Mijëra gra, në shesh para bashkisë, kundër keqpërdorimit që Edvini po u bën grave dhe vajzave në grevën e urisë
Sot, shoqata të ndryshme në mbrojtje të të drejtave të fmijëve, personalitete-gra të botës së artit, nëna, kryefamiljare nga e gjithë Tirana e përtej, u bashkuan në një protestë të fuqishme kundër Edi Ramës. Mbi 7 mijë gra në një protestë të paparë ndonjëherë rrethuan bashkinë e Tiranës, duke i kërkuar Edi Ramës të nxjerrë menjëherë nënat nga greva e urisë ku i ka futur si një akt çnjerëzor. Nënat që folën në protestë thanë se: “Zoti Rama, dramën tënde me fëmijë, mos e kthe dramë të fëmijëve të nënave shqiptare. Vetëm një katil mund t’i heqë fëmijës nënën nga koka dhe ta fusë në burgun e rrugës, siç ke bërë ti”. Edi Luarasi, një ndër personalitetet më të dashura të shqiptarëve, mori fjalën dhe tha: “Ti, zoti Rama nuk mund të na pengosh heqjen e vizave.
Ne duam të shohim fëmijët tanë. Ne duam të shohim mbesat dhe nipat tanë që jetojnë jashtë. Ti s’mund ta prishësh këtë moment që mezi po e presim. Suela Konjari, një aktore tjetër e madhe, i thirri zotit Rama: “Të flas si grua; nuk futen gratë në grevë. Nxirri nënat nga greva!
Vokshi: Asnjë politikan në botë nuk fut në grevë urie gra dhe nëna
Partia Demokratike akuzoi kryetarin e Partisë Socialiste, Edi Rama se po përdor për interesa të karrierës së tij politik gratë duke i futur në grevë urie. Deputetja e PD-së Albana Vokshi e cilësoi si të papranueshme futjen në grevë urie të grave dhe fajësoi për këtë kryetarin e PS-së, Edi Rama. “Kam dalë këtu jo si politikane, por do të flas si nënë, me dy fëmijë të vegjël që janë për mua mendimi i parë tek zgjohem dhe mendimi i fundit i ditës. Z. Rama, je i vetmi njeri në botë, por edhe si kryetar Partie, që fut në grevë urie nëna me fëmijë. Z Rama, nënat me fëmijë nuk futen në grevë urie. A mendon ti Z. Rama, qoftë edhe një herë të vetme, qoftë edhe një çast çfarë drame përjetojnë fëmijët e këtyre nënave?”, u shpreh deputetja e PD-së, Albana Vokshi. Ajo e akuzoi kryetarin e PS-së se nuk ka ndjeshmëri njerëzore dhe ai duhet të mbajë përgjegjësi për jetën e tyre. “Ti Z. Rama nuk mund të kuptosh çfarë do të thotë përkujdesi dhe përgjegjësia për fëmijët. Vetëm ne nënat e dimë. Z. Rama, fëmija është gjëja më e shtrenjtë për çdo nënë në botë, prandaj asnjë nënë nuk ta fal ty dramën që po përjetojnë fëmijët e tyre. Ata fëmijë që shohin nënat në burgun e rrugës po terrorizohen, Edhe ata nuk do të ta falin ty këtë. Nuk gjej dot emër tjetër për ty – Katil”, u shpreh Vokshi.
Krijoni Kontakt