Raporti i KE: Organizata "Mjaft" ka mungesë transparence me fondet

[REALIST]

Korrupsioni me fondet e Lëvizjes "Mjaft" e kanë bërë Erion Veliajn pjesë të raporteve për organizatat rinore të hartuara nga Këshilli i Europës. Në raportin e fundit të Këshillit të Europës për organizatat rinore, vërehet një emancipim i shoqërive civile dhe organizatave rinore. Në raport thuhet si, Lëvizja "Mjaft" ka pasur mungesë transparence me fondet e ardhura nga donacionet e huaja. Raporti vlerëson Këshillin Rinor si një organizatë, e cila është "ombrellë" e organizatave rinore. Në raport citohen shumë organizata rinore që janë kontribuese tek emancipimi i të rinjve. Në raport citohet si pikë e errët e shoqërisë civile shqiptare, Lëvizja "Mjaft", e cila gjatë ekzistencës së saj nuk ka bërë asnjë herë transparencën e financave. Ish- drejtuesi i Lëvizjes "Mjaft" është akuzuar publikisht nga organizatat rinore për pastrim parash dhe vjedhje të donacioneve. Për këto akuza, Veliaj është denoncuar në Prokurori me një dosje voluminoze, ku ai si drejtues i "Mjaft"-it, i jepte pjesën më të madhe të donacioneve vëllait të tij. Erion Veliaj u akuzua për përvetësimin e miliona eurove nga donacionet për rininë shqiptare dhe zhdukjen e 300 mijë eurove të Familjes Mbretërore Angleze dhe të disa donatorëve të tjerë, para që u dhanë për të mbështetur punësimin rinor në Shqipëri. Organizatat rinore e denoncuan Veliajn pas zhdukjes së bashku me vëllain e tij, të 300 mijë eurove kredi për biznesin rinor, që ai kishte marrë në kuadër të lëvizjes "MJAFT". Organizatat rinore faktuan se, Veliaj kishte abuzuar me projektin "Biznesi Rinor Shqiptar". Ky projekt synonte dhënien e mikrokredive për të rinjtë, para të cilat do t'u jepeshin me grante deri në 4000 euro për çdo biznes të ri dhe më pas me paratë që do të kthenin së bashku me përqindjet e të kredituarve të parë do të kreditoheshin të tjerë të rinj, dhe kështu me radhë do të krijohej një Bankë Rinore, e cila do të vazhdonte të funksiononte si subjekt i shoqërive të mikrokreditit. Kjo fushë përcaktohet si dhënie kredish dhe fondacionet që japin para me përqindje klasifikohen nga ligji shqiptar si piramida, nëse nuk kanë një licencë të dhënë nga Banka e Shqipërisë. Paratë e donatorëve më të rëndësishëm në botë, përfshirë Familjen Mbretërore Angleze, International Youth Foundation (IYF), Youth Business International (YBI), të cilat njihen botërisht për mbështetjen që i japin bizneseve dhe vetëpunësimit të të rinjve nëpërmjet fondeve të mikrokreditit, iu dhanë një organizate pa asnjë lloj eksperience në këtë fushë, pa asnjë lloj ekspertize të domosdoshme dhe të detyrueshme që kërkon fusha e mikrokreditit. Fondacioni (Lëvizja) MJAFT rezulton nga të dhënat e dokumentuara se nuk ka plotësuar asnjë kërkesë për t'iu njohur e drejta e dhënies së mikrokredive pranë Bordit Mbikqyrës të Bankës së Shqipërisë, as sipas ligjeve të para shkurtit 2007 dhe as ato pas shkurtit 2007. Fondacioni "Mjaft" nuk është licencuar nga Banka e Shqipërisë për të dhënë mikrokredi. Ndaj dhe për këtë qëllim, këto fonde iu duheshin besuar një institucioni të licencuar, por Veliaj nuk mund të pranonte që t'i ikte nga dora një thelë kaq e majme, që më pas do ta ndante me të vëllanë, Maznikun dhe Fugën. Në vitin e parë, shuma prej 55,800 dollarësh amerikanë iu dha 15 të rinjve, të cilat duhej ta kthenin me përqindje më të lartë për të shërbyer si kreditim i besueshëm dhe jashtë çdo risku për të tjerë të rinj.


