Shkupi 2014

[gimche]

Nuk shqyrtohet kërkesa e BFI-së për Burmalinë

Këshilli i komunës Qendër nuk hapi debatin për iniciativën e Bashkësisë Fetare Islame që në qendër të Shkupit të ndërtohet xhamia Burmali. Për çeljen e debatit kundërshtuan këshilltarët e LSDM-së me arsyetimin se kryetari i komunës Vlladimir Todoroviç, nuk u ka dorëzuar atyre iniciativën e BFI-së në formë të shkruar. Ata kërkuan nga Todoroviçi tua dorëzojë materialet e shkruara brenda 7 ditëve.

“Ne reagojmë pasi ju po e thyeni procedurën për një çështje kaq serioze. Pse sot dhe tani, nëse ju para 15 ditëve në media keni thënë se keni marrë iniciativë pse ndërkohë nuk e shkruat atë dhe ta vendosnit në rend dite që ta shqyrtonim sot”, tha Bllagorodna Kërstevska Mojsovska – këshilltare nga radhët e LSDM – së.

“Siç duket kryetari i komunës do që në derë të vogël të kalojë një punë shumë të ndjeshme. Le të përgjigjet konkretisht pse pikërisht sot”, u shpreh Hristo Gegovski – këshilltarë nga radhët e LSDM - së.

Kryetari i komunës qendër Vlladimir Todoroviç me propozimin e të cilit u tentua të vendoset në rend dite iniciativa e BFI-së tha se këshilltarët nuk kanë nevojë për pritje pasi janë mjaft mirë të informuar mbi çështjen.

“Nuk ka gjëra të tjera me të cilat do ti kisha njohur nga iniciativa që në komunë ekziston prej disa muajsh. Do të thotë, asgjë nuk është e re dhe nuk shoh arsye se pse deri tani nuk keni ndërtuar qëndrim se a meriton kjo iniciativë ta pranojmë apo jo”, deklaroi Todoroviç.

Ndërkohë, jashtë komunës Qendër kanë vazhduar debatet për projektin ‘Shkupi 2014’. Në debatin që organizoi Partia për Ripërtëritjen e Maqedonisë të Liljana Popovskës u tha se projekti është i përshpejtuar ndërsa kisha dhe porta e triumfit nuk duhet të ndërtohen.

“Kisha dhe porta e triumfit janë gjëra ekstreme të cilat do të duhen të lihen për një periudhë më të largët që të diskutohen dhe pranohen pasi mendoj se ato më së shumti janë kundërshtuar”, deklaroi Meri Pejovska – arkitekte.

Esteti Denko Skallovski tha se sheshit i duhen objekte dhe simbole që do të reflektojnë shoqërinë multi-etnike dhe multi-fetare në vend.

“Të miratohet vendim për ndërtimin e objekteve të cilat do të përmbajnë elemente që ka shoqëria jonë; që do të thotë, të reflektojë të gjithë strukturën multi-etnike, multi-kulturore dhe politike e deri në elementet estetike që çdo qytetar si edhe pasardhësit tanë të mund të identifikohen me simbolikën kulturore, politike dhe nacionale në shesh”, shtoi Skallovski.

Projekti u kritikua edhe nga aspekti i mbingarkimit të hapësirës përreth lumit Vardar, e cila sipas debatuesve, në rastin e vendosjes së institucioneve të tjera nuk do të përballojë fluksin e qarkullimit të qindra mijëra njerëzve siç parashikohet. /alsat-m/