Përse zyra e Edvin Ramës heshti për vizitën në Amerike
--------------------------------------------------------------------------------
Përse zyra e Ramës heshti për vizitën në Shtetet e Bashkuara
Performanca qesharake e Ramës në SHBA lë me gojëhapur të pranishmit
Qëndrimet qesharake të Ramës kanë lënë me gojëhapur edhe disa miq të tij në Shtetet e Bashkuara të Amerikës, të cilët janë përfshirë nga një konfuzion total pas deklaratave të kryetarit të PS-së se njeh rezultatin e zgjedhjeve, por jo Parlamentin. Në një tryezë të hapur ku ishin të pranishëm rreth 30 persona, disa nga Departamenti i Shtetit, ambasada shqiptare në Uashington, organizata shqiptare NAAC, ish-ambasadorja Mariza Lino, përfaqësues të SOROS dhe disa të tjerë që kanë punuar në Shqipëri, Rama përsëriti retorikën e tij politike që trumbeton çdo ditë në Tiranë, duke mos sjellë asgjë të re. Në fillim foli Dan Server, nënpresidenti i USIP, që drejton tryezën e rrumbullakët dhe më pas foli Rama nja 20 minuta për zgjedhjet, rezultatin, bojkotin, hapjen e kutive, etj. Rama tha se Shqipëria është një demokraci që nuk funksionon, duke përsëritur frazat e jashtëzakonshme. Në fjalimin e tij ai krijoi konfuzion dhe pështjellim me fraza të tipit: "njoh zgjedhjet, por jo Parlamentin"; "respektoj vendimin e gjykatës, por duam sërish të hapen kutitë". Këto fraza bënë që pjesëmarrësit të rrudhin buzët me shprehjen, pasi nuk arritnin të kuptonin ç'do të thotë edhe të njohësh rezultatin, edhe të mos jesh në Parlament. Z. Server i kërkoi Mariza Linos të fliste, nëse dëshironte, meqë ka qenë ambasadore në Tiranë, por ajo tha që nuk kishte asnjë koment. Më pas fjalën e mori përfaqësuesi i ambasadës shqiptare në Uashington, i cili solli shkurtimisht disa fakte kokëforta për zgjedhjet. Ai theksoi se zgjedhjet janë vëzhguar nga dhjetëra e qindra vëzhgues të huaj, përfshirë kongresmenin Hastings dhe ishin zgjedhjet e para në histori ku opozita zgjodhi dhe vendosi për sistemin elektoral që dëshironte. Diplomati shqiptar nënvizoi më tej se këto ishin zgjedhjet e para që procesverbalet janë firmosur nga të gjithë komisionerët e partive pa asnjë vërejtje, ku opozita ka pasur të angazhuar jo pak por 20 000 komisionerë, numërues dhe vëzhgues. Ai saktësoi për të pranishmit se këto ishin zgjedhjet e para për të cilat Komisioni Qendror i Zgjedhjeve shpalli rezultatin në mënyrë unanime 7 me 0. Gjithashtu, diplomati shqiptar u ndal tek procesi i numërimit, duke nënvizuar se këto ishin zgjedhjet e para që çdo votë, një rast unik në botë, është skanuar, regjistruar dhe transmetuar live në ekrane të mëdha në vendet e numërimit, ndërkohë që shtoi se nuk është shënuar asnjë problem me listat e votimit apo me pajisjen me kartat e identitetit. Konkluzionet e raportit të OSBE/ODIHR-it, vijoi më tej diplomati shqiptar në Uashington, janë të qarta dhe kokëforta, ndërsa shtoi se vendimi i Gjykatës së Apelit rrëzon kërkesën për rihapjen e kutive. Ai nënvizoi se ka parashikim ligjor që komisione parlamentare nuk mund të ushtrojnë atributet e gjykatave dhe ka vendim të Gjykatës Kushtetuese për përjashtimin e çdo lloj kontrolli parlamentar mbi aktivitetin e pushtetit gjyqësor. Ai shtoi se qeveria dhe Presidenti kanë njohur rezultatin dhe qeverinë siç kanë njohur legjitimitetin më të plotë të gjitha institucionet ndërkombëtare dhe ato monitoruese. Në përfundim, ai nënvizoi se thirrjet publike në media për rrëzimin e qeverisë me forcë nga rruga janë të papranueshme për një forcë politike që kërkon demokraci dhe se të krahasosh qeverinë e një vendi të NATO-s me qeverinë komuniste të vitit '90 është fyerje për arsyen dhe koshiencën demokratike të shqiptarëve.
Rama pyetet nëse do të kërkojë ndjesë publike për firmën e të atit në varjen e poetit Havzi Nela
Në seancën e pyetjeve me të pranishmit, kreu i PS-së nuk ka mundur ta përmbajë veten dhe shpeshherë ka ofenduar ata që i drejtonin pyetje. Pyetjen e parë e bëri Mustafa Xhepa: "Si i jeni përgjigjur ju kërkesës publike të familjarëve të poetit të varur Havzi Nela (njeriut të fundit të ekzekutuar në Europën Lindore për arsye politike në vitin '89) për të kërkuar ndjesë për faktin që firma e babait tuaj figuron ndër firmat që kanë dhënë dritën jeshile për varjen e tij. Është e rëndësishme për mua si ish-i përndjekur të marr një përgjigje jo thjesht nga i biri i të atit që ka vënë firmën në këtë krim, por mbi të gjitha nga njeriu që drejton sot opozitën dhe që një ditë pretendon të drejtojë Shqipërinë!". Përgjigjja e Ramës ishte një tërbim i vërtetë. Pasi kruajti kokën një herë dhe turfulloi, tha: "Më vjen keq për ty se si je katandisur, goxha burrë merresh me gënjeshtra. Kjo nuk është e vërtetë. Babai im ka qenë artist dhe s'ka pasur punë me këto gjëra që thua ti. Mua më vjen keq për shtresën tuaj", ndërsa filloi të fliste ca llafe pa bosht, sepse ai e humbi ekuilibrin. Kjo bëri përshtypje shumë negative, sepse në Amerikë nuk mund të komentosh personin që pyet, por duhet të përgjigjesh. Rama e humbi fare, filloi të turfullonte dhe të bënte lëvizje të pakontrolluara.
