Pronarët e fajit...

[Faik]

Pronarët e fajit

Politika dhe politikanët shqiptarë në Maqedoni janë në gjendje kome...E vetmja që mund të bëjnë është të thonë se si duhet vepruar... ndërkohë "shtëpia po digjet"... thotë një student i gazetarisë në USHT.

Shkruan Fatmir Shabani

Politika dhe politikanët aktual në Maqedoni janë në gjendje kome. Politikanët duan që të ngrihen nga pavetëdija klinike por nuk munden. Ata duan që të bëjnë diçka sa për sy e faqe për të tërhequr vëmendjen e popullit por përsëri s`munden. E vetmja që mund të bëjnë është të thonë se si duhet vepruar.

Ç’do ditë që kalon po na sjell gjëra të reja dhe shumë të qarta për t`i kuptuar, madje edhe politikanët na e bëjnë të qartë se në zgjedhjet e ardhshme nuk duhet votuar për asnjërën parti shqiptare sepse populli shqiptarë në Maqedoni udhëhiqet vetëm nga një parti dhe ajo është “VMRO-DPMNE”-ja.

Përderisa bëhet fjalë për prishjen e marrëdhënieve ndëretnike në Maqedoni, për fajin nuk duhet të pyesim se i kujt është, sepse vet politikanët tanë janë prindërit dhe pronarët e fajit. Ata kanë lënë anësh të gjitha problemet dhe vuajtjet e popullit, vetëm e vetëm për të akuzuar njëra -tjetrën se cila e ka fajin më të madh!

Populli shqiptarë në Maqedoni çdo herë ka qenë i shkelur, i torturuar dhe i nënçmuar, deri në skajshmëri. Jo që jemi popull pa gjuhë, identitet dhe histori, por vetëm e vetëm se asnjëherë nuk e kemi lënë pa u shitur dhe nuk kemi lënë anësh bizneset dhe interesat personale.

Më kujtohet një fjalë popullore ku thonë “Armiku na bashkoi”, mirëpo tek ne ndodhë e kundërta: “Ra armiku e pa populli se kush është Sadiku”. Sepse deri në një kohë kur gjërat ishin të pa definuara mendonim se faji është tek të huajt, që shqiptarët nuk janë bashkë. Por jo edhe aq vonë kuptova se populli shqiptarë në Maqedoni nuk është bashkë, sepse duhet të paguaj çmimet e inateve të politikanëve dhe politik-bërësve shqiptarë.

Kreu i “DR”-së, Imer selmani disa ditë më parë u përcolli porosi BDI-së, Ali Ahmetit dhe atij të PDSH-së, Menduh Thaçit për të unifikuar qëndrimet dhe kapërcimin e inateve të politikes ditore partiakë. Kryetari I BDI-së Ali Ahmeti dhe partia e tij nuk komentuan rreth kësaj kërkese, mirëpo pa kaluar as edhe një ditë doli në skenë kryetari i PDSH-së MenduhThaçi duke u kundërpërgjigjur rreth kësaj kërkese dhe duke etiketuar Imer Selmanin si njeri “të sherbimit sekret” dhe si bashkpunëtorë i Nikola Gruevskit, duke dashur të thotë që “nuk e kalla un katundin po e kalli ai që deri dje ishte me mua!.”

Nuk do mend se kjo është vetëm një skenar përçarës duke pasur për synim pëçarjen e mëtutjeshme të partive politike shqiptare, vetëm e vetëm që projektet antishqiptare dalënga dalë të realizohen.

Nga ana tjetër Fazli Veliu i njohur si komandant “Daja” , deputet i BDI-së e njëherit edhe kryetar i Shoqatës së Veteranëve të Luftës (SHVL), jo me larg se dje kërkoi që Shqiptarët e Maqedonisë të jenë pjesë e bisedimeve për zgjidhjen e çështjes së emrit dhe të mbështesin propozimin që emri i ri i shtetit të Aë “Iliro Maqedonia”. Për mendimin tim kjo është ide shumë e qëlluar por pak sa e vonuar dhe në adresë të gabuar! Por ama, e rëndësishmja është që politikanët shqiptarë rolin e marketingut politik dinë se si e luajnë. Ata dinë për çdo ditë t’u përshtaten rrethanave dhe roleve që duhet aktruar.

Nga ata mund të dëgjosh edhe deklarata radikaliste, si: “Jemi më të fort në mes të Shkupit, sesa ne mal” ose mund të dëgjosh duke thënë për Gruevskin që ai është “Millosheviqi” i dytë ndaj shqiptarëve. Nga ana tjetër politikanët shqiptarë në Maqedoni, ende presin që po ai “Millosheviq” t’i realizojë kërkesat e atyre që perfaqësojnë shqiptarët në Maqedoni. Kjo nuk është asgjë tjetër pos politikë për kollktukë. Këtë nuk mund ta quajmë asgjë tjetër përpos “Populli u dënoftë deri në atë nivel që ju dënuat atë!”.

“Derisa shtëpia digjet dhe vëllezërit nuk mundohen që ta fikin atë, por grinden se cili kishte harruar cigaren ndezur,” ne si popull asnjëherë nuk kemi për të gjetur derën e shpëtimit. / Zhurnal /

http://zhurnal.mk/mk/cont.asp?k=2721...10154459&sh=13