Çfarë thonë shenjtorët për kreshmën dhe si të kreshmojmë ne në mënyrë të shenjtë?

[neokastra]

1. Qëllimi i kreshmës

“

Kreshmët janë ilaç, por ilaçi sado i dobishëm që të jetë, shpesh
nuk vlen aspak kur nuk ka përvojë ai që e përdor. Sepse, duhet që
njeriu të dijë kohën e përdorimit, sasinë e nevojshme, gjendjen e trupit
që do ta marrë ilaçin, kushtet klimatike, dietën që duhet të mbajë,
stinën më të përshtatshme të vitit, e shumë të tjera si këto, të cilat po
të mos i kemi parasysh, ilaçi nuk sjell asnjë dobi. Prandaj Kisha jonë
e Shenjtë i ka caktuar periudhat kur i krishteri orthodhoks duhet të
mbajë kreshmë.
Kreshmët që i ka caktuar Kisha të mbahen para të kremteve të
mëdha të krishterimit, kanë për qëllim kryesor të na përgatisin
shpirtërisht për t’u njohur dhe ndërgjegjësuar me ngjarjet e mëdha që
kremtojmë ato ditë”.
Shën Joan Gojarti

[neokastra]

2. Tregoje kreshmën me vepra
“Mban kreshmë? Tregoje me vepra. Çfarë veprash? Kur shikon
ndonjë të varfër, ndihmoje. Kur shikon armikun tënd, të pajtohesh dhe
të bëhesh mik me të, të mos shash, të mos shpifësh, të mos vjedhësh,
të mos bësh ndonjë padrejtësi, të mos mbash nëpër gojë njerëzit, etj.
Me fjalë të tjera, nuk duhet të mbajë kreshmë vetëm goja, por edhe
syri, edhe veshi, edhe këmbët dhe të gjitha pjesët e trupit tënd.
Le të mbajnë kreshmë duart, duke mos u ndotur me vjedhje dhe
grabitje.
Le të mbajnë kreshmë këmbët, duke u larguar nga rruga që të çon
nëpër qendra mëkatare dhe nëpër mbledhje imoralësh.
Le të mbajnë kreshmë sytë, duke mos u hedhur në fytyra të bukura
me qëllim satanik e shtazor, sepse do të ishte një gjë qesharake sikur
gojën ta largosh nga gjellët, të cilat në fund të fundit nuk janë të këqija
në vetvete, kurse syve t’u japësh leje të shohin gjëra që janë të ndaluara
dhe që janë vetvetiu të liga.
Nuk ha mish? Mirë bën, por mos i lër sytë e tu të hanë imoralitet
dhe paturpësi.
Le të mbajë kreshmë edhe veshi. Por kur mban kreshmë veshi?
Kreshma e veshit është të mos dëgjojë e të mos pranojë as sharje, as
shpifje, as qortime. Sepse Shkrimi i Shenjtë thotë: ‘Të mos pranosh të
dëgjosh kallëzime dhe fjalë të liga’.
Le të mbajë kreshmë edhe goja, e goja mban kreshmë kur nuk
nxjerr asnjë fjalë të keqe. Se me të vërtetë, çfarë dobie vjen kur nga
njëra anë nuk hamë mish dhe peshk e ushqime të tjera kreshmore, e
nga ana tjetër, kafshojmë dhe copëtojmë të afërmit tanë?”
Shën Joan Gojarti

[neokastra]

3. Kreshma: Themeli i virtyteve
“Kreshma lind profetët, forcon të dobëtit. Kreshma urtëson
ligjvënësit. Është mbrojtëse e shpirtit, shoqëruesi besnik i trupit, armë
e fitimtarëve, ushtrim për atletët. Është dëbuese e tundimeve dhe
parapërgatitëse për fitimin e devotshmërisë. Është mik i vigjilencës
dhe krijues i urtësisë. Në luftë sillet me trimëri, ndërsa në kohë paqeje
mëson qetësinë. Të përsos dhe të shenjtëron. Kreshma zhduk fuqinë e
zjarrit dhe mbyll gojët e luanëve. Kreshma ngjit lutjen në qiell e për
rrjedhojë lartëson shpirtin. Është nëna e shëndetit. Pedagog i të rinjve.
Stolia e pleqve.”
Shën Vasili i Madh

[neokastra]

4. Dobitë që vijnë nga kreshma
Kreshma është mjeku i shpirtrave tanë. Ajo zbut inatin, shton zellin
për të bërë të mirën. Zbut zemrën. Pastron mendjen nga mendimet e
liga. Frenon gjuhën që të mos thotë fjalë të tepërta e të pahijshme.
Frenon sytë të mos jenë kureshtarë të shohin andej e këtej, por e bën
secilin të tregojë kujdes për
veten e tij dhe e mëson të
kujtojë gjithnjë mëkatet e tij
duke e larguar kështu nga
gjykimi i të afërmit.
Shën Simeoni, Theolog i Ri

[neokastra]

5. Kur bën dobi kreshma?
“Le të kemi përmbajtje
në gjithë shqisat tona. Pra,
nëse kreshmon nga ana
ushqimore, por i lë sytë e tu
të shohin me kureshtje,
kështu ata krijojnë smirë dhe
zili në shpirtin tënd, dhe nëse
veshi yt pranon sharje, këngë
të pahijshme, përgojime,
fjalë të këqija dhe pranon
dhe gjëra që dëmtojnë dhe
shqisat e tjera, cila është dobia e kreshmës? Patjetër nuk do kesh
asnjë dobi. Pra, nevojitet një kreshmë jo vetëm nga ana ushqimore,
por një kreshmë me gjithë shqisat tona.
Shën Grigor Pallamai”

[neokastra]

6. Bëje çdo gjë për hir të Zotit
[COLOR="rgb(160, 82, 45)"]Ka shumë gjëra që bëhen nga njerëzit dhe që janë të mira nga
natyra e tyre, por nuk janë të mira për ndonjë shkak, si p.sh.: Kreshma
dhe agripnia, lutja dhe psalmodia, lëmosha dhe mikpritja, nga natyra
e tyre janë vepra të mira, por kur bëhen nga lavdidashja, tashmë nuk
janë më të mira.
Perëndia nga të gjitha veprat tona kërkon qëllimin e tyre, d.m.th.
nëse i bëjmë për hir të Atij, apo për ndonjë shkak tjetër.
Shën Maksim Konfesori[/COLOR]

[neokastra]

7. Si të kreshmojmë ne në mënyrë të shenjtë?
• Të kreshmojmë jo vetëm nga ana ushqimore, por edhe të
largohemi nga mëkatet. Pra, një kreshmë ushqimore dhe shpirtërore.
• T’i falim dhe t’i ndjejmë ata që na kanë lënduar shpirtërisht.
• Ta shoqërojmë kreshmën me lutje dhe të kushtojmë më shumë
kohë në leximin e Ungjillit dhe të librave të tjerë shpirtërorë.
• Ta shoqërojmë kreshmën me lëmoshë, pra të ndihmojmë atë që
ka nevojë.

[Seminarist]

Le te mos harrojme se kreshma ka karakter disiplinor e jo dogmatik dhe si e tille ajo VARION nga Kisha ne Kishe, sikurse nga Lindja bizantine ne Perendimin latin, apo si nga vete Kishat lindore jo-bizantine ne relate me Kishen bizantine, kjo qe ne mijevjecarin e pare, kur Kisha ishte NJE.