Universiteti i Prishtinës mbush 40 vjet

[Brari]

Sot shënohet 40 vjetori i Universitetit të Prishtinës

Pikërisht sot më 15 shkurt 2010 Universiteti i Prishtinës(UP), shënon 40-vjetorin e themelimit të tij si universiteti i parë në Kosovë. Kontributi i këtij institucioni të lartë arsimor në edukimin e brezave të rinj të Kosovës dhe të trojeve të tjera shqiptare ka qenë dhe është tepër i madh. Siç bëhet e ditur nga Universiteti i Prishtinës, sot pritet të organizohen aktivitete të ndryshme, ndërsa studentët që sot i fillojnë ligjëratat e semestrit të dytë e kanë mundësinë të dinë më tepër për historikun e këtij institucioni të rëndësishëm shtetëror të Kosovës.

bota sot


--------------


..

Lavdi atyre shqiptareve te medhenj qe mundesuan krijimin e ketij Universiteti..

[Guri i Kuq]

Të falemnderit Brari !

Gjithë ajo që na bënë të krenohemi si shqiptarë,kudo që jemi, është edhe preukupim i yti....!

Si ish student i këtij Universiteti, i gjenaratave të viteve të para,i përshëndes gjithë ish studentët dhe studentët e sotshëm,bijtë dhe bijat tona,duke ju uruar jetë të gjatë dhe shumë arritje në përpjekjet titanike për mbajtjen gjallë,kultivimin dhe lavrimin e shpirtit të këtij vendi !
Ata që janë gjallë e kuptojnë shpirtin,ajrin dhe frymen e asaj kohe..

Në emër të qindra shokëve,që nuk janë sot....shkollës sonë,Universitetit tonë,mësuesve tanë
U R I M E- përvjetorin e 40-të !

[Brari]

Kur degjova per her te pare se.. Universiteti i Prishtines ishte nje kolos i arsimimit me mbi 25 mije studente.. mu be zemra mal..

Edhe nji here nderime per ata qe e krijuan.. por dhe per ata qe mesuan aty e i sherbyen Kosoves ne te gjitha fushat e ceshtjet..e hallet qe i ka pasur Kosova..

[Milkway]

Si student i ketij Universiteti , i shpreh falenderimet me te sinqerta gjithe atyre njerzve qe punuan dhe mundesuan hapjen e ketij Universiteti , qe nxorri gjenerata e gjenerata per te mbajtur gjalle shpresen per nje te ardhme me te mire.

Urime UP rrofsh per jete te jeteve .

[Brari]

Universiteti i Prishtinës drita që zhduki një errësirë
Fatbardhë Zeka
UP-ja mbushi 40 vjet
Prishtinë, 15 shkurt - Në manifestimin madhor për dijen e brezave të tërë studentësh, Universiteti i Prishtinës u cilësua si fillimi i një drite të re dhe zhdukja e një errësire të dijes. Kështu me 17 Fakultete dhe me 38 mijë e 291 nxënës të regjistruar për vitin akademik 2009/10, Universiteti i Prishtinës këtë festoi 40 vjetorin e tij. Në manifestimin e së hënës u përmenden vështirësitë që ka kaluar UP-ja, sukseset dhe planet për të ardhmen. Derisa të pranishëm ishin edhe përfaqësues të Qeveris të cilët premtuan mbështetje për këtë institucion të lartë arsimor.

U krijua edhe strategjia

Presidenti i Republikës së Kosovës Fatmir Sejdiu, uroi shënimin e 40 vjetorit të themelimit të Universitetit të Prishtinës, ndërsa tha se kremtja u përket pikësëpari profesorëve dhe studentëve, mirëpo ajo po kaq fuqishëm përjetohet edhe nga qytetarët e vendit tonë.

“Themelimi i Universitetit të Prishtinës është ngjarje historike. Një hap kualitativ përpara në progresin e mëtejshëm të gjithanshëm të shoqërisë. Zhvillimi i fuqishëm i shkencës sjell ndryshime përkatëse në koncepcionin dhe pozitën e saj në shoqëri. Në vend të shkencës si aktivitet i ndarë nga jeta, sot kemi depërtimin e saj në të gjitha poret e jetës” tha presidenti Sejdiu.

