11 vjetori i çlirimit te Kosovës

**Kosovelli** · 12-06-2010, 07:58

Prizren, përurohet monumenti i NATO-s

PRIZREN- Përurohet sot Monumenti i NATO-s me rastin e shënimit të Ditës së Çlirimit të Kosovës. Monumenti është ndërtuar në shenjë falënderimi për Aleancën Veri-atlantike dhe kontributin e saj për çlirimin, paqen dhe stabilitetin e Kosovës.
Ceremonia mbahet në hyrje të qytetit dhe ne te merr pjesë edhe kryeministri i Republikës së Kosovës, Hashim Thaçi.
Kryeministri Sali Berisha kujtoi dje 11-vjetorin e ndërhyrjes së NATO-s për çlirimin përfundimtar të Kosovës, dhe vlerësoi se "Kosova është shndërruar në një nga vendet më të sigurta në rajon dhe më gjerë, që prodhon paqe, stabilitet dhe bashkëpunim".

**Kosovelli** · 12-06-2010, 08:02

Sejdiu: 12 Qershori fundi i shtypjes së popullit të Kosovës

PRISHTINE- “Data 12 qershor simbolizon fundin e shtypjes së popullit të Kosovës nga një regjim brutal dhe agun e shpresës për një të ardhme më të mirë për të gjithë qytetarët e vendit tonë të dashur”, ka thënë presidenti i Kosovës, Fatmir Sejdiu, në një pritje të organizuar me rastin e 12 qershorit, ditës kur forcat paqeruajtëse të NATO-s hynë në Kosovë.

Kjo ditë në kalendarin zyrtar të festave në Kosovë shënohet si Dita e Paqes.

“Me gjithë vështirësitë normale që e karakterizojnë një shtet të posalindur, në tablonë e saj të përgjithshme, Kosova ka qenë dhe mbetet një rrëfim suksesi”, ka thënë mes tjerash presidenti i Kosovës, për të shtuar se “Kosova, shtet i lirë dhe sovran, atdhe i dashur i të gjithë qytetarëve të saj, anëtare e Bashkimit Evropian dhe e NATO-s, ka qenë, është dhe do të mbetet motoja e të gjitha angazhimeve tona politike e shtetërore”.

**Kosovelli** · 12-06-2010, 08:04

Berisha: Clirimi i Kosovës, mirënjohje NATO e SHBA

TIRANË- Kryeministri Sali Berisha kujtoi sot 11-vjetorin e ndërhyrjes së NATO-s për çlirimin përfundimtar të Kosovës, ndërsa vlerësoi se "Kosova është shndërruar sot në një nga vendet më të sigurta në rajon dhe më gjerë, që prodhon paqe, stabilitet dhe bashkëpunim".

Në një konferencë për shtyp, Kryeministri Berisha e quajti një datë historike për lirinë e kombit shqiptar, lirinë e Kosovës.

"11 vjet më parë forcat tokësore të Aleancës së Atlantikut të Veriut, pas një fushate rreth tre mujore të sulmeve ajrore, hynë në territorin e Kosovës dhe çliruan atë nga një regjim barbar çnjerëzor që shkatërroi mbi 20 mijë jetë njerëzore dhe rrafshoi mbi 130 mijë banesa, shkolla, spitale dhe kopshte", tha Kryeministri.

Ai shprehu mirënjohjen ndaj ushtrive të vendeve anëtare të NATO-s, qeverive të tyre dhe ish Presidentit të SHBA-së, Bill Klinton, që udhëhoqi Aleancën me një betejë vendimtare për lirinë e shqiptarëve, për paqen dhe sigurinë në Kosovë, në rajon dhe në Europë".
(e.n/BalkanWeb)

**Kosovelli** · 12-06-2010, 08:13

Kryeministri uron qytetarët për Ditën e Paqes

Sot, në njëmbëdhjetë vjetorin e çlirimit të Kosovës, kujtojmë simbolin e sakrificës së gjithë popullit të Kosovës, babain e Pavarësisë së Kosovës, komandanti tonë legjendar, Adem Jashari dhe familjen e tij heroike, ka thënë kryeministri Hashim Thaçi me rastin e 11 vjetorit të çlirimit të vendit.

Përmes një mesazhi, Thaçi ka thënë se 11 vjetori i çlirimit dhe 12 Qershori - Dita e Paqes edhe shënon ditën e fillimit të epokës së lirisë, ditë me të cilën çdo qytetar i vendit tonë ndihet krenar.

Ai tha se në këtë ditë të madhe kujtohen të gjithë dëshmorët e lirisë, martirët dhe qytetarët që dhanë jetën në rrugëtimin e gjatë për çlirimin dhe pavarësimin e Kosovës.

“Sot, në njëmbëdhjetë vjetorin e çlirimit të Kosovës, kujtojmë simbolin e sakrificës së gjithë popullit të Kosovës, babain e Pavarësisë së Kosovës, komandanti tonë legjendar, Adem Jashari dhe familjen e tij heroike”, ka thënë ai.

Sipas tij, përmasën madhore dhe historike Ditës së Paqes ia jep edhe realiteti i shtetit të pavarur dhe demokratik të Kosovës, si një shtet me qeverisje të mirë, efektive dhe transparente, duke garantuar mbrojtjen afirmative të të drejtave për të gjitha komunitetet e vendin tonë.

