Shekulli
Fshati turistik në Hamallaj, fillojnë shitjet me 1120 euro m2
Tërhequr më 14 Korrik 2010
Prezantohet në internet fshati turistik i miratuar një vit më parë nga Kryeministri, ndërsa institucionet shqiptare nuk kanë asnjë dijeni mbi këtë projekt
Fillojnë shitjet e apartamenteve të fshatit turistik të miratuar një vit më parë nga kryeministri Sali Berisha. Bëhet fjalë për projektin që pretendon të shndërrohet ndër resorset më luksoze në Shqipëri, për hir të të cilit u ndërhy para pak javësh edhe në Hamallaj nga forcat e policisë për shkatërrimin e objekteve pa leje, ndërhyrje kjo që u shndërrua në një luftë të vërtetë.
Zyrtarisht asnjë prej institucioneve shqiptare nuk ka dijeni për projektin e miratuar me vendim të KRRTRSH të datës 14/07/2009 për fshat turistik të zonës së Hamallajve nga investitori MANE TCI dhe "CSS Property Partners LP". Të paktën kështu kanë deklaruar, ndërsa në një faqe në internet jo vetëm që prezantohet i gjithë projekti, por edhe ftohen blerësit duke u joshur me çmime favorizuese.
Projekti
Banesat tona po shkatërrohen për hir të interesave klienteliste të njerëzve të lidhur me pushtetin. Këtë deklaronte i madh dhe i vogël në fshatin Hamallaj, ku ditën e parë të këtij muaji banorët në mbrojtje të banesave të tyre u përleshën me forcat e policisë. Zyrtarisht askush nuk flet për projektin e fshatit turistik në këtë zonë.
Institucionet që menaxhojnë turizmin thonë se nuk kanë asnjë informacion, por projekti jo vetëm që synon të ndërtojë një resors turistik nga më luksozët në vend, por ka filluar edhe shitjet e vilave që do të ndërtohen në këtë zonë.
Të paktën këtë lajmëron një faqe zyrtare elektronike e një agjencie shitjesh të pronave. Çmimi i vilave fillon nga 50 400 euro ose me 1120 euro për m2 ndërkohë që në rast se bëhen rezervime këto ditë do të ketë edhe një ulje prej 12 %. Kjo është oferta më joshëse që reklamohet për projektin e resorsit turistik në zonën e Gjirin e Lalzit në faqen zyrtare të agjencisë "Albania Properties".
Ndërtimet në këtë zonë do të kryhen nga një kompani angleze dhe fshati turistik do të ketë vila, apartamente, papafingo, hotel, pishina, sauna, fitness dhe projekti pretendon të jetë fshati me luksoz në plazhet shqiptare.
E ndërsa në këtë faqe zyrtare të një agjencie të shitjes së pronave prezantohet me detaje projekti i miratuar një vit më parë, çuditërisht asnjë prej institucioneve që kanë vartësi zhvillimin e turizmit në vend nuk ka dijeni për vendimin e miratuar nga kryeministri Berisha më datës 14.07.2009. Zëdhënësja e Ministrit së Transporteve të thotë se këtë projekt mund ta gjesh në faqen zyrtare të KRRTRSH-së. Zëdhënësja jo vetëm që nuk ka dijeni për projektin, por ende nuk di që KRRTRSH-ja nuk ka një faqe elektronike zyrtare.
Po kështu edhe në Ministrinë e Turizmit, Kulturës, Rinisë dhe Sporteve nuk kanë asnjë dijeni për projektin e kompanisë "MANE TCI" dhe "CSS Property Partners LP. Të paktën këtë të thotë Majlinda Lami, drejtore e Turizmit në MTKRS. "Unë nuk kam asnjë informacion mbi këtë projekt", shprehet ajo për gazetën "Shekulli".
E ndërsa drejtuesit e institucioneve ngrenë supet për projektin e miratuar një vit më parë, në faqen zyrtare në internet të kësaj agjencie gjen të gjithë informacionin e duhur mbi projektin e fshatit turistik në gjirin e Lalzit. Kështu në informacionin e dhënë mëson se fshati turistik do të ndërtohet sipas standardeve ndërkombëtare me shërbime mirëmbajtjeje dhe shërbime argëtimesh të shkëlqyera.
