Ligj I Ashper:s'ka Me Azilante Shqiptare Ne Britanine E Madhe

[Shijaksi-London]

Ligji i ashpër: S'ka më azilantë shqiptarë në Britaninë e Madhe

GAZETA SHQIPTARE 8 SHKURT 2003
Nga Londra
Muhamed Veliu

Lamtumirë emigracionit ilegal shqiptar në Angli. Një ligj i sapomiratuar nga qeveria e këtij vendi ndalon kategorikisht hyrjen pa dokumenta në këtë vend, duke mos njohur asnjë lloj argumenti të azilkërkuesit.
Ligji i ri për emigracionin në Britaninë e Madhe i cilëson Shqipërinë, Bullgarinë, Maqedoninë, Moldavinë, Rumaninë, Serbinë dhe Malin e Zi si shtete të sigurta, dhe, si pasojë, qytetarëve të këtyre shteteve, të cilët do të mbërrijnë në Britani për të kërkuar azil politik, do tu refuzohet një gjë e tillë automatikisht dhe do të deportohen menjëherë. Detyrimet e ligjit të ri u bënë publike nga ministri i Brendshëm David Blunket, i cili tha se këto ndryshime bëhen për të ndaluar numrin në rritje të shtetasve nga Europa Juglindore që mbërrijnë në Britani për të kërkuar azil. Ligji bën përjashtime vetëm për ato raste kur personi që kërkon azil ka prova të forta për të mbështetur kërkesën e tij. Vetëm nëse vërtëtohet një gjë e tillë, aplikanti mund të vazhdojë procedurat e radhës. Sipas shifrave të Ministrisë së Brendshme britanike (Home Offise), për çdo vit më se 8 000 shtetas nga vendet e Europës Juglindore aplikojnë për azil në Britani. Po ashtu, nga publikimi vjetor i shifrave rreth numrit të azilkërkuesve në Britani mësohet se vitin e shkuar kanë kërkuar azil 100 000 veta. Nuk kanë mbetur pa u përfshirë në këtë ligj dhe ata të cilët merren me trafikimin e vajzave për qëllime prostitucioni. Ligji i ri parashikon dënime deri në 14 vjet për ata të cilët merren me këtë lloj trafiku. Ligj i ri ka prekur edhe emigrantët me lejeqëndrimi të rregullta në shtete të ndryshme të BE-së, të cilët nuk kishin nevojë për vizë hyrjeje në Britani. Tani të gjithë atyre do tu duhet të pajisen me viza hyrje në Britani.
Blunket tha se "numri në rritje i emigrantëve në BE të cilëve po u garantohet e drejta e qëndrimit në këto vende, bën që shumica e tyre të hyjë lirisht në Angli dhe duke përdorur identitete të tjera kërkojnë azil për të marrë ndihmë sociale dhe banesa falas.
Ana pozitive e këtyre masave do të shikohet muajt e ardhshëm. Në ditët që do të vijnë qeveria Britanike do të diskutojë edhe rreth liberalizimit të mundshëm të vizave për qytetarët e Europës Juglindore. Ky ligj i ri mund ti hapë dritën jeshile dhënies së 40 000 vizave pune për këto shtete nga ku mund të përfitojnë dhe shqiptarët. I këtij mendimi duket se është edhe ambasadori shqiptar në Londër, Kastriot Ropam i cili thotë: E vlerësoj qëndrimin e qeverisë Britanike si një qëndrim pozitiv, që kjo qeveri bën ndaj zhvillimeve të brëndëshme demokratike dhe progresit në këtë drejtim. Sigurisht që qeverija Britanike po përpiqet të marri masa për të ndaluar emigracionin ilegal, por në të njëjtën kohë besoj se në kuadër të proceseve integruse në të ardhmen do të krijohet mundësija që shtetasit shqiptarë, të vinë në Britannë e Madhe në mënyrë të ligjëshme.

DISA TE DHENA PER SHQIPTARET NE BRITANI

- Sipas statistikave jo zyrtare, në Britaninë e Madhe jetojnë rreth 50 000 shqiptarë.
- Numri i emigrantëve shqiptarë erdhi duke u rritur pas vitit '98.
- Emigrantët shqiptarë janë përqëndruar në Londër, sepse mundësitë për tu punësuar janë më të mëdha.
- Ndërsa në Irlandë numri i emigrantëvë arrin nga 2000 deri në 3000 veta.
- Nga viti në vit ka një rritje të studentëve shqiptarë që frekuentojnë universitet angleze. Vetëm në universitetin e Oxfordit studiojnë më shumë se 50 studentë shqiptarë.
- Krahas shumicës së njerëzve që punojnë, bie në sy dhe një rritje e grupeve kriminale të cilat kanë vepruar në shtete të tjera të Europës.
- Shumë emigrantë kanë arritur të hapin biznese private, restorante, lavazhe makinash, internet kafe apo dhe në dy kompani të cilat merren me sigurimin e klubeve të natës apo të personave VIP.



Dy ngjarjet kriminale me protagonistë azilantët

Pse u acaruan me emigrantët


Problemet e emigracionit janë shndërruar në çështje dite për politikanët britanikë, median si edhe për çdo njeri të thjeshtë. Temperatura e këtij problemi u rrit menjëherë pas arrestimit të gjashtë shtetasve afrikano-veriorë në një shtëpi në Ëood Green, në veri të Londrës, ku u gjetën disa pajisje që kishin shërbyer për prodhimin e gazit vdekjeprurës recin. Vetëm disa ditë nga operacioni i Londrës, në një operacion tjetër anti-terrorizëm, kësaj radhe në Mançester, një oficer i policisë u godit për vdekje nga një algjerian, i cili rezultoi se ishte emigrant. Fakti që të arrestuarit e Londrës dhe vrasësi i detektivit Stephen Oake ishin azilantë, bëri që edhe një herë pas një kohe të gjatë "heshtjeje" problemi i azilkërkesve të dilte në pah si një problem tejet kompleks, kësaj here i ndërthurur me terrorizmin. Shumë shoqata në mbrojtje të emigrantëve kanë filluar protestat e tyre në përkrahje të të drejtave të shtetasve të huaj azilkërkues në Britaninë e Madhe.


Edhe kisha kundër emigrantëve


Në debatin për emigrantët është përfshirë dhë argjipeshkvi i Canteburyt DrRowan Williams, i cili tha se mbyllja e emigrantëve në kampe është "tejet e arsyeshme". Me deklaratën e tij, Williams duket qartë se mbështet propozimin e konservatorëve. Por deklarata e kryepeshkopit, i cili cilësohet si liberal ndaj çështjeve sociale, u komentua nga grupet që mbrojnë të drejtat e emigrantëve si një "goditje" e re ndaj azilkërkuesve, por kësaj radhe nga njeriu i Zotit. Menjehërë pas publikimit të kësaj deklarate në media dhe përdorimit të saj nga shtypi i poziconuar kundër emigrantëve, zyra e shtypit e komentoi thënien e argjipeshkvit si një sentencë e nxjerrë nga konteksti i fjalës së tij. Ata mohuan lajmin se argjipeshkvi ishte avokat i idesë se izolimi i emigrantëve është "tejet i arsyshëm".