Sezoni turistik, inaugurimet dhe rrugët

[shoku_tanku]

Nëse vitin e kaluar qershori erdhi bashkë me temperaturën e lartë dhe ethet e fushatës zgjedhore, këtë vit po vjen nën klimën e acartë të marrëdhënies së ngrirë prej gati një viti të pushtetit me opozitën e majtë e të djathtë për shkak të mungesës së transparencës së procesit të kaluar zgjedhor.


Askush nga strukturat qeveritare përgjegjëse këtë vit nuk është kujtuar se bashkë me qershorin, për shkak të sezonit turistik, fillon dhe rritja e fluksit të turistëve.


Përjashtim bënë vetëm disa shoqata që vullnetarisht kanë ndërmarrë aksione qytetare sensibilizuse pastrimi të bregdetit në disa zona, që gjithsesi duhen falënderuar.


Reklama mediatike për turizmin shqiptar, që kaloi kufijtë vitin e kaluar me spote televizive disa qindra milionëshe në disa kanale gjigante mediatike botërore, këtë vit është zëvendësuar me inaugurime modeste rrugësh nga vetë kryeministri disa që fillojnë e disa që thuhet se mbarojnë me destinacion mbërritjen në bregdet.


Nisa ta shkruaj këtë opinion, duke marrë shkas nga një udhëtim që mu desh të bëj këto ditë në Sarandë, Gjirokastër, Vlorë e Korçë, Shkodër, gjatë të cilit bëra disa "vrojtime" në cilësinë e ekspertit të çështjeve të sigurisë rrugore.


Çfarë rezultoi lidhur me gjendjen e akseve kryesore rrugore që të çojnë në destinacione turistike?
Aksi Qaf-Thanë-Pogradec dhe akset urbane të këtij qyteti janë akoma në rikonstruksion (edhe pse shiritat e fillimit të punimeve janë prerë prej kohësh) dhe nuk do të jenë të gatshëm as këtë sezon për t'u krijuar komoditetin e nevojshëm e të domosdoshëm turisteve që duan të vizitojnë këtë zonë.


E keqja është se në këtë segment për muaj të tërë nuk është punuar fare ndërsa tani që afron sezoni sheh ndonjë fadromë që heq ndonjë kamion dhe.


Aksi Plepa-Rrogozhinë jo vetëm nuk përfundoi sipas planifikimit, por do të vazhdojë edhe këtë vit të jetë një problem i madh për trafikun dhe mundim i të gjithë shtetasve vendas apo të huaj që do të udhëtojnë në destinacione turistike.


Në aksin rrugor interurban kryesor Lushnjë-Fier inauguruar në prag të zgjedhjeve të vitit të kaluar, janë lejuar tre kryqëzime në nivel në kundërshtim flagrant me kërkesat e nenit 2 pika B të Kodit Rrugor të Republikës së Shqipërisë.


Nuk ka rëndësi nëse kjo shkelje ligjore ka ndodhur për faj të projektuesit, zbatuesit, audituesit, kolauduesit, për arsye të natyrës korruptive apo abuzime financiare. E them këtë, pasi situata në këto tre kryqëzime të kundraligjshme minimalisht duhej zgjidhur me rrethrrotullime shumë pak të kushtueshme (do ishte mëkat nëse këto shpenzime janë kursyer apo me keq shpërdoruar e përvetësuar).


Gjatë këtij viti në këto tre kryqëzime antiligjore kanë ndodhur disa ngjarje aksidentale me pasojë jetë njerëzore e dëme materiale dhe askush nuk i është drejtuar shtetit shqiptar si përgjegjës direkt i tyre për përgjegjësinë penale dhe atë të zhdëmtimit të pasojave, në të kundërt mund të jenë dënuar padrejtësisht personat e gabuar.


Shtimi i fluksit të mjeteve për shkak të sezonit mund të sjellë të tjera ngjarje me pasoja të dhimbshme, nëse askush nuk reagon e ndërhyn për ta kthyer në normalitet këtë segment rrugor në këto tre "njolla të zeza".


Nuk mund të mos të bjerë në sy mungesa e bajpasit të Fierit i përfolur (prej më se 2 vjetësh) se ka përfunduar projekti e do të fillojë së shpejti edhe pse s'duket gjë në horizont. Duke vazhduar me destinacion Gjirokastrën nuk mund të mos ndjesh lodhjen e mundimin për të përshkruar segmentin problematik Ballsh-Tepelenë, jo vetëm në segmentet që kanë vite që riparohen e rrëshqasin sërish, por dhe nga gjendja skandaloze e shtresës së asfaltit, si dhe nga mungesa e elementëve të sigurisë dhe sinjalitikës.


Ndërkohë që për ritmet e punës në segmentet Levan-Tepelenë dhe Levan-Vlorë as që bëhet fjalë për ecuri, si duket "tradita" e do që këto vepra të mos përfundojnë asnjëherë sipas planifikimit, por në prag të fushatës së ardhme zgjedhore.


