Judah: "Kosova ka ngecur në vend, autoritetet nuk po bëjnë politikë pro-aktive"

[DYDRINAS]

Judah: 'Kosova ka ngecur në vend'


Tim Judah

'Autoritetet kosovare nuk po bëjnë politikë pro-aktive'


Ndërsa kanë kaluar dy vjet nga pavarësia e Kosovës kritikët thonë se pas inercisë së pavarësisë, vendi duket se ka ngelur në vend.

Në një intervistë për BBC-në, publicisti britanik Tim Judah i cili ka shkruar librin 'Kosova: Luftë dhe Hakmarrje', thotë se autoritetet kosovare nuk po bëjnë "një politikë pro-aktive", siç e quan ai, për promovimin e vendit duke e lënë këtë në dorë të të huajve.

Ai thotë se Kosova ka ngecur në vend edhe për sa i përket ekonomisë, dhe krijimit të vendeve të punës.

Ilir Nishku bisedoi me zotin Judah dhe fillimisht e pyet nëse gjerat kanë ecur me shpejtësinë e duhur për Kosovën dy vjet pas pavarësisë.

BBC: Dy vjet pas pavarësisë, a mendoni se gjërat kanë ecur me shpejtësinë e duhur për Kosovën?

Tim Judah: Një vit më parë do të thoja, po, gjërat kanë shkuar përgjithësisht shumë mirë, duke marrë parasysh parashikimet shumë të errëta se çfarë mund të ndodhte pas pavarësisë, ndërsa njerëzit flisnin për një valë të re refugjatësh, për një konflikt të ri.

Por tani, pas dy vitesh, mendoj se ekziston një ndjenjë që Kosova thjesht ka ngecur në vend dhe nuk po ecën me të vërtetë.

Duket se ka një ndjenjë inercie për Kosovën, nuk duket se ka ndonjë vizion strategjik se çfarë duhet të bëjë më pas dhe qeveria e saj nuk po bën sa duhet, apo mjaftueshëm, për të krijuar vende pune, apo për të tërhequr investime.

Sigurisht, që nuk është e lehtë, por më është krijuar përshtypja që Kosova duket se ka ngecur në vend dy vjet pas pavarësisë.

BBC: Kur i pyet autoritetet kosovare 'pse gjërat nuk po shkojnë kaq mirë në ekonomi, apo në krijimin e vendeve të punës', një nga arsyet që japin është për shkak se çështja e statusit nuk është zgjidhur ende në mënyrë përfundimtare, - ata po presin vendimin e Gjykatës Ndërkombëtare të Drejtësisë për ligjshmërinë e pavarësisë - dhe mendojnë se vendimi i gjykatës do të përshpejtojë gjerat. A mendoni ju se vendimi i Gjykatës do të ndikojë, çfarëdo që të jetë ai?

Tim Judah: Ndjenja ime është se autoritetet e Kosovës nuk janë pro-aktive sa duhet. Vitin e shkuar unë bisedova me ministrin e Jashtëm serb, Vuk Jeremiq, dhe ai më tha se vitin e shkuar ai kishte shpenzuar 700 orë në aeroplan, pra rreth dy orë në ditë.

E di që nuk është njëlloj dhe është e vështirë, por a kalon ministri i Jashtëm i Kosovës dy orë në ditë, çdo ditë, duke fluturuar nëpër glob për të promovuar Kosovën dhe a bëjnë të njëjtën gjë ministrat e tjetër kosovarë?

E kuptoj se Serbia ka një diplomaci më me eksperiencë, por ndryshimi i madh midis Serbisë e Kosovës është se Serbia ka një politikë pro-aktive për të bërë diçka, ndërsa me kosovarët duket se ata janë tepër të gatshëm që të lënë të tjerët të bëjnë diçka, duke pritur që amerikanët apo britanikët të bëjnë diçka për ta.

Nëse je në Kosovë, ajo të duket e madhe, por krahasuar me botën, po të kihen parasysh çështje si Irani apo Afganistani, Kosova nuk është aq e rëndësishme. Pra, është e mundur të shkosh dhe të promovosh biznesin apo edhe njohjen.

BBC: Ju thatë se Serbia punon fuqishëm kundër pavarësisë, por a nuk mendoni se përpjekjet e tyre janë të kota? Ata nuk mendojnë se kanë për marrë Kosovën përsëri, apo jo?