"Pjesë e këtij resorsi do të jetë edhe një hotel i markave të famshme perëndimore që do të sigurojë me bollëk shërbime dhe argëtime klasi", thuhet në prezantimin e këtij projekti në këtë faqe elektronike.
Por ndërtimi e këtij resorsi turistik është kundërshtuar nga banorët e Hamallajt. Gjatë protestave të tyre ata kanë denoncuar se aksioni i policisë ndërtimore për shkatërrimin e banesave të tyre bëhet pikërisht për të liruar hapësira në funksion të këtij projekti. Të paktën 13 banorë të këtij fshati u arrestuan për këtë kundërshtim të policisë në mbrojtje të shtëpive të tyre.
Pas përleshjes së zhvilluar ndërmjet banorëve dhe forcave të policisë asnjë prej drejtuesve të institucioneve shqiptare nuk reagoi qoftë dhe për të përgënjeshtruar pretendimin e banorëve ndërkohë që shitjet e apartamenteve kanë filluar në gjirin e shkretuar të Lalzit.
Kreu i Inspektoriatit të Policisë Ndërtimore shpjegon programin e institucionit që drejton në krye të të cilit ai ka nisur një luftë pa kompromis ndaj koasit urbanistik
Bojaxhi: Do të prishen të gjitha ndërtesat pa leje
Që ndërhyrjet e Inspektoriatit të Policisë Ndërtimore nuk janë për hir të interesave klientaliste, për këtë të garanton kreu i këtij institucioni Gjergji Bojaxhi.
Sipas tij, të gjitha ndërhyrjet që janë urdhëruar kohët e fundit, kanë pasur qëllim vetëm zbatimin e ligjit. Kështu ka ndodhur në Pyllin e Sodës, Vlorë, në Ksamil, Sarandë apo edhe në Hamallaj të Durrësit.
E për këtë, Bojaxhi të thotë se garanci është emri i tij, pasi ndërtimet pa leje janë beteja e tij e radhës. E për këtë duket se Inspektoriati i Policisë Ndërtimore ka një plan veprimi. Duket se sezoni i plazhit e ka "detyruar" kreun e ndërtimorëve të ndërpresë fushatën e tij në bregdet për ta përqendruar në veri apo dhe në qytetet ku nuk prishet rehatia e pushuesve. Të paktën këtë të thotë në një intervistë për "Shekullin" Gjergji Bojaxhi.
Z.Bojaxhi, kohët e fundit keni zhvilluar disa aksione të policisë ndërtimore me jo pak probleme. Gjithnjë këto ndërhyrje bëhen para sezonit turistik. A ekziston një strategji për to?
Strategjia është shumë e thjeshtë. Ndërtimet pa leje që nuk janë në proces legalizimi, si dhe ndërtimet që mund të jenë bërë edhe pas vitit 2007 do të nxirren jashtë përdorimit dhe nuk do të lejohet që zonat me rëndësi kombëtare, zonat bregdetare, akset kryesore të rrugëve, parqet kombëtare si dhe zonat e tjera me një interes kombëtar të cenohen prej tyre.
Mendoj se ka ardhur koha që paralelisht me ligjin e legalizimit shteti shqiptar të tregojë kontroll mbi territorin dhe të qartësojë se procesi i legalizimit ishte për të zgjidhur një problem social dhe jo për të zgjidhur problemin e disa individëve që kanë zaptuar zona me rëndësi kombëtare.
Por ama procesi i legalizimit nuk ka përfunduar ende...
Ligji është shumë i qartë që në zona me rëndësi kombëtare, dhe zonat janë të përcaktuara, nuk lejohet procesi i legalizimit dhe këtu nuk ka asgjë të çuditshme.
Ka shumë ndërtime që janë bërë 10 metra larg detit dhe kanë nisur procedurat e legalizimit. Kjo nuk do të thotë se ato do të legalizohen. Megjithatë kjo nuk ka të bëjë me procesin e legalizimit. Mendoj se shteti dhe shoqëria shqiptare është ndërgjegjësuar se, nëse Shqipëria do të ketë një zhvillim të qëndrueshëm, duhet që ndërtimet të bëhen në mënyrë të planifikuar.
