Flamuri Shqiptar ne Hene

[dodoni]

Flamuri shqiptar është mbajtur si simbol gjatë fluturimit drejt Hënës, të anijes kozmike "Apollo 14" -Dokumenti ndodhet në Muzeun Historik i autografuar nga kozmonauti me origjinë shqiptare Shepard në vitin 1971 -


TIRANE, 7 Shkurt/ATSH-Klotilda Harka/.- Flamuri shqiptar në miniaturë me shqiponjën dykrenare është mbajtur si simbol nga astronauti me origjinë shqiptare Alan B. Shepard, gjatë fluturimit drejt Hënës të anijes kozmike "Apollo 14", në vitin 1971. Faktin e dëshmon një fletë katërkëndeshe prej kartoni ku flamuri shqiptar ndodhet i ngjitur pranë një fotografie me ngjyra të anijes kozmike "Apollo 14", bërë në sipërfaqen e Hënës, e cila ndodhet në arkivin e Muzeut Historik Kombëtar në Tiranë. Relikja është e autografuar nga Shepard dhe kozmonautët e tjerë dhe gjithashtu në të ndodhet mbishkrimi në anglisht ku thuhet se "ky flamur u mbajt si simbol deri në Hënë, në anijen "Apollo 14" gjatë ditëve nga 31 Janari- 9 Shkurt i vitit 1971 dhe është prezantuar nga admiral Alan B.Shepard, një kozmonaut me origjinë shqiptare". Shepard gjatë udhëtimit kozmik e mori me vete këtë flamur të kombit shqiptar, duke dëshmuar origjinën e tij shqiptare. Në relike ruhet dhe një mbishkrim tjetër anglisht me shkrim dore ku thuhet "With the compliments of the astronauts of the United States" - Alain Shepard, që i përket 20 Tetorit të vitit 1971. Drejtori i Muzeut Historik Kombëtar Moikom Zeqo i tha ATSH-së se, kjo relike muzeore është një dëshmi e shkëlqyer e nderimit të kombit shqiptar nga kozmonauti me origjinë shqiptare Shepard, i cili e ka përgatitur me dorën e tij këtë autograf, nëntë muaj pas flututimit të anijes kozmike "Apollo 14", drejt Hënës. Zeqo tha se, flamuri shqiptar që ndodhet në këtë relike muzeore, është flamuri zyrtar i asaj kohe dhe është respektuar sipas variantit me yll. Ai tha se "jemi duke hulumtuar për të zbuluar identitetin e këtij kozmonauti dhe hollësira të tjera rreth faktit se si kjo relike është arkivuar në Shqipëri, pikërisht në vitin 1971, në periudhën e shtetit totalitar me antiamerikanizmin e tij të njohur. Muzeu Historik Kombëtar është duke hulumtuar dhe rreth jetës dhe veprimtarisë shkencore të një kozmonauti tjetër me origjinë shqiptare, William Grigori. "Hulumtimi rreth këtyre dy personaliteve do të shuajë më tepër kurizitetin e lidhjeve miqësore amerikano-shqiptare", tha drejtori i Muzeut Historik Kombëtar. /f.n/
2003-02-07



--------------------------------------------------------------------------------
Copyright © 2001 Albanian Telegraphic Agency! Inc. All rights reserved.