Tim Judah: Jo, nuk e mendoj këtë në asnjë moment. Por nuk mendoj se ky është qëllimi i tyre. Nuk mendoj që një qeveri serbe të ketë ndonjë synim që të sundojë dy milion shqiptarë armiqësorë ndonjëherë përsëri. Nuk mendoj se ky është qëllimi.

Qëllimi, mendoj unë, është që ta manovrojnë Kosovën në një pozicion që Kosova të jetë e detyruar të negociojë, jo që Kosova të vendoset përsëri nën sundimin e tyre, por që të vijë në një pozicion drejt ndonjë ndarjeje apo shkëmbimi territoresh. Dhe në fund të fundit, nuk është se kjo nuk është tërheqëse për njerëzit në Luginën e Preshevës.

Një nga udhëheqësit në Luginën e Preshëves tha vetëm javën e shkuar, nëse nuk e kam gabim, se nëse Mitrovica e Veriut nuk do të jetë nën sundimin e Kosovës, pse duhet të jetë Presheva në sundimin serb.

Mendoj se ky është synimi. Nuk mendoj se ata do ta arrijnë këtë, në afat të shkurtër apo të mesëm, por ai është qëllimi, jo që të marrin përsëri Kosovën.

BBC: Pra siç e thatë edhe ju, a janë këto ide të zbatueshme, po të kihet parasysh se Perëndimi është fuqishëm kundër tyre, madje edhe udhëheqësit kosovarë shprehen kundër kësaj?

Tim Judah: Nuk e di nëse kosovarët janë kundër kësaj, udhëheqësit kosovarë thonë që janë kundër kësaj, se jam i sigurt se do të krijonin probleme me amerikanët, apo të tjerët, p.sh, nëse thonin diçka tjetër, por nuk e dij nëse ata e besojnë këtë me të vërtetë.

BBC: Po Perëndimi. Çfarë mendon Perëndimi për këtë?

Tim Judah: Në terma të përgjithshme, jo, ata nuk duan që kjo të ndodhë. Por ata nuk duan që kjo të mos ndodhë për shkak të Kosovës apo Serbisë. Ata nuk duan që kjo të ndodhë për shkak të pasojave të mundshme në Maqedoni dhe Bosnjë. Ky është problemi. Nëse Serbia dhe Kosova do të ishin në një ishull, dhe mos të kishin lidhje me të tjerë, nuk e besoj se të tjerët do të shqetësoheshin sado pak.

BBC: Kohët e fundit po bëhen përpjekje në Kosovë për ta afruar veriun, për ta integuar atë me Kosovën. A mendoni ju se është e mundur që brenda një kohe kaq të shkurtër, komuniteti serb në Kosovë të harrojë çështjen e pavarësisë dhe të mendojë më shumë për jetën e përditshme?

Tim Judah: Mendoj se duhet të veçojmë veriun e Kosovës nga enklavat serbe. Mendoj se në enklava ka një vetëdije se, që të mbijetojnë ata duhet të bëjnë biznes me Prishtinën, por kjo nuk mund të ndodhë me Veriun. Nuk mendoj se Veriu mendon edhe për një sekondë të vetme për këtë, sepse nuk ka qenë pjesë e Kosovës në asnjë kuptim që nga viti 1999.

BBC: A mendoni se me kalimin e kohës plagët mund të shërohen?

Tim Judah: Është një pyetje interesante dhe mendoj se është e mundur. Interesante është në fakt, se, megjithë të gjitha ato që kanë ndodhur, megjithëse kanë qenë pak negativë në vitet e fundit, në një farë mënyrë marrëdhëniet midis Serbisë dhe Kosovës nuk kanë qenë aq keq.

Çfarë dua të them me këtë? Për shembull, në takimet rajonale që janë shumë të rëndësishme për Serbinë dhe shumë të rëndësishme për Kosovën, të dy vendet janë në përgjithësi atje së bashku.

Sigurisht që ka gjithnjë argumenta, a do të përfaqësohet si Republika e Kosovës apo nën Rezolutën e OKB-së 1244, apo asnjëra prej tyre, por fakt është se për shumë gjera të rëndësishme Kosova dhe Serbia janë të përgatitura të ulen së bashku në të njëjtën dhomë dhe të bëjnë gjera së bashku.

