Pakistani po shqyrton njohjen e Kosovës

[gimche]

Pakistani po shqyrton njohjen e Kosovës

Prishtinë, 5 gusht - Pakistani brenda pak ditësh mund të njohë pavarësinë e Kosovës.
Lajmin e bën të ditur drejtori për Evropë në ministrinë e jashtme të Pakistanit, Israr Hussain.

“Jemi duke e finalizuar qëndrimin tonë, sepse ende nuk e kemi bërë një gjë të tillë. Ne nuk do ta analizojmë mendimin këshillëdhënës të Gjykatës Ndërkombëtare të Drejtësisë, por në bazë të këtij mendimi po e formulojmë qëndrimin tonë shtetëror lidhur me këtë çështje”, deklaroi ai për mediet kosovare.

Hussain ka shtuar se qëndrimi i Pakistanit do të bëhet i ditur shumë shpejt, por ai nuk pranon ta bëjë të ditur nëse shteti i tij do marrë vendim për njohjen e realitetit të ri të krijuar në Ballkan. “Këtë nuk mund t’ua them, nuk mund t’i përgjigjem pyetjes suaj sepse e kam të pamundur. Por përgjigjen do e mësoni shpejt, ndoshta javën e ardhshme”, tha Hussain. /koha/

[gimche]

Irani po e studion Mendimin e GJND-së për Kosovën

Teheran/Beograd, 5 gusht - Teherani është i gatshëm të ndihmojë në zgjidhjen e "kontestit" të Kosovës dhe në vendosjen e paqes së përhershme dhe të sigurisë në Ballkan, ka deklaruar shefi i diplomacisë iraniane gjatë takimit me të dërguarin e presidentit serb në Iran, në kuadrin e misionit për të penguar njohjen e Kosovës nga 55 vende të botës.
"Irani është i gatshëm që t'i kontribuojë vendosjes së paqes dhe sigurisë në Ballkan dhe në zgjidhjen e problemeve në rajon, posaçërisht të kontestit midis Serbisë dhe Kosovës", ka thënë ministri i Jashtëm i Iranit, Manucer Mottaki.
Sipas mediave serbe, ministri iranian shpreson që Serbia dhe Kosova do të arrijnë një zgjidhje adekuate dhe gjthëpërfshirëse të konfliktit nëpërmjet negociatave konstruktive dhe progresive. Irani, shtet i cili ende nuk e ka njohur Kosovën, është duke përcjellë situatën me vëmendje dhe është duke shqyrtuar Mendimin këshillues të Gjykatës Ndërkombëtare të Drejtësisë, sipas të cilit Deklarata e Pavarësisë së Kosovës nuk shkel të drejtën ndërkombëtare, ka thënë shefi i diplomacisë iraniane. /koha/