Greqia heq pensionet në Shqipëri
Sipas këtij vendimi, bëhet pothuaj e vështirë që minoritarët grekë në Shqipëri të përfitojnë pensionet që kanë marrë ndër vite, duke filluar nga 250 deri në 480 euro. Qeveria e Papandreut, e ndodhur në kushte të vështira për të menaxhuar financat e shtetit, është detyruar të ndërpresë mbështetjen financiare me pensione.
Vendimi
Vendimi i Institutit përkatës OGA, i cili ka nisur zbatimin nga data 1 nëntor e këtij viti, përcakton që minoritarët grekë në Shqipëri nuk mund të tërheqin më pensionin e tyre me prokurë, siç kanë bërë deri tani. Sipas vendimit, minoritari duhet të jetë banor në shtetin grek dhe nëse nuk paraqitet në 10 ditët e para të muajit, pensioni i digjet dhe nuk i jepet. Deri më sot, pensionistët minoritarë, që mendohet të jenë rreth 25 mijë përfitues, përcaktonin një person me prokurë, i cili u tërhiqte paratë në zyrat përkatëse të pensionit. Por vendimi i OGA-s përcakton se nuk do të jepet më pension me prokurë dhe se pensionisti duhet të paraqitet personalisht brenda 10 ditëve të para të muajit në zyrat përkatëse në Greqi, për të marrë pensionin. Kjo e bën pothuaj të pamundur tërheqjen e pensionit nga minoritarët, pasi u duhet të udhëtojnë çdo muaj për në Greqi. Në rast se minoritarët përfitues nuk shkojnë të tërheqin pensionin, atëherë ai digjet dhe nuk u jepet. Ky vendim pritet të bllokojë në mënyrë masive dhënien e pensioneve për minoritarët shqiptarë. Arsyeja mbetet kriza greke financiare, e cila është detyruar të ndërpresë praktikën e shpërblimit me pensione ekstra për minoritarët grekë në Shqipëri, e cila shpesh ka pasur akuza se janë përdorur për të rritur numrin artificialisht të minoritarëve në Shqipëri. Vendimi i OGA-s i është shpërndarë të gjitha prefekturave në Greqi dhe u është bërë me dije edhe punonjësve të zyrave të shpërndarjes së pensioneve. "Ju lutem të vini në dijeni të gjitha degët e zyrave të shpërndarjes së pensioneve dhe zyrës së postave për zbatimin e këtij urdhri", thuhet në vendim, me firmën e drejtorit të OGA-s, Stefanos Rizos. Ky udhëzim bën të pamundur që minoritarët të përfitojnë pensionin nga shteti helen, siç e kanë përfituar të paktën këto 15 vitet e fundit.
Rregullat e reja
Tashmë, në bazë të rregullave të reja, pensionistët minoritarë duhet të paraqesin edhe dokumente që vërtetojnë banimin e tyre të përhershëm në vendin fqinj. Këto dokumente mungojnë për një pjesë të mirë të minoritarëve grekë në Shqipëri. Përveç procedurës, minoritarët duhet të plotësojnë edhe një mori dokumentesh. Atyre u duhet të dorëzojnë vërtetimin e kombësisë greke. Më tej duhet pajisja me kartë të homogjenit, deklaratë e autoriteteve tatimore greke nga aplikuesit e rinj. Përfituesit e deritanishëm duhet të paraqiten edhe me shumë dokumente të tjera, që vërtetojnë se përfituesi është me banim të përhershëm në Greqi, se ka një banesë apo një kontratë qiraje, se paguan taksat dhe detyrimet e tjera që paguan një qytetar grek. Kriza ekomomike në shtetin fqinj duket se e ka detyruar Greqinë të jetë më dorështrënguar me minoritetin etnik në Shqipëri.
--------------------------------------------------------------------------------
Pensioni, jo më shumë se 1 për familje
Në fillim të vitit 2010, kur shteti grek ndodhej në mes të krizës financiare, Instituti i Sigurimeve Shoqërore që mbulon të punësuarit në bujqësi dhe minoritarët grekë në Shqipëri, OGA, mori një tjetër vendim. Sipas këtij vendimi, në një familje minoritarësh që përfitoheshin disa pensione, do të kishte shkurtime, duke bërë që vetëm 1 person në familje të merrte pension. Në rast se në familje kishte një çift përfituesish, pensioni do të hiqej për njërin prej tyre dhe do të mbetej vetëm pensioni më i lartë për njërin prej bashkëshortëve. Reduktimi i këtyre pensioneve është cilësuar si një barkë shpëtimi për qeverinë greke dhe financat e saj, sipas analistëve financiarë grekë. Mediat në Greqi shkruajnë se përfituesit e pensioneve do të jenë të goditurit e parë, për shkak se qeveria greke duhet të ulë në masë drastike për shpërblime, nën kushtet e presionit të ndërkombëtarëve. Shkurtimi i shpenzimeve buxhetore preku menjëherë mijëra qytetarë shqiptarë me kombësi greke, por edhe shumë shqiptarë të tjerë, që mendohet se përfitojnë nga këto pensione, duke marrë statusin e homogjenit në mënyrë abuzive e politike. Nga skema suplementare e pensioneve, e praktikuar nga Banka Bujqësore Greke, një pension, i cili sipas rastit varion nga 250-480 euro në muaj, mendohet të jetë dhënë edhe për shumë shqiptarë të konsideruar si minoritarë.
--------------------------------------------------------------------------------
10 ditë afat për pensionin
Sipas rregullave të reja, nëse pensioni nuk tërhiqet brenda 10 ditëve nga fillimi i muajit, atëherë ai digjet, çka do të thotë se minoritarët grekë të Shqipërisë do të humbasin mundësinë e marrjes së pensionit nëse nuk shkojnë çdo muaj në zyrat e OGA-së, gjithnjë të shoqëruar me dokumente zyrtare, të cilat vërtetojnë se ata janë banorë të përhershëm të shtetit grek dhe se nuk banojnë në Shqipëri
--------------------------------------------------------------------------------
Greqia, nën presion për uljen e pensioneve
Shteti grek është ndodhur nën presion të thellë nga Bashkimi Europian dhe organizatat e tjera ndërkombëtare financiare, për uljen e shpenzimeve. Mes tyre, shteti u detyrua të ulë pagat dhe pensionet për të gjithë administratën e lartë, ushtrinë, por edhe pensionet që konsiderohen si të larta. Greqia është ndër të paktat vende që ka edhe pagë të 14-të për punonjësit e vet, si dhe pushime të stërzgjatura. Sipas të dhënave të një gazete greke, që i referohet gazetës prestigjioze "Financial Times", gjatë dekadës së fundit kostoja e punës për njësi prodhimi në ekonominë greke është rritur me 40 për qind dhe për këtë shkak nga ekspertët perëndimorë zgjidhja kryesore e krizës financiare në Greqi mund të vijë vetëm nga ulja e pagave, pensioneve dhe shpërblimeve suplementare, të cilat kapin shifra katastrofike.
Panorama
Përgjigju Duke Cituar
Postuar më parë nga Luli X
Krijoni Kontakt