Tadiq zbulon: Plani serb - ndarja e Kosovës

[Llapi]

Të ndryshohet politika ndaj Kosovës
Disa parti serbe kërkojnë që Beogradi të ndryshojë politikën ndaj Kosovës. LDP ka propozuar rezolutë të re. Opozita në Serbi kritikon zyrtarët me të lartë serbë se kanë dhënë deklarata boshe dhe të rrejshme për fitore në Kombet e Bashkuara

Nga Express më 11.08.2010 në ora 11:22
Opozita serb kërkon ndryshim të politikës së Beogradit ndaj Kosovës. Lideri i liberal demokratëve, Cedomir Jovanovic, ka deklaruar se do të prezantojë në Kuvendin e Serbisë një projektrezolutë e cila mund të harmonizohet me BE’në dhe SHBA’në. Ndërkaq, Partia e Tomislav Nikolicit (SNS) kërkon që të ketë bashkëpunim edhe me Rusinë dhe Kinën.

Jovanovic kërkon që çështja e Kosovës, e cila rëndon politikën dhe ekonominë e Serbisë, të zgjidhet sa më shpejt dhe që Serbia të mos e bllokojë më hyrjen e Kosovën në organizata ndërkombëtare.

Lideri i LDP’së, Cedomir Jovanovic, konsideron se nuk ka rëndësi qëndrimi i tij personal ndaj pavarësisë së Kosovës, por duhet marrë parasysh realitetin, trashëgiminë historike dhe nevojat e serbëve të Kosovës. Jovanovic është një nga politikanë e rrallë serbë, i cili kërkon që Serbia të njohë pavarësinë e Kosovës.

“Partia Liberale Demokratike nuk mund të njohë pavarësinë e Kosovës, atë mund ta bëjnë vetëm njerëzit që jetojnë në këtë shtet (Serbi). Unë mund të angazhohem dhe do të angazhohem për njohjen e asaj pavarësie të Kosovës, e cila është e pranueshme për serbët në Kosovë”, ka thënë Jovanovic.

“Unë do të bëj përpjekje për zgjidhje të problemeve. Kosovën e kanë pranuar 22 shtete evropiane, anëtare të BE’së. Pavarësinë e Kosovës sot e njohin 70 shtete”, ka shtuar ai.

Nënkryetari i SNS’së, Aleksandar Vucic, konsideron se Serbisë i nevojitet edhe përkrahja e Rusisë dhe Kinës.

“Pra, me shtetet e BE’së, por edhe me Rusinë, Kinën dhe me SHBA’të. Me të gjitha shtetet të cilat mund të marrin pjesë në zgjidhjen e problemit tonë”, ka thënë ai.

“Na duhet para se gjithash mbrojtja e interesave tona nacionale, por një qasje e hapur e jo qasje e cila është kozmetikë dhe mbyllje e syve të opinionit”, thotë Vucic.

LDP dhe SNS kritikojnë deklaratat e ministrit të jashtëm Vuk Jeremic se lufta për rezolutë në OKB “është mision i pamundshëm, por edhe të presidentit Boris Tadic.
Cedomir Jovanovic thotë se politika e presidentit serb është pa efekte.

“Presidenti Tadic mundet çdo ditë të udhëtojë nëpër Serbi, duke vizituar punëtorët përskaj rrugëve, por kjo në asnjë mënyrë nuk do të punësojë njerëzit të cilët janë pa punë, nuk do të zbusë borxhet e shtetit ndaj atyre punëtorëve”, vlerëson ai.

Edhe Aleksandar Vucic ka komentuar deklaratat kontradiktore të zyrtarëve të Serbisë.

“Në një moment kemi rrëfime boshe dhe të rrejshme rreth asaj se si do të fitojmë në OKB. Pas vetëm shtatë ditësh kemi pranim se ajo fitore potenciale është gati e pamundshme”, ka thënë ai.

Edhe partia tjetër, SPO e Vuk Draskovicit porosit se Serbia duhet të ndryshojë politikën ndaj Kosovës. Sekretari i kësaj partie, Milos Andic, ka deklaruar se kjo është e vetmja mënyrë të mbrohen interesat nacionale në Kosovë, me garanci ndërkombëtare dhe pa obligime formale për njohje të shtetësisë së Kosovës.