Prof. Dr. Isa Mustafa zgjidhet kryetar i LDK-së

[fattlumi]

Prishtinë, 21 nëntor - Kryetari i Lidhjes Demokratike të Kosovës, Isa Mustafa reagon ndaj deklaratave të Ukë Rugovës bërë në media. Mustafa konteston deklarimet e Rugovës se oferta e tij ka qenë jo serioze.
“Është shumë serioze t`i ofrohet dikujt pozita e deputetit”, ka thënë Mustafa. Gjithashtu ka kundërshtuar thënien e Ukë Rugovës se LDK nuk është reformuar, raporton RTK. Sipas Mustafës 50% e kryesisë së LDK-së janë njerëz të cilët nuk kanë qenë pjesë e kryesisë më parë, ndërsa ka shtuar se pjesa e mbetur nga kryesia e vjetër nuk ka mundur të hiqet, sepse janë njerëz që udhëheqin degët e LDK-së. Isa Mustafa ka thënë se nuk ka pas asnjëherë qëllim të bëjë revulucion, që do të nënkuptonte shuarjen e LDK-së së vjetër dhe krijimin e një LDK-je të re. Ai ka thënë se LDK tani do të tregohet si forcë e rëndësishme politike në Kosovë, duke ruajtur frymën rugoviane. Ai ka paralajmëruar se LDK do t`i nënshtrohet një procesi të reformave të brendshme.

koha.net

----------------------------
Mustafa: Oferta jonë ka qenë shumë serioze

Derisa djali i presidentit të ndjerë Ibrahim Rugova, Ukë Rugova vazhdon të konsideroj se ka qenë jo serioze oferta e kryetarit aktual të LDK-së, Isa Mustafa, ky i fundit ripërsëriti se oferta e tij për Ukën ka qenë serioze.

Ukë Rugova vazhdon të konsideroj se kryetari aktual i LDK-së, Isa Mustafa i ka bërë ofertë jo serioze për të hyrë në strukturat e partisë dhe për më shumë Mustafën e sheh si peng të strukturave të vjetra të LDK-së.

Lidhur me këto ka reaguar Isa Mustafa, i cili tha se oferta për të qenë deputet është serioze dhe se reformat në LDK vërehen qysh në kryesi, ku ka një ndryshim të madh nga përbërja e kaluar.

"Konsideroj se oferta jonë ka qenë shumë serioze, sepse është mjaft serioze oferta për deputet të Kuvendit të Kosovës dhe e dyta kryesia e partisë prej 50 për qind, pra prej 23 anëtarëve 12 janë të rinj, që nuk kanë qenë përpara në kryesi dhe kemi edhe njerëz të moshës së re", tha ai.

Sipas tij, kjo është reforma në LDK dhe se pjesa e mbetur nga kryesia e vjetër nuk ka mundur të hiqet, sepse janë njerëz që udhëheqin degët e LDK-së dhe pëlqehen nga anëtarësia.

Mustafa ka thënë se nuk ka pas asnjëherë qëllim të bëjë revolucion, që do të nënkuptonte shuarjen e LDK-së së vjetër dhe krijimin e një LDK-je me struktura të reja.

"Ne vetëm po të kishim bërë revolucion, se ndryshe do të kishte qenë dashur të shuajmë krejtësisht strukturat e LDK-së për të bërë një LDK të re. Unë atë nuk e kam koncept, por unë e kam konceptin e ruajtjes së substancës, ruajtjes së trashëgimisë rugoviane të LDK-së dhe udhëheqjes së politikave pragmatike...", ka thënë Mustafa.

Sidoqoftë Mustafa ka paralajmëruar se LDK do t`i nënshtrohet një procesi të reformave të brendshme edhe pas mbajtjes së zgjedhjeve të përgjithshme, ku për bazë do të merret edhe rezultati që do të dal nga zgjedhjet.

Ndërkaq kryetari i LDK-së e ka quajtur si pjesë të fushatë vendimin e kryeministrit Hashim Thaçi për të rritur pagat e mësimdhënëse nga 1 janari i vitit të ardhshëm prej 50 për qind.

bota sot

[fattlumi]

Mustafa: Jap dorëheqje, nëse nuk rritet LDK-ja

Prishtinë, 25 nëntor – Dorëheqjen dhe rrëzimin e Qeverisë i ka përmendur të mërkurën Isa Mustafa. Të parën ka thënë se do ta bënte sikur nuk do t’ia rriste votat e LDK-së partisë, në krye të së cilës është vënë dy javë më parë, kurse të dytën në rast se partia e tij do të mbetej në opozitë dhe do ta konsideronte qeverisjen jofunksionale.

