Veriu i Kosoves

[guri79]

Hysa demanton me fakte Zannierin
nga ww.koha.net

Prishtinë, 23 shtator - Reagimi i shpejtë i shefit të UNMIK-ut, Lamberto Zannier, lidhur me raportin e koordinatorit të Strategjisë për Veriun, Ylber Hysa, me pohimet se raporti i koordinatorit përmban pasaktësi dhe se asnjëherë nuk janë kontaktuar zyrtarët ndërkombëtarë, ka marrë një përgjigje të shpejtë nga koordinatori Hysa, i cili edhe e ka hapur debatin për punën e dëmshme që e ka bërë UNMIK-u në integrimin e veriut.
Ndaj pohimeve të Zannierit, se ai personalisht nuk është kontaktuar asnjëherë, Hysa ka ofruar versionin e vet, duke thënë se raporti i është dërguar UNMIK-ut 48 orë para publikimit, por nuk kanë marrë kurrfarë përgjigje. Duke iu përgjigjur reagimit të Zannierit, Hysa ka shkuar edhe më tej, duke ofruar emrat e gjithë zyrtarëve të UNMIK-ut në Mitrovicë dhe në Prishtinë, të kontaktuar për raportin, por që nuk kanë preferuar të flasin. Ata janë Vladimir Anokhin, i thirrur shumë herë gjatë javës së dytë dhe të tretë të korrikut; Kerim Bardad-Daidj, java e tretë dhe e katërt e korrikut, sidomos gjatë 23-26 korrik, kur asistentja e tij, Bojana, ka thënë se shefi nuk mund të bisedojë me koordinatorin Hysa, Serghey Malashenko, i kontaktuar gjatë javës së dytë të korrikut, por pa përgjigje, Eva-Maria Veliçkoviq, e kontaktuar po ashtu gjatë javës së dytë të korrikut, pa përgjigje, Millanka Ignjatoviq, me të cilën është kontaktuar gjatë javës së dytë të korrikut, por ajo nuk ishte në gjendje të bisedonte, pastaj Anil Vasisht, i lutur që të përgjigjet me e-mail dhe telefon, por pa rezultat, Andrea Jacko, me të cilin biseda është zhvilluar gjatë javës së tretë të qershorit, i cili ka thënë se do të takohet, por kurrë nuk është përgjigjur. “Po ashtu, është kontaktuar me shkrim nëpërmjet postës elektronike, siç ishte kërkuar të veprohej nga ne, por kurrë nuk kemi marrë ndonjë përgjigje”, ka thënë Hysa.
Koordinatori i Strategjisë për Veriun ka shtuar se sa i përket pretendimeve të Zannierit për “resurse të limituara financiare” që UAM i ka pasur në dispozicion, institucionet përkatëse kosovare, ka thënë ai, do të tregojnë se për çfarë shumash bëhet fjalë të vëna në dispozicion që nga viti 2001. KTV-ja, gjatë ditës, ua ka ofruar këto fakte zyrtarëve të UNMIK-ut për të marrë një përgjigje, por përgjigja ka qenë e shkurtër. Zëdhënësi i UNMIK-ut, Jacob Quinn, në përgjigjen e përgjithësuar, nëpërmjet postës elektronike nuk ka dashur të komentojë më shumë, duke thënë se qëndrimi për raportin tashmë është bërë i ditur. “Ne e kemi bërë të qartë qëndrimin tonë për raportin. UNMIK-u do të vazhdojë të diskutojë çdo çështje që ka të bëjë me interesin e komuniteteve të Kosovës, me të gjitha palët e interesuara, në mënyrë të hapur dhe konstruktive, nëpërmjet kanaleve të zakonshme”, ka thënë Quinn.
Zyra për zbatimin e Strategjisë për Veriun ka publikuar para dy ditësh një raport “Administrata e UNMIK-ut në Mitrovicë po e pengon integrimin e veriut”. Në atë raport thuhet se administrata e UNMIK-ut në veri të Mitrovicës është shndërruar në një pengesë të integrimit të këtij qyteti dhe po e ndihmon mbijetesën e strukturave paralele të Serbisë në atë pjesë të Kosovës.
Publikimi i këtij raporti kishte nxitur reagimin e menjëhershëm të shefit të UNMIK-ut, Lamberto Zannier.

