Rama përjashton Kastriot Islamin nga PS. Seseri dhe Majko braktisin mandatet

[Albo]

Majko drejt OKB, ikën Seseri, Rama:Të përjashtohet Islami

Kreu i PS-së, Edi Rama, i ka kërkuar Grupit Parlamentar të përjashtojë deputetin Kastriot Islami, një prej themeluesve të PS dhe kryetari i parë i Kuvendit pluralist më 1991-shin. Propozimi i Ramës u bë dje në mbledhjen e Kryesisë së re të PS-së, ku u shqyrtuan mungesat e tre deputetëve socialistë, Pandeli Majko, Kastriot Islami dhe Rudina Seseri në votimin e kreut të KLSH, Bujar Leskaj, në Parlament. Në mbledhjen e parë të Kryesisë së re socialiste Rama ka tërhequr vëmendjen dhe ka kërkuar që të bëhet një vlerësim për mungesat e vëna re në mbledhjen e Grupit. Sipas Ramës, nga tre emrat që munguan, Majko, Seseri dhe Islami, vetëm Islami ka qenë i pajustifikuar. Duke shprehur vendimmarrjen e mbledhjes së shkuar të Grupit Parlamentar socialist, Rama mësohet të ketë thënë se këto raste nuk duhen toleruar, por duhet zbatuar Statuti. Rama ka këmbëngulur në kompetencat e Grupit Parlamentar për të diskutuar dhe vendosur për këtë thyerje të vendimmarrjes. Deputetët socialistë Arben Malaj dhe Ben Blushi i kanë kërkuar kreut socialist që para debatimit në Grup, Islami të takohet me kreun e Grupit, Ruçi, dhe të tregojë aty shkaqet që e detyruan atë që të mos ishte në momentin e votimit. Kreu socialist ka kërkuar që Majko, i cili mungoi në momentin e votimit, të shpjegojë arsyet e largimit nga seanca parlamentare. I gjendur nën trysninë e deputetëve socialistë, Majko i ka treguar Kryesisë se arsyeja e largimit nga seanca ishte organizmi i një videokonference në një nga ambasadat e huaja në Tiranë lidhur me kandidimin e tij për një post të lartë në Organizatën e Kombeve të Bashkuara. Kjo arsye e Majkos e ka çtensionuar situatën në mbledhjen e Kryesisë, ndërsa anëtarët e saj i kanë uruar Majkos suksese. Gjithashtu, Rama i ka njohur anëtarët e Kryesisë me letrën që deputetja Rudina Seseri i ka dërguar atij me anën e së cilës e lajmëronte se linte mandatin e deputetit.

DEBATI
Reaksioni ndaj mungesës së Islamit dhe Majkos në seancën e së enjtes, kur votohej kandidati i maxhorancës për kreun e KLSH-së, Bujar Leskaj, ishte krijuar menjëherë pas sakrificave që disa deputetë kishin bërë për të zbatuar vendimin politik të Grupit. Mësohet se një nga deputetët socialistë kishte lënë një nga familjarët e tij në spital në Itali dhe ishte kthyer në Tiranë për të qenë prezent në seancën e së enjtes. Gjithashtu, edhe një tjetër deputet i operuar në shtyllën kurrizore kishte ardhur në sallën e Kuvendit për të bashkuar votën me Grupin Parlamentar socialist. Largimi i Majkos dhe Islamit duket se ka krijuar reaksion dhe qëndrime të ashpra nga shumica e deputetëve që kanë kërkuar të jepen sqarime për sjelljen e dy deputetëve të Grupit të tyre Parlamentar. Socialistët kishin parashikuar se nëse i gjithë Grupi i tyre do të ishte në sallë, pa asnjë mungesë dhe me ta do të bashkohej dhe vota e Dritan Priftit dhe Vangjel Dules, kandidatura e Bujar Leskajt do të rrëzohej, duke ditur dhe tre abstenime nga Grupi Parlamentar demokrat për këtë kandidaturë. Ditën e martë, në mbledhjen e Grupit Parlamentar socialist pritet të diskutohet dhe të hidhet në votim për çregjistrim emri i deputetit socialist Kastriot Islami, pas mungesës së tij në votimin e së enjtes. Neni 36 i Statutit të PS përcakton rastet se kur deputeti çregjistrohet nga Grupi Parlamentar.

