Dhurata e parë e vitit 2010

[Mexhid Yvejsi]

Sokol PLAKOLLI, Prishtinë

Dhurata e parë e vitit 2010

Vetëm kokat e ndritura dijnë ta shohin kohën me syrin kritik. Ato e jetojnë të sotmen, ndërsa punojnë për të ardhmen. Dhuratat e tyre janë më të vlefshme se vet koha, ngase ato arrijnë t’i mbijetojnë çdo kohe.
Një të tillë dhuratë na bëri këtë fillim viti Mexhid Yvejsi. Duke na dhuruar 99 poezi të kushtuara 99 emrave më të bukur të Allahut të madhërishëm, mëshirëplotit.
Ky libër me poezi vjen si dhurata e 25-të me rradhë e autorit, kushtuar lexuesëve.
Mexhidi Yvejsi u lind më 13 korrik 1950, në Gjakovë. Mësimet fillestare dhe të mesme i kreu në Gjakovë, ndërsa në Universitetin e Prishtinës, Fakultetin Filozofik. Studioi gjuhën dhe letërsinë angleze. Deri më sot ka botuar në trojet shqiptare nëpër Evropë, Amerikë, Afrikë, Azi e deri në Australi mbi njëmijë punime të ndryshme .
Së fundmi, në këtë fillim viti na dhuroi librin me poezi: ,, 99 EMRAT E BUKUR TË ALLAHUT’’, (redaktor: Daut Ibrahimi; recensent: Ali Sylaj; rradhitja kompjuterike: Fetah Krypa; shtypi: Grfo Print-Gjakovë).
Është me rëndësi jetike të kuptojmë se në çka besojmë, se çka adhurojmë. Unë mendoi se poezia është ajo që ndriçon errësirat më të thella të shpirtit të trazuar. Poezia është sikur vetëtima, ajo ka mjaftë dritë për të na çelë sytë...! E Allahu është Dritë, Dritë mbi Dritë...

1. Allah
( Zoti është një)

Allahu është Zoti
Zoti është Një,
S’ka Zot tjetër përveç Tij.
Këtë të vërtetë secili njeri
Duhet ta kuptojë, duhet ta dijë.
Për me pasë dritë, ardhmëri.

( Është kjo poezia e parë kushtuar emrit : ALLAH, i cili është emri më i madh i krijuesit, emër i përveçëm, emër që s’ka shumës). Poezitë tjera po ua lëmë që ti mësoni kur ta keni librin në duart tuaja.

Allahu xh.sh. në Kur’anin Fisnik thotë:
-“Allahu ka emrat më të bukur (mirë), prandaj Atë thirreni me ta” , (El-A’ëraf, 180)
- “Thuaj: “Thërrisni: Allah ose thërrisni Er-Rrahman, me cilindo që ta thërrisni (prej këtyre dy emrave), emrat e Tij janë më të bukurit…”, (Isra’ë 110)
- “Ai është Allahu, nuk ka zot tjetër pos Tij. Atij i takojnë emrat më të bukur” (Ta-Ha, 8)
- “Ai është Allahu, Krijuesi, Shpikësi, Formëdhënësi. Të Tij janë emrat më të bukur.” (El-Hashr, 24)

Ka thënë Pejgamberi a.s.: “Allahu i ka 99 emra, 100 pa një, Ai është tek dhe e do tekun. Ai që i numëron (mëson) këta emra të Tij, do të hyjë në Xhehnnet. Secilin prej këtyre emrave Mexhidi Yvejsi na e solli të pasuar me nga një poezi, e cila shpjegon kuptimin dhe rëndësinë e secilit emër. E lusim Allahun e madhërishëm që autorit të këtij libri t'i jep shëndet, frymëzim dhe harmoni të vazhdueshme. E ai ne, në vazhdimësi vepra të tjera pas kësaj të fundmes!

Kushtuar autorit:
Mexhid Yvejsi

Ata, që dinë të bëjnë dhuratat më të mira.
Ata, veprat e të cilëve sjellin dobi të vazhdueshme.
Ata, të cilët me dritë e mundin terrin.
Ata, të cilët mbesin të gjallë pas vdekjes.
Ata, që me majën e pendës luftojnë pa diturinë.
Ata, kanë një vend të lartë në vendin e lartësuar.

Sokol PLAKOLLI, Prishtinë