Energjia, tjetër rritje çmimi më 2011-n
25/06/2010
Ard Kola
ERE: Korrigjimi i nivelit të humbjeve favorizoi OSSH. Gjyqi, palët drejt kompromisit
Shqiptarët do të përballen me një tjetër rritje të çmimeve të energjisë elektrike në janar 2011. Konfirmimi vjen nga Enti Rregullator i Energjisë, i cili sapo ka korrigjuar nivelin e humbjeve në rrjet, element tepër i rëndësishëm në përcaktimin e tarifave të reja. Të dhënat e fundit tregojnë për një nivel humbjeje me të paktën 34 për qind, ose 1 për qind më lart nga periudha kur ERE mori vendimin për rritjen e çmimeve me rreth 13 për qind. “Në vendimin e muajit dhjetor për rritjen e çmimeve, niveli i humbjeve ishte 33 për qind, gjë që u kundërshtua nga OSSH-ja, duke pretenduar një masë prej 35.7 për qind. Nga verifikimet në terren dhe te linjat e përcjelljes së energjisë, rezulton se niveli i humbjeve paska qenë 34 për qind. Kjo do të thotë se OSSH-së i lind e drejta që tani të kërkojë rritje me të paktën 1 për qind, por analizat dhe studimet do të nisin në shtator, për të marrë një vendim përfundimtar”, tregon për “Shqip” një burim zyrtar i ERE-s. Sipas tij, me situatën aktuale, rritja e çmimeve të energjisë është e pashmangshme në vitin 2011.
Humbjet e energjisë elektrike janë treguesit që përcaktojnë nevojën e kompanisë për të investuar në rrjet, e për pasojë detyrimin e saj për të kërkuar rritje çmimi, në mënyrë që të krijojë të ardhura dhe fond për të përballuar shpenzimet. Kur CEZ bleu OSSH-në, nisi studimin për të parë nivelin e humbjeve, nisur dhe nga fakti që shifrat e paraqitura nga qeveria ishin pak të besueshme. Gjendja e humbjeve të energjisë, nga faktori teknik dhe më së shumti nga vjedhja në linja, ishte tepër katastrofike dhe për ta përmirësuar, OSSH-ja planifikoi një nivel investimi tepër të lartë. Ajo çfarë kishte ndodhur në OSSH-në shtetërore ishte fshehja e të dhënave te faturimi, ku për të kamufluar nivelin e arkëtimeve, energjia e konsumuar i adresohej Operatorit të Shpërndarjes për qëllimet e veta. Kur çekët panë nga afër manovrën e fshehjes së humbjeve reale, dolën me konkluzionin se energjia që hidhet në rrjet humbet rrugës në masën 35.7 për qind dhe jo 33 për qind sikurse i kishte deklaruar qeveria para privatizimit. Në rast se kemi nivel humbje të lartë, aq më e madhe është mundësia për rritjen e çmimeve, për shkak të nevojave për para në sektorin e investimeve. ERE nuk e mori në konsideratë kërkesën e OSSH-së për humbje rreth 35 për qind, por e la të hapur rrugën e verifikimit, ndërsa mori vendim për rritje tarifash me 13 për qind, duke marrë si të qenë humbjet me 33 për qind. Në këtë konflikt, palët u gjendën në gjyq, e në rast se humbiste ERE, qeveria shqiptare duhet t’i paguante CEZ-it 60 milionë dollarë, si dëm i shkaktuar nga mosrritja e tarifave, sikurse e parashikon deklarata rregullatore.
I gjithë debati lidhej me nivelin e humbjeve për vitin 2008 e tutje, kur OSSH ishte në pronë të shtetit dhe ku të dhënat për privatin janë pak të besueshme. Kur kanë kaluar një vit nga verifikimi i të dhënave, del se OSSH-ja kishte pak të drejtë, ose më saktë 1 për qind më tepër nga pretendimet e qeverisë. Kjo e drejtë na detyron të kemi rritje të çmimeve për vitin që vjen me të paktën 1 për qind.
Sa i takon gjyqit, palët janë duke parë mundësinë e një kompromisi, në mënyrë që të mos preket garancia 60 milionë dollarë. ERE dhe OSSH-ja kanë kryer vetëm një seancë gjyqësore ku janë njohur me pretendimet, ndërsa të tjera janë shtyrë pa fund që prej muajit shkurt.
Përgjigju Duke Cituar
Postuar më parë nga Zoti Basha
Krijoni Kontakt