Referati I Im I Lexuar Në Kuvendin

[Ahmed.M]

Ahmed MORA

REFERATI I IM I LEXUAR NË KUVENDIN
ZGJEDHOR TË PPD-së NË KËRÇOVË


Në Kuvendin Zgjedhor i mbajtur me datë 23.06.1990, në të cilën pas miratimit të rendit të ditës dhe zgjedhjen e tre komisioneve si që janë:

a) Komisioni zgjedhor
b) Komisioni verifikues dhe
c) Komisioni mbikqyrës, që të tre me nga tre anëtarë.

Nga të pranishmit në sallë, rendi i ditës u aprovua me aklamacion dhe pastaj u kalua në pikën e parë, ku u zgjodhën anëtarët e Komisionit zgjedhor dhe ate: Tefik Mahmudi, Sejdin Abazi dhe Ibrahim Rizmani; u votua për të gjithë dhe pas votimit e aprovimit të votimit u konstatua se Këshilli zgjedhor u zgjodh.

Anëtarë të Komisionit verifikues u zgjodhen zotërinjtë: Murat Hyseini, Qamil Veliu dhe Nejazi Fejza (MORA).

Anëtarë të Komisionit mbikqyrës u zgjodhën zotërinjtë: Islam Mehmedi, Nazmi Sadiku dhe Shaban Bajrami prej fshatit Baçisht.

Pas verfikimit të komisioneve mbledhja vazhdoi punën me pikën e dytë të rendit të ditës, ku në faltore me rradhë u paraqitën disa diskutues e mandej për diskutim u paraqita unë AHMED MORA, aktivist konsekuent i Këshillit nismëtar dhe të përkohshëm të PPD-së në Kërçovë, duke Ju drejtuar delegatëve të Kuvendit, musafirëve nga Komunat e Strugës, Gostivarit, Tetovës, Shkupit, Brodit dhe të pranishmëve me përshëndetjet.

Zonja dhe Zotërinj, të nderuar delegatë, të dashur musafirë, mirëse na erdhët në Kuvendin zgjedhor të Degës së PPD-së në Kërçovë.

Diskutimin tim do ta filloj me proverbën popullore që ka qenë moto e BALLIT KOMBËTAR: “NË ROBËRI PUNA JONË ËSHTË LUFTA, NË LIRI, LUFTA JONË ËSHTË PUNA.” Pra, ne duhet t’i rrekemi punës, se puna është burim i vërtetë i mirëqenjes njerëzore e cila i shmang tri veti negative, ata janë:
a) Shqetësimi,
b) Dëshirat që na shpijnë në rrugë të gabuar dhe
c) Vobegësia.

Duka patur parasysh këto virtyte, atëherë e qartë është se kalin duhet ta kapim për freri e jo për bishti.

(foto)


1. E lusë këtë tubim dhe i propozoj këtij Kuvendi të PPD-së që ditën e flamurit kombëtar 28 Nëntorin, ta shpallë ditë feste. Meqë partia komuniste e humb fuksionin e saj dhe zhduket sistemi një partiak, atëherë, le të zhduket edhe simboli i saj (ylli) i imponuar mbi kokat e shqiponjës kreshnike, ndërsa flamuri të ngel i pastër, dhe kurrë më të mos lejohet të manipulohet me te.

2. Më habit fakti se shoku gazetar i cili kishte bërë një intervistë me zotëri Vasil Tupurkovskin, ku në të njejtën intervistë z. Vasil Tupirkovski pyet i habitur, pse flamuri shqipëtar nuk valon në Strugë?

Mos vallë, a thua se flamuri vetëm në Strugë nuk valon? E, zotëri Vasil Tupurkovski përgjigjet me habi: “Pse nuk valon në Strugë e kush e ka nxjerr dhe dhënë këtë urdhër?” Kërkojmë në një intervistë të ardhshme të jep dëshmi. Por, përsëri pyetemi, mos vallë zotëri Tupurkovski nuk di as për paralelet e “përziera” nën moton e “vëllazërim – bashkimit”, por vetëm në gjuhën maqedone?!, të cilët na çojnë në asimilim total.

Zotëri Vasil Tupurkovski me një diapazon të gjerë të dijenisë botërore, por edhe të asaj kombëtare për popullin e vet në shtetet fqinje din çdo gjë, gjë që na gëzon, por të mos dijë për hallet e popullit tonë në “shtetin e përbashkët” – NA BEFASON.