Në një intervistë dhënë “Kohës Ditore”, Mustafa ka folur për ndryshimet që ka bërë në LDK dhe për balancën midis gjeneratave që mëton ta krijojë pa dridhje e trazira. Ka folur edhe për mosbesimin për të qeverisur që ka në ish-ministrat, të cilët i ka dhënë deri tash LDK-ja. Ka premtuar njerëz të rinj e të painkriminuar në resorë ekzekutivë, në rast se LDK-ja del e para në zgjedhje. Por në rast se mbetet pas PDK-së, ai është treguar i gatshëm që ta lërë partinë për herë të parë në historikun e saj në opozitë. Kjo, ngaqë i ka vënë “vijë të kuqe” partneritetit qeverisës me partinë e Hashim Thaçit. Mustafa nuk e ndien veten shkaktar të afrimit të Bujar Bukoshit dhe Ukë Rugovës me partinë e Ramush Haradinajt. Tregon se i ka thënë shefit të dikurshëm të tij se lufta për reforma duhet të zhvillohet brenda partisë, e jo jashtë saj. Kurse për djalin e presidentit, Ibrahim Rugova, ai është i sigurt se i ka dalë hakut. Ka shpjeguar se i ka ofruar vend në listë për deputet, edhe pse në parim nuk ka pasur nevojë ta bënte një gjë të tillë. I pari i LDK-së vazhdon të ketë respekt për pararendësin e tij, Fatmir Sejdiu, dhe nuk e përjashton mundësinë që t’i kërkojë falje nëse nuk arrin t’ia sjellë partisë një votë më shumë se në zgjedhjet e vitit 2007. Ai befasohet se si sot askush nuk e akuzon Jakup Krasniqin se po e shkel Kushtetutën, duke kryer aktivitete partiake në cilësinë e ushtruesit të detyrës së presidentit, po aq sa nuk e akuzon askush kryeministrin në dorëheqje, Hashim Thaçi, që e ka kthyer në punë ish-kryetarin e Rahovecit, 45 ditë pas dorëheqjes së tij. Mustafa është treguar i gatshëm që ta lërë postin e kryetarit të Komunës së Prishtinës, vetëm në rast se partia konsideron se ai duhet të bëhet kryeministër.
Ka thënë se nuk do të vepronte njësoj për postin e deputetit. Ai nuk e ka përjashtuar mundësinë që dikush tjetër nga LDK-ja të mund ta marrë drejtimin e Qeverisë, por është shprehur kategorik që postin e kryeministrit të mos ia lërë ndonjë partie tjetër.

