PD bën thirrje për unitet kombëtar

[gimche]

Partia e Drejtësisë bën thirrje për unitet kombëtar

Prishtinë, 18 korrik - Përçarja e politikave shqiptare përballë interesave kombëtare po kërcënon rëndë interesin e shqiptarëve në Ballkan. Kështu ka deklaruar kryetari i Partisë së Drejtësisë, Ferid Agani, në konferencën e sotme për shtyp, duke iu referuar problemeve të qeverisë së Kosovës me veriun, statutit superior të minoritetit serb në vend krahasuar me atë të shqiptarëve në Serbi dhe forcave politike shqiptare të përçara në Maqedoni. Partia e Drejtësisë ka apeluar te miqtë ndërkombëtar të popujve të Ballkanit të mbështesin parimin e reciprocitetit në marrëdhëniet ndërmjet popujve dhe shteteve të Ballkanit Perëndimor si rrugë e vetme për zgjidhje të qëndrueshme dhe afatgjata ndërmjet tyre. /koha/

[gimche]

Çështja shqiptare në Ballkan po përjeton goditje

Partia e Drejtësisë (PD), apelon te miqtë e dëshmuar të popujve të Ballkanit, SHBA dhe shtetet tjera të Quintit, që të mbështesin parimin e reciprocitetit të plotë në marrëdhëniet ndërmjet popujve dhe shteteve në Ballkanin perëndimor, si rrugë të vetme për zgjidhje të qëndrueshme dhe afatgjata ndërmjet tyre.

Partia e Drejtësisë vlerëson se zhvillimet pas shpalljes së verdiktit gjyqësor në Gjykatën Ndërkombëtare të Hagës, do të aktualizojnë edhe më shumë nevojën e koordinimit urgjent të qëndrimeve politike të krerëve shtetëror dhe politik të shqiptarëve në Ballkanin perëndimor.

Problemet që ka Republika e Kosovës në veriun e vendit si dhe vështirësitë gjatë zbatimit të Marrëveshjes së Ohrit dhe veçanërisht të Marrëveshjes së Konçulit të arritura me ndërmjetësim ndërkombëtar, që kanë të bëjnë me pozitën e Shqiptarëve në Maqedoni dhe në Serbi, imponojnë nevojën për organizimin sa më të shpejtë të takimit joformal të krerëve shtetëror dhe politik të shqiptarëve në Shqipëri, Kosovë, Maqedoni, Luginë të Preshevës dhe Mal të Zi, të cilin PD e ka kërkuar në mënyrë të përsëritur vitet e kaluara.

Partia e Drejtësisë konsideron se momenti historik nuk lejon vonesa të mëtutjeshme në këtë aspekt dhe se bashkërendimi i veprimeve politike në rrafshin mbarëkombëtar paraqet parakusht për zgjidhjen e problemeve të grumbulluara.

Kryetari i PD-së, Ferid Agani, tha se indikatorët e shumtë flasin se çështja Shqiptare në Ballkan është duke përjetuar goditje të njëpasnjëshme prandaj këto trende duhet të ndërpriten në mënyrë urgjente.

PD ka ngushëlluar popullin e Shqipërisë për aksidentin tragjik që ka ndodhur ditën e djeshme. /mesazhi/