Deputetët rregullojnë me ligj privilegjet për vete
Kuvendi i Kosovës ka miratuar muaj më parë Ligjin për të drejtat dhe përgjegjësitë e deputetit. Ligji rregullon të drejtat, përgjegjësitë, imunitetin dhe kompensimin e deputetit të Kuvendit të Kosovës para, gjatë dhe pas mandatit të tij.
Ky ligj është kritikuar nga shoqëria civile, por deputetët theksojnë se edhe Kosova duhet ta ketë ligjin për deputetët.
Deputetët e legjislaturës së tretë të Kuvendit të Kosovës kanë miratuar ligjin për të drejtat dhe përgjegjësitë e deputetit, i cili pritet të hyjë në fuqi në janar të vitit të ardhshëm.
Me gjithë kritikat e shumta, ligji është miratuar me shumicë votash nga të gjitha partitë politike, si nga pozita ashtu edhe nga opozita. Ligji u jep të drejta të shumta deputetëve gjatë mandatit të tyre, por edhe pasi të përfundojnë mandatin dhe pensionohen.
Deputetja, Suzane Novobërdaliu, thotë për Radio Blue Sky se miratimi i ligjit ka qenë obligim, për arsye se, si i tillë, ekziston në të gjitha shtetet. Ajo thekson se ligji për deputetët nuk u jep shumë privilegje deputetëve ashtu siç pretendohet.
Ndërkaq, analisti Behlul Beqaj thotë se ligji për deputetët i ka bashkuar deputetët e pozitës dhe opozitës për shkak se aty është vendosur për përmirësimin e pozitës së tyre materiale. Beqaj thekson se kjo është arsye që në legjislaturën e re duhet të ndryshohet pozita e deputetëve dhe ata duhet të jenë në shërbim të interesit publik, dhe jo atij personal.
Me këtë ligj, deputeti, gjatë ushtrimit të mandatit të tij, ka të drejtë kompensimi për pagën bazë, kompensim për pjesëmarrje në seanca dhe takime të komisioneve, si dhe kompensim për funksionet parlamentare. Deputeti gëzon edhe të drejtën për pensionin suplementar, nëse detyrën e deputetit e ka ushtruar së paku një mandat dhe e ka mbushur moshën pesëdhjetepesë (55) vjeçare.
Përgjigju Duke Cituar
Krijoni Kontakt