Për ndryshimet në LDK-ja nga dita kur ka ardhur në krye të partisë,

Mustafa tha se në pikëpamje të organizimit ka ndryshime, të cilat i konsideroj të mëdha, sepse ka mjaft ndryshime në Këshillin Qendror të LDK-së, diku në bazë të evidencës sonë janë mbi 60 për qind njerëz që nuk kanë qenë përpara në Këshillin Qendror, prej 107-ve. Në listën për deputetë po ashtu ka ndryshime. Rreth 70 për qind janë njerëz të rinj.
Sipas Mustafës, ka edhe ndryshime cilësore. Do të ishte iluzion të mendohej që për katër ditë, prej 7 nëntorit, kur është mbajtur Kuvendi, deri më 11 nëntor, kur është dashur të dorëzoheshin listat, të mund të bënim reformën esenciale në LDK, ka thënë ai. “LDK-ja ka mbajtur filozofinë rugoviane, por në politikat tona të mëtutjeshme do të jemi shumë pragmatikë dhe do të merremi me problemet ditore, me problemet të cilat ballafaqohet shteti i Kosovës, sepse ne duhet të ofrojmë zgjidhje pragmatike për këto probleme”, është shprehur Mustafa në intervistën për “Koha Ditore”.
Për ankesat që janë dëgjuar në terren pas zgjedhjeve partiake, ai ka përmendur dy degë ku do të përsëriten zgjedhjet - është Dega e Gjakovës dhe Dega e Obiliqit. Të gjitha degët e tjera janë në rregull. Ai po ashtu ka mbrojtur qëndrimin se “Ne duhet ta ruajmë substancën e LDK-së”, siç është shprehur duke iu kundërvënë vërejtjeve për emra që dëgjohen tash 20 vjet në strukturat udhëheqëse të LDK-së. Kjo nënkupton që të ruhen edhe njerëzit që kanë punuar për një kohë të gjatë nëpër degë të LDK-së, veprimtarë të LDK-së, themelues të LDK-së. Ata njerëz e kanë autoritetin e tyre në degët e tyre.
Mustafa ia ka konfirmuar “Kohës Ditopre” se nëse fiton nuk do të krijojë qeveri me ministrat e kaluar. Kur iu përmendën emrat Skënder Hyseni e Lutfi Haziri, ai sqaroi se në qoftë se ne i fitojmë zgjedhjet, tash shpresojmë se do t’i fitojmë, atëherë do të ketë vende për të gjithë.
I pyetur se në rast fitoreje, a do ta linte postin e kryetarit të Komunës për atë të deputetit, ai u përgjigj “Në qoftë se do të gjejmë zgjidhje adekuate të kryeministrit, me të cilin ne do të pajtohemi të gjithë se është një zgjidhje e mirë, të themi edhe në suaza të konsultimit të elektoratit, atëherë unë do ta mbaj postin e kryetarit të Prishtinës dhe do ta lëshoj atë pozitë për një kandidat tjetër të LDK-së. Por, nuk do t’ua japim të tjerëve”.
Për koalicionet e mundshme paszgjedhore, Isa Mustafa tha se parimi ynë është tani që ne nuk orientohemi për asnjë parti, nuk jemi që të bëjmë koalicion me Partinë Demokratike, s’jam as unë personalisht dhe e kam deklaruar këtë publikisht edhe moti, edhe për arsyen se atë e kemi kundërshtarin kryesor gjatë fushatës dhe ai është rivali ynë kryesor.
“Vija e kuqe është vetëm për PDK-në dhe unë konsideroj vërtet se prapë ne me PDK-në do të jemi partitë që do të fitojmë numrin më të madh të votave dhe në qoftë se ne bëjmë një koalicion të tillë të madh, atëherë do të ngufasim demokracinë në Kosovë, sepse nuk do të ketë opozitë të vërtetë në Kuvendin e Republikës së Kosovës”.
Për qeverisjen me AAK-në ai tha se s’mund të thotë se ka ndonjë përvojë shumë të ndritshme. Punë tjetër është që qeverisja me zotin Haradinaj ka zgjatur shumë shkurt. Mustafa ishte kategorik se edhe sikur PDK-ja të dilte e treta në zgjedhje, nuk do ta ndryshonte qëndrimin ndaj saj. Ndërkaq ka pohuar se nëse PDK-ja del e para, LDK-ja do të mbetet në opozitë. “Ne me PDK-në s’do të bëjmë koalicion”, është shprehur Isa Mustafa.
Kryetari i porsazgjedhur i LDK-së, Isa Mustafa përkujtoi se Bujar Bukoshi ishte angazhuar për reformim të brendshëm të LDK-së. “Me të kam biseduar edhe gjatë kohës kur ai ka vendosur të angazhohej. I kam sugjeruar që angazhimin ta bëjë brenda partisë, sepse është e vështirë që LDK-ja të reformohet me veprime jashtë forumeve dhe organizmit të saj”, i tha ai “Kohës Ditore”. Ndërkaq në ndërhyrjen e “Kohës Ditore” – prandaj ju “e shpërblyet” me mospërfshirje në listën zgjedhore të partisë, Mustafa u përgjigj: “Jo, s’është puna për “shpërblim”, sepse Bujarin e kam mik dhe vazhdoj ta kem mik. Por, bëhet fjalë për atë se ai nuk ka marrë pjesë në zgjedhjet e LDK-së”. Mustafa përmendi po ashtu se
as Ukë Rugova nuk ka marrë pjesë, por për të ka qenë një disponim i Kryesisë, për arsye të familjes së zotit Ibrahim Rugova që ai të mbetej. “As Uka, as Bukoshi s’kanë qenë delegatë të Kuvendit Zgjedhor. Ata s’kanë qenë as delegatë të Degës së tretë. Ata kanë dalë jashtë gjatë procesit zgjedhor në degë”. Sipas pohimeve të tij as ai vetë “deri në ditën e fundit, por as Sejdiu, nuk kemi vendosur që të kandidoheshim”. Zotit Bukoshi i kam thënë se nëse kandidohemi e konsideroj të arsyeshme që ai të mbetej kandidat për kryetar ashtu siç edhe e ka paralajmëruar. Nuk kemi pasur arsye që t’i themi njëri-tjetrit ‘tërhiqu, se po hyj unë tash’. I kam thënë se është shumë demokratike të futeshim në këtë proces, unë, ti dhe Sejdiu dhe ndoshta do të kishte edhe të tjerë që do të konkurronin. Por, ndërkohë, ndodhi formimi i Listës “Rugova”.