Ai kujtoi faktin se tashmë Republika e Kosovës është e njohur nga 69 shtete të botës, si dhe po arrin suksese të vazhdueshme në të gjitha fushat, që nga avancimi i infrastrukturës së gjithanshme, në arsim, në zhvillimin ekonomik dhe në sfera tjera.

Kryeministri Thaçi tha se Kosova së shpejti do të anëtarësohet edhe në Bankën Evropiane për Rindërtim dhe Zhvillim, duke e hapur kështu rrugën e pandalshme të zhvillimit të qëndrueshëm ekonomik.

“Përvjetori i njëmbëdhjetë i çlirimit, Republikën e Kosovës e gjen me fillimin e realizimit të projektit të përmasave historike, si autostradës Vërmicë-Prizren–Prishtinë-Merdarë apo e njohur si Autostradë e Kombit. Ëndrra e kamotshme e qytetarëve të Kosovës për lëvizje të lirë, për zhvillim të qëndrueshëm ekonomik, për integrim, po fillon të bëhet realitet”, është shprehur ai.

Ai ka siguruar qytetarët se çfarëdo që të jetë vendimi i Gjykatës Ndërkombëtare të Drejtësisë për shpalljen e pavarësisë, Kosova do të vazhdojë përpara, duke realizuar njohje të reja dhe hapur kapitullin e integrimeve për shtetin e Kosovës.

Edhe në këtë rast, kryeministri Thaçi e ka theksuar përkushtimin për qeverisje të mirë, fuqizim të sundimit të rendit dhe ligjit.

“Lufta e pa kompromis ndaj korrupsionit dhe krimit të organizuar është përkushtimi ynë më i fuqishëm për të ruajtur besimin dhe imazhin e shtetit tonë. Institucionet e Kosovës, do të jenë në vijën e parë në luftë kundër korrupsionit, duke vlerësuar lartë rolin mbështetës të institucioneve ndërkombëtare në vend”, është shprehur ai.

Në Ditën e Paqes, sipas Thaçit një falënderim u takon edhe eprorëve dhe ushtarëve të aleancës më të madhe ushtarake në botë, NATO-s dhe Shteteve të Bashkuara të Amerikës, Bashkimit Evropian dhe të gjitha vendeve tjera demokratike, të cilat me përkrahjen e vazhdueshme dhe në të gjitha fushat e ndihmuan dhe po e ndihmojnë ndërtimin e shtetit tonë.

**Llapi** · 12-06-2010, 09:28

Thaçi: Ky është monument i shpirtit dhe zemrave të qytetarëve të Kosovës

Prizren, 12 Qershor 2010 (Kosovapress) Koha 12:55

Hyrja e trupave të NATO-s në Prizren dhe kontributi i tyre për ruajtjen e paqes, ndihma e dhënë popullatës së këtushme dhe angazhimi i tyre në krijimin e një mjedisi të sigurt tashmë është përjetësuar me ngritjen e një monumenti kushtuar Aleancës-Veriatlantike, në lagjen “Bazhdarhane” të Prizrenit.

**Llapi** · 12-06-2010, 11:44

Kryeministri Thaçi: Monumenti kushtuar NATO-së shpreh falënderimin e popullit të Kosovës për Aleancën Veriatlantike

Prishtinë, 12 qershor 2010

Kryeministri i Qeverisë së Kosovës, Hashim Thaçi, i shoqëruar nga ministri i Ambientit dhe Planifikimit Hapësinor, Mahir Jakcilar, sot mori pjesë në përurimin e Monumentit të Paqes kushtuar Trupave të NATO-së në Prizren.

Kryeministri i Kosovës, Hashim Thaçi në emër të Qeverisë së Republikës së Kosovës me këtë rast qytetarëve të Prizrenit u uroi Ditën e Çlirimit. “Sot po shënojmë ditët e lirisë së shtetit tonë, ditët kur shënuam kthesën historike të vendit dhe shoqërisë sonë”, theksoi kryeministri Thaçi, duke shtuar se Kosova tashmë ka fituar njohjen e fuqishme nga 69 shtete.

“Sot Kosova ka të ardhme të sigurt euro-atlantike. Është hapur kapitull i ri, ai i integrimit të Kosovës në NATO dhe në BE dhe po ndërtohet një shtet sipas standardeve demokratike dhe multietnike dhe shembulli më i mirë për këtë është vet qyteti i Prizrenit”, theksoi kryeministri Thaçi.

Kryeministri Thaçi, Monumentin e NATO-s që u përurua sot e vlerësoi si monument që pasqyron shpirtin dhe zemrat e qytetarëve të Kosovës, sepse atëherë kur njësitet e Ushtrisë Çlirimtare të Kosovës, popullata e Kosovës luftoi kundër aparatit të dhunshëm policor e ushtarak serb, në krah të tyre dolën forcat e Aleancës së NATO-s.

Kryeministri Thaçi me këtë rast shprehu falënderimin për të gjitha vendet e Aleancës dhe SHBA-në që u vunë në anën e humanizmit dhe paqes.

Ndërkaq, komandanti i KFOR-it në Prizren, gjenerali gjerman Manfred Hofmeyer, monumentin e vlerësoi si simbol të mirënjohës të popullit të Kosovës për paqeruajtësit ndërkombëtarë.

Ramadan Muja, kryetari i Komunës së Prizrenit, shprehu dëshirën që së shpejti krahas flamujve të vendeve të tjera anëtare të NATO-s, të valojë edhe flamuri i Kosovës.