Kosova fiton ne Hage

[ARIANI_TB]

Opinioni i pritshëm i GjND-së
23 KORRIK 2010 - E Diel 14:34
Sot Gjykata Ndërkombëtare e Drejtësisë në Hagë dha opinionin e saj këshillëdhënës lidhur me kërkesën e Serbisë në formë padie nëse IPVQ-të kanë pasur të drejtë ta shpallin pavarësinë e Kosovës, e cila më pastaj u riformulua nga GjND-ja në ”A është shpallja e njëanshme e pavarësisë nga ana e IPVQ-ve në përputhje me të drejtën ndërkombëtare?”. Kjo pyetje iu parashtrua Gjykatës në dhjetor të vitit 2008.



Opinioni i GJND-së mund të përmblidhet në tri pika kryesore:



a) Shpallja e pavarësisë së Kosovës nuk e ka shkelë të drejtën ndërkombëtare.



b) Shpallja e pavarësisë së Kosovës nuk e shkelë Rezolutën 1244 të Këshillit të Sigurimit të OKB-së.



c) Kjo pavarësi nuk e shkelë Kornizën Kushtetuese për Vetëqeverisje të Përkohshme në Kosovë.



Sa i përket pikës së parë, pothuajse të gjithë analistët, politikanët e zyrtarët, e kanë interpretuar atë si bazë të ligjshmërisë së pavarësisë së Kosovës. Do të ishte mirë të ishte kështu, por kjo gjë fatkeqësisht nuk është e vërtetë. Gjykata vetëm ka shpjeguar se nuk ka norma pozitive të së drejtës ndërkombëtare të cilat e sanksionojnë shpalljen e pavarësive apo ndalimin e tyre. Konstatimi se ”shpallja e pavarësisë së Kosovës nuk e ka shkelë të drejtën ndërkombëtare”, nuk e implikon përfundimin se kjo shpallje është në përputhje me të drejtën ndërkombëtare, sepse e drejta ndërkombëtare në përgjithësi nuk i parasheh procedurat e ligjshme të krijimit të shteteve. Gjithsesi që një qëndrim i tillë është pozitiv në kuptimin e konceptimit të shtetit si fakt real. Por politikanët e Kosovës e konceptojnë shtetin vetëm si shpallje, prandaj kjo e rrezikon integritetin territorial dhe sovranitetin e Kosovës.



Pika e dytë po ashtu ka qenë e pritshme, meqë vetë pavarësia e mbikëqyrur e Kosovës sipas rekomandimit të Ahtisaarit është shpallur duke iu referuar Rezolutës 1244 të KS të OKB-së. Kjo ndodhi pasi që sponsorizuesit e rekomandimit të Ahtisaarit (ShBA-të, Britania e Madhe, Franca, Gjermania, Italia etj.) dështuan që gjatë verës së vitit 2007 ta nxirrnin një rezolutë tjetër për Kosovën, për shkak të përdorimit të vetos ruse në Këshillin e Sigurimit. Kështu që, meqë nuk arritën ta ndryshojnë, atëherë e shpallën pavarësinë e mbikëqyrur përbrenda Rezolutës 1244, duke arsyetuar se vetë kjo shpallje nuk e shkelte R1244.



Ky opinion i GjND-së do ta rikonfigurojë deri në njëfarë mase qasjen e Serbisë ndaj Kosovës. Tash Serbia nuk do të përqendrohet aq shumë në përpjekjet për rihapjen e statusit të Kosovës, megjithëse nuk do ta njoh atë, por në ndarjen e brendshme të Kosovës, ashtu sikurse në Bosnje. Kjo është arsyeja pse opinioni i GjND-së do të shfrytëzohet nga Serbia për konsolidimin e saj në veri dhe lindje të Kosovës si dhe në kërkesën e saj për negociata të reja, prej të cilave do të përpiqet fillimisht ta imponojë një status special për veriun si dhe ta krijojë një kanton autonom serb në lindje. Kosovës i kërcënohet ky rrezik real aq më tepër kur kemi në mendje udhëheqësit që e qeverisin Kosovën, të zhytur në korrupsion si dhe të shantazhueshëm nga qarqe të huaja.



Komiteti i VETËVENDOSJE!-s



për Politikë dhe Çështje Juridike

[Llapi]

Quint’i në aksion
SHBA, Mbretëria e Bashkuar, Franca, Gjermania dhe Italia kanë koordinuar veprimet në mbështetje të Kosovës. Të revoltuara nga sjellja e Serbisë pas GJND’së, kanë dërguar demarshe tek shumë shtete. Ato kërkojnë njohje të Kosovës dhe mospërkrahje të Rezolutës serbe. Në këtë komunikim, gjuha e Quint’it përshkruhet si tejet e fuqishme.

Nga Bekim Greiçevci më 11.08.2010 në ora 7:54
Sjellja e Serbisë pas shpalljes së opinionit të GJND’së për pavarësinë e Kosovës, sidomos deponimi i Projektrezolutës në OKB, ka nxitur mobilizim të shteteve anëtare të Quint’it në mbështetje të shtetit të ri.

Përfaqësues nga SHBA, Mbretëria e Bashkuar, Franca, Gjermania dhe Italia kanë mbajtur një seri konsultimesh në New York për koordinim të aksioneve për njohje të reja për Kosovën, si dhe për pengim të Projektrezolutës serbe, ka mësuar Express nga dy burime diplomatike.

Arsyeja kryesore për angazhim të shtuar të anëtarëve të Quint’it është qëndrimi befasues i Beogradit që edhe pas verdiktit të Gjykatës së Hagës të insistojë për negociata për statusin politik të Kosovës.

Serbisë i është tërhequr vërejtja para 22 korrikut që të mos ndërmarrë hapa të njëanshëm pas vendimit të Gjykatës së Botës, por Beogradi dëshmoi se nuk do t’i përfillë ato.

“Secili nga anëtarët e Quintit kanë marrë një pjesë të barrës. Janë dërguar demarshe te shumë shtete që nuk kanë njohur Kosovën, por edhe disa nga ato që e kanë njohur.

Është kërkuar të njihet pavarësia e Kosovës dhe të mos jepet mbështetje për Projektrezolutën e Serbisë”, ka thënë për Express një diplomat i lartë europian në kusht anonimiteti.

Ky diplomat thotë se në këtë komunikim qeveritë e shteteve të Quint’it kanë përdorur një gjuhë tejet të fuqishme.

“Arsyeja se të gjitha shtetet e Quint’it përdorën gjuhë të fuqishme është se drafti serb i dërguar në Asamblenë e Përgjithshme me të vërtetë nuk ishte një gjë e mirë”, thotë ai.
Demarshi është mënyrë e komunikimit diplomatik përmes të cilit përcillet qëndrimi zyrtar i një Qeverie tek tjera.

Ky diplomat zbulon se përpjekja e anëtarëve të Quint’it për të bindur shtetet që ta njohin Kosovën është shumë e madhe. “Ambasadorët kanë marrë instruksione që në këto vende të angazhohen përtej demarshit. Të kenë komunikim të drejtpërdrejtë me zyrtarë të qeverive përkatëse”, ka shtuar ai.

Tekstin e plote mund ta lexoni ne numrin e sotëm te gazetës Express.