Për takimet me Ukë Rugovën një ditë pas Kuvendit, kur ai doli shumë i zhgënjyer, Isa Mustafa sqaroi me këtë rast ai nuk ka manifestuar zhgënjim. “Zhgënjimi më tepër është shprehur përmes letrave. Unë kam komunikuar me të edhe dy herë pas atij takimi. Kam biseduar një herë këtu dhe ia kam shprehur qëndrimin e Kryesisë dhe të Këshillit qendror se ekziston disponimi i tyre që të rezervohet një vend për të në listën për Kuvend, e jo edhe në listën partiake, sepse ajo ishte mbyllur me Kuvendin zgjedhor të partisë. Por një disponim i ngjashëm nuk ka ekzistuar për anëtarët e tjerë të ekipit të tij, për të cilët ai kërkoi të përfshiheshin në listën e organeve partiake.


Isa Mustafa është shprehur optimist se LDK do t’i fitojë zgjedhjet e 12 dhjetorit. Optimizmin e shpreh në disponimin që po shoh në degët dhe në anëtarësinë e LDK-së. Deri tash kam vizituar Degën e Gjakovës tri herë. Kam vizituar Degën e Pejës, Deçanit dhe atë të Junikut. Kam vizituar degët e Ferizajt, Gjilanit, Vushtrrisë, Mitrovicës. Sot do t’i vizitoj Suharekën dhe Prizrenin. Nesër do t’i vizitoj Malishevën, Klinën dhe Istogun. Kam përshtypjet e mia të plota se LDK-ja në krahasim me atë që e kam parë në zgjedhjet e fundit lokale është shumë më mirë në pikëpamje të masivizimit. Kjo më bën të bindem se ne do të fitojmë. P.sh, në Ferizaj, qysh tani jam i bindur se LDK-ja do të jetë e para pa asnjë dyshim, është shprehur i bindur ai (më gjerësisht sot në “Koha Ditore”).

[Llapi]

Isa e ndau LDK-në sikur Sejdiu
E premte, 26 Nandor 2010 20:17

Beadin Syla

Prishtinë, 24 nëntor



kombetareeKreu i LDK-së, Isa Mustafa, shpresa e shumë anëtarëve të kësaj partie për reforma rrënjësore, doli të jetë njeriu që kishte përdorur të gjitha mundësit për ta shkatërruar këtë parti për interesa personale. Ish-anëtari i LDK-së, Zejnullah Rrahmani, në një intervistë për “Infopress”, ka thënë se Isa Mustafa përdori edhe grupin e tifozëve “Plisat” për të bërë protesta për të kërkuar rrëzimin e ish-shefit të tij, Fatmir Sejdiu, dhe duke tradhtuar përkrahësit e tij, madje edhe mikun e tij të vjetër, Bujar Bukoshin, ministër i cilit ishte në qeverinë e tij në ekzil. Rrahmani ka thënë se Isa e ndau partinë siç e kishte ndarë ish- kreu i saj, Fatmir Sejdiu. Sipas Rrahmanit, Isa Mustafa la jashtë partisë Ukë Rugovën dhe figura të tjera të rëndësishme, duke e shndërruar LDK-në në një parti lokale të Llapit e Gollakut.



Infopress: Z. Rrahmani, deri para mbledhjes së Këshillit Qendror të LDK-së ishit pjesë e kësaj partie, pse u larguat nga punimet e tij?

