Thaçi tregon të dhëna për shtëpinë në Hajvali
Thaçi ka thënë se trualli i kësaj shtëpie është 15 ari dhe jo 3 hektarë siç është shkruar në media.
Pyetjet parlamentare e kanë shtyrë kryeministrin Hashim Thaçi te tregohet më transparent se kurrë, duke dhënë edhe adresën e saktë në të cilën jeton tash e dy vjet me qera. I pyetur nga deputeti i AAK-së Ibrahim Selmanaj për shtëpinë e tij në Hajvali, për të cilën kanë raportuar mediat, Thaçi ka thënë se trualli i kësaj shtëpie është 15 ari dhe jo 3 hektarë siç është shkruar në media dhe se edhe ai ka të drejtë ta ketë një shtëpi e jo të jetojë nëpër banesa me qera.
Duke e konsideruar si të porositur pyetjen e Selmanajt, Thaçi ka thënë se secili mund t’i merr të dhënat në komunën e Prishtinës, ku dëshmohet sa ari truall ka dhe se për çfarë pasurie bëhet fjalë.
“Unë me shpifje të motivuara politikisht, me të pavërteta të prezantuara me motive politike, nuk mund të merrem. Por është një dezinformim dhe një e pavërtetë. Të gjitha të dhënat mund t’i merrni në komunën e Prishtinës që është një truall prej 15 ari, dhe jo tre hektarë, sepse unë nuk ndërtojë kulla me hapësirë trehektarëshe dhe unë një ditë do të jetojë si të gjithë ju në një shtëpi, edhe djali do të vazhdojë shkollën dhe nuk do të jetojë as në kullë as në stan”, ka thënë Thaçi, transmeton Kosovapress.
Kreu i ekzekutivit të vendit ka thënë se gjithmonë ka pasë mirëqenie të mirë familjare, edhe në kohën e paraluftës në Kosovës edhe gjatë luftës dhe për këtë ka falënderuar familjen që i ka mundësuar t’i përkushtohet lirisë së Kosovës dhe ndërtimit të shtetit.
Kryeministri Thaçi që nga qershori i vitit 2008 jeton në banesë me qera në lagjen Bregu i Diellit, siç ka thënë ai, pasi që ka qenë i detyruar nga organet kompetente të sigurisë që ta ndërrojë vendbanimin.
“Duke mos dashur në asnjë rrethanë ta ngarkojë buxhetin, tash e dy vjet unë jetojë në një banesë me qira, 3 dhomëshe, bashkë me familjen time në banesë në lagjen Bregu i Diellit në katin shtatë, rruga “Hilmi Rakovica” numër 36. Pra, në katin e shtatë, ku herë ka ashensorë herë nuk ka”, ka treguar Thaçi.
Ai ka kërkuar nga deputeti Selmanaj që të merret me pyetje tjera për kryeministrin e jo me pyetje që kanë të bëjnë me familjen dhe me djalin e tij, për të cilin ka thënë se shpesh është pyetur për shkollimin e tij.
“Djali im quhet Endrit, është 11 vjeç, më 13 prill e ka ditëlindjen, është në klasën e pestë, është në shkollën ‘Mehmet Akif’. Ju kisha ftuar të bëni pyetje për kryeministrin e Qeverisë së Kosovës, mos të merreni me familjen, mos të merreni me fëmijë. Të dhënat komplete dhe të sakta lidhur me pasurinë time dhe fillimin e ndërtimit të shtëpisë, janë në dispozicionin tuaj, qytetarëve dhe autoriteteve, në komunën e Prishtinës”, ka deklaruar ai.
Kreu i ekzekutivit të vendit i është përgjigjur edhe pyetjes së deputetes së AAK-së, Gjylnaze Syla lidhur me atë nëse Qeveria ka bërë regjistrimin e dëmeve që Serbia i ka shkaktuar Kosovës gjatë luftës.
Syla ka thënë se dihet se janë 12 mijë njerëz të vrarë, mbi 120 mijë shtëpi të djegura, mijëra të zhdukur, dihet se është grabitur fondi pensional e dëme të tjera, por ka kërkuar nga Qeveria të dijë nëse ka të dhëna të reja.
Thaçi ka thënë se të dhënat që u prezantuan nuk janë ndonjë e dhënë diçka e re, pasi që dihen pasojat që i janë shkaktuar Kosovës dhe qytetarëve të saj nga Serbia.
“Ato dëme u përmenden edhe nga ju, janë përmendur shpesh edhe para jush edhe nga ne. Ne kemi luftuar të gjithë së bashku për të parandaluar dhe dëbuar forcat serbe nga Kosova, për të fituar lirinë, për të shpallur Kosovën shtet dhe tani për të bërë hapa për integrim në BE”, ka thënë Thaçi, duke shprehur gatishmërinë e institucioneve të Kosovës për të bashkëpunuar me Serbinë për çështje që janë ende të hapura, siç është çështja e të pagjeturve.
Kreu i ekzekutivit të vendit në seancën e parë me kabinetin e riformatizuar, ka uruar ministrat që kanë marrë përgjegjësi të reja në kabinetin e tij, ndërkaq ka falënderuar gjithë ministrat e larguar, duke çmuar kontributin e tyre në qeverisjen e mirë për dy vjet rresht. /express/
Hashim%20Thaqi%20220110.jpg){kind=spacer}
Përgjigju Duke Cituar
Postuar më parë nga ximi_abedini
Krijoni Kontakt