Debati për Islamin
Edi Rama: Dje ka pasur mungesa në votim. Ka munguar Pandi, Islami dhe Rudina. Pandi do ta sqarojë vetë mungesën. Rudina më ka kërkuar lënien e mandatit për shkak se ka angazhime në SHBA dhe s’mund të ndjekë punët e Parlamentit. Por kjo është çështje me të cilën duhet të merret Grupi Parlamentar. E kishim thënë se votimi i djeshëm ishte një vendim politik i Grupit dhe kisha kërkuar që të gjithë deputetët të ishin në sallë dhe të merrnin pjesë në votim.
Arben Malaj: Unë mendoj se zoti Islami të takohet me kryetarin e Grupit, zotin Ruçi.
Edi Rama: Nuk dua ta zgjasim më këtë çështje, meqë është kompetencë e Grupit, le të jetë pjesë e vendimmarrjes së Grupit.
Ben Blushi: Le ta konsiderojmë ditën zero për këto thyerje të vendimeve politike. Mendoj se Islami duhet të flasë me kryetarin e Grupit sepse kjo është çështje e Grupit.
Edi Rama: E kemi vendosur në mbledhjen e fundit që të lëmë pas çfarë është bërë deri tani në Kuvendi dhe thamë që tani e tutje të zbatohet Statuti.
Islami: U interesova te drejtuesit e Grupit të PS, nuk ka vendim zyrtar
Deputeti socialist, Kastriot Islami, në një reagim të tij të parë pas njoftimeve se do të jetë Grupi Parlamentar që do të merret me qëndrimin e tij në Parlament, u shpreh se nuk është njohur me një propozim për përjashtim të tij nga Grupi Parlamentar. “Nga shumë gazetarë dhe nga faqe të medias pranë Ramës jam bërë me dije për ‘propozimin e Ramës për përjashtimin tim nga grupi i PS’. Jam interesuar te një nga drejtuesit e Grupit Kuvendor të PS dhe më ‘rezulton se nuk ka asnjë vendim zyrtar për këtë çështje’. Kjo është arsyeja që nuk mund të kem asnjë qëndrim lidhur me këtë çështje”, u shpreh Islami. Deputeti socialist, në mbledhjen e fundit të Asamblesë Kombëtare, nuk u propozua as për në Kryesinë e re dhe as për në Sekretariat. Ish-sekretari për Çështjet Zgjedhore, Islami, ka mbajtur një qëndrim kritik ndaj kreut të PS dhe vendimeve të tij si për bojkotin e Parlamentit të deputetëve socialistë, ashtu dhe për përgjegjësitë e humbjes së zgjedhjeve të 2009-s dhe 2011-s. Vetëm një ditë më parë, Islami, në adresën e tij në rrjetin social “Facebook”, ka shprehur qëndrimin e tij ndaj vendimit të fundit të Grupit Parlamentar për Bujar Leskajn si kreu i KLSH-së. “Përveç votimit kundër dhe pro, ka shumë mënyra të tjera alternative për të pasur një qëndrim inteligjent e institucional lidhur me emërimet e anëtarit të bordit të BSH, të kryetarit të KLSH, të Avokatit të Popullit, në mënyrë që PS të rezultonte një forcë politike që respekton shtetin ligjor, garantuese e zbatimit të Kushtetutës dhe forcimit të institucioneve dhe ngjall besimin e publikut për procesin e përzgjedhjes dhe të emërimit në institucionet publike”, shprehej dje Islami në Facebook.