Rrahmani: Mbledhjen e Këshillit të Përgjithshëm të LDK-së e kam lëshuar në shenjë pakënaqësie me listën e imponuar të Kryesisë së LDK-së. Aty është parë qartë që kryetari i ri i LDK-së ka mbetur peng i një strukture të kryesisë së Fatmir Sejdiut, një kryesi që e ka ndarë LDK-në tashmë disa herë dhe që është në zë për korrupsionin shtetëror, sepse ka qenë pjesë e tri qeverive të kaluara, ose e legjislaturës së kaluar dhe gjithkund ka lënë nam për korrupsion dhe nepotizëm. Nuk ka ndodhur asgjë në LDK, pos që Isa Mustafa e ka zënë vendin e kryetarit. Gjithë angazhimi i tij verbal kështu është bërë i pavlefshëm dhe vetëm edhe një përpjekje për ta mashtruar elektoratin. Të mos harrojmë që vetë Isa Mustafa është zgjedhur kryetar i LDK-së në një Kuvend zgjedhor, në të cilin nuk ka pasur të drejtë të flasë asnjë delegat i Kuvendit, dhe ku është dëgjuar fjala e vetëm tre personave: Sabri Hamitit, që e ka pasur rolin e konferencierit; e Fatmir Sejdiut, që ka paraqitur një fjalë të hallakatur dhe Isa Mustafës, që ka thënë tre - katër fjali, por nuk ka paraqitur program.



Infopress: Ju ishit kundër njerëzve që përzgjodhi kryetari i ri i LDK-së afër vetës, apo pse ju nuk ju futi në strukturat udhëheqëse?

Rrahmani: Futjen në struktura udhëheqëse unë nuk e shoh në këtë mënyrë siç ka bërë ai. Unë kam qenë ndër ata që ka reaguar dhe punuar publikisht dhe brenda partisë që përçarësi i LDK-së, ish-kryetari i saj të largohet sa më parë të jetë e mundur. Ai ishte duke e shkatërruar plotësisht këtë subjekt. I tashmi, Isa Mustafa, ia ka marrë atë karrige. Deri atë ditë ka qenë këshilltari i tij dhe i preferuari i tij në përgjithësi, aq sa i bëheshin vërejtje se ishte vënë në shërbim të tij! Mirëpo, ka mbetur peng i njerëzve të fuqishëm të Kryesisë që qëndronin kurdoherë prapa Sejdiut. Nëse e lexoni listën e saj, e shihni që aty janë të gjithë ata, me rokada të vogla vendesh, që shkojnë nga anëtarë deri të nënkryetar etj., mirëpo ata janë njerëzit që i mbajnë prej 5- 10 funksione që pasurinë e tyre familjare e kanë qindfishuar brenda këtyre viteve të pasluftës, prandaj edhe i mbrojnë interesat e veta dhe frikohen. Më tutje lista e Kryesisë degëzohet në tresh dhe janë asistentët. Detyra e këtyre që Isa Mustafa thotë se janë të rinj është të përkrahin shefat e tyre. Në një përbërje të tillë unë nuk e shoh veten.



Isa e ndau LDK-në



Infopress: Keni qenë kundër formës se si Fatmir Sejdiu po e udhëhiqte LDK-në, tani nuk u pajtuat as me Isën, çfarë ndryshimesh prisni në LDK?

Rrahmani: Sejdiu nuk e ka udhëhequr LDK-në, e ka përgjysmuar dhe ia ka humbur çdo kualitet dhe autoritet që ajo ka pasur dhe e ka humbur edhe karrigen e kryetarit të Kosovës, gjë që në njëqind vjetët e ardhshme nuk besoj që do t’i ndodhë një kryetari në Kosovë. Nuk shkon. Isa ka punuar shumë gjatë si ministër i 3 përqindëshit në qeverinë Bukoshi dhe pastaj në mandat të Sejdiut si kryetar i Prishtinës. Sejdiu e ndau LDK-në. Isa e ndau duke përjashtuar Ukë Rugovën dhe Bukoshin. A nuk është e njëjta gjë. Merreni shikoni sa njerëz ka përjashtuar Isa që të nesërmen që e ka marrë kreun e partisë dhe do ta kuptoni çka ka për të bërë në të ardhmen. Tek e fundit, a nuk e keni dëgjuar arrogancën e tmerrshme se mund të largohet kush të dojë etj. Etj., në vend se të përpiqet t’i afrojë njerëzit e të sheshojë terrenin midis pjesëve të pakënaqura të LDK-së, LDD-së, pjesë të AKR-së, njerëz që momentalisht janë strehuar në AAK etj. Unë kujtoj që armiqësia e tij dhe e kësaj kryesie e hapur me familjen Rugova, përjashtimi prej radhëve të saj të Ukë Rugovës dhe përkrahësve të tij, por edhe i gjithë të tjerëve që nuk e duan një LDK të tillë çfarë po përpiqet të na e japë këto ditë Isa dhe grupi i tij, janë argumente të mjaftueshme që LDK-ja tashmë ka bërë edhe një hap prapa dhe ajo del si e dëmshme për gjithë vendin.



