Protesta e biznesit, dorëzohen Financat: Pa kasa edhe 6 muaj

[Albo]

Kasat, Bode zbardh skemën e rimbursimit

TIRANË- Në mes të debatit për kasat fiskale, Ministri i Financave gjen edhe njëherë rastin të shpjegoje ndryshimet në ligjin "Për taksat vendore", i cili iu mundëson bizneseve të vogla rimbursimin e kostos së tyre. I thirrur në interpelancë nga anëtari i Komisionit të Ekonomisë, Selami Xhepa, në lidhje me procesin e pajisjes me kasa fiskale të biznesit vendas, Bode shpjegoi planin e qeverisë për mënyrën se si do të bëhet rimbursimi i kasave fiskale për bizneset e vogla. Qeveria synon të kompensojë bizneset që do të pajisen me kasa fiskale deri në fund të shkurtit të vitit të ardhshëm me nga 44 mijë lekë, ndërsa për pronarët e taksive në Tiranë dhe Durrës të cilëve iu është dashur të vendosin taksimetër, parashikohet kompensimi me 30 mijë lekë. Në lidhje me kasat fiskale, shuma që do të kompensohet do të përfshijë vetëm vlerën e pajisjes pa TVSH, ndërsa kjo e fundit do të paguhet nga pronari i biznesit. Duke parë listën e çmimeve të kasave që qarkullojnë sot në treg, të cilat fillojnë nga 420 euro bashkë me shërbimet e mirëmbajtjes, qeveria do të lidhë marrëveshje me kompanitë që furnizojnë tregun me pajisje fiskale për të futur kasa me çmime më të ulëta, deri në 53 mijë lekë. Sipas këtij plani, të gjithë ato biznese që e kanë blerë ose do ta marrin kasën fiskale deri në 28 shkurt të vitit 2011 do të kompensohen në shumën e 44 mijë lekëve. Kjo hapësirë kohore është krijuar për t'i dhënë mundësi kompaniveqë të furnizojnë tregun me kasa me çmim deri në 44 mijë lekë pa TVSH. Në momentin kur këto lloj kasash do të jenë të mundura për biznesin e vogël, qeveria do të rimbursojnë bizneset në shumën e 44 mijë lekëve, e cila është edhe vlera e pajisjes fiskale pa TVSH.

Forma e zgjedhur për rimbursimin e bizneseve të vogla është zgjedhur llogaritja e shumës prej 44 mijë lekësh si taksë e paguar. Referuar të dhënave të ofruara nga dje në seancë plenare nga Kryeministri Berisha, më shumë se 80 për qind e bizneseve në vend i derdhin detyrimet e tyre pranë njësive të qeverisjes vendore. Llogaritja si taksë e paguar e kostos së pajisjes fiskale do të bëjë që ai detyrim të mos derdhet në arkën e këtyre të fundit. Lidhur me këtë, Bode tha se qeveria do të kompensojë buxhetet e bashkive dhe komunave për efektet financiare që do të shkaktojë ky veprim. "Efektet financiare që do të vijnë nga ky veprim, do të merren në konsideratë për t'iu kompensuar nga ana e qeverisë të gjitha njësive vendore, pas përfundimit të evidentimit dhe paraqitjes së dokumenteve që deri me datën 28 shkurt të kenë instaluar pajisjet e reja elektronike fiskale", - tha ministri. Shefi i financave shfrytëzoi foltoren e Kuvendit për t'iu përgjigjur akuzave të deputetëve të majtë për abuzimet sipas tyre që ka shoqëruar procesin e përzgjedhjes së kompanive që do të furnizonin tregun me kasa si dhe pajisjen e bizneseve. Sipas tij, përzgjedhja e kompanive ka kaluar nëpër një proces bazuar mbi tregun e lirë por duke plotësuar kushtet e vendosura nga qeveria.

Kodheli: Raporti i Kontrollit të Brendshëm, prova e abuzimit me kasat

TIRANË - Partia Socialiste ka zbardhur sot një pjesë të raportit të Departamentit të Kontrollit të Brendshëm në lidhje me përzgjedhjen e kompanive që do të furnizonin tregun me kasa fiskale, në të cilin sipas saj, pasqyrohen shkeljet që kanë karakterizuar këtë proces. Deputetja e PSsë, njëkohësisht edhe nënkryetare e Komisionit të Ekonomisë, Mimi Kodheli, citoi dje një paragraf të tij duke theksuar se në të provohet qartë praktika korruptive e ndjekur nga Ministria e Financave. "Urdhri i Ministrit të Financave, nr. 48 datë 5.8.2008 "Për procedurat e Aplikimit dhe Autorizimit të Shoqërive të Autorizuara", nuk ka përcaktuar kritere të sakta dhe të qarta, lidhur mekualifikimin apo skualifikimin e subjekteve pjesëmarrëse si dhe sasinë e pikëve që duhet të marrë një shoqëri për kualifikim. Urdhri rezulton të jetë i mangët, duke lenë hapësira për vlerësime dhe kualifikime eventuale të operatoreve ekonomike, jo korrektë dhe të pa kualifikuar. Ky fakt ka sjellë praktikisht si pasojë, kualifikim të shoqërive që nuk kane kapacitetet e mjaftueshme për kryerjen e këtij shërbimi", - është pjesa të cilës iu referua Kodheli gjatë daljes së saj për mediet. Përballë këtyre akuzave, Bode përmendi se më shumë se pjesëtarët e qeverisë, më afër kompanive të kasave fiskale është Partia Socialiste duke përmendur të afërmin e një deputeti të majtë.

Shekulli