[guri79]

Rusët administrojnë veriun
nga www.koha.net

Prishtinë, 24 shtator – Katër misionarë nga Rusia janë zyrtarët kryesorë të UNMIK-ut në veri të Kosovës. Këta zyrtarë tok me një misionar nga Ukraina, një serb nga Kroacia dhe një zyrtare me nënshtetësi gjermane, janë zyrtarët e UNMIK-ut që administrojnë veriun e Kosovës.
Vladimir Anokhin nga Rusia është ushtrues i detyrës së shefit të administratës së UNMIK-ut në veri të Mitrovicës. Lilia Galieva, po ashtu nga Rusia, është përfaqësuese komunale e UNMIK-ut në Leposaviq. Zyrtari i tretë rus atje është Vladimir Gromov. Ky i fundit është përfaqësues komunal në Zveçan.
Burime të “Kohës Ditore” në atë pjesë të Kosovës kanë shpjeguar se të tre rusët kanë edhe një këshilltar. Andrei Efimov, që vjen nga Ministria e Punëve të Jashtme e Rusisë, është këshilltar i lartë politik i UNMIK-ut në veri.
Bashkë me rusët në veri të Kosovës punojnë tre zyrtarë të tjerë. Ata nuk janë nga Rusia, por edhe identiteti i tyre nuk është nga vendet më mike të Kosovës.
Kozak Yaroslav nga Ukrahina është përfaqësues komunal në Zveçan. Zyrtar për çështje civile në prezencën e UNMIK-ut në veri të Kosovës është Mario Maglov, serb nga Kroacia.
Eva Maria Veliçkoviq është zyrtarja e fundit që punon në UNMIK. Ajo ka nënshtetësi gjermane, ndërkaq kombësinë e saj burimet e gazetës nuk kanë mundur që ta përcaktonin.
Të gjithë këta zyrtarë, sipas burimeve të gazetës, kanë bashkëpunim të mirë me strukturat paralele të Serbisë në veri të Kosovës, por bashkëpunim edhe më të mirë me këto struktura ka stafi lokal i UNMIK-ut atje, që përbëhet nga 99 për qind serbë vendës. Shumica e stafit lokal, që në përgjithësi janë rreth 120, punojnë edhe për strukturat paralele, sipas burimeve të gazetës.
UNMIK-u ka edhe një bord këshillëdhënës në atë pjesë të Kosovës. Bordi që do të duhej të përbëhej nga përfaqësues të komuniteteve përbëhet prej tetë personash.
Gjashtë prej tyre janë serbë. Vetëm njëri nga ta është shqiptar dhe një tjetër është boshnjak.
Megjithëse aktualisht UNMIK-u ka katër projekte të ndryshme shumetnike në atë pjesë të Kosovës. Burime të gazetës kanë shpjeguar se më shumë se 90 për qind të projekteve të propozuara nga komuniteti shqiptar atje janë refuzuar nga ky bord i UNMIK-ut.
Shefi i UNMIK-ut, Lamberto Zannier, nëpërmjet një komunikate për media, ka thënë se prezenca e misionit që ai udhëheq e ka ndihmuar dhe po e ndihmon jetën në veri.
Zannier ka kundërshtuar pjesët kryesore të raportit të hartuar nga kjo zyrë e përbashkët koordinuese e Qeverisë së Kosovës dhe e ICO-së (më gjerësisht në numrin e sotshëm të “Kohës Ditore”).

[guri79]

