Ambasada Gjermane i refuzon vizën biznesmenit shqiptar

[Xhuxhumaku]

Ambasada Gjermane i refuzon vizën biznesmenit shqiptar

E henë, 18 Tetor 2010 09:21


Kostika Gjylameti, administrator i "Albania Distribution", distributor ekskluziv i "Birra Korça", ishte ftuar nga gjiganti i prodhimit të birrës KRONES, në panairin "Brau Beviale 2010", që zhvillohet në datat 10-12 nëntor 2010, në Nurenberg të Gjermanisë. Biznesmeni aplikoi për vizë në Ambasadën Gjermane në Tiranë, duke paraqitur edhe ftesën e kompanisë së njohur gjermane KRONES, e cila konfirmonte pjesëmarrjen e tij në aktivitet. Aplikimi për vizë u refuzua. "Aktiviteti është një nga panairet më të mëdha që zhvillohen në fushën e industrisë së birrës. Në këtë panair, nga grupi "IHB" u ftua një grup përfaqësuesish, mes të cilëve bëja pjesë edhe unë", thotë Kostika Gjylameti. Ai sqaron se për shkak të pasaportës së re, nuk ishte pajisur me vizë. Prandaj, pasi konfirmoi të gjitha formalitetet e nevojshme, biznesmeni aplikoi pranë Ambasadës Gjermane, më 20 shtator 2010. Në një intervistë për gazetën "Panorama", Gjylameti shpjegoi gjithë procedurat e ndjekura dhe përgjigjen e kthyer nga ambasada.
Kur aplikuat për vizë dhe cilat ishin konkretisht dokumentet që paraqitët, a plotësuat formularin dhe procedurat tjera?
U njoha me procedurat që duheshin ndjekur për aplikimin për vizë, pasi edhe më parë kam qenë i pajisur me leje qëndrimi italiane, sepse kam studiuar në Itali. Pas kësaj, plotësova gjithë dokumentacionin e nevojshëm, të cilin e mora në faqen zyrtare të ambasadës dhe u paraqita në sportel në datën e caktuar. Punonjësi i ambasadës, pasi verifikoi që dokumentet ishin të plota dhe nuk kishte asnjë mangësi, pranoi dokumentacionin, më dha numrin (kodin) e aplikimit, si dhe më caktoi datën për t'u paraqitur në ambasadë për të marrë përgjigjen.
Çfarë ndodhi më pas me aplikimin tuaj?
Në datën 7 tetor 2010, u paraqita për të marrë përgjigje pranë Ambasadës Gjermane në Tiranë. Tek dera e jashtme, një punonjës i saj më dha një letër, më dorëzoi pasaportën me një vulë refuzimi për vizën dhe një shkresë në të cilën theksohej se "informacionet e paraqitura rreth qëllimit dhe kushteve të qëndrimit të synuar nuk kanë qenë të besueshme". Kërkova shpjegime të mëtejshme dhe m'u tha se duhej të kontaktoja me faks pranë zyrave konsullore të Ambasadës Gjermane në Tiranë.
Vitet e fundit, ndërsa procesi i liberalizimit të vizave ka kaluar në etapat e tij, vendet e zonës "Shengen" kanë zbatuar një regjim të lehtësuar vizash për disa kategori qytetarësh shqiptarë, siç janë përfaqësuesit e biznesit, ku bëni pjesë edhe ju. Në këtë rast duket se kjo normë nuk është respektuar, ju ia bëtë të ditur ambasadës statusin tuaj në Shqipëri?
Kjo është arsyeja pse ndodhem këtu dhe po e bëj prezent këtë shqetësim. Sepse gjykoj se vendimi i ambasadës nuk është i vetmi në rastin tim, pasi në këtë refuzim nuk u zbatua "regjimi i lehtësuar" që përmendni ju, për të cilin është folur shumë këto vite. Unë kisha paraqitur ekstraktin e regjistrimit në QKR për aktivitetin që unë drejtoj, për statusin tim si administrator i kompanisë. Ky ishte një tregues tjetër që viza e kërkuar prej meje ishte për shkaqe pune dhe nuk kishte asnjë synim për shkeljen e saj.
Si e konsideroni vendimin e ambasadës ndaj aplikimit tuaj për vizë për të qenë pjesë e aktivitetit në Gjermani, ku ju ishit ftuar nga një kompani e njohur biznesi?
E konsideroj vendim të padrejtë. Nuk arrij të jap një shpjegim apo një argumentim, pasi përgjigja e dhënë nuk më duket aspak e besueshme në statusin tim, për shkak të dokumenteve të paraqitura prej meje në aplikim, të cilat i plotësonin të gjitha kushtet e duhura për vizë. Është për t'u theksuar se ishte një vizë pune, me ftesë nga një partner biznesi shumë serioz në Gjermani. Dua të theksoj faktin, se ndërsa flitet për liberalizim vizash, nëpër dyert e ambasadave të huaja në Shqipëri mbizotëron akoma mentaliteti refuzues edhe ndaj biznesmenëve shqiptarë që bashkëpunojnë me kompani të një niveli ndërkombëtar.

KRONES ftoi biznesmenin në Nurenberg

Grupi KRONES, me seli në Neutraubling të Gjermanisë dhe me filiale në disa prej qyteteve më të mëdha, zhvillon, prodhon dhe shpërndan makineritë që mbulojnë ciklin e plotë teknologjik të prodhimit, paketimit dhe shitjes së birrës. Kompania KRONES, e cila kishte ftuar në panair biznesmenin shqiptar, është themeluar në vitin 1951. Ajo ka një numër të përgjithshëm punonjësish prej 10.238 persona dhe zotëron më shumë se 1300 patenta për shërbimet dhe linjat e saj të prodhimit, që karakterizohen nga procedura të rrepta për standardin cilësor, i cili realizohet nga një staf i kualifikuar, gjithnjë në kërkim të ideve inovatore.

panorama.

[SKRAPARI]

nuk eshte ndonje gje e re. gjermanet kane 20 vjet qe refuzojne.

[Qyfyre]

Vizat nuk jane liberalizuar akoma, keshtu gje problemi i liberalizimit te vizave nuk ka lidhje me kete ceshtje.