Anetaresimi i Shqiperise ne Nato

[dodoni]

Takimi Shqipëri-Maqedoni-Kroaci, angazhim për një të ardhme të sigurt - Shprehet Presidenti Moisiu në fillim të punimeve të Samitit të Tiranës -


TIRANE, 12 Shkurt/ATSH-Enkelejda Koraqi/.- Presidenti i Republikës, Alfred Moisiu, vlerësoi të Mërkurën në fillim të punimeve të Samitit të Tiranës, mes presidentëve të Shqipërisë, Maqedonisë dhe Kroacisë, se "ky takim konfirmon angazhimin e përbashkët në ndërtimin e një të ardhme më të sigurt për vendet tona, për rajonin dhe për Europën". Presidenti i Maqedonisë, Boris Trajkovski, ai i Kroacisë, Stipe Mesiç, ndodhen në Tiranë, në takimin e parë të nivelit të krerëve të shtetit të të tre vendeve, me qëllim hartimin e një strategjie të përbashkët për integrimin në NATO. Në fjalën e tij, Presidenti i Republikës Moisiu, tha se "ky takim është një hap me vlerë në realizimin e synimit tonë final, integrimin e plotë të tre vendeve në NATO dhe në Bashkimin Europian". Ai theksoi se, pas një periudhe të gjatë të luftës së ftohtë dhe të katër luftrave ballkanike, "rajoni ynë paraqet një tablo të re dhe një klimë tjetër politike. Popujt tanë meritojnë një të ardhme paqësore, të bashkuar, të zhvilluar dhe të integruar në familjen e madhe europiane". Sipas Presidentit Moisiu, ky bashkëpunim mes tre vendeve kandidate për anëtarësim në NATO në Samitin e ardhshëm, "po futet në rrugë të mbarë dhe kjo forcon më tej stabilitetin e rajonit". "Nisma jonë për bashkëpunim trepalësh dhe synimi për anëtarësim në NATO, ka gjetur përkrahje të gjerë, si brenda vendeve tona ashtu edhe nga faktori ndërkombëtar", thaz.Moisiu, duke shtuar se prezenca në këtë takim të Tiranës e Ambasadorit të Shteteve të Bashkuara të Amerikës në Shqipëri, James Jeffrey, konfirmon edhe një herë mbështetjen e qeverisë amerikane. Më tej, Presidenti nënvizoi se takimi i tre Presidentëve në Tiranë zhvillohet në një kohë kur paqja dhe siguria në botë vazhdojnë të jenë të cënuara nga terrorizmi dhe nga regjimet si ai i Sadam Hysenit, që zotërojnë armë të shkatërrrimit në masë. Në këtë drejtim, ai vuri në dukje se "Shqipëria është e radhitur vendosmërisht në koalicionin antiterrorr dhe do ta mbështesë atë deri në fund". Nga ana e tij, Ambasadori i SHBA në Tiranë, Jeffrey, i cili merr pjesë në këto bisedime trepalëshe, siguroi përkrahjen dhe ndihmëm e SHBA në thellimin, lehtësimin e reformave, si dhe forcimin e stabilitetit në vend. Sipas tij, bashkëpunimi rajonal do të jetë tepër i frytshëm për të arritur këto objektiva". "Ne jemi të gatshëm të bashkëpunojmë me ju në të gjitha mënyrat për të arritur realizimin e këtyre aspiratave", tha ambasadori Jeffrey. /xh.c/inxhi/
2003-02-12



--------------------------------------------------------------------------------
Copyright © 2001 Albanian Telegraphic Agency! Inc. All rights reserved.
Pershendetje
Rrofshin Shqiptaret e Bashkuar dhe Shqiperia e Bashkuar