Majko drejt OKB si ndihmës i Ban Ki Munit

Anëtari i Kryesisë socialiste, Pandeli Majko, pritet të jetë ndihmës i sekretarit të Përgjithshëm të OKB-së, Ban Ki Mun. Është hera e parë që Shqipëria do të përfaqësohet në një nivel kaq të lartë në Organizatën e Kombeve të Bashkuara.
Vendimi do të merret në janar nga vetë sekretari i Përgjithshëm për të emëruar ndihmësin e tij për vendet e Europës dhe vendet e ish- Bashkimit Sovjetik dhe Kaukazit. Propozimi ka ardhur nga një ambasadë e huaj në Tiranë dhe i është dërguar selisë qendrore të OKB-së, ndërsa ditën e enjte Majko është larguar nga salla e Kuvendit, ku bëhej votimi për të marrë pjesë në një video-konferencë me selinë qendrore të OKB-së rreth këtij propozimi. Është hera e parë që propozimi nuk është bërë nga asnjë institucion shqiptar. Majko dje ka marrë përgëzime dhe nga kreu i PS dhe kolegët e tij në Kryesinë socialiste. “Nëse Pandi do të emërohet në këtë post, do të jetë një nder shumë i madh për vendin, por dhe për Partinë Socialiste”, mësohet të jetë shprehur Rama. Vetë Majko, në një sqarim për mediat dje në mbrëmje, sqaroi propozimin që atij iu bë për postin e lartë në OKB. “Unë jam vënë në dijeni që emri im, si shqiptar, është duke u konsideruar për një kandidaturë të mundshme pranë Kombeve të Bashkuara, në pozicionin e ndihmëssekretarit të Përgjithshëm të Europës dhe vendeve të ish- Bashkimit Sovjetik dhe Kaukazit. Për një politikan karriere si unë, pavarësisht moshës sime të re, është gjithmonë i mirëpritur rasti për të dhënë kontributin individual përtej kufijve kombëtarë. Marrja në konsideratë për të qenë pjesë e mundshme e një qeverisjeje globale do të ishte një nder për cilindo politikan karriere. E theksoj dhe njëherë se kandidimi i emrit tim është thjesht në stadin e kandidaturave jo të pakta që arrijnë pranë sekretarit të Përgjithshëm të OKB dhe që në fund është Shkëlqesia e tij, zoti Ban Ki Mun ai që do të përzgjedhë kandidaturën më të përshtatshme”, shprehet Majko në njoftimin e tij. Sipas Majkos, ai do të vazhdojë të jetë deputet i PS. “Unë vazhdoj të jem deputet i Partisë Socialiste dhe të jap kontributin tim gjithashtu brenda Kryesisë së Partisë Socialiste”, shprehet Majko. Duke vlerësuar rolin e OKB-së në botë, Majko kujton se kjo organizatë ka dhënë një kontribut të çmuar në rajonin tonë. “Sot Kombet e Bashkuara po marrin një rol akoma dhe më primar në menaxhimin e krizave, paqes, zhvillimit njerëzor dhe luftës kundër varfërisë në botë. Shqipëria është një vend i vogël, por që 10 vjetët e fundit ka ditur të japë kontributin e saj në paqen jo vetëm në rang rajonal, në menaxhimin e krizës se Kosovës dhe Maqedonisë, por edhe atë global me pjesëmarrjen e saj në paqeruajtësit e Kombeve të Bashkuara apo me punësimin e disa dhjetëra shqiptarëve, të cilët japin kontributin e tyre në gjirin e Kombeve të Bashkuara nëpër misionet e zhvillimit në botë”, shprehet Majko.

Institucionet shqiptare mbështesin ish-kryeministrin

Të gjitha institucionet shqiptare kanë dhënë mbështetjen maksimale për Pandeli Majkon në kandidimin e tij për postin e ndihmëssekretarit të Përgjithshëm të OKB-së. Sipas burimeve tona, si Kryeministri, ashtu dhe kryetarja e Kuvendit, por dhe Ministria e Jashtme, kanë dhënë vlerësimet maksimale me referencat e tyre për dy herë ish-kryeministrin e vendit dhe anëtarin e Kryesisë socialiste. Rasti Majko duket se është nga të paktat raste kur ngjyrat politike nuk janë parë për të përfaqësuar vendin në Organizatën e Kombeve të Bashkuara, të cilat nuk kanë pasur ndonjëherë një shqiptar në nivele kaq të larta.

Zgjedhjet në janar
Zgjedhja e ndihmëssekretarit të Përgjithshëm për Europën dhe vendet e ish- Bashkimit Sovjetik dhe Kaukazit do të bëhet në muajin janar. Do të jetë vetë sekretari i Përgjithshëm, Ban Ki Mun, që do të bëjë përzgjedhjen e emrit që do të punojë pranë tij. Lista e kandidatëve është e gjatë, por kandidati i Shqipërisë duket se ka dhe mbështetjen e një prej ambasadave më të rëndësishme në Tiranë.