Veriu përplas Qeverinë me UNMIK-un

Prishtinë, 23 shtator – Qeveria e Kosovës dhe misioni i OKB-së, UNMIK-u, kanë filluar përplasjet publike rreth veriut të Kosovës. Një raport për prezencën e UNMIK-ut në veri i hartuar nga Zyra për koordinimin e zbatimit të Strategjisë për veriun, ka zgjuar polemika mes zyrtarëve të OKB-së dhe atyre të Qeverisë, shkruan sot “Koha Ditore”.
Raporti i publikuar një ditë më parë në “Koha Ditore” dhe që ka për qëllim të japë një pasqyrë për pengesat në zbatimin e Strategjisë për veriun, të hartuar nga ICO-ja dhe Qeveria e Kosovës konstaton se administrata e UNMIK-ut në veri të Mitrovicës është shndërruar në një pengesë të integrimit të këtij qyteti, dhe po e ndihmon mbijetesën e strukturave paralele të Serbisë në atë pjesë të Kosovës.
“Në vend se të shpërbëjë strukturat paralele, UAM-i ashtu sikur edhe në të kaluarën, e mban autoritetin ne veri të Mitrovicës dhe i lejon strukturat paralele që të vazhdojnë qeverisjen...Për shkak të shkeljes së mandatit të tyre dhe veprimit në mënyrë jotransparente, UAM-i në fakt ka ndihmuar ndarjen ndërmjet komunitetit serb dhe komuniteteve tjera në veri të Mitrovicës. Duke e rritur mandatin e strukturave paralele atje, UAM-i në mënyrë direkte ose indirekte po i ndihmon strategjisë së Beogradit për kontrollimin e territorit në veri të lumit Ibër, duke e shkelur integritetin territorial të Kosovës”, thuhet në raport.
Shefi i UNMIK-ut, Lamberto Zannier, nëpërmjet një komunikate për media, ka thënë se prezenca e misionit që ai udhëheq e ka ndihmuar dhe po e ndihmon jetën në veri.
Zannier ka kundërshtuar pjesët kryesore të raportit të hartuar nga kjo zyrë e përbashkët koordinuese e Qeverisë së Kosovës dhe e ICO-së.
“Më vjen keq që autorët nuk janë konsultuar me mua apo zyrtarët adekuatë të Kombeve të Bashkuara gjatë përgatitjes së këtij raporti. Po ta bënin këtë, do të kishin mundësinë të publikonin një raport të saktë”, ka thënë shefi i UNMIK-ut.
Zyra koordinuese për zbatimin e Strategjisë për veriun, është instaluar nga Qeveria e Kosovës dhe udhëhiqet nga koordinatori Ylber Hysa. Raporti i publikuar një ditë më parë, shënon edhe përplasjen më serioze të Qeverisë së Kosovës më ish-administratën e OKB-së për sa i përket veriut.
Raporti i kësaj zyre, i lë një pjesë të madhe të fajit për ndarjen e Mitrovicës prezencës së UNMIK-ut atje. Misioni i OKB-së pas shpalljes së pavarësisë ka reduktuar prezencën e vet në Kosovë, mirëpo e ka mbajtur praninë në veri të Mitrovicës, pasi që atje mungojnë institucionet e Kosovës.
Sipas raportit UAM-i ka vetëm tre zyrtarë ndërkombëtarë, ndërkaq që të tjerët janë serbë lokalë nga veriu i Mitrovicës. Shumica e tyre punojnë edhe për strukturat paralele të Serbisë. Sipas të njëjtit raport, paret që ndahen nga Qeveria e Kosovës, bien në duart e strukturave paralele të Serbisë, nëpërmjet UAM-it.
Shefi i UNMIK-ut në reagimin e tij ka thënë se UAM-ia ka edhe një zyrë të veçantë për komunitetet joserbe në veri, në të cilën edhe stafi që punon janë joserbë.
“UAM-i ende i kryen funksionet e veta dhe operon nga buxheti i Kosovës. Ky buxhet përdoret për administratën e Mitrovicës veriore. Të gjitha pagesat e fondeve nga buxheti i Kosovës janë të realizuara përmes komunës e Mitrovicës (në jug), dhe të audituara nga Ministria e Financave”, thuhet në reagimin e shefit të UNMIK-ut.
Udhëheqësi i Zyrës për koordinimin e zbatimit të Strategjisë për veriun, ka thënë nëpërmjet një reagimin pas komenteve të Zannierit, se raporti i zyrës së tij është i qëndrueshëm.
“Është për të ardhur keq, që UNMIK, respektivisht UAM, ndihet kaq i trazuar që pas shumë vjetësh është observuar nga institucionet kosovare që i financon ato, dhe të pamësuar që të monitorohen, kanë reaguar me kaq nguti. Zyra jonë, duke bërë një raport, vetëm ka vënë në pah fakte dhe realitete të regjistruara, të ndërtuara përmes një pune shumëmujore, që përveç burimeve të shumëllojshme, përfshijnë një varg burimesh nga vetë UNMIK-u. Me këtë rast, po vëmë në pah edhe ata të cilët janë kontaktuar nga raportuesit tanë, që ose nuk kanë dashur kurrë të intervistohen, ose kanë qenë në pushime, ose nuk kanë pasur kohë për muaj të tërë të flasin për këtë çështje”, ka thënë Hysa, duke përmendur emra të disa zyrtarëve të UAM-it, të cilët nuk kanë dashur të flasin me Zyrën për koordinim, në mesin e tyre edhe vetë Vladimir Anokhin, i cili sipas Hysës është thirrur shumë herë gjatë javës së dytë dhe të tretë të korrikut.
“Për më tepër, raporti ynë, që ka pritur Mendimin e Gjykatës Ndërkombëtare të Hagës, dhe Rezolutën e OKB në New York, së pari i është dërguar SRSG Zannier dhe stafit të tij, plot 48 orë para publikimit, duke mos marrë asnjë reagim. Sa u përket konstatimeve për `resurse të limituara financiare` që UAM-i i ka pasur në dorë, institucionet përkatëse kosovare do të tregojnë se për çfarë shumash bëhet fjalë të vëna në dispozicion që nga viti 2001. Mjafton, të thuhet që për këtë vit UAM ka pasur në shfrytëzim 2,7 milionë euro nga buxheti i Kosovës. Po ashtu, të dhëna të tjera lidhur me strukturën e të punësuarve, përkatësinë e tyre etnike e profesionale dhe ndërlidhjen e tyre me struktura paralele, ia lëmë debatit të këtyre ditëve. Mjafton të shihet se sa të punësuar në UAM janë njëkohësisht edhe staf në komunën paralele në Mitrovicën e veriut”, ka thënë Hysa, i cili ka shtuar se Qeveria e Kosovës nuk dëshiron që t`i jetë mosmirënjohëse ndaj tërë punës së UNMIK-ut për tërë këto vite në Kosovë.
“Nëse UNMIK dhe UAM dëshirojnë ne jemi më se të disponuar që ta vazhdojmë këtë debat, me ç’rast i thërrasim të gjithë aktorët të kontribuojnë në këtë temë’, ka thënë Hysa.
Njëra nga konstatimet e raportit është se shumica e stafit të UAM-it që përbehet nga serbë lokalë, kanë punë të dyfishta. Të njëjtit sipas raportit punojnë edhe për strukturat paralele.
Zëdhënësi i UNMIK-ut, Jacob Quinn, ka thënë se stafi i angazhuar nga UNMIK-u, punon vetëm për ta, ndërkaq që angazhimet tjera nuk mund të jenë në dijeninë e misionit.
“Në stafin civil të UAM-it janë të punësuar vetëm nga ne. Nëse kanë ndonjë angazhim tjetër, atë e bëjnë pa lejen tonë”, ka thënë Quinn.
Ky zëdhënës ka shpjeguar se në kuadër të administratës në veri UNMIK-u ka edhe një zyrë për komunitete, stafi i së cilës përbëhet nga joserbë. Kjo zyrë sipas këtij zëdhënësi edhe merret me projekte shumetnike në atë pjesë të Kosovës.
“UAM ka takime javore më përfaqësuesit e të gjitha komuniteteve atje”, ka thënë Quiin.
Sipas tij, janë katër projekte që UNMIK-u po i administron gjatë vitit 2010, e nga të cilat do të përfitojnë të gjithë komunitetet në veri të Mitrovicës.
“Ndërtimi i dy shtëpive për familje shqiptare të Kosovës që kushton 45 mijë euro. Ky projekt është iniciuar nga përfaqësuesit e Lagjes së Boshnjakëve. Rehabilitimi i 24 shtëpive, në vlerë prej 80 mijë eurosh. Katër familje shqiptare, katër boshnjake, një rome dhe një turke do të përfitojnë nga ky projekt. Instalimi i dy transformatorëve elektrik në vlerë prej 30 mijë eurosh. Dhe projekti i katërt është asfaltimi i një rruge nga e cila do të përfitojnë të gjithë qytetarët”, ka thënë Quinn.

