Cituar
Krijoni Kontakt