Kjo është një shenjë e mirë, nëse e krahason me një vend tjetër të ndarë si Qiproja ku ata thonë. 'Harrojeni - nuk do të bëjmë asgjë së bashku!'. Pra, krahasur me qipriotët grekë dhe turq, kosovarët dhe serbët janë në fakt në një pozitë më të përparuar në një periudhë shumë më të shkurtër kohore.

Pra, a do të shërohen plagët me kalimin e kohës?! Si tju them, unë nuk kam në dorë globin e kristaltë, por do të thoja se ka shenja të mira që të dyja palët mund të vazhdojnë të kënë marrëdhënie dhe të kalojnë në një fazë tjetër marrëdhëniesh, kur ata ta pranojnë se nuk janë dakord për shumë gjera, por të bëjnë biznes ditë pas dite, marrëdhënie që nuk janë të mundshme në vende të tjera, si p.sh Qiproja.

bbc

[toni karlosi]

[QUOTE=DYDRINAS;2603767]Judah: 'Kosova ka ngecur në vend'


Tim Judah

'Autoritetet kosovare nuk po bëjnë politikë pro-aktive'


O Z.Judah nuk kemi vakt se njehere ,kemi me u marr me tendera.

[fattlumi]

Pse, me kete qeveri as mos te shohin enderr shqiptaret se do shkojne ose te integrohen dikund?
Kete e dine edhe qeveritaret mirepo shesin patriotizem folklorik para popullit.

Dydrinas kjo eshte dashur ti bashkangjitet temes : Kosova : 2 vjet pas pavaresise

[Rugova]

Tim Judah është një analist i denjë për çështjet e Ballkanit, sidomos ato shqiptare. Tërë ajo që ka theksuar në intervstë qëndron. Lidershipi aktual kosovar me injorancën dhe paftësinë e tij për të ndërtuar shtet e ka sjellur Kosovën buzë greminës. Sipas logjikës së këtyre "udhëheqësve" ata janë vetë shteti, ngase me egocentrizmin e tyre karrierist iu është ngulitur në tru, se nuk do të kishte pasur kurrë Kosovë, as liri, as pavarësi të saj pa ata dhe të bëmat e tyre "madhore"!?
Përkundrazi, po të mos kishin qenë pikërisht këta abuzues dhe karrieristë në "pushtet" të pa shtet në këto dhjetë vitet e shkuara, pra, posikur në vend të tyre të kishin qenë njerëz të cilët interesat e kombit dhe atdheut i vëjnë mbi interesat personale, me siguri se sot Kosova do të ishte shumë afër anëtarësimit në BE dhe NATO, nuk do të kishte një shkallë kaq të lartë të korrupsionit, krimit të organizuar politik dhe ekonomik, mbrapambeturisë ekonomike, papunësisë enorme, errozionit moral dhe kulturor, etj, sepse me logjikën e përjashtimit dhe luftës kundër "armiqëve" të brendshëm, politikanët e sotëm të Kosovës (kryekëput me orientim majtist), në vend se të ndërtojnë shtet mbi baza bashkohore të zhvillimit dhe ekonomisë së tregut, këta duke harrnuar disa rrugë janë vetëkënaqur dhe lavdërohen para elektoratit të gjorë kosovar, se gjoja ne po ndërtojmë shtetin, që në fakt janë duke e rrënuar atë me të gjitha mjetet e lejuara dhe të palejuara.
Shteti ndërtohet me punë, projekte konkrete zhvillimore, hapje të vendeve të reja të punës duke tërhequr kapitalin e huaj në vend, duke ndërtuar fabrika dhe objekte prodhuese për të kunkurruar në treg me të tjerët, e jo duke u marrë me "politikë të lartë shtetërore" në Kuvend (me debate shterpe), duke bërë fushata elektorale pa kurrfarë koncepti politik dhe zhvillimor ekonomik, pa kurrfarë oferte ndërtuese, etj, që e gjithë kjo retorikë e thatë e ka sjellur sot Kosovën në shkopin e lypsarit para gjithë botës.....!
Dhe, derisa populli heshtë dhe nuk reagon ndaj këtij mjerimi që e ka kapluar sot Kosovën në të gjitha sferat e jetës, deri atëherë kvazipolitikanët dhe matrapazët me çështjen e Kosovës do të pasurohen edhe më tej duke shfrytëzuar dhe keqpërdorur marrëzisht pasuritë natyrore që Zoti ia ka falur Dardanisë sonë antike......
Tim Judah, po flet edhe sot për të mirën e Kosovës, por mjerisht nuk ka kush ta dëgjojë!

