Kryeministri Berisha rikonfirmoi dje vullnetin e Partisë Demokratike për të pranuar çdo kërkesë të Partisë Socialiste, përveç diskutimit të vendimeve të gjykatave, një çështje kjo që ka lidhje vetëm me opozitën. Berisha informoi dje deputetët e Grupit parlamentar të Partisë Demokratike rreth tryezës së takimit me kreun e PS-së, Edi Rama, të thirrur nga Presidenti Bamir Topi në respektim të Rezolutës së Këshillit të Europës. Duke u ndalur gjerësisht tek ky takim, kreu i ekzekutivit shprehu edhe njëherë angazhimin serioz të mazhorancës për të dhënë kontributin e saj në gjetjen e gjuhës së përbashkët me opozitën. "Unë, megjithëse pas takimit në mënyrën më serioze kam bërë transparencë thelbësore lidhur me takimin që kemi pasur tek Presidenti i Republikës, po iu them se në atë tryezë shkova me zotin Patozi. Edhe një herë mund t'ju them se unë e vlerësoj atë si një përpjekje serioze, pozitive dhe se ne shkuam aty të vendosur për të dhënë kontributin tonë më madhor. Ne mbetemi të vendosur për të dhënë kontributin tonë më madhor në zgjidhjen e problemit të krijuar nga bojkoti i Parlamentit", u shpreh Berisha. Gjithashtu, Kryeministri theksoi se në tryezë ai i kishte dhënë opozitës garanci të plotë për të shqyrtuar çdo kërkesë që është mes opozitës dhe mazhorancës, por nga ana tjetër, ai vuri në dukje se në mënyrë kategorike kjo mazhorancë nuk mund të konsiderojë si çështje bilaterale vendimet gjyqësore. Në këtë kontekst, Berisha theksoi se gjykatat kanë vendosur dhe vendimi i tyre nuk mund të bëhet një problem midis palëve, por bëhet problem vetëm me atë palë që e konteston atë. "Ky vend ka një histori zhvillimi 19-vjeçare në këtë rrugë dhe kjo histori zhvillimi është jashtëzakonisht e rëndësishme të mbahet parasysh. Duke e garantuar opozitën se jam i hapur të shqyrtoj çdo kërkesë që është midis nesh, theksova se kurrë ndonjëherë nuk e kam konsideruar dhe nuk e konsideroj çështje bilaterale çështjen e vendimeve gjyqësore. Gjykatat kanë vendosur dhe do të vendosin sa herë që palët t'i drejtohen asaj, por vendimi i tyre sapo jepet nuk është më problem ndërpalësh, por është problem vetëm me gjykatën", vijoi kreu i qeverisë. Por, gjithashtu, ai vuri në dukje se gjykatat kanë marrë vendime edhe për mazhorancën, në shumë raste të ankimuara këto edhe nga opozita, por mazhoranca në mënyrën më absolute jo vetëm që i ka respektuar këto vendime, por nuk i është drejtuar asnjëherë opozitës për të bërë atë fajtore apo përgjegjëse. "Unë nuk i kam kërkuar asnjëherë, askërkujt, të trajtojë problemet tona me gjykatën. Ju e keni dëgjuar opozitën të citojë 17 vendime kundër qeverisë dhe ne si kemi kërkuar asnjëherë opozitës të bëjmë diçka kundër këtyre vendimeve, sepse ato janë vendime të gjykatave, nuk ka përgjegjësi opozita. Opozita edhe kur na ka paditur ne nuk mban përgjegjësi. Nuk mundem, në asnjë mënyrë, që problemet që opozita ka me gjykatën t'i bëj probleme midis qeverisë dhe opozitës. Kjo nuk mund të ndodhë. Për vendimet e gjykatave opozita i ka problemet me gjykatat. Ka qenë dhe do të jetë kështu, derisa gjykatat janë të pavarura dhe të mos i bëjmë vegël të ekzekutivit, që s'mund të bëhen kurrë", tha ndër të tjera kreu i mazhorancës. RD
Përgjigju Duke Cituar
Postuar më parë nga mesuesi_1
Krijoni Kontakt