Autoritetet e Serbisë të njohin parimet e reciprocitetit
Me ftesë të udhëheqjes komunale në Bujanoc, në këtë qytet të premten ka qëndruar një delegacion i Lidhjes Demokratike të Dardanisë, i kryesuar nga kryetari i këtij subjekti politik, Akademik Nexhat Daci.
Duke folur para këshilltarëve komunalë në një seancë solemne, Daci tha se autoritetet serbe domosdo duhet të njohin parimet e reciprocitetit për shqiptarët e Luginës së Preshevës, ashtu siç respektohen të drejtat e komunitetit serbë në Republikën e Kosovës.
Duke theksuar domosdoshmërinë e njohjes së identitetit shqiptar, kreu i LDD-së ka inkurajuar shqiptarët e Luginës së Preshevës që të unifikohen në qëndrimet e tyre për tejkalimin e sfidave.
Kryetari i komunës së Bujanocit, Shaip Kamberi, e ka quajtur domethënëse vizitën e liderit të LDD-së, në këtë periudhë nëpër të cilën kalon populli shqiptar i Luginës së Preshevës. Ndërsa, kryetar i Kuvendit komunal në Bujanoc, Jonuz Musliu, vizitën e Dacit e ka krahasuar me vizitën e zëvendëskryeministrit Ilir Meta, duke theksuar se kjo mënyrë e qasjes së politikave zyrtare të dy shteteve shqiptare ndaj shqiptarëve në këto troje është mjaftë inkurajuese dhe shpresëdhënëse.
Daci është pritur me entuziazëm në Kuvendin komunal të Bujanocit, duke u bërë udhëheqësi i parë i një partie politike nga Kosova që viziton zyrtarisht komunat e Kosovës Lindore të udhëhequra nga shqiptarët. /Telegrafi/
Përgjigju Duke Cituar
Krijoni Kontakt