Një yll si Alketa Vejsiu

[fighterme]

Një yll si Alketa Vejsiu

Share

Si shkrimtar i satirës, shqisat, formimi e pastaj frymëzimi më irritohen gjithnjë nga e padrejta, absurdi, dhe e shëmtuara. Sepse i urrej. E dua të bukurën, të drejtën, normalen. Në art, në jetën sociale dhe në politikë. Dhe kur nuk i gjej, nxjerr armën artistike, satirën. Për të ruajtur dhe zgjeruar shëndetshëm të bukurën, është krijuar kjo gjini e letërsisë. Midis marrëzisë dhe mizerabilitetit, për fat ka edhe disa vlera njerëzore, artistike që të kthejnë buzëqeshjen e besimin tek jeta. Ndonëse të rralla, këto duken si ai fari buzë detit, që të kthen shpresën. Midis tyre më ka tërhequr një femër.

Artiste e vërtetë.Është një zonjushë, apo zonjë e re, që sa herë e shikoj në ekran më bën të harroj krejtësisht këndvështrimin tim kritik mbi jetën dhe shoqërinë. Ose më saktë, tek figura e saj gjej të mishëruar të kundërtat e atyre që shkruaj në librat e mi satirikë. Nëse ky vend do të kishte më shumë njerëz publik të tillë, kjo jetë do të niste seriozisht rrugën e përmirësimit. Talentet që rrezatojnë vlera, kulturë, mençuri, emancipim, janë si ai diamanti në majën e matrapikut, i detyruar të depërtojë në tunelin e errët të mendjes të një shoqërie për të na sjellë pak dritë.Atë e njohin të gjithë, sepse një ose dy herë në vit drejton spektaklet e Vera Grabockës. Dalja e saj, e folura, prezantimi, komentet që bën, paraqitja, janë vlerë më vete brenda vlerës së programit. Alketa Vejsiu quhet. Është nga ato moderatore që më impresionon, më ngjall të bukurën, të mençurën. Edhe kur pas saj në skenë, mund të dalë një artist që nuk të përcjell emocion dhe bukuri artistike, ngushëllohesh se pas tij do të kesh fatin të shohësh sërish Alketën. Dhe nuk të zhgënjen. E saktë, e mençur, delikate, e natyrshme. Plot formim klasik dhe modern, kjo vajzë e mrekullueshme përcjell ngrohtësi, shplodhje të syve dhe relaks shpirtëror. Vini re si flet. Asnjë pozë për të na treguar se unë jam e bukur, jam e mençur, kam dalë në ekran… Asnjë nga këto. Ajo thjeshtë bën një punë. Një punë artistike që na e përcjell artistikisht në mënyrë të mrekullueshme. E përgjegjshme për atë që ka marrë përsipër. Respekt për programin që drejton, për regjizoren, për televizionin, dhe veçanërisht e respektueshme me shikuesit e saj.Në profesionin e Alketës ka plot vajza. Por jo si ajo. Sepse ato kanë një tjetër synim. Vetëm të duken, duke na u treguar gjoja të bukura, gjoja të mençura, gjoja të afta, gjoja artiste. Përfundimi? Qesharake. Por Alketa Vejsiu, nuk është e mirë pse konkuron në një treg me ta. Ajo, edhe nëse do të kishte patur fatin të drejtonte në skenat dhe ekranet europiane, midis të mirave do të ishte më e mira. E ky nuk do të ishte vetëm fati i saj. Por edhe i yni.Elegante, me sharm thellësisht femëror, e sjellshme dhe e ngrohtë, Vejsiu është padyshim ylli më i bukur i ekraneve tona. Natyra i dha bukurinë dhe vullneti zgjuarsinë. Me këto cilësi ajo mjeshtërisht na shfaqet, herë si ikonë e viteve `40 e `60, e herë si e viteve 2000, apo e ditëve të sotme. Gjithnjë e pranueshme dhe e pëlqyeshme.Është hera e parë që shkruaj seriozisht e pa sarkazëm, fjalën e rrallë dhe të merituar, yll. Por kjo vajzë e meriton. Me informacionin e bollshëm, kulturën e komunikimit, buzëqeshjen e ëmbël, Alketa është aperitivi i mbrëmjeve para gjumit. Për fat të keq, e rrallë dhe e veçantë. Gjetja dhe stacionimi i regjizores Vera Grabocka tek kjo vajzë shumë e talentuar, meriton një përgëzim të veçantë. Ashtu siç ka sjellë spektakle të papërsëritshëm, ajo nxorri dhe i besoi Vejsiut gjithë punën e saj. Realizon deri në perfeksion punën regjizoriale të fshehur pas kamerave, gjithçka të shkruar në skenar apo të improvizuar, na përcillen mjeshtërisht nga Alketa. Grabocka, besoj se mbetet e kënaqur me performancën e bukuroshes së ekranit. Puna e saj, është Alketa Vejsiu që përcjell përkushtimin maksimal të regjizores. Nëse do të njihni cilësinë e regjizorit, shikoni moderatorin e tij. Shumë e talentuara ka kërkuar dhe gjetur shumë të talentuarën. Shikoni Alketën të bindeni në shijet dhe kërkesat e Vera Grabockës.Prej vitesh ndjek me admirim këtë prezantuese dhe gjithnjë më le pa fjalë. Vazhdimisht e talentuar, e bukur, e saktë dhe e ngrohtë. Edhe kur i shpëton një pikë loti, ajo bëhet më e bukur, më emocionuese, më frymëzuese. Thuhet se kukullat nuk kanë shumë mend. Ndërsa Alketa është një kukull shumë e mençur, me kulturë dhe tepër e thjeshtë.