Ban Ki Mun
Sekretari i Përgjithshëm i OKB-së, Ban Ki Mun, ka në stafin e tij disa ndihmës, të cilët mbulojnë të gjitha kontinentet, mbi bazën e një ndarjeje që lidhet më shumë dhe me problematikat. Sekretari i Përgjithshëm ka një grup prej 42 anëtarësh nga e gjithë bora, të zgjedhur prej tij, që mbulojnë të gjitha çështjet për të cilat angazhohen Kombet e Bashkuara. Aplikimet për vendet vakante bëhen të hapura, ndërsa vendimin për plotësimin e stafit e merr vetë sekretari i Përgjithshëm i OKB-së.

Braçe: U betuam se do ta mbanim sekret
Anëtari i Kryesisë socialiste, Erjon Braçe, pas përhapjes së lajmit se Pandeli Majko mund të lërë mandatin nëse do të marrë detyrën e ndihmëssekretarit të Përgjithshëm të OKB-së, shprehu habi për shkak të konfindencialitetit që vetë Majko kishte kërkuar për këtë lajm në mbledhjen e Kryesisë. “Po kush ua tha, kjo ishte tejet sekret?!!!!”, u shpreh Braçe në Facebook, duke vazhduar që me përhapjen e lajmit do të merret Kryesia e ardhshme. “Nejse, do kemi mbledhje kryesie prapë për të gjetur se kush e tha, sepse ne u betuam që s’do ia thoshim kujt!!!”, u shpreh Braçe.

Projektet në SHBA, Seseri dorëzon mandatin e deputetes
Rudina Seseri jep dorëheqjen nga mandati i deputetes së PS-së për shkak të përfshirjes në një projekt të madh të menaxhimit të fondeve në SHBA. Pak më shumë se dy vjet nga marrja e mandatit nga KQZ-ja, Seseri ka njoftuar ditët e fundit drejtuesit kryesorë të partisë, Edi Ramën e Gramoz Ruçin, si dhe kryetaren e Parlamentit, Jozefina Topalli, për vendimin. Në letrën që mban datën 14 dhjetor, drejtuar Ramës thuhet: “Më duhet t’ju njoftoj zyrtarisht se për arsye personale nuk do ta kem të mundur të vazhdoj detyrën e deputetit të Kuvendit të Shqipërisë. Rishtazi kam vendosur të marr angazhime më të mëdha profesionale, të cilat e bëjnë të pamundur të përmbush përgjegjësinë e detyrës së deputetit në vazhdimësi. Shkëputja ime është efektive menjëherë dhe, në përputhje me ligjet në fuqi, mandati im i kalon kandidatit vijues të listës zgjedhore së Partisë Socialiste për qarkun Durrës”. Ndërkohë, në letrën drejtuar kreut të PSsë, deputetja e qarkut të Durrësit e ka falënderuar atë për mundësinë që i krijoi për t’u përfshirë në jetën politike në Shqipëri. “Ky angazhim qe një eksperiencë unike për të kontribuuar, së cilës i jam përgjigjur me kontributin tim të gjithëkohshëm dhe të gjithanshëm. Mbi të gjitha, ju falënderoj që më rilidhët nga afër me bashkëqytetarët e mi, sidomos me popullin e Krujës, ndaj të cilit mbetem mirënjohëse dhe krenare”, thuhet në letrën e deputetes së Krujës. Në fund, deputetja socialiste garanton kreun e PS-së se do të ketë mbështetjen e saj përmes ekspertizës profesionale në sfidat e vendit. Rudina Seseri është një nga figurat e reja që u promovua nga PS-ja në zgjedhjet e 2009-s me një eksperiencë të pasur akademike dhe profesionale. Me një CV që përfshin Universitetin e Harvardit, karriera e Seserit mbart pozicione në kompani prestigjioze si “Credit Suisse”, “Fairhaven Capital” dhe “Microsoft Corporation”. Në botën e ekonomisë dhe sipërmarrjes, ajo është vlerësuar si një ndër 50 gratë më të fuqishme të SHBA, ndërsa publikimi prestigjioz “Business Journal” para dy muajsh e ka klasifikuar Seserin si pjesë të 40 individëve më të suksesshëm nën moshën 40 vjeç.