LDK-ja e Isës, parti e Llapit e Gollakut



Infopress: Me këtë reformë që ka ndodhur në LDK, a mendoni se ajo do të arrijë ta rimarrë vetën për të riparuar humbjet e zgjedhjeve të kaluara?

Rrahmani: Nuk ka pasur reformë në LDK. Lexoni listën e Kryesisë dhe ju e shihni që janë të njëjtët emra. Imazhi i tyre në opinionin kosovar është tërësisht i rrënuar. E dyta, aty duhet të shtrohen pyetje shumë më serioze, si ta zëmë: përse u përdorën grupe militantësh të uniformuar (me T- shirt) dhe çka do të thotë kjo për demokracinë e Kosovës! E treta, opinioni dashamirës i LDK-së duhet ta dijë që në proces të zgjedhjeve në LDK janë përdorur grupe të tilla, vërtet pa uniforma, mirëpo të bartura prej një aktivi në tjetrin dhe prej një nëndege në tjetrën, kështu që qysh atje me manipulim të plotë të votës e të listave janë eliminuar kuadro të njohura të LDK-së, njerëzit me shumë autoritet profesional e politik në Kosovë. Zgjedhjet e brendshme të LDK-së, me një fjalë, nuk kanë qenë aspak demokratike dhe pse të besoj unë që ata njerëz do të instalojnë demokracinë në Kosovë, kur në parti janë sjellë ashtu!? Së fundi, shumica prej asaj Kryesie kanë siguruar vetën përmes familjarëve e militantëve të paguar, duke u zgjedhur me aplauze si delegatë nga degët e tyre, sepse nuk kanë pasur guxim t’i nënshtrohen votës së fshehtë si delegatët tjerë, “më pak të rëndësishëm”. Isa dhe Kryesia e tashme e kanë paraqitur LDK-në si një parti lokale, me dominim të qartë të Llapit e Gollakut, ndërsa kuadri nga viset tjera është i parëndësishëm dhe margjinal, unë nuk e kam parë dhe nuk e shoh LDK-në si parti lokale. Argumenti i fundit që këtu dua të përmendi është fakti që me këtë udhëheqje, LDK-ja i është afruar njësimit të plotë me parti të nostalgjikëve për kohën e kaluar, siç ka thënë një diplomat i huaj.



Infopress: Cilat kishin me qenë reformat sipas jush?

Rrahmani: Programi i ri i LDK-së. Parti e qendrës së djathtë me sens për gjendjen sociale të kosovarëve. Lufta e ashpër kundër korrupsionit. Regjistrimi i anëtarësisë. Zgjedhja në të gjitha instancat partiake me votë të fshehtë, pa lista të përgatitura “diku (!?) më lart”, me lista me tre e më tepër kandidatë. Me shpallje të programit të partisë për zgjedhje.





Infopress: Mendoni se LDK-ja u nda edhe një herë me shkuarjen e këtij grupi në AAK?

Rrahmani: Kjo është e qartë për të gjithë. Lista i është bashkuar AAK-së sepse Isa Mustafa dhe Kryesia e tij e LDK-së e ka përjashtuar Ukë Rugovën nga LDK-ja e tashme. Unë e kam thënë edhe më herët në Këshill të Përgjithshëm të LDK-së, që kjo udhëheqje ka të bëjë pak me Rugovën dhe ka të bëjë shumë me interesat e mëdha materiale, që shumica prej tyre i kanë siguruar vetës dhe familjarëve të tyre. Emri i Rugovës dhe i familjes së tij të respektuar është shpërdoruar në mënyrë të paskrupullt. Tash që një pinjoll i asaj familjeje ka kërkuar të futet në jetën politike e partiake, në LDK, e kemi parë të gjithë se si i janë përgjigjur ata, duke e fyer e poshtëruar, duke i thënë që ata e duan më shumë Rugovën se djali i tij, duke ia mbyllur derën para hundës dhe duke e etiketuar se e ka lëshuar LDK-në.



Infopress: Pse Isa hezitoi t’i marrë afër vetës të tjerët e i bëri ftesë vetëm Ukës?