Duhet theksuar se, atje ku ekzistojnë, e bukura, e mira dhe e përsosura artistikisht, kanë nevojë për vlerësim. Pse nuk ndodh gjithnjë? Xhelozi? Padyshim. Kjo ndjenjë e ulët që zotëron njerëzit e artit, i detyron të pohojnë ndryshe nga çfarë shikojnë dhe ndjejnë. Të thuash të vërtetën mbi një talent të spikatur, nuk është se i bën nder atij. Nderi është për turmat që kanë nevojë të marrin dhe shijojnë shumëfish talentin që zotëron. Artistit, thjeshtë, i bëhet qejfi dhe nxitet për më shumë.E keni vënë re si Alketa Vejsiu u drejton pyetje të ftuarve? Sa me elegancë dhe njerëzishëm komunikon me ta? Asnjëherë pyetje të gjata që kanë brenda përgjigjen dhe opinionin e prezantueses, e cila detyron çdo të ftuar të përgjigjet pastaj vetëm me një “po” ose “jo” të ftohtë! Pas gjithë këtyre cilësive, unë shoh një femër të përgatitur, me kulturë dhe botë të pasur shpirtërore. Por jo vetëm unë. Veprimtaria e saj artistike më bind se sa artiste është ajo në të vërtetë. Në gojën e Vejsiut bindesh se gjuha shqipe është e bukur dhe tepër melodioze. E pagabueshme dhe pa asnjë shtirje artificiale, ajo të bën të ndjehesh krenar dhe të frymëzon +-artistikisht. Prezantuese që di të kërcejë bukur dhe me delikatesë, këngëtare profesioniste që performon mrekullisht në videoklipe, njohëse dhe komunikuese e rrjedhshme në disa gjuhë, Vejsiu meriton titullin ikonë e ekranit shqiptar.Tek “Dancing with the stars” Alketa është mishërimi i ëmbëlsisë, komunikimit dhe saktësisë. Të vjen keq që këtij programi kaq të dashur dhe të bukur po i vjen fundi. Të vjen keq që ky apo ai artist po eleminohet nga gara. Por me diçka tjetër ngushëllohesh. Se yllin Alketa Vejsiu, do ta kemi deri në fund të këtij eventi. Me shpresën se në një tjetër mrekulli të Vera Grabockës, do të na mrekullojë edhe Alketa.I ftuari i radhës do të ndjejë ngrohtësi dhe saktësi nga prezantimi i saj. Askush nuk është vënë në siklet, sepse ajo nuk thotë asnjë fjalë apo mendim që nuk i shkon atij ambienti apo të ftuari. Asgjë e tepërt nuk rrjedh nga ajo. Vetëm ato që duhen, dhe pa skenar në duar apo me ndihmën e skaletës së programit. Vejsiu nuk ngec asnjëherë. Nuk kërkon ndihmën e regjisë për të dalë nga situata. Ka kujtesë të mrekullueshme, tekst të pjekur për të gjitha mendjet, shijet, moshat e sekset. Ajo reagon bukur dhe gati sfiduese kur has banalitete. E qeshur dhe komunikuese i përbuz me fisnikëri sjelljet që nuk i shkojnë cilësisë së programit apo vlerave të saj artistike. Improvizuese e shkëlqyer ku nuk dallon dot nëse kjo pjesë apo fjali ishin në skenar apo jo.Duke shkruar këto radhë për Alketa Vejsiun, bëra një përjashtim nga natyra ime satirike. Ose më saktë, më detyroi aftësia dhe magjia e saj. Atë që dëshiroj por nuk e gjej dhe e satirizoj në çdo faqe libri, tek Vejsiu prezantuese më shfaqet e plotë dhe e shëndetshme. Prandaj i shkruajta këto radhë. Është mirënjohja ime për të dhe krenaria që më jep si spektator i saj. Është falenderimi më i sinqertë kur këtë e bën një satirik. Shumë rrallë, por plotësisht të merituar. Duke shkruar për Alketën prezantuese, kam respektuar gjithë prezantueset e mençura të ekranit ose jo, që ka kjo tokë.
Në fund dua të siguroj cilësinë e ekraneve tona, Vejsiu se, fjalët e mia nuk do ta marrin më sysh. Ato vetëm mund të ndihmojnë edhe të tjerë ta shikojnë e vlerësojnë me këtë sy. Ata që dinë të shkruajnë dhe nuk i ka mbuluar verbëria e xhelozisë. Që Alketa Vejsiu të mos mbesë vetëm. Për të mirën tonë.