Seseri, letër Ruçit: Këshillat tuaja politike më kanë ndihmuar
Deputetja e Partisë Socialiste, Rudina Seseri, i ka dërguar një letër edhe kryetarit të Grupit Parlamentar të kësaj partie, Gramoz Ruçi, ku e ka vënë në dijeni të vendimit të saj për të lënë mandatin. Në letrën drejtuar kreut të Asamblesë së socialistëve thuhet se “nëpërmjet kësaj letre më duhet t’ju njoftoj zyrtarisht se për arsye personale nuk do ta kem të mundur të vazhdoj detyrën e deputetit të Kuvendit të Shqipërisë. Rishtazi kam vendosur të marr angazhime më të mëdha profesionale, të cilat e bëjnë të pamundur të përmbush përgjegjësinë e detyrës së deputetit në vazhdimësi”. “Në planin individual, lejomëni t’ju shpreh mirënjohjen dhe falënderimet e mia për konsideratën, mbështetjen dhe dashamirësinë që keni treguar në vijimësi ndaj meje. Në mënyrë të veçantë, këshillat tuaja më kanë ndihmuar në angazhimin tim politik dhe më gjerë. Në mbyllje, dëshiroj t’ju siguroj për mbështetjen time të palëkundur përmes ekspertizës sime profesionale në sfidën madhore të rimëkëmbjes së Shqipërisë”, përfundon letra e deputetes së PS-së


Letra për Ramën: Ishte eksperiencë unike

Zotit Edi Rama,
Kryetar i Partisë Socialiste të Shqipërisë Tiranë

I dashur Edi,
Nëpërmjet kësaj letre më duhet t’ju njoftoj zyrtarisht se për arsye personale nuk do ta kem të mundur të vazhdoj detyrën e deputetit të Kuvendit të Shqipërisë. Rishtazi kam vendosur të marr angazhime më të mëdha profesionale, të cilat e bëjnë të pamundur të përmbush përgjegjësinë e detyrës së deputetit në vazhdimësi. Dëshiroj t’ju shpreh falënderimet e mia për mundësinë e rrallë që më ofruat për tu përfshirë në jetën politike në Shqipëri dhe për vlerësimin që keni treguar në vazhdimësi. Ky angazhim qe një eksperiencë unike për të kontribuar, së cilës i jam përgjigjur me kontributin tim të gjithëkohshëm dhe të gjithanshëm. Mbi të gjitha, ju falënderoj që më rilidhët nga afër me bashkëqytetarët e mi, sidomos me popullin e Krujës, ndaj të cilit mbetem mirënjohëse dhe krenare. Lejomëni, gjithashtu, t’ju siguroj për mbështetjen time të palëkundur përmes ekspertizës sime profesionale në sfidën madhore të rimëkëmbjes së Shqipërisë.
Me respekt,
Rudina Seseri


LETRA E PLOTË PËR TOPALLIN

Jozefina Topalli (Çoba),
Kryetare e Kuvendit të Shqipërisë
Bulevardi “Dëshmorët e Kombit”
Tiranë

E nderuara znj. Topalli (Çoba),

Nëpërmjet kësaj letre më duhet t’ju njoftoj zyrtarisht se
për arsye personale nuk do ta kem të mundur të vazhdoj
detyrën e deputetit të Kuvendit të Shqipërisë. Rishtazi
kam vendosur të marr angazhime më të mëdha profesionale,
të cilat e bëjnë të pamundur të përmbush
përgjegjësinë e detyrës së deputetit në vazhdimësi. Shkëputja
ime është efektive menjëherë dhe, në përputhje
me ligjet në fuqi, mandati im i kalon kandidatit vijues të
listës zgjedhore së Partisë Socialiste për qarkun Durrës.
Ju uroj gjithë të mirat.
Rudina I. Seseri
Letra origjinale me të njëjtën përmbajtje ju është dërguar me postë.


