Gjithë shqiptarët të mësojnë me tekste të njëjta shkollore

Shkup, 28 maj - Shqiptarët e Maqedonisë shprehin interes të përfshihen në idenë e kryeministrit shqiptarë Sali Berisha, që shqiptarët e Shqipërisë dhe të Kosovës të mësojnë në tekste të njëjta shkollore, shkruan sot “Lajmi” i Shkupit.
Nuhi Dardhishta, kryetar i Lidhjes së Arsimtarëve Shqiptarë (LASH), tha se për këtë gjë disa herë është biseduar. “Shpesh herë kemi iniciuar që nxënësit shqiptarë të Maqedonisë t’i kenë tekstet e njëjta me ata të Kosovës dhe Shqipërisë, por ende nuk e kemi arritur këtë gjë”, tha Dardhishta, duke përshëndetur idenë më të re të kryeministrit shqiptarë. Ai shtoi se ky material do të ishte i dobishëm dhe më i përsosur për nxënësit shqiptarë në vend. “Ky vendim do të ishte i mirë se ardhur, pasi që nuk do të kishte më histori të shtrembëruar e të shkruar nga autor gënjeshtarë. Ndryshime do të mund të bëhen vetëm në tekstet e gjeografisë”, shtoi Dardhishta. Ndërsa zëdhënësi i Ministrisë së Arsimit, Goran Galevski theksoi se së pari duhet që të bëhen disa procedura sepse bëhet fjalë për tekste të një shteti tjetër. “Duke pasur parasysh se kohë më parë u morr vendimi që të përkthehen rreth 500 tituj të literaturës botërore, me anë të procedurave të parashikuara me ligj mund të vendoset që shqiptarët e Maqedonisë të mësojnë me literaturën e njëjtë si të Shqipërisë dhe Kosovës, por së pari duhet të shqyrtohet ai material”, tha Galevski. Ai gjithashtu shtoi se për këtë gjë duhet të shprehin pëlqim edhe mësimdhënësit. Kurse nga sektori për informim i këtij institucioni thonë që mësimi me literaturë të përbashkët me Kosovën dhe Shqipërinë do të ishte një ide e mirë. “Mësimi në gjuhën shqipe me një literaturë të përbashkët është një ide shumë e mirë dhe ashtu duhet të jetë, por planprogramet ne i kemi të ndryshme pasi që bëhet fjalë për shtete të ndryshme”, deklaroi Numan Sallau, nga sektori për informim i MASH-it. Ai shtoi se kjo çështje mund të zgjidhet. “Për tu marrë një vendim i tillë Ministria e Arsimit të Maqedonisë duhet të nënshkruaj marrëveshje me shtete shqiptare fqinje dhe kjo çështje do të rregullohet”, theksoi Sallau. Ndërsa gjuhëtarët shqiptarë vlerësojnë se duhet të formohet një grup ekspertësh të cilët do t’i hartojnë këto tekste të përbashkëta. “Është një ide e mirë, por pasi që bëhet fjalë për tre shtete mendoj se duhet të formohet një ekip ekspertësh shqiptarë dhe ti hartojnë këto tekste që të kenë informata të bollshme për shqiptarët e të tre shteteve”, tha Asllan Hamidi, gjuhëtar dhe dekan në fakultetin e Albanologjisë në Shkup. Ai gjithashtu shtoi se pas këtij hartimi do të ishte mirë që të gjithë shqiptarët kudo që ndodhen të mësojnë me këto tekste shkollore me qëllim që të mos ketë laramani dhe informata të pasakta për popullin tonë. Ndërkaq kryeministri i Shqipërisë ditë më parë tha se Shqipëria dhe Kosova duhet të shkojë drejt teksteve të përbashkëta. “Ne duhet të shkojmë drejt teksteve të përbashkëta, me përmbajtje të njësuara, pasi të vërtetat janë një dhe detyra e shkencës është t’u heqë pluhurin dhe mykun e së kaluarës e t’i bëjë ato të shndrisin” tha Berisha .