Zonat e caktuara të ruhen dhe të kenë një status të veçantë. Shumë aksidente në rrugë apo fatkeqësi natyrore vijnë si pasojë e një ndërtimi kaotik, ndërtim që nuk ka marrë parasysh studimet gjeologjike apo sizmike.
Zona të gjelbëra që jane shkelur dhe janë dhunuar sheh në gjithë territorin, por nuk mund të vazhdohet kështu. Çdo ndërtim pa leje do të shembet dhe për këtë kemi filluar në zonat më problematike për të mënjanuar sot atë që nesër do të jetë katastrofë.
Përse ka ndërhyrje gjithnjë në prag të sezonit turistik?
Nuk mund të flas për të shkuarën. Unë nuk kam më shumë se tre muaj që kam marrë këtë detyrë. Menjëherë pas marrjes së detyrës është ndërtuar dhe plani i veprimit. Ne nuk kemi ndërhyrë në zonat që cënojnë turizmin. Në pyllin e Sodës gjithkush e di që nuk ka turizëm dhe ne kemi ndërhyrë vetëm tek ato ndërtime që cenojnë pyllin. Po kështu edhe në Ksamil.
Të gjithë e dimë që në Ksamil nuk ka pasur pronarë dhe se ndërtimet që janë bërë janë pa leje ndërtimi. Megjithatë ne nuk kemi ndërhyrë në zonën e plazhit, por në thellësi të qytetit.
Po kështu, edhe në Hamallaj. Ndërtimet e planifikuara për shembje nuk kanë leje ndërtimi dhe janë shumë larg zonës së bregdetit. Megjithatë tashmë që vërtetë jemi në sezonin turistik, ndërhyrjet nuk do të jenë më në zonat bregdetare, por më në thellësi të vendit.
Mund të them se në planin tonë të punës parashikohet ndërhyrja në kurorën e gjebër të Tiranës, si dhe në qytetet në verilindje.
Ka zëra që thonë se ndërhyrjet janë bërë për hir të interesave të caktuara...
Unë nuk di që ndërhyrjet që janë bërë tashmë të jenë bërë në kundërshtim me ligjin. Veç kësaj nuk e kam marrë këtë detyrë për të shkelur ligjin dhe deri më tani në karierën time nuk ka qoftë dhe një rast të tillë. Ndaj po ju garantoj që pjesë e punës së Policisë Ndërtimore do të jetë vetëm në përputhje të plotë me ligjin.
Puta: Segmente brenda qeverisë duan të përvetësojnë tokat
Banorët e Hamallajt nuk kanë qenë të vetmit që kanë protestuar ndaj shkatërrimit të banesave të tyre për hir të një fshati turistik. Akuzat e vendasve që rrënimi vjen për hir të interesave të pushtetarëve të vendit janë mbështetur edhe nga ish-deputeti i Partisë Demokratike, Simon Puta.
Nismëtari i themelimit të PD-së ka kërkuar që kreu i qeverisë të ndërhynte menjëherë pas asaj që ka ndodhur në Hamallaj të zonës së Gjirit të Lalëzit. Puta u shpreh se "janë segmente brenda qeverisë që duan të përvetësojnë tokat e Hamallajt duke prishur shtëpitë e fshatarëve, të ndërtuara me gjak dhe djersë, të cilat janë të përfshira në procesin e legalizimit".
Ky pretendim është thënë që në nisje të protestave nga vetë banorët e Hamallajt të cilët u shprehën se bëhet fjalë për rreth 400 dynymë tokë, të cilat ishin blerë nga njerëz të shtetit dhe që po çonin në shkatërrimin e banesave të tyre në proces legalizimi. Ndërkohë, një vendim i vitit të kaluar, i firmosur nga Kryeministri tregon se janë mbi 40 ha tokë në këtë zonë, në të cilat do të investohet nga "Mane TCI" dhe "CSS Property Partners LP".
Përgjigju Duke Cituar
Postuar më parë nga Albo
)
Krijoni Kontakt