Veliaj refuzon të bëjë transparencën e donacioneve të huaja

Erion Veliajt prej vitesh i është kërkuar të bëjë transparente paratë që ka përfituar nga donatorët ndërkombëtarë të destinuara për shoqërinë civile rinore shqiptare, por ai ka refuzuar të bëjë një gjë të tillë. Arsyetimi i tij karakteristik për një të korruptuar ka qenë se ai i jep llogari donatorëve të huaj dhe jo shqiptarëve. Prej një viti, kërkesa për transparencë është përsëritur me tone më të forta pas angazhimit politik të Veliajt me G99 si provë integriteti. Arsyeja pse Veliaj refuzon të tregojë sa para ka marrë dhe si i ka shpenzuar ato, lidhet me 3 motive të forta. E para, Veliaj nuk tregon dot se ka përfituar mbi 5.4 milion euro nga komuniteti ndërkombëtar, kontribute këto për shoqërinë civile shqiptare, sepse të gjithë do të kuptonin se pse sot në Shqipëri nuk ka më asnjë qendër rinore që të ofrojë shërbime për rininë. E dyta, Veliaj nuk tregon dot se si 5.4 milion euro janë grabitur drejtpërdrejt nëpërmjet bizneseve familjare të klanit Veliaj (Grafik Propaganda, C&PR Production, ACG shpk, etj). E treta, sepse Veliaj, me një pjesë të këtyre parave të dhëna nga donatorët për të mbështetur shoqërinë civile shqiptare janë kanalizuar për të financuar në mënyrë të paligjshme Partinë private të tipit OJF, G99.

Por një nga rastet më të papreçedenta në shoqërinë civile shqiptare është pikërisht mënyra se si Erion Veliaj në konflikt të pastër interesi përfitoi 300 mijë euro, që duhej të ofroheshin si kredi të buta për rininë shqiptare, i ndau dhe zhduku me të vëllanë e tij, Arbër Veliaj dhe bashkëpunëtorët e tij të ngushtë, Mazniku dhe Fuga. E gjithë kjo grabitje ka ndodhur nëpërmjet vrimës së zezë të Fondacionit MJAFT, i cili u zhduk pa lënë gjurmë nga qarkullimi. Ky fondacion u mbyll dhe u zhduk kompjuteri i financave me të gjitha dosjet financiare nga Erion Veliaj, për të fshehur gjurmët e korrupsionit galopant me donacionet ndërkombëtare të destinuara për shoqërinë civile shqiptare. Një ndër pikat më të errëta të këtij Fondacioni është, "zhdukja" pa lënë gjurmë e vetë Fondacionit, bashkë me qindra mijë eurot e tij, të cilat mund të kenë fluturuar në numrin që kontrollon Erion Veliaj në San Francisko, "145 Swiss Ave, San Francisco, CA 94131 (Payable to BYL, memo Mjaft)". Një ndër arsyet kryesore që ky Fondacion u zhduk një ditë pa lënë gjurmë, është edhe se Fondacioni "MJAFT" ka gëlltitur një shumë të pallogaritshme parash nga Balkan Children and Youth Foundation. Ajo që të bën më shumë përshtypje në qarkullimin e qindra mijë eurove të Fondacionit "MJAFT", është loja e pokerit financiar të Velisë me shokë e shoqe, të cilën do ta kenë mësuar nga kryetarja e Bordit të Fondacionit "MJAFT", Milva Ekonomi.


Zhdukja e 300 mijë eurove, prokuroria asnjë reagim

Prokuroria vazhdon të mbylli sytë para dosjes korruptive të Erion Veliajt. Prokuroria nuk është vënë në lëvizje pas denoncimit për zhdukjen e 300 mijë eurove kredi për biznesin rinor, nga Erion Veliaj. Prokuroria nuk ka nisur hetimet qoftë kryesisht për dosjen e plotë të dorëzuar pranë saj, nga organizatat rinore për Erion Velinë. Fondacioni "MJAFT", i drejtuar nga Erion Veliaj, zhduku 300 mijë euro të Familjes Mbretërore Angleze dhe të disa donatorëve të tjerë, para që u dhanë për të mbështetur punësimin rinor në Shqipëri. Dhe për këtë çështje shumë të përfolur, Prokuroria nuk nisi hetimet qoftë kryesisht. Personat që morën shumën ishin anëtarët e Lëvizjes MJAFT, të cilët në kundërshtim me ligjin për OJF-të, e kthyen organizatën e tyre në një organizatë që ndan fitime. Por ajo që përcaktoi konfliktin më tipik të interesit, ishte kreditimi nga Erion Veliaj, i vëllait të vet, Arbër Veliaj, 18-vjeçar, i cili mori që në fillim grantin maksimal që lejohej prej 4000 eurosh. Ky operacion i paligjshëm financiar është dhe i dënueshëm nga legjislacioni shqiptar. Fondacioni "MJAFT" zhduku një ditë të bukur 300 mijë euro të Familjes Mbretërore Angleze dhe të disa donatorëve të tjerë, para që u dhanë për të mbështetur punësimin rinor në Shqipëri. Në vetë faqen e tyre zyrtare rezulton paraqitja e të dhënave kompromentuese, se kush kontribuoi për paratë e mikrokreditit të paligjshëm rinor në Shqipëri, kush i mori dhe, mbi të gjitha në formë spektakolare, tregohet Arbër Veliaj, duke marrë paratë në një ceremoni zyrtare nga vetë i vëllai, Erion Veliaj.


Elis KUÇI
Rilindjademokratike