(Tekstin e plotë mund ta lexoni në numrin e nesërm të gazetës, “Bota sot”)

[_MALSORI_]

ne ceremonine hapese te festimeve ne universitet i pari u egzekutua hymni kombetar ...mu duk dicka e quditshme ...me qellim e bene nje gje te tille apo eshte e lejueshme...duke qene se eshte hymni i nje vendi tjeter nuk e di pse eshte lejuar...une u kenaqa qe vellezerit tane ne kosove nuk e kishin harruar hymnin tone madheshtore por edhe me qudi verejta qe ne ambjente nuk kishte asnje flamur...e mbi te gjitha flamurin kuq e zi....nuk e di si...

[fattlumi]

Edhe une si ish student ne kete universitet uroj pervjetorin te gjithe atyre qe kontribuan ne krijimin e tij,te gjithe atyre qe e mbajten edhe ne koherat me te veshtira nen pushtimin serb dhe te gjithe atyre qe sot punojne me nder ne kete universitet dhe punojne qe ta bejne universitet te vlerave evropiane.

Urime

[Argjendii]

nje Index i asaj kohe i Universitetit te Prishtines

[MARGUS]

Prita qe disa "patriot kujdestar" qe na mbushin faqet e forumit me historina te Py di kijave
qe te na shkruaj lidhur me ket tempull qe i dha drit dhe lirin shqiptarve ne kosove e ma gjer ne te gjitha trojet shqiptarve

[Brari]

Në krye të kërkesave për lirinë dhe prosperitetin e Kosovës

Nga Fatmir Sejdiu

Investime të rëndësishme në ngritjen e institucioneve

Sot është ditë e veçantë - e shënojmë 40 vjetorin e themelimit të Universitetit të Prishtinës. Kremtja, megjithëse u përket pikësëpari profesorëve dhe studentëve, ajo po kaq fuqishëm përjetohet edhe nga qytetarët e vendit tonë.

Fillimi i punës së UP-së ishte shtytës për krijimin e specialistëve të profileve nga fusha e filologjisë, arteve, shkencave sociale, matematiko-natyrore, juridike, ekonomike, teknike, të mjekësisë, të bujqësisë etj. Institucioni akademik do t’i shërbente zhvillimit socio-kulturor dhe ekonomik të Kosovës dhe në këtë kontekst veçmas shqiptarëve si popullsi shumicë.

Fati i zhvillimit të vendit tonë ishte i lidhur me punën dhe shtrirjen e Universitetit, sepse ai ndërtoi strategjinë teorike dhe praktike për dije dhe liri. Dija i dha jetë lirisë dhe të dyja bashkë u vunë në shërbim të të mirës për të gjithë. Ajo krijoi bazën për zhvillimin e shtetit dhe në këtë mënyrë e forcoi perspektivën tonë.

Këtë moto UP-ja e promovoi që nga themelimi, dhe kjo mund të kuptohet më së miri nga fjala e prof. dr. Dervish Rozhajës, rektorit të parë, mbajtur më 15 shkurt 1970 në Prishtinë: “Themelimi i UP-së është ngjarje historike. Një hap kualitativ përpara në progresin e mëtejshëm të gjithanshëm të shoqërisë. Zhvillimi i fuqishëm i shkencës sjell ndryshime përkatëse në koncepcionin dhe pozitën e saj në shoqëri. Në vend të shkencës si aktivitet i ndarë nga jeta, sot kemi depërtimin e saj në të gjitha poret e jetës.”(përf. citati)

E theksoj këtë fragment ceremonial të akademik Rozhajës, për të vlerësuar angazhimin e qindra profesorëve dhe punonjësve të Universitetit, përkushtimin për punën kërkimore–shkencore, thellimin dhe modernizimin e procesit të mësimdhënies, si dhe daljen në krye të kërkesave për lirinë dhe prosperitetin e Kosovës.

Me këtë rast kthejmë kujtesën tonë për të respektuar të gjithë profesorët dhe studentët e Universitetit të Prishtinës, të cilët punuan në proceset e krijimit dhe të realizimit të aspiratës për liri dhe mëvetësi nacionale, duke u nisur nga vitet ‘60, ‘80 dhe ’90.

Po kështu, vlerësojmë kontributin studimor të mijëra studentëve që u diplomuan në fakultete dhe shkolla të larta dhe si ekspertë eminentë, dijen e tyre e zbatuan jo vetëm në Kosovë, por edhe në Maqedoni, Luginë të Preshevës, Rozhajë e Novi Pazar, Mal të Zi dhe në shumë vende të botës. Në këto 40 vjet Universiteti i Prishtinës dha kontribut të qenësishëm në fushën e arsimit, të shkencës dhe arteve, shtylla këto, të ngritjes së identitetit modern të shtetit tonë, Republikës së Kosovës. Universiteti e ngriti vetëdijen për njeriun e arsimuar si një faktor themelor të krijimit të një shoqërie të lirë, humane dhe demokratike.

Duke promovuar konceptin bashkëkohor të reformimit dhe menaxhimit, universiteti u bë korrespondues me vlerat konkurruese në tregun e dijes, jo vetëm në shkallë nacionale, por edhe universale.

Me pranimin e Deklaratës së Bolonjës Universiteti i Prishtinës bëhet edhe formalisht pjesë e komunikimit midis universiteteve në hapësirën evropiane të arsimit të lartë. Do të jetë me interes të ketë sa më shumë projekte të përbashkëta me partnerë akademikë jashtë vendit, në mënyrë që të ndërtohet koncepti i Universitetit jo vetëm si konsumues dhe i financuar, por edhe si prodhues dhe financues.

Dua të them me këtë rast, se ende nevojitet më shumë dëshirë dhe veprim praktik për të ndryshuar qasjen tradicionale të punës në Universitet. Ndërlidhja e studimeve dhe hulumtimeve me kërkesat e tregut të punës dhe strategjinë e zhvillimit nacional dhe global, mbetet një nga synimet kryesore për të ardhmen.

Për këtë arsye, ligjvënësit dhe qeveritarët, duke krijuar politika nxitëse të zhvillimit të arsimit të lartë, ndihmojnë realisht të ardhmen më të mirë të qytetarëve dhe të shtetit tonë. Në Kosovë tashmë ndiqen politika liberale në arsimin e lartë. Arsimi i lartë është e drejtë e realizuar në gjuhën shqipe, serbe, turke, boshnjake. Ne duam që secili qytetar të ketë mundësinë për të arritur maksimumin shkencor dhe profesional. Këto politika duhet përparuar dhe stimuluar, mbasi ende jemi vendi me mesatare më të ulët të përfshirjes së të rinjve në arsimimin e lartë. Të rinjtë tanë duan arsimin dhe ne këtë jemi të obliguar t’ua mundësojmë.

Që nga 1 tetori i këtij viti në Prizren do të fillojë punën edhe Universiteti i dytë publik në Kosovë. Ndërkohë, në vitet e fundit është zhvilluar një rrjet shumë i rëndësishëm i institucioneve private të arsimit të lartë. Në të ardhmen priten investime të rëndësishme edhe në ngritjen e institucioneve me profilizime të reja.

Besoj, të gjitha këto do të ndikojnë në rritjen e konkurrencës universitare dhe ofrimin e cilësisë më të lart ani pse tregu i dijes në Kosovë po bëhet gjithnjë e më i hapur, dinamik dhe gjenerues. Në të, pozita e UP-së, si universiteti i parë dhe me një traditë kaq frytdhënëse, duhet të ruhet dhe forcohet me punë dhe ndryshim të përhershëm, reformim thelbësor, investime në ngritjen e kuadrove të reja, investime në modernizimin e procesit kërkimor-shkencor dhe të kushteve më të mira për mësim dhe banim të studentëve.

Jam shumë i bindur se këtë do ta bëjë Universiteti i Prishtinës dhe në këtë projekt do të ketë përkrahjen e merituar.

E ndjej si privilegj që vitin e parë të studimeve e kam filluar në Universitetin e Prishtinës.

bota sot

.