Rrahmani: Kjo është pyetje për Isa Mustafën. Unë mund të flas nga perspektiva e një dashamiri, mendoj që ka gabuar që ia ka mbyllur derën atij dhe të tjerëve. LDK-ja ka nevojë për të gjithë. Ma merr mendja që në këtë rast Isa e ka sakrifikuar mikun e tij, Bujar Bukoshin, dhe të tjerët sepse është peng i atyre që e sollën aty dhe që tash i ka në kryesi.



Infopress: A do të thotë që me distancimin e familjes Rugova nga LDK-ja e tanishme, fryma Rugova në LDK ka përfunduar?

Rrahmani: Me “fryma Rugova” gjithkush kupton çka dëshiron vet. Kjo viteve të fundit ka shërbyer për të gjitha ato veprime që opinioni kosovar i ka shumë të freskëta dhe i ka përjetuar mbi kurrizin e vet: qeverisja e keqe, me afera të pambarim dhe të përditshme korruptive, me vendosje kadrovike të dështuara dhe me punë që e vendosin Kosovën në kuadrin e një shteti të dështuar dhe të izoluar, ku varfëria dhe obskurantizmi kanë përfshirë pjesën kryesore të shoqërisë e të vendit, gjë që e radhitë atë në të gjitha raportet ndërkombëtare në vende si ato të Afrikës apo Azisë. Por, dikur “fryma Rugova” ka qenë pajtim i shqiptarëve, Kosova e pavarur, demokraci, krijim i miqësisë me Evropën dhe raport special me SHBA...etj., orientimi perëndimor i shqiptarëve në përgjithësi. LDK-ja e tashme vështirë që u përgjigjet koncepteve të tilla. Tek e fundit, ne e kemi parë se si në Kuvend udhëheqja e saj as nuk ka denjuar ta përshëndesë përfaqësuesin e Ambasadës Amerikane në Prishtinë, dhe madje gjithnjë e më shpesh na ka rënë ta shohim se si funksionarët e LDK-së “nuk e vërejnë” që është aty...Tash sa i përket Familjes Rugova, unë mendoj që ajo është dhe duhet të gëzojë respektin më të lartë në këtë vend. Ajo është në familje që ka sakrifikuar dhe ka dhënë për Kosovën aq sa të gëzojë një mirëqenie në Kosovë. Natyrisht që përjashtimi i Ukës dhe gjërat tjera që këto ditë na bie të dëgjojmë që ndërmerren ndaj asaj familjeje (ndërprerja e të ardhurave etj.) duhet të jenë brengosëse për secilin qytetar.



Deklarata elektorale



Infopress: Do t’i kthehemi edhe njëherë kryetarit të LDK, ku para fillimit të fushatës ai ka filluar të deklarojë se nuk do të bëjë koalicion me atë apo këtë parti, janë këto deklarata elektorale?

Rrahmani: Janë vetëm deklarata elektorale dhe asgjë më shumë. Nëse e shihni listën e kryesisë do ta vëreni se aty janë shumë prej ministrave të kabinetit Thaçi dhe një pjesë e tyre kanë qenë bashkëpunëtorë të shkëlqyeshëm të tij dhe të partisë së tij, duke qenë deputetë të Kuvendit. Disa prej tyre janë tashmë janë miq edhe në jetën e përditshme. Nëse ai u propozon vende në kabinetin e tij të ardhshëm (nëse e fiton natyrisht), ata do ta pranojnë menjëherë. Nëse flas si njeri i politikës, do të thosha që një qëndrim i tillë i ngurtë është i dëmshëm politikisht për këndo që e shpreh, sepse nuk duhet të ketë armiqësi subjektesh politike, po vetëm mospajtime programesh.



Infopress: Sa do të ketë zgjedhje të lira dhe fer, kur kihet parasysh koha e shkurtër për përgatitjen e tyre?

Rrahmani: Koha e shkurtër nuk është përcaktuar për të pasur zgjedhje të lira e fer. Përcaktuese është vullneti i partive për të bërë garë të lirë e fer. Kjo nënkupton që udhëheqjet e partive, sidomos të partive që kanë qeverisur, PDK-LDK, të urdhërojnë strukturat e tyre dhe militantët që t’i përmbahen rregullave dhe ligjit. Zgjedhjet e liria, demokratike, të padhunueshme dhe të padhunshme i bëjnë nder të gjithëve, si subjekteve politike, fitimtarëve dhe të humburve, i bëjnë nder Kosovës.