3. Apeloj që me kërkesë të PPD-së të kërkohet që RTV-ja si rrjetë difuzive në Shkup të siguroj program të plotë në gjuhën shqipe e njëherit të mundësohet që ta kapim TVSH-në dhe RTV-në e Prishtinës, e jo të ndërtohen repetitor për pengesa në çdo majë mali të cilat janë investime të kota.

4. Kërkoj që PPD-ja të angazhohet për tokat e aneksuara, që janë marrë pa kurrfarë mëkati dhe janë formuar të ashtuquajturat “lagjet e uzurpuesëve” ose tokat që janë marrë për TE në Osllomej. Të kompenzohen me të holla, me një çmim real, e pas shfytëzimit të tyre për eksploatimin e thëngjillit, ata t’u kthehen pronarëve.

5. Amandamenti 56 me të cilin IJRM-ja pranohet si shtet sovran vetëm i maqedonasëve, të mos pranohet, por i njejti amandament të zëvendësohet dhe të jetë kështu: “Maqedonia është shtet sovran dhe i barabartë i maqedonasëve, shqipëtarëve, turqëve, vllehëve, muslimanëve, romëve e i të gjithë të tjerëve që jetojnë në te, pa marrë parasysh përkatësinë e tyre nacionale, fetare e tjera.”

6. Kërkoj që nga ky Kuvend Zgjedhor i PPD-së të lëshohet një PROTESTË kundër ministrit të punëve të jashtme të SFRJ-së – zotëri Budimir Llonçarit, për deklaratën e rrejshme se populli shqiptar ka ardhur në Ballkan në shekullin e XIX–të, kur dihet mirë se shqiptarët janë një ndër popujtë më të vjetër në Ballkan.

Le ta dijë mirë e mirë zotëri B. Llonçari, se shqipëtarët nuk janë popull nomad, por janë popull autokton, në troje të veta.

a) Për zhvillimin e kampanjës permanente që po e bën ai, me segmentin antishqiptar në arenën botërore; se shqiptarët janë ende të egër, se revolucioni në Kosovë është vetëm vëllavrasje ndërmjet shqiptarëve musliman e të krishterë, gjë që nuk është e vërtetë, por le ta di bota e mbarë se, është luftë për sovranitet kombëtar.

b) Për të drejat njerëzore dhe manipulimin që po e bën ai, ku mashtron opinionin botëror në diasporë gjoja se populli shqiptar i gëzon të gjitha të drejtat legjitime dhe të barabarta njerëzore në Federatë, ndërsa ne e kemi të qartë se çfarë të drejtash po gëzon populli shqipëtar në këtë federatë “Juridike dhe të barabartë” ku dihet mirë e mirë se populli shqiptar është qytetar i rendit të dytë, i torturuar dhe persekutuar.

7. E lusë PPD-në si organ legjitim, t’u bëj një notë protesti organeve federative që të mos mbajnë ligjerata të rrejshme jashtë Jugosllavisë për popullin shqiptar, pasi që /ilirollogët/shqiptarollogët me famë botërore janë edhe jashtë Jugosllavisë, ashtu që opinioni është i njohur shumë mirë dhe e dinë se shqiptarët nuk janë popull nomad, por le ta dijnë mirë se duke u munduar të bëjnë keq për ne, ata bëjnë keq vetëm për vete, për Jugosllavinë.

8. Propozoj që Humanistja më e madhe në botë, e cila ka marrë çmim Nobel për Paqë, që me gojë të vetë POHON se nga origjina dhe gjaku jam shqiptare, me emrin e vërtetë GONXHE BOJAXHIU, e lindur në Shkup më 1910, ndërsa e njohur me emrin plotë famë NËNË TEREZA, të propozohet dhe të jetë ANËTARE NDERI NË PPD.

9. Propozim – Në emër të PPD-së njëherë e përgjithmonë të çohet zëri kundër atyre që fëmijët tonë i sjellin në arkivole nga shërbimi ushtarak – Pra, kërkojmë që fëmijët tonë të mos na i kthejnë të vdekur nga ushtria, por në bazë të meritave të kthehen të graduar.

10. Propozoj që Parlamenti i Ri shumë partiak të përbëhet prej një DHOME – dhoma e qytetarëve, e jo prej dy dhomave: dhomë e ashtuquajtur dhoma e të punësuarëve, ku për hirë të punësimit minimal ne kemi humbje të mëdha, por nëse pranohet opcioni tjetër që parlamenti i ardhshëm të përbëhet prej dy dhomave, atëherë dhoma e të punësuarëve të shëndrohet dhe të emërohet me emrin dhoma e kombeve.

Ju përshëndes dhe Ju uroj ditë të mbarë.