[drenicaku]

O fort mir i kemi punet kush po na udheheq,bile ka nje her po me shkon menja qe jemi ne enderr,po a krahasohen politikajt tan me ata te serbis,keta tonet deri dje kan flejt me bageti dhe hopa sa qel e meshel syt jan ban dikushi,kurse serbet kan politiqar te kalibrit nderkombetar,ka dasht zot e punet tona po na i kryjn amerikanet se tjeter keng ish kendu

[apollo12]

Per momentin veriu i kosoves eshte jashte juridiksionit te shtetit te Kosoves. Une mendoj se per te futur nen kontroll te plote kete pjes eshte e vetmja zgjidhje nese ne Shqiptaret ne bashkepunim me Aleatet tan e ndermarrim ndonje sulm te armatosur njejt siq kan bere Kroatet me Operacionin "Oluja" kunder serbeve. Ne kete form siq eshte duke vepruar Thaqi, strukturat serbe vetem sa kan me u forcue edhe me shum, e pas nje kohe ka me qen shum ma problem. Kjo qeveri absolut nuk ka kurrfar plani per kthimin e veriut ne juridiksionin e Kosoves. As plan paqsor e jo se jo ndonje plan Ushtarak." Magarin e hanger ujku e i zoti thojke ishalla jam anderr"