Ndahet nga jeta Prof. Dr. Mehmet Begraca

[Brari]

22.01.2010
Presidenti Sejdiu ngushëlloi familjen Begraca

Presidenti i Republikës së Kosovës, dr. Fatmir Sejdiu i ka dërguar një telegram ngushëllimi familjes Begraca, e cila humbi më të dashurin e saj, profesorin e nderuar të Fakultetit të Mjekësisë, prof.dr. Mehmet Begraca Në vijim po e japim tekstin e këtij telegrami:

E nderuara familje Begraca,

Pranoni ngushëllimet e mia më të sinqerta për ndarjen nga jeta të më të dashurit tuaj, mjekut dhe profesorit të nderuar të Fakultetit të Mjekësisë, prof.dr. Mehmet Begraca.

Kontributi dhe puna e tij e çmuar në përmirësimin e gjendjes shëndetësore të popullatës, në edukimin e brezave të tërë të mjekëve dhe në zhvillimin e sektorit shëndetësor do të kujtohen dhe nderohen përherë nga qytetarët e Republikës së Kosovës.

Shpirtërisht dhe në lutje jemi me Ju në këto çaste pikëllimi!
Zoti e bekoftë Mehmet Begracën!

Me respekt,

Dr. Fatmir Sejdiu,
President i Republikës së Kosovës

--

Ndahet nga jeta Prof. Dr. Mehmet Begraca

Publikuar: E enjte, më 21 janar 2010



Prishtinë, 21 janar – Është ndarë nga jeta, sot në orët e para të mëngjesit, Prof. Dr Mehmet Begraca. Veterani i mjekësisë në Kosovë, themeluesi i Mjekësisë së Punës në vendin tonë, profesori që nga themelimi i Fakultetit të Mjekësisë në Universitetin e Prishtinës, ish-ministër (sekretar) i Shëndetësisë në Qeverinë e Kosovës e deputet në periudha para vitit 1980 vdiq në moshën 76 vjeçare, gjithnjë i nderuar e i respektuar nga kolegë, ish-studentë të tij, dhe publiku kosovar, me të cilin asnjëherë nuk u nda dhe nuk e zhgënjeu. Për meritat e tij flet edhe vendimi i Qendrës së Mjekësisë së Punës në Obiliq, e cila kohë më parë, për të gjallë të tij, mori emrin e themeluesit, Dr. Mehmet Begraca”. Është nderuar me shumë mirënjohje profesionale e publike dhe është autor i një vargu punimesh shkencore të publikuara në vend dhe në botën e jashtme.
Nesër në Fakultetin e Mjekësisë është paralajmëruar mbajtja e një mbledhjeje komemorative, kurse varrimi do të bëhet po ashtu nesër, në vendlindjen e tij, Begracë të Kaçanikut.

Prishtinë, 21 janar 2010 - Sot në Prishtinë në moshën 76 vjeçare ka ndërruar jetë prof. dr. Mehmet Begraca, doktor i Shkencave të Mjekësisë-Mjekësi e punës.

Profesor Begraca ishte i lindur në vitin 1934 në Lushnjë , ku ishin vendosur prindërit e tij pas shpërnguljes nga Begraca e Kaçanikut.

Shkollën fillore e kishte kryer në Ferizaj, gjimnazin në Prishtinë, ndërsa Fakultetin e Mjekësisë në Shkup në vitin 1961.

Disertacionin e doktoratës e mbrojti në Fakultetin e Mjekësisë në Prishtinë, në vitin 1978.

Më vonë kreu specializimin e Mjekësisë së punës në Beograd dhe zgjidhet ligjërues i kësaj lënde në FM të Prishtinës, ku arrin gradën e profesorit ordinar.

Ka qenë edhe dekan i FM në Prishtinë, sekretar krahinor për shëndetësi dhe politikë sociale dhe një kohë të gjatë ka qenë drejtor i Dispanzerit të punës në Obiliq.

Ka botuar shumë punime shkencore dhe ka udhëhequr një numër të madh të projekteve me interes për shëndetësinë publike të Kosovës.

Me emrin e tij është i lidhur ngusht zhvillimi i Mjekësisë së Punës në Kosovë. Ai ishte doktori i parë i shkencave të mjekësisë së punës dhe profesori i parë i kësaj lënde në Kosovë.

Me rastin e vdekjes së tij, nesër në orën 10:00 në Dekanatin e Fakultetit të Mjekësisë në Prishtinë, mbahet një mbledhje komemorative.

1 Pergjigje per
“Ndërroi jetë prof. dr. Mehmet Begraca, doktor i shkencave të Mjekësisë

”skender says:
21 janar 2010 at 5:32 PSzoti profesor edhe toka e begraces qe do te pranoj ty eshte krenare me materjen tende e lere me gjeneratat qe ti i prodhove me decenie te tera


..