Kryeministri ka shtuar për tre vjet llogaritë bankare dhe pasuritë e patundshme
Presidenti i Republikës së Kosovës, Fatmir Sejdiu, është më i “varfër” sivjet sesa para tre vjetësh. Duke krahasuar formularët e deklarimit të pasurisë para zgjedhjeve të përgjithshme të vitit 2007 dhe deklarimit të pasurisë në vitin 2010, Presidenti Sejdiu ka 21 mijë e 600 euro më pak para të gatshme. Kështu bëri të ditur në një shkrim të djeshëm, e përditshmja e Kosovës “Koha Ditore”. Në procesin e deklarimit të pasurisë së organizuar nga OSBE-ja para tre vjetësh, para të gatshme Sejdiu kishte deklaruar 119.827 euro të shpërndara në tri banka komerciale, ndërsa sivjet ai ka deklaruar 98.200 euro. I pari i vendit sivjet nuk ka deklaruar edhe një shtëpi 250 metra katrorë. Para tre vjetësh ai kishte thënë se ka një shtëpi personale me vlerë 200 mijë euro, si dhe një shtëpi tjetër të përbashkët me familjen prej 500 metrash, në vlerë prej 400 mijë eurosh. Ndryshe nga Sejdiu, që është “varfëruar” këto tre vjet, partneri i tij i koalicionit, Kryeministri Hashim Thaçi, duket se e ka rritur pasurinë që kur ka ardhur në pushtet. Në vitin 2007 Thaçi kishte deklaruar vetëm 540 euro para të gatshme në një bankë, ndërsa sivjet ka 324 mijë e 901 euro në dy llogari bankare. Në vitin 2007, sa ishte në opozitë, Thaçi kishte thënë se ka një shtëpi personale 250 metra katrorë në Prishtinë në vlerë prej 150 mijë eurosh, ndërsa sivjet ka thënë se këtë shtëpi e ka shitur 260 mijë euro. Kurse në fshatin e tij të lindjes në Brojë, Thaçi para tre vjetësh ka thënë se ka shtatë hektarë tokë, vlera e së cilës është 140 mijë euro, ndërsa sivjet për të njëjtën tokë 180 mijë euro, pa përmendur vlerën e shtëpisë, për të cilën ka thënë se kushton 80 mijë euro. Kryeministri i vendit është pasuruar edhe me një truall me sipërfaqe 15 ha e 75 metra në Vetërnik, me vlerë 175 mijë euro, në të cilin po ndërton një shtëpi, sipas tij, 700 metra katrorë, që kushton 230 mijë euro. Gjithë këtë truall dhe shtëpi me vlerë 405 mijë euro ka thënë se e ka mbuluar me 260 mijë euro nga shitja e shtëpisë në lagjen “Arbëria”. Sivjet Thaçi po ashtu ka deklaruar edhe një veturë të tipit “Grand Chiroki”, të blerë 11 mijë euro, me paratë e kursyera. Nëse nuk ka ndonjë burim tjetër të ardhurash, Kryeministri i vendit këtë pasuri e ka arritur me pagën e tij vjetore 17 mijë e 318 euro, pagën e bashkëshortes prej 15 mijë e 608 dhe me një kredi 100 mijë euro.
Më i pasur sivjet është deklaruar edhe ish-kryetari i Kuvendit të Kosovës, Nexhat Daci, aktualisht kryetar i LDD-së në opozitë. Pasuria e tij e paluajtshme në vitin 2007 ka qenë një shtëpi 300 metra katrorë në Prishtinë me vlerë 120.000 euro dhe një vilë në Brezovicë me 100 metra katrorë, me vlerë 50 mijë euro.
Kryetari LDD-së sivjet ka thënë se e njëjta shtëpi ka vlerë 250 mijë euro, vila në Brezovicë 90 mijë euro dhe 41 mijë euro para të gatshme në dy llogari bankare, ndërsa tre vjet më parë kishte thënë se nuk ka asnjë cent.
Shefi i grupit parlamentar të Aleancës për Ardhmërinë e Kosovës, ish-ministri Ardian Gjini, sipas asaj që ka deklaruar, asnjë cent nuk e ka në xhep, pasi sivjet nuk ka deklaruar asnjë cent para të gatshme. Gjini kishte deklaruar në vitin 2007 një truall tre ha në Prishtinë me vlerë 200 mijë euro dhe një shtëpi banimi në Gjakovë me vlerë 250 mijë euro. Pronë private Gjini kishte deklaruar vetëm veturën e tij të tipit “Mercedes” në vlerë prej 11.000 eurosh. Ndërsa deri më 1 gusht i kishte thënë se ka pasur borxh 65.000 euro në një bankë.
Sivjet Gjinit, e njëjta shtëpi në Gjakovë duket se i është rritur për 100 metra. Sipas tij, shtëpia në Gjakovë është 350 metra katrorë, por me vlerë 250 mijë euro, sikurse para tre vjetësh. Ndërsa tre ha truall në Prishtinë kanë po të njëjtën vlerë sikurse para tre vjetësh, 200 mijë euro. Nëse Gjini ka deklaruar të njëjtën veturë “Mercedes”, atëherë vlera e saj i është rritur për 4 mijë euro, pasi sivjet ka thënë se ka një të tillë me vlerë 15 mijë euro. Ish-zëvendëskryeministri Lutfi Haziri, aktualisht ministër i Kulturës, Rinisë dhe Sporteve, është pasuruar shumëfish për tre vjet. Në vitin 2007 ai kishte deklaruar 45 mijë euro para të gatshme, ndërsa kishte thënë se nuk ka pasuri të patundshme. Tani Haziri ka thënë se ka një shtëpi familjare me 16 ha truall, pronë e përbashkët me prindër, në vlerë 350 mijë euro, pesë ha truall pronë e bashkëshortes në vlerë 12 mijë euro, një veturë BMW X5 në vlerë 25 mijë, para të gatshme në bankë 78 mijë euro.
Shqip
Përgjigju Duke Cituar
Postuar më parë nga Daja-GONI
Krijoni Kontakt