[DYDRINAS]

Pasojat e rënies së investimeve


Investimet e huaja në Kosovë shënuan rënie gjatë 2009-s, krahasuar me një vit më parë. Sipas autoriteteve, kjo është pasojë e krizës ekonomike globale, por ekspertë të ekonomisë e vlerësojnë të papërshtatshme klimën për investime.

Pas shpalljes së pavarësisë së Kosovës, interesimi i investitorëve të huaj për të investuar në Kosovë ka shënuar rënie, ç’gjë është në kundërshtim me pritjet e kosovarëve, thonë njohës të çështjeve ekonomike.

Muhamet Sadiku, profesor në Universitetin e Prishtinës, konsideron se me gjithë hapësirat e mjaftueshme për investime, Kosova nuk ka krijuar një ambient të favorshëm për investitorët e huaj.

Ai, madje, thekson se përveç krizës globale financiare, në këtë kuadër problem paraqet edhe moszbatimi i ligjit, niveli i lartë i korrupsionit dhe shkalla e lartë e ekonomisë joformale.

“Të gjithë ishim në pritje të inkurajimit të investitorëve për t’u përfshirë në realizmin e projekteve të ndryshme”.

“Por, realisht, investitorët e huaj presin më shumë nga Kosova e pavarur, në kuptimin e forcimit të shtetit ligjor, në kuptimin e përmirësimit të infrastrukturës, të qeverisjes, pastaj luftimit të korrupsionit dhe luftimit të ekonomisë joformale”, thotë Sadiku.

Rënia e nivelit të investimeve ndërkombëtare të drejtpërdrejta në Kosovë, është shkaktuar si pasojë e krizës financiare globale, thotë Mustafë Hasani, kryeshef në Agjencinë për promovimin e investimeve në Ministrinë e Tregtisë dhe Industrisë.

Megjithatë, ai konsideron se gjatë këtij viti është rritur numri i investitorëve të huaj të interesuar, pas vendimit të autoriteteve kompetente, për privatizimin e ndërmarrjeve të mëdha publike.

“Sidomos projektet e mëdha të privatizimit në Kosovë, siç janë privatizimi i KEK-ut, Aeroporti Ndërkombëtar i Prishtinës, Termocentrali ‘Kosova e Re’, autostrada dhe ato privatizime që janë projekte mjaft të mëdha dhe kanë zgjuar interesimin e kompanive të huaja”, thekson Hasani.

Në anën tjetër, niveli i ulët i investimeve të huaja të drejtpërdrejta Kosovë, paraqet rrezik për zhvillimin ekonomik në të ardhmen, thotë Lundrim Aliu, zyrtar për informim në zyrën e Bankës Botërore në Prishtinë.

“Edhe pse ekonomia e Kosovës i ka rezistuar krizës, pasqyra makroekonomike përmban disa rreziqe. Paqartësitë ekonomike në të ardhmen në Bashkimin Evropian, mund të bëjnë që ngadalësimi ekonomik i Kosovës të vazhdojë nëpërmjet tri formave”.

“Mungesës së rritjes së vogël së remitencave, mos-forcimit të kërkesës për eksportet e Kosovës dhe vazhdimi i niveleve të ulëta të investimeve të huaja direkte që hyjnë në vend”, shprehet Aliu.

Ndryshe, sipas raportit të fundit të Bankës Qendrore të Kosovës, thuhet se në tri vitet e fundit, investimet e huaja kanë pësuar rënie të vazhdueshme, në vitin 2007 investimet ndërkombëtare direkte në vend kanë qenë 421 milionë euro, kurse vitin 2008, investimet kanë rënë në 355 milionë, ndërkaq vitin e kaluar investimet kanë qenë vetëm 310 milionë euro.

radio europa e lire

[Guri i Kuq]

EULEX-i pajtohet se krimi është problem i madh për Kosovën


Publikuar: Sot, më 21 shkurt 2010 ne "Koha Ditore"

