Policia i arreston, gjyqësori i liron...

[fegi]

Tefik Selimi
Debate lidhur me trafikimin e qenieve njerëzore
Gjilan, 25 mars - Qendra Kosovare për Bashkëpunim Ndërkombëtar (KCIC) dhe Forumi për Iniciativa Qytetare (FIQ), të enjten mbajtën debatin me temë “Luftimi i trafikimit të qenieve njerëzore: sfidat dhe te arriturat”. Qëllimi kryesor i organizimit të këtij debati ishte diskutimi për Strategjinë Nacionale dhe Planin e Veprimit Kundër Trafikimit me Qenie Njerëzore. Gjithashtu, fushat kryesore e debatit ishte si ta parandalojmë trafikimin dhe ri-trafikimin e qenieve njerëzore, mandej: mbrojtja e viktimave dhe dëshmitarëve, hetimi dhe ndëshkimi i krimeve të trafikimit dhe mbrojtja e fëmijëve tanë. Debati në fjalë u organizua në kuadër të Projektit “Rritja e mbikëqyrjes publike në sundimin e ligjit në Kosovë”. Projekti ishte i financuar nga “National Endowment for Democracy (NED) (Veprimtaria nacionale për demokraci). Fillimisht, fjalën e mori Flamur Arifi, koordinator i Forumit për Iniciativa Qytetare, i cili, tha se, përpara e kemi një temë mjaft aktuale, por edhe të rëndësishme për ta debatuar në këtë dukuri jo të “këndshme” tek ne. Ai ftoi të pranishmit që sa më shumë të japin të dhëna lidhur me luftimin e trafikimit të qenieve njerëzore si dhe sfidat dhe ta arriturat. Valdrin Grainca tha se, e tërë Kosova është duke u përballur më këtë dukuri jo të mirë, e cila, si tha ai, -duhet të luftohet me të gjitha mjetet në të mirë të shoqërisë. Driton Islami, zyrtar nga policia e Gjilanit tha se, puna jonë është ta luftojmë me kohë dhe kudo që paraqitet kjo dukuri. Por, si tha ai, ne nuk mundemi atë ta luftojmë pa ndihmën e të tjerëve. I marrim të dhënat dhe ia përcjellim gjyqësorit, i cili merret me dënimin. Nazife Jonuzi, drejtoreshë e një qendre parashkollore tha se, Kosova, në krahasim nga viti 1999 dallon nga vitet e mëhershme të kësaj dukurie të keqe të trafikimit të qenieve njerëzore. Ndërkaq Selver Zymberi tha se, nga viti 2002, kemi fillluar një luftë të pakompromis lidhur me mbylljen e lokaleve të shumta që merren me këtë dukuri. Ismajl Kurteshi, drejtor në Drejtoriatin e Arsimit të Gjilanit tha se, kjo temë është shumë e qëlluar, por që dua inkuadrohem në debat dhe të bëj këto pyetje: sa për qind është luftimi i trafikimit të qenieve njerëzore, cilat janë masat që janë marrë në parandalimin e kësaj dukurie jo të mirë, a janë trafikantët nga Gjilani apo mese tjetra dhe, në fund, a ka rënie apo ngritje e kësaj të keqejeje? Këtyre pyetjeve nuk iu dhanë përgjigje, se munguan të dhënat. Burim Korça tha se, kjo dukuri nuk është kah luftohet ashtu si do të duhej. “Na jemi dëshmitar, kur policia i arreston trafikantët e qenieve njerëzore, ndërsa gjyqësia i liron. Kjo nuk e lufton këtë dukuri shëmtuese të shoqërisë sonë. Kadri Bislimi, zv – drejtor në shkollën teknike “Mehmet Isai” në Gjilan, tha se, në këtë drejtim duhet me çdo mënyrë të luftohet, e sidomos “Bosët” e trafikimit të qenieve njerëzore. “Sepse, këtë të keqe e kemi më shumë nga të huajt, të cilët na sollën këtu. Më parë kjo “dukuri” nuk na ishte”. Të shtojmë edhe këtë se, në debat nuk mori pjesë gjyqësia, e cila ishte e ftuar me kohë.