Program Specializimi

[Fiori]

Program Specializimi për personat që i përkasin pakicave etnike, fetare dhe gjuhësore

Programi i specializimit të pakicave është miratuar në vitin 2005 nga zyra e Komisionerit të Lartë për të Drejtat e Njeriut.

Nëpërmjet këtij programi, zyra e Komisionerit të Lartë për të Drejtat e Njeriut synon tu japë mundësinë personave që i përkasin pakicave kombëtare, etnike, fetare dhe gjuhësore, sidomos të rinjve dhe të rejave që ju përkasin këtyre pakicave, mundësinë që të njihen më menyrën e funksionimit të Organizatës së Kombeve të Bashkuara si dhe mekanizmat mbi të drejtat ndërkombëtare të njeriut në përgjithësi dhe të drejtat e pakicave në veçanti.

Programi i specializimit të pakicave synon të ndihmojë komunitetet dhe organizatat e pakicave në mbrojtjen dhe respektimin e të drejtave të anëtarëve të tyre.

Programi i specializimit të pakicave mbahet çdo vit dhe zhvillohet në gjuhët anglisht dhe arabisht. Programi në gjuhën angleze i ka fillimet e tij që nga viti 2005 dhe ka një kohëzgjatje prej 3 muajsh. Ndërsa, programi në gjuhën arabe ka filluar në vitin 2007 dhe ka një kohëzgjatje prej 4 javësh tashmë, prej dy javësh që kishte qënë më parë.


Pjesëmarrësit në program sistemohen tek zyra e Komisionerit të Lartë për të Drejtat e Njeriut në Gjenevë të Zvicrës. Programi në fjalë është interaktiv dhe konsiston në prezantime mbi çështje të ndryshme si për shembull, sistemin e Organizatës së Kombeve të Bashkuara, punën e bërë nga zyra e Komisionerit të Lartë për të Drejtat e Njeriut, mekanizmat dhe instrumentat për mbrojtjen e të drejtave të njeriut. Programi në fjalë përfshin edhe përgatitjen e detyrave individuale si dhe punën në grup.


Në fund të programit pjesëmarrësit duhet të kenë një njohuri të përgjithshme për sistemin e Organizatës së Kombeve të Bashkuara, instrumentat dhe mekanizmat ndërkombëtare në mbrojtje të të drejtave të njeriut në përgjithësi dhe të pakicave në veçanti si dhe të jenë në gjendje që ata vetë të ndihmojnë në specializimin e anëtarëve të tjerë të minoritetit ku ata bëjnë pjesë.


Programi mbulon shpenzimet e udhëtimit për në Gjenevë, sigurimin shëndetësor të pjesëmarrësit, banesën ku do të qëndrojë pjesëmarrësi si dhe shpenzimet e tjera ditore të të ushqyerit dhe lëvizjes.
Kush ka të drejtë të aplikojë?

1. Aplikanti duhet ti përkasë një grupi të pakicave etnike, kombëtare, gjuhësore ose fetare (nuk do të pranohen kërkesat e aplikantëve që nuk i përkasin pakicave të përmendura më sipër ose personave që janë thjesht të lidhur shumë ngushtë me pakicat në fjalë ose organizatat e tyre).

2. Mosha e aplikantit nuk përbën ndonjë pengesë për pjesëmarrjen në program. Megjithatë, preferencë do tu jepet aplikantëve që janë nga 25 deri në 35 vjeç.
3. Arsimi i aplikantit nuk përbën ndonjë pengesë për pjesëmarrjen në program nëse aplikanti është në gjendje që ta mbështesë atë me përvojën në punë.
4. Aplikantët duhet të kenë aftësinë, dëshirën dhe mundësinë që të trainojne personat e tjerë të pakicave pasi ata të kthehen në vendet e tyre.

5. Aplikantët duhet të kenë aftësitë e kërkuara gjuhësore që do të përdoren gjatë programit (për shembull, aftësitë gjuhësore në gjuhën angleze për programin në gjuhën angleze dhe njohin mirë gjuhën arabe për programin në gjuhën arabe).