Prishtinë, 21 shkurt – Misioni i BE-së për sundimin e ligjit në Kosovë, EULEX, pajtohet se krimi është një problem i madh për vendin, ndërsa zyrtarët e këtij misioni janë të vetëdijshëm për kritikat dhe pakënaqësitë e shoqërisë civile, në raport me punën e këtij misioni, e që është pikërisht luftimi i krimit, shkruan sot Koha Ditore.
Misioni më i madh i BE-së, më shumë se një vit pas vendosjes në Kosovë, nuk ka bërë ende asnjë arrestim serioz të ndonjë rasti që ka lidhje me korrupsionin apo krimin e organizuar, ndonëse shumë raporte ndërkombëtare kanë vlerësuar se këto fenomene janë të zhvilluara në Kosovë.
Së fundi, vlerësimin se në Kosovë ka korrupsion dhe mosfunksionim të ligjit e ka bërë edhe vetë ambasadori i Shteteve të Bashkuara të Amerikës në Kosovë, Christopher Dell.
Ambasadori i shtetit që vlerësohet se ka më së shumti ndikim në politikën dhe jetën kosovare ka thënë se në Kosovë pushteti po qëndron mbi ligjin.
“Nuk mendoj të jetë sekret, kur them që korrupsioni është një prej sfidave kryesore, me të cilat përballet vendi (Kosova v.j.). Madje, për këto dhjetë vjet asnjë zyrtar i lartë dhe as edhe një nga niveli i mesëm nuk ka dhënë llogari për këtë dhe nuk është dënuar për akuzën për korrupsion. Kjo është vërejtur edhe nga popullata”, ka thënë Dell në një intervistë për BIRN.
Në të njëjtën paraqitje, diplomati amerikan ka thënë se është i brengosur me madhësinë e ekonomisë dhe Qeverisë në Kosovë duke marrë shembull Afrikën e Jugut ku qeveria ka kontrolluar ekonominë. Ai ka kërkuar nga qytetarët të reagojnë për pakënaqësitë, dhe ka vlerësuar se partitë politike në Kosovë janë të njëjta, andaj ka nevojë për një forcë të re.
“Në një vend të vogël si ky, ku Qeveria është hisedari kryesor në ekonomi, ekziston rreziku që ekonomia të jetë vetë Qeveria, dhe të bën të kuptosh që në fakt qeverisja ka të bëjë me përfitime ekonomike, dhe kjo është një gjë shumë e rrezikshme. Kjo ka ngjarë edhe në Afrikën e Jugut pas pavarësisë, ku në fakt qasja në politikë ka nënkuptuar qasje në ekonomi, gjë që ka sjellë në një sistem njëpartiak”, ka thënë veç të tjerash Dell.
Përderisa EULEX-i dhe partitë opozitare pajtohen se krimi është problem i madh për Kosovën, Qeveria e Kosovës thotë se po e lufton korrupsionin dhe dukuritë e tjera negative.
Vlerësimit të ambasadorit amerikan i ka paraprirë edhe një vlerësim që ditë më parë e kanë bërë OJQ-të kosovare, të cilat kanë kritikuar EULEX-in për performancë të dobët. I pyetur nëse Kosova është shtet kriminal, zëdhënësi i EULEX-it, Nicholas Hawton, ka thënë se “nuk ka dyshim se krimi është një problem i madh, me të cilin ballafaqohet Kosova”.
“Për këtë edhe është i vendosur EULEX-i në Kosovë, pra që t`i monitorojë dhe ndihmojë autoritet lokale që të luftohet krimi”, ka thënë Hawton.
Sipas këtij zyrtari të EULEX-it, ky mision synon që të ketë raporte të mira me shoqërinë civile, dhe misioni gjithmonë mundohet që të përmirësojë punën e vet.
“Kritikat konstruktive janë gjithmonë të mirëseardhura përderisa ne në vazhdimësi provojmë që ta përmirësojmë punën tonë. EULEX-i mban marrëdhënie të mira me OJQ-të. Ne synojmë që të jemi transparent dhe përgjegjës për punën tonë. Dhe për këtë edhe kemi pasur një takim me OJQ-të për të diskutuar sinqerisht rreth punës tonë”, ka thënë Hawton.
Zëdhënësi i Qeverisë së Kosovës, Memli Krasniqi, ka thënë se “deklaratat e ambasadorit janë deklarata të tij dhe se Qeveria e Kosovës nuk mund të komentojë qëndrimet e ambasadorëve në Kosovë”. Megjithatë, sipas Krasniqit ekzekutivi i tanishëm kosovar po e lufton korrupsionin dhe dukuritë e tjera negative.