Konomi zëvendëson Seserin
Një bankier do të zërë vendin e lënë bosh nga Rudina Seseri në Parlament. Sipas listës që Partia Socialiste ka dërguar në Komisionin Qendror të Zgjedhjeve, rezulton se Edison Konomi, me profesion ekonomist, do të jetë deputeti më i ri i kësaj force politike. Konomi, në fakt, ishte renditur i shtati në listën e qarkut të Durrësit dhe në këtë zonë PS-ja fitoi pesë deputetë. Por ai ka përfituar për shkak se i gjashti, Gjon Bardhi, u kandidua dhe fitoi në zgjedhjet lokale të 8 majit si kryetar i Bashkisë së Fushë-Krujës. Edison Konomi ka mbajtur për pak kohë edhe postin e kryetarit të Partisë Socialiste të qytetit të Durrësit.

Panorama
Aristir Lumezi/Adi Shkembi

[Albo]

Përjashtimi i Islamit, Meta: Nuk mund ta besoj

“Nuk dua ta besoj përjashtimin e Kastriot Islamit” Kështu është shprehur kreu i Lëvizjes Socialiste për Integrim, Ilir Meta lidhur me propozimin e kryetarit të PS-së, Edi Rama për përjashtimin e deputetit nga Grupi Parlamentar.
Sipas Metës, nuk mund të ketë përjashtim nga partia pas 21 vitesh pluralizëm, duke shtuar se Islami nuk ka bërë ndonjë gabim, por thjesht ka shprehur mendimet e tij.
Në mbledhjen e djeshme të Kryesisë së Partisë Socialiste, kryetari Edi Rama ka propozuar që Grupi të përjashtojë deputetin, Kastriot Islami pas ai ka thyer vendimin politik, duke mungar në votimin e së enjtes për kreun e Kontrollit të Lartë të Shtetit, Bujar Leskaj.

Malaj, kundër përjashtimit të Islamit

Anëtari i Kryesisë socialiste, Arben Malaj, u shpreh dje kundër propozimit për përjashtimin e Kastriot Islamit nga Grupi i PS. Duke shprehur qëndrimin e tij të mbajtur në mbledhjen e Kryesisë, por dhe ndaj rastit konkret, Malaj në adresën e tij në Facebook shprehet se është kundër vendosjes së disiplinës formale në grupin e deputetëve. “Së pari, ritheksova në Kryesi konceptin që efikasiteti i një force politike vjen nga fleksibiliteti i saj dhe jo nga masa përjashtuese, apo disiplina formale. Masat ndëshkuese e përjashtuese do të jenë të dëmshme për sfidat politike të PS-së. Së dyti, këtë koncept të organizimit dhe drejtimit të PS-së nuk e trajtova thjesht për rastin Islami, por ia kam paraqitur edhe grupit të punës në PS, që po punonte për përmirësimin e statutit të PS. Pra është një diskutim për mentalitetin si bëhet fituese PS dhe jo një diskutim pro dhe kundër një rasti të veçantë”, shprehet Malaj, si një reagim ndaj propozimit të kreut socialist, Edi Rama, për të diskutuar në mbledhjen e Grupit rastin Islami. Duke folur konkretisht për seancën e ditës së enjte, kur Grupi i PS votoi kundër kandidaturës së Bujar Leskajt në Kuvend për kryetar të KLSH-së, Malaj shprehet se mungesa e deputetëve socialistë nuk rrëzoi projektin politik të PS. “Së treti, aq më pak ne nuk duhet të synojmë rritjen e efikasitetin tonë politiko- elektoral, duke rritur masat ndëshkimore ndaj çdo deputeti socialist, edhe në rastet kur mospjesëmarrja në votime apo votimi abstenues nuk prodhon një rezultat politik negativ për PS-në, por “shkelje të disiplinës”. Me mospjesëmarrjen e tyre, kolegët deputetë të PS nuk i sollën një dështim politik PSsë në votimin përkatës”, shprehet Malaj. Kritik në mënyrën se si duhet të organizohet dhe drejtohet PS, Malaj kërkon një vlerësim real dhe jo formal të punës së çdo deputeti, duke mos e kushtëzuar atë vetëm në zbatimet formale të rregulloreve dhe statutit. “Së katërti, aktiviteti konkret i çdo deputeti mund të shërbejë si element vlerësimi për karrierën e tij politike, por në asnjë rast mungesa në seancë parlamentare, mosvotimi, apo votimi abstenues, të shërbejnë për të çregjistruar kolegë nga Grupi Parlamentar. Shtimi i rasteve statutore kur një deputet penalizohet politikisht, krijon premisa negative në ushtrimin e mandateve politike, duke i shndërruar deputetët në thjesht “kartonë solidarë”, pa të drejtë analize dhe qëndrimi individual”, shprehet Malaj në profilin e tij në Facebook. Deputeti socialist shprehet se do të flasë më gjatë rreth kësaj çështjeje në mbledhjen e së martës të Grupit Parlamentar socialist. Iniciues i një turi takimesh dhe hartues i platformës për modernizimin e partive politike, Malaj shprehet në sqarimin e tij se “i mbetem konceptit se partitë tona politike duhet të jenë sa më transparente, sa më demokratike dhe sa më produktive ndaj vendit dhe interesave themelorë të anëtarëve, mbështetësve, simpatizuesve dhe votuesve të tyre”. Në mbledhjen e parë të Kryesisë së re socialiste që u mblodh ditën e premte, kreu socialist Edi Rama kërkoi zbatim të rreptë të statutit të PS për ata që dolën jashtë vendimit politik të Grupit gjatë seancës të së enjtes, kur Kuvendi do të votonte kandidaturën e demokratit Bujar Leskaj për kreun e KLSH-së. Përveç Islamit, në votim mungoi dhe Pandeli Majko, i cili e justifikoi mungesën e tij me pjesëmarrjen në një videokonferencë me Uashingtonin, pasi ka aplikuar për postin e ndihmëssekretarit të Përgjithshëm të OKB-së, Ban Ki Mun.