6. Organizata ose komuniteti ku ben pjesë aplikanti duhet të propozojë dhe mbështesë kërkesën e aplikantit për të marrë pjesë në programin në fjalë. Është e preferueshme që organizata ose komuniteti i pakicave të ketë një anëtarësi të qëndrueshme ose pjesëmarrje të madhe nga anëtarët e saj si dhe te ushtrojë veprimtarinë e saj në mbrojtjen e të drejtave të komunitetit në fjale.
7. Qëllimi kryesor i programit është që të ofrojë aplikantëve të minoriteteve mundësitë që të njihen më mirë me të drejtat ndërkombëtare të njeriut duke i ndihmuar organizatat ose komunitetet ku ata bëjne pjesë të mbrojnë sa më mirë të drejtat njeriut në përgjithësi dhe të pakicave në veçanti. Prandaj, është shumë e rëndësishme që personi që propozohet dhe merr pjesë në këtë program specializimi të kthehet tek organizata ose komuniteti i tij për të dhënë kontributin e tij në mbrojtjen e të drejtave të pakicave.
Proçesi i përzgjedhjes së kandidatëve pjesëmarrës

Proçesi i përzgjedhjes do të marrë parasysh rajonin së cilës kandidati i përket duke i dhënë mundësi të barabarta të gjithë pjesëmarrësve pa dallim gjinie. Po ashtu, në përzgjedhjen e pjesëmarrësve do të merret në konsideratë edhe gjendja e të drejtave të njeriut në rajonin ose vendin e aplikantit si dhe situata e të drejtave të pakicave në vendet përkatëse.

Duke patur parasysh numrin e madh të aplikimeve, vetëm kandidatët e suksesshëm do të informohen.

Për sa i përket programit në gjuhën angleze, 15 kandidatura do të përzgjidhen paraprakisht duke u dhënë përparësi pesë kandidaturave të para. Dhjetë kandidaturat e tjera do të konsiderohen si kandidatura alternative. Fjalën e fundit në përzgjedhjen e kandidatëve pjesëmarrës e ka Grupi Këshillues i përbërë nga stafi i zyrës së Komisionerit të Lartë për të Drejtat e Njeriut



Si mund të aplikoni?

Kërkesat duhet të plotësohen në mënyrën e kërkuar dhe dërgohen në adresën e mëposhtme brenda datës 3 Maj 2010. Këto kërkesa janë të vlefshme për programin e vitit 2011. Pjesët I dhe II të aplikimit duhet të nënshkruhen dhe faksohen. Aplikimi mund të dërgohet edhe me postë ose në mënyrë elektronike tek adresa e mëposhtme e postës elektronike:

Minorities Fellowship Programme
Indigenous Peoples and Minorities Unit
Office of the United Nations High Commissioner for Human Rights
Palais des Nations
8-14 Avenue de la Paix
CH-1211 Geneva 10
Switzerland
Telefax number: (+41 22) 928 90 66
E-mail: minorityfellowships@ohchr.org



Një letër zyrtare rekomanduese e lëshuar nga komuniteti ose organizata e pakicave që ka propozuar kandidatin duhet ti bashkëngjitet aplikimit.

Për më shumë informacion mos hezitoni të lexoni tek faqja e internetit: http://www2.ohchr.org/english/issues...og.htm#english. Nga fundi i vitit 2010 emrat e kandidatëve fitues do te bëhen publike në faqen e internetit të zyrës së Komisionerit të Lartë për të Drejtat e Njeriut në Gjenevë të Zvicrës.

Minoritetet kombëtare, etnike, fetare dhe gjuhësore në Shqipëri, Kosovë, Maqedoni si dhe shtetet e tjera Ballkanike kanë mundësinë që të aplikojnë tek ky program. Ky shkrim ka për qëllim të japë informacion mbi këtë program dhe të gjitha mendimet e shprehura janë të autorit të këtij shkrimi. Autori i shkrimit nuk merr përsipër asnjë lloj detyrimi lidhur me faktin se disa fakte të tjera mund të mos jenë përfshirë në këtë shkrim. Lexuesi mund të marrë informacionin e plotë mbi programin në fjalë duke hulumtuar tek faqja e internetit të zyrës së Komisionerit të Lartë për të Drejtat e Njeriut në Gjenevë.



Përktheu dhe përgatiti

Akil Tirana

Avokat

Washington, D.C.