“Lufta kundër korrupsionit dhe dukurive të tjera negative janë proces nuk është një akt dhe kjo lufte është ndër prioritetet sfiduese. Dallimi mes kësaj qeverie dhe atyre që kanë qenë deri tash, është se ne po e luftojmë korrupsionin dhe krimin e organizuar, ndërkaq që ato kanë bashkëjetuar me të”, ka thënë Krasniqi.
Zëdhënësi i ekzekutivit është pajtuar se partitë politike në Kosovë ende nuk e kanë bërë profilizimin e tyre, por sipas tij, ato dallojnë.
“Nëse ka menduar si ideologji atëherë partitë politike janë të njëjta, sepse asnjëra nga to nuk ka mundur të nisë profilizimin e vetë, ndonëse kemi disa parti që kanë dëshirë të deklarohen se janë të djathë apo të majtë. Dallimi mes partive në Kosovë qëndron në dy versione. E para është dallimi për vizionin që kanë për Kosovën dhe dallimi i dytë është kapaciteti i tyre udhëheqës, që do të thotë lidershipi që kanë”, ka thënë Krasniqi.
Ndryshe nga qeveria, përfaqësues të partive opozitare në Kosovë, kanë thënë se deklarimet e ambasadorit, duhet të shërbejnë si alarm për Qeverinë. Por edhe opozitarët nuk pajtohen me konstatimi ne ambasadorit, se Kosovës nuk i dihen zgjedhje këtë vit.
“Janë deklarata shumë të qëndrueshme, të cilat i kemi bërë edhe ne si opozitë, por të cilat nuk janë marrë parasysh asnjëherë. Në Kosovë jo që zyrtarët nuk i përgjigjen ligjit, por për më tepër ata e kanë bërë ligjin dhe janë vendosur mbi atë”, ka thënë Ibrahim Makolli, nënkryetar i AKR-së.
Duke e komentuar performancën e EULEX-it, Makolli ka thënë se misioni po vazhdon me të njëjtën traditë dhe nuk po bën ndryshime.
“Ne vetë kemi besuar se EULEX-i do të arrijë që në pjesën që ka, të jetë më efikas, por për fat të keq edhe EULEX-i po e vazhdon të njëjtën traditë.
Zgjedhjet na nevojiten gjithsesi, sepse kur vendi ka keqqeverisje dhe krizë, e vetmja mënyrë për ta tejkaluar atë, janë zgjedhjet. Por nuk na duhen zgjedhjet me këtë ligj të zgjedhjeve dhe me këto institucione që organizojnë zgjedhje, sepse kemi një përvojë të hidhur me zgjedhjet e fundit që po zgjasin qe disa muaj”, ka thënë Makolli.
Edhe nënkryetari i AKR-së ka preferuar që deklaratës së Dellit se partitë në Kosovë janë të njëjta t`i japë një kontekst.
“E ka pasur parasysh për ato parti që e kanë provuar pushtetin, dhe të tri partitë që kanë qenë në pushet janë të njëjta. Vendi nuk e ka provuar një qeverisje ndryshe me subjektet e tjera që nuk kanë qenë në qeverisje asnjëherë”, ka thënë Makolli.
Sekretari i përgjithshëm i AAK-së, Burim Ramadani, ka thënë se deklaratat e ambasadorit Dell janë vërtetuar disa herë.
“Këto deklarata janë të përsëritura, sepse edhe raporte të ndryshme ndërkombëtare kanë dhënë konstatime të tilla fatkeqe. Por deklarata e ambasadorit Dell duhet të jetë alarmi i fundit për Qeverinë e Kosovës dhe për EULEX-in që të marrin veprime energjike në luftën kundër korrupsionit dhe krimit të organizuar. Revolta e qytetarëve ndaj kësaj situate është tepër e madhe dhe nëse nuk ka veprime konkrete kjo revoltë mund të kthehet shumë shpejt, në revoltë të organizuar. Ndihma e SHBA-së dhe ambasadës së saj është tepër e domosdoshme në këtë rast, ka thënë Ramadani.
Sipas tij, AAK-ja e ka drejtimin e vet që e dallon nga partitë e tjera dhe “po udhëheq në debatin për profilizim të partive”. “Pra, kemi bërë ndryshime të mëdha strukturore dhe programore dhe këto reforma ndikojnë që AAK-ja të jetë mjaft e dallueshme prej partive tjera por sigurisht po punojmë në fuqizimin e mëtejmë të profilit tonë partiak”, ka thënë Ramadani, sipas të cilit, zgjedhjet këtë vit janë të domosdoshme.