Ndoshta në këtë ecuri me ritme breshke një faktor i pa deklaruar nga qeveria është dhe kriza financiare, mungesa e likuiditeteve dhe borxhet ndaj firmave zbatuese, çka vështirësojnë vazhdimin e punimeve në këto vepra publike. Nuk do të doja të besoja edhe ndonjë variant të "zhdukjes pa lënë gjurmë" të ndonjë firme zbatuese që pasi ka përftuar financimet ka lënë në këmbim kantierin me disa mjete që kanë shërbyer për inaugurimin e fillimit të punimeve.


Në këto kushte pushuesve do t'u duhet të mbërrijnë edhe në Vlorë përsëri ne rrugë pa standarde cilësie e sigurie. Ndërkohë që qyteti Vlorës është qyteti që ka infrastrukturën më të dobët rrugore në tërë zonën turistike, mjafton të kalosh në segmentin nga ish-vilat e udhëheqjes në kampin e punëtorëve që shërben si aks rrugor nacional pasi përballon gjithë automjetet që hyjnë në Vlorë nga Orikumi (është pak ta krahasosh me një rrugë fshati) që të bindesh për këtë.


Prej vitesh Vlora vazhdon të jetë arenë "përplasjesh" urojmë jo hakmarrjeje mes pushtetit qendror e vendorëve për fondet e investimeve jo vetëm në infrastrukturën rrugore. Përplasje që ka ofruar si produkt të qytetit kryesor turistik të vendit jo vetëm problemet mjedisore e të ndotjes, por dhe një trafik sfilitës në kurriz të qytetarëve vlonjatë e atyre që duan të shijojnë bregdetin e tij.


Në qytetin e Sarandës, ku turistët më së shumti i drejtohen bregdetit të Ksamilit dhe qytetit antik të Butrintit, këtë vit nuk do të mund të shijojnë bukuritë e tyre, pa u përballur me streset që të krijon qarkullimi në një rrugë tërësisht në rikonstruksion.


Është e çuditshme mënyra e planifikimit të punimeve dhe rikonstruksioneve në këto segmente turistike pikërisht në prag të çeljes së sezoneve turistike, ashtu sikundër po në të njëjtën kohë fillojnë dhe aksionet e prishjeve të ndërtimeve të paligjshme, të cilat me gërmadhat e grumbujt e inerteve që lënë pas ngjasojnë me skena tërmetesh apo bombardimesh.


Ndërsa premtimi kryeministror për të asfaltuar çdo metër rrugë që të çon në gjiret e mrekullueshëm të bregdetit të kësaj zone si duket i është lënë një periudhe tjetër.


Në aksin e kombit përveç përfundimit të segmentit 60.4 km Rrëshen-Kukës (vetëm me njërin nga tunelet), pjesa tjetër e asaj që quhet rruga Durrës-Kukës edhe këtë vit do të vazhdojë të jetë kantier punimesh krejtësisht i pa plotësuar me sinjalitikën që parashikon legjislacioni, ç'ka rëndon trafikun dhe vazhdon të marrë jetë njerëzish në aksidente të shumta rrugore.


Meqë këto ditë Kryeministri preu disa shirita inaugurimi rrugësh rurale e dytësore në rrethin e Beratit, shpresoj t'i ketë tërhequr vëmendjen gjendja skandaloze e aksit rrugor nacional Lushnjë - Berat apo Fier - Berat, për të planifikuar ndonjë fond edhe për këto segmente që çojnë vizitorët në qytetin 2400-vjeçar dhe që është pak të thuhet se janë lënë në mëshirë të fatit.


Kjo është në vija të trasha situata e sigurisë vetëm për sa i përket infrastrukturës së akseve rrugore kryesore të vendit, e cila përbën vetëm një nga brinjët e trekëndëshit të sigurisë rrugore.
Që të plotësohet tabloja e këtij trekëndëshi duhet analizuar edhe performanca e strukturave te zbatimit të ligjit dhe posaçërisht policisë rrugore, si dhe realizimi i projekteve e aktiviteteve publicitare, sensibilizuese, publikimeve e botimeve për edukatën rrugore.


Pa u futur në analizë të hollësishme të tyre, konstatimet janë të zymta pasi ky sezon i gjen strukturat e policisë rrugore në ankthin dhe ethet e vendit të punës për shkak të ristrukturimit që mendoj se është shumë i vonuar pas deklaratave optimiste të Ministrit të Brendshëm e Drejtorit të Përgjithshëm të Policisë Shtetit para disa muajsh.


Ndërsa për pjesën e edukatës rrugore do t'u rekomandoja Ministrit të Brendshëm dhe atij të Punëve Publike e Transportit që të paktën të kishin planifikuar publikimin e një spoti të ngjashëm me atë të liberalizimit të vizave, që ka filluar të jepet me shumicë këto ditë edhe pse vizat do të mund të liberalizohen në rastin më të mirë pas sezonit turistik.


Janë të gjitha këto arsye, që me gjithë dëshirën për të mos e çelur ditën me makthin e njoftimeve për vdekjen e radhës në rrugët e vendit, na e zbehin optimizmin për përmirësimin e treguesve të sigurisë rrugore gjatë këtij sezoni turistik e më pas.

Qendra e Studimeve të Sigurisë Rrugore

Berti Koxha\Shekulli