Në këtë moment, Mustafa Xhepa vazhdoi sërish: "Ju jeni në Uashington dhe akoma nuk keni takuar asnjë zyrtar të qeverisë. Komuniteti shqiptar ka informacione se kërkesa juaj për takime është refuzuar. Mund të na thonë përse?". Me këtë pyetje Rama e humbi fare, u skuq, filloi të përtypej dhe të nxehej dhe tha: "Kjo është gënjeshtër, është gënjeshtër", e përsëriti disa herë saqë ndërhyri moderatori dhe tha: "Të vazhdojmë me pyetjen tjetër".
Përfaqësuesit e Lidhjes Shqiptaro-Amerikane i kërkuan llogari Ramës përse u bën presion deputetëve socialistë dhe nuk i lejon ata të futen në Parlament. Duke mos njohur procedurat më elementare të komunikimit publik, por i mësuar me përfaqësuesit e medias që kontrollon, të cilave ua rekomandon vetë pyetjet që duhet t'i bëjnë, Rama ka degjeneruar në turfullima, sharje e fyerje duke pretenduar se këto pyetje kanë ardhur nga Tirana, pretendim që e ka bërë qesharake dhe mjerane performancën e tij. "Përse ju i beni presion deputetëve të PS që të mos shkojnë në Parlament, përse ju nuk përmbushni misionin e opozitës?", ishte pyetja që Zefa Balaj i drejtoi kryetarit të PS-së. Rama u përgjigj: "Unë nuk bëj presion, është vendim politik, por mua më vjen keq për pyetjet tuaja". Këtu Rama shpërtheu: "E di unë, këto pyetje jua sjell ai nga Tirana juve, më duket sikur kam Berishën përpara, se kjo është gjuha e tij, ai ju ka nisur pyetjet nga Tirana". Të gjithë të pranishmit patën mundësinë ta njohin më mirë se kush është drejtuesi i opozitës në Shqipëri dhe sa seriozisht mund të merren pretendimet e tij. Më pas zoti Bytyci e pyeti: "Përse ju po harxhoni kaq shumë energji si opozitë për asgjë, për një krizë që nuk ekziston, në vend që të punoni për integrimin në BE? Rama, tashmë që e kishte humbur, nuk u përgjigj fare, por bëri një farë qartësimi të figurës së vet, përpjeket e tij titanike për rrëzimin e komunizmit, aktivitetin e tij për demokracinë, etj. Shkurt, Edvin Rama nuk foli për asgjë, nuk iu përgjigj asnjë pyetjeje, por përsëriti gjatë gjithë kohës të njëjtat gjëra.
Ekspertët ligjorë në SHBA: Bojkoti nuk është politikë e re
Në mbyllje erdhën edhe dy pyetje, që u bënë nga Dan Server i USIP dhe një tjetër nga një ekspert ligjor amerikan që ka punuar për ABA-CEELI (Central and Eastern Europe Laë Initiative) në vitet 1997-2000. Dan Server e pyeti: "Çfarë prisni ju zoti Rama nga komuniteti ndërkombëtar?" Rama filloi ato fjalitë e tij, që ne duam të na kuptoni, se ne duhet të jemi në Parlament, por nuk mund të mos sqarojmë shqiptarët se çfarë ka në kutitë e votimit. Fjalitë e tij ishin të mërzitshme, pa asnjë përmbajtje të qartë e të prerë, se çfare kërkonte. Ndërsa eksperti ligjor që kish punuar pranë ABA-CEELI, e pyeti: "Unë kam punuar në Shqipëri dhe e njoh demokracinë shqiptare. Ju thoni se jeni për një politikë të re, por veprimet tuaja janë po ato që bënte dikur PD, por me një ndryshim se rezultatet e zgjedhjeve atëherë kanë qenë të kontestueshme, ndërsa këto zgjedhje janë njohur gjerësisht. Kjo është rruga juaj, bojkoti?" Rama vazhdonte të njëjtat fjali, aq sa u bë i mërzitshëm, monoton dhe të gjithë humbën interesin në atë që po thoshte. Në fund Rama tha: "Unë dua t'ju sqaroj se këto pyetje kanë ardhur nga zyra e Sali Berishës, ai i nis këto pyetje. Por e tha me kaq turfullim, sa që ata që ishin aty s'po kuptonin se çfarë thoshte. Ekspertë amerikanë pyesnin me habi: "A është korrekte kjo frazë e Ramës, apo e kuptuam gabim: Ne njohim zgjedhjet, por nuk futemi në Parlament?" Gjithashtu pyesnin: "Si ta kuptojmë që edhe njeh vendimin e gjykatës, edhe kërkon diçka që ky vendim e ka rrëzuar?"
Rilindjademokratike
Përgjigju Duke Cituar
Postuar më parë nga juanito02
Krijoni Kontakt