Meta: Islami shprehu ato mendime që po zbaton sot lidershipi i PS

Kryetari i Lëvizjes Socialiste për Integrim, Ilir Meta, ka shprehur dje habinë e tij për mundësinë e përjashtimit të Kastriot Islamit nga Grupi Parlamentar i Partisë Socialiste. Kreu i LSI-së e cilësoi përjashtimin e Islamit si një rast të paprecedentë në këto 21 vite pluralizëm politik. “Nuk dëshiroj të flas në emër të zotit Islami, sepse nuk mund ta bëj këtë gjë. Nuk mund ta besoj që kjo gjë mund të ndodhë. Po unë nuk e di që Islami të ketë bërë ndonjë gabim apo faj të tij, përveçse ka shprehur mendimet, të cilat në fakt pikërisht sot i ka përqafuar vetë lidershipi i Partisë Socialiste”, pohoi kreu i LSI-së. I pyetur nëse Kastriot Islami do të pranohet në radhët e Lëvizjes Socialiste për Integrim, Ilir Meta ka lënë të hapur çdo mundësi, duke thënë se: “LSI ka strukturën e saj për cilindo që dëshiron të aderojë, por unë nuk e besoj se si mund të ndodhë një përjashtim në jetën politike pas 21 vitesh pluralizëm politik dhe demokraci, aq më tepër në Partinë Socialiste”. Meta nuk ka kursyer dhe kritikat për kryesocialistin Edi Rama, i cili pas dy vitesh filloi të ndjekë linjën europiane të Kastriot Islamit. Sipas kreut të LSI-së, përjashtimi i Islamit nga Grupi i Partisë Socialiste është i pakuptimtë, pasi po të ishin ndjekur këshillat e tij, sipas Metës vendi do të kishte marrë statusin e vendit kandidat në BE. “Si mund të përjashtohet një njeri, i cili për dy vjet mbajti një linjë politike tepër pro europiane, një linjë, e cila po të ishte përqafuar që atëherë nga lidershipi socialist, Shqipëria do të kishte fituar statusin e vendit kandidat që para dy vitesh”, deklaroi Meta. Kreu i LSI-së ka komentuar dhe qëndrimin e PD-së e PS-së për të mos ndryshuar sistemin zgjedhor. Sipas Metës, “shpresoj që të ketë reflektime dhe të jetë shumë e hapur, shumë gjithëpërfshirëse dhe konstruktive, sepse dihet që reformat që ka bërë vetëm PS-ja me PD-në gjithmonë kanë sjellë probleme, të cilat në radhë të parë i kanë krijuar vetë ato pas zgjedhjeve”.

Kadeli: Duhet zbatuar rregullorja që kemi vendosur
Deputeti socialist i qarkut të Lezhës, