Krimi ka ngritur kokën

[Brari]

Krimi ka ngritur kokën


» Vendosur: 09/02/2010 - 09:07



• Edmond Arizaj

Realisht nuk është se ndonjëherë në Shqipëri e ka pasur kokën ulur. Por është shfaqur shumë me ngjyrat e tjera të tij (vjedhje, abuzime, mashtrime, korruptime), ndërsa prej vitesh e kishim kaluar në kujtesë (harresë) ngjyrën e zezë të krimit, vrasjet dhe plagosjet Vetëm në këta dy muaj, mund të numërohen dhjetëra të tillë. Me emra të njohur e të panjohur, krimi nuk po di të ndalet, madje as të mendojë dy herë. Në jo pak raste, mediat raportojnë për episode fare banale, të cilat “zgjidhen” nëpërmjet armëve. Gjaknxehtësi, mbrojtje e nderit, sharje nga partia, tradhti, prishje pazaresh, janë vetëm pak nga arsyet e shumta që jepen. Por që të gjitha mund t’I përmbledhësh vetëm në një logjikë të thjeshtë, krimi nuk ka më frikë nga shteti. Dhe kjo është vërtet e frikshme. Aq e frikshme, kur çdo ditë të duhet të mendosh se në lokalin ku je ulur me familjen tënde, mund të zhvillohet shumë shpejt “një larje hesapesh” dhe plumbat kush e di se ku përfundojnë. Aq e frikshme sa të mendosh se mund të gjendesh në kohën e gabuar në vendin e gabuar, teksa hidhet një makinë në erë për “prishje pazaresh”. Aq e frikshme sa të gjendesh në mes të ditës midis dy gjaknxehtëve që luajnë “sherifësh”, apo gabimisht të bëhesh viktima rastësore e sedrës së thyer të një burri. Për të mos folur më pas për vjedhjet me armë, rrëmbimet që përfundojnë në mënyrë të zezë, e për emigrantë që zhduken sapo kthehen në Atdhe. (Dhe nuk po i përmendim, vetëvrasjet, apo vrasjet brenda shtëpisë). Një llavë e zezë krimi që ka përfshirë vendin tonë të vogël, por me gjaknxehtësi, sedër dhe namuz të madh. Nuk është e thjeshtë të vësh dorën mbi fajtorin e dytë, atë që nuk bën dot zap fajtorin e parë, shtetin. Policët shqiptarë mund të konsiderohen pa frikë si heronj. Me ca rroga qesharake, me një mbrojtje shtetërore akoma më qesharake, ata çdo ditë e kanë “qyl”, pse çdo ditë janë të rrethuar, të kërcënuar e të rrezikuar. Patjetër që kjo është detyra e tyre dhe e kanë marrë parasysh, derisa kanë zgjedhur profesionin e mbrojtësit të ligjit, por edhe ligji duhet t’I mbrojë ca më shumë se mua dhe ty. Madje hero mund të quhet edhe ai polici rrugor atje tej, që disa shkruajtës e tallin, madje edhe e shajnë ndonjëherë, pse e ndalon në rrugë. Ai polici që akuzohet tash e parë për marrje ryshfeti në mes të rrugës, por që kurrë nuk i qahet halli, kur përplaset me fytyrën firmato të krimit, që i kërcënohet nga xhami gjysmë i hapur i makinës…
Në këtë shpërthim të papërmbajtur të krimit, në këtë kryengritje kriminale, ka vetëm një pyetje nga qytetarët paqësorë, nga ata që nuk e shohin armën si zgjidhje, por organet e ligjit, nga ata që duan të jetojnë të qetë rutinën, ku është shteti?
Dhe nga faqet e mesit të gazetave, atje ku jepet me detaje krimi i radhës dhe në krah, fytyra e viktimës së radhës, duhet të kalosh në faqet e para. Aty ku politika është ngërthyer kaq keq, sa nuk ka Asamble Evropiane që ta zërë me dorë. Shteti është i zënë me politikën. Intervista pa fund, deklarata pa kokë, negociata, mitingje, antimitingje, fronte, koalicione, 4 marsi, 28 qershori, deputetë, për pak deputetë, gjysmë deputetë, prag-deputetë, tradhtarë, besnikë, qëndrestarë, kuti, vota, komisionerë, gjykata, viza, Evropë, Amerikë, analistë, pacifistë, globalistë, terroristë, dumbabistë, fashistë, komunistë, socialistë, lsistë, demokratë, president, Parlament… Të gjithë janë përfshirë në një vorbull pa fund, nga e cila s’po dinë të dalin. E në këtë mishmash politik të shtetit, krimi hedh valle. Krimi i organizuar dhe ai i rastit, krimineli i regjur dhe ai rishtar. Të gjithë kanë gjetur kohën e përshtatshme, me mjegull dhe me lagështirë. Të gjithë nxitojnë të lajnë hesapet e vjetra, apo inatet e ditës. E në nxitim e sipër, bashkë me të ashtuquajturin fajtor, ikën dhe i pafajshmi pa fat. Të tjerë të pafajshëm, struken e mblidhen që të jenë sa më të padukshëm, se mos kush e di, diku mund të kenë shkelur në kallo dikë, mund ta kenë ofenduar, dikujt mund të mos ia kenë bërë nderin. Dhe kur shteti nuk e ka mendjen, mendja e zezë punon për hakmarrjen. Duke ndjellë frikë dhe panik te qytetarët, duke i bërë ata mosbesues e të demoralizuar. Për këta qytetarë, që janë shumica, që janë votues e taksapagues, që janë themeli i ecjes së vendit, shteti, të gjitha anët e shtetit, duhet të reflektojnë, jo një çast, por ditë e muaj me radhë. Krimi e ka vështirë të ngrejë kokën, por më vështirë është t’ia ulësh atë.

panorama

[Duaje Siveten]

Shekulli, 10/02/2010

Nipi i Hysni Kapos heton varrin masiv

TIRANË - Misteri i varrit masiv në periferi të Tiranës do të zbardhet nga një prokuror që ka lidhje me diktaturën komuniste. Hetimet po drejtohen nga prokurori Etien Kapo, nipi i ish-sekretarit të Komitetit Qendror të asaj kohe dhe anëtari i Byrosë Politike e deputet në Kuvendin Popullor.

Prokurori Kapo është i biri i Pëllumb Kapos, i cili deri në vitet '90-të ka qenë një nga drejtorët e Degës së Punëve të Brendshme. Por, paradoksi qëndron se gjyshi i tij bënte pjesë në nomenklaturën e lartë shtetërore të asaj kohe, ndërsa sot ai duhet të zbardh vrasjet e kryera nga ai regjimi ku edhe gjyshi i tij ishte një nga drejtuesit e atij shtetit.

Sipas burimeve, mësohet se Hysni Kapo i lindur në Tërbaç të Vlorës më 4 mars 1915, vdiq më 23 shtator 1979 në një klinikë në Parisit, ndërkohë mbante postin e Sekretarit të Komitetit Qendror të Partisë Popullore të Shqipërisë. Të pyetur për këtë fakt, zyrtarët e Prokurorisë së Përgjithshme, shprehen se ditën e zbulimit të eshtrave në afërsi të fshatit Qesarakë në rrëzë të malit Dajt, pranë seksionit të vrasjeve dhe krimit kundër personit në Prokurorinë e Tiranës, ka qenë i gatshëm prokuror Kapo, i cili automatikisht ngarkohet me hetimin e çështjes.

"Nuk mund ta paragjykojmë punën e prokurorit Etien Kapo për shkak të kaluarës së familjarëve të tij. Ai është korrekt në respektim të ligjit dhe punës dhe nuk mendojmë se është ndonjë shqetësim për ndonjë persona. Ai do të hetojë çështjen deri në fund për të parë se kush janë personat e ekzekutuar dhe identifikimin e tyre" - thanë zyrtarët e Prokurorisë së Përgjithshme, të cilët nuk deshën të identifikohen për shkaqe "morali" karshi kolegut të tyre.

Ndërkohë, dy ditët e fundit, prokurori i çështjes Kapo, ka zbarkuar në vendin e gjetjes së këtyre eshtrave bashkë me një grup oficerësh dhe ekspertësh të Mjekësisë Ligjore. Nga këqyrja e vendit mësohet se oficerët ndër të tjera kanë gjetur edhe një kafkë njeriu, e cila nuk përkon me asnjë nga eshtrat e gjetura që ndodhen pranë morgut të kryeqytetit. Kjo ka ngritur dyshime se në atë zonë ndodhen të varrosur edhe shumë persona të tjerë të ekzekutuar në kohën e regjimit komunist.

Sipas burimeve nga prokuroria, deri më tani janë gjetur dhe dërguar në morg 18 apo 19 skelete personash, që mendohen se janë të seksit femër. Vetëm pak ditë më parë ishte një qytetar që kërkonte prej kohësh eshtrat e babait të tij, që gjatë gërmimeve zbuloi eshtrat e këtyre personave që janë ekzekutuar gjatë viteve të regjimit.

[Edvin83]

KE dhe SHBA: Ligji mbi SHISH, jemi të shqetësuar!
10/02/2010
Gazeta Shqip

Pas zyrtarëve amerikanë reagon edhe kreu i KE-së, Lohan

Komisioni Europian dhe Shtetet e Bashkuara të Amerikës konfirmojnë shqetësimet për ligjin e ri të Shërbimit Informativ Shtetëror. Amendamentet janë hartuar nga qeveria dhe pritet të miratohen në Kuvend, por diplomatë të huaj, të cituar një ditë më parë nga “Top Channel”, shprehën kritika dhe shqetësim se me këto ndryshime, shërbimi sekret shqiptar vihej në varësi politike të Kryeministrit, duke shkelur parimet e një shoqërie demokratike. Në reagimin zyrtar, Komisioni Europian ka nënvizuar standardet europiane që synon të arrijë Shqipëria, por edhe kushtëzimin e integrimit europian me respektimin e këtyre standardeve. Ndërsa Shtetet e Bashkuara të Amerikës kanë theksuar përveç aspiratave europiane dhe detyrimet euroatlantike të Shqipërisë, si vend anëtar i NATO-s. Duke iu përgjigjur një kërkese të “Top Channel”, ambasadori i delegacionit të Komisionit Europian në Tiranë, Helmut Lohan, i komentoi kështu ndryshimet e fundit në ligjin për SHISH: “Në procesin e përgatitjes së opinionit për kërkesën e Shqipërisë për anëtarësim në Bashkimin Europian dhe vlerësimit të kritereve politike, Komisioni Europian merr në analizë edhe çështje të tilla si për shembull kompetencat e Shërbimit Informativ në një shoqëri demokratike, llogaridhënien dhe kontrollin e tij”. Po për “Top Channel”, reagoi dy ditë më parë edhe ambasada e Shteteve të Bashkuara në Tiranë. Zëdhënësi i ambasadës bëri këtë koment: “Lidhur me projektligjin për Shërbimin Informativ, është një çështje me rëndësi që meriton të shqyrtohet me kujdes dhe durim. Shqyrtimi duhet të marrë parasysh aspiratat euroatlantike të Shqipërisë dhe detyrimet e saj si një aleat i NATO-s”. Partnerët ndërkombëtarë janë të shqetësuar nga ndryshimet. Me variantin e ri, SHISH bëhet kompetent për të mbledhur informacion për njohjen, parandalimin e krimit të organizuar, të kontrabandës, pastrimit të parave dhe më kryesorja, për korrupsionin e personave që ushtrojnë funksione publike. Varianti i ri i ligjit thekson edhe më shumë varësinë e agjencisë nga Kryeministri. Jo se SHISH deri më sot ka qenë i pavarur nga Kryeministri, por me ligjin e ri, kreu i qeverisë mund t’i kërkojë drejtorit të SHISH-it informacione dhe raportime në çdo kohë dhe për çdo çështje që lidhet me veprimtarinë e agjencisë. Po ashtu, për të mbledhur informacion nga agjencitë e huaja partnere, shërbimit i duhet miratimi i Kryeministrit. Partnerët ndërkombëtarë pyesin se ku të çon kjo? Ata mendojnë se ndryshimet rrezikojnë të cenojnë profesionalizimin e shërbimit sekret dhe ta vënë atë nën një ndikim të pastër politik.

Krimi po synon te vere nen kontroll te gjitha organet e shtetit!