Negociatat sekrete Prishtinë-Beograd !

[ARIANI_TB]

Prishtinë – Një dokument diplomatik perëndimor nga Beogradi i shkruar me gjuhë të përafërt me atë të kabllogrameve amerikane, verifikon mossinqeritetin e shteteve të Quintit që një kohë të gjatë kanë kërkuar nga Prishtina dialog vetëm me “qytetarin e veriut” të Kosovës. Dokumenti që daton nga koha kur pushtetin në Serbi e kishte Boris Tadiq, flet për dëshirën e pranuar të Beogradit për negociata sekrete me Prishtinën, krahas dialogut teknik. Përgjatë këtyre negociatave, përmes një vendimi administrativ do krijohej territori i veçantë i quajtur “Veriu i Kosovës”.

Ndonëse nuk përdoret askund termi autonomi për veriun, një prej pikave thotë: “Të drejta të zgjeruara dhe status për serbët që jetojnë në komunat e veriut të Kosovës, ku serbët përbëjnë shumicën, duke e krijuar (përmes një vendimi administrativ) një rajon të vetëm të quajtur Veriu i Kosovës, me të drejta të veçanta të përfaqësimit”.

Javën e kaluar “Zëri” ka raportuar për një lobim të fuqishëm që Beogradi po e bën te amerikanët, gjermanët dhe britanikët duke kërkuar të drejtën për serbët e veriut të Kosovës që përmes zgjedhjeve të kenë parlamentin e tyre me të drejta ekzekutive.

Që të gjitha këto dhe shumë kërkesa të tjera, dokumenti i siguruar nga “Zëri” thotë se janë planifikuar që të arrihen para zgjedhjeve të prillit të mbajtura në Serbi, përmes “diskutimeve diskrete” .

Ish- diplomati amerikan, Daniel Serwer, para pak ditësh i ka thënë gazetës se ai ka indikacione që marrëveshjet do të arrihen para se palët të takohen publikisht. Sipas Serwer, takimi i liderëve apo palëve në përgjithësi do ketë rëndësi për simbolikën që përfaqëson ai shtrëngim i duarve, por jo për të arritur marrëveshjet.

Dokumenti, që sipas informacioneve të gazetës ka rrjedhur tashmë nga diplomacia perëndimore në Beograd te zyrat e qeverisë në Prishtinë, thotë saktësisht kështu:

“Paralelisht dhe ndaras nga dialogu aktual i lehtësuar nga BE-ja mes Beogradit dhe Prishtinës, Beogradi do të ishte i gatshëm që të shqyrtonte mundësinë e diskutimeve diskrete për një zgjidhje të përgjithshme të marrëdhënieve me Prishtinën dhe të cilat do të fillonin menjëherë dhe potencialisht do të përfundonin në pranverë të vitit 2012”.

Kohë më parë edhe partia aktualisht opozitare, Aleanca për Ardhmërinë e Kosovës kishte drejtuar akuza publike ndaj zyrtarëve të partisë në pushtet se po takohen fshehtas me pjesëtarë të pushtetit serb nga koha kur Boris Tadiq ishte president i Serbisë. Mirëpo, nga ajo kohë deri më tash gjërat kanë ndryshuar rrënjësisht pasi AAK jo vetëm që nuk zbuloi asnjë nga provat që thoshte se i posedon, por me “sugjerimet” e miqve ndërkombëtarë ka shprehur gatishmëri të bëhet pjesë e një dialogu politik me Serbinë, i cili mbështetur në dokumentin e siguruar, duket se tashmë vetëm po zhvillohet.

“Diskutimet diskrete” që përmenden aty thuhet se do të bëheshin duke u mbështetur në dy parime:

(a) që ato të bëhen pa paragjykuar statusin e Kosovës nën rezolutën e Këshillit të Sigurimit të OKB-së, 1244 dhe qëndrimin e Beogradit për të mos njohur Deklaratën e njëanshme të Pavarësisë së Kosovës dhe (b) që kjo zgjidhje do të përfshinte interesin e të gjithë serbëve që jetojnë brenda kufijve ekzistues të Kosovës dhe do të përjashtonte opsionin e ndryshimit të pikave të kalimit (boundary)”.

Një tjetër kërkesë është edhe dhënia e një statusi special për Kishën Ortodokse për të siguruar qëndrueshmëri afatgjate, mbrojtje dhe ruajtje të tyre, njëjtë siç kërkohet aplikimi i përgjithshëm i principeve të decentralizimit.

Ndërkaq nga ato që Serbisë do i kërkohej është pajtimi që Kosova të marrë pjesë në forume rajonale, mbështetja e perspektivës evropiane për tërë rajonin dhe implementimi i marrëveshjeve të arritura në dialogun teknik.

Zyrtarisht deri më tash të dyja palët, edhe pushtetarët e rinj në Beograd dhe ata në Kosovë janë shprehur të gatshëm për negociata politike. Ambasadori i Britanisë së Madhe në një intervistë përmes telefonit javën e kaluar ka thënë se për të arritur një zgjidhje të qëndrueshme për veriun duhet të përfshihet edhe Beogradi.


http://www.zeri.info/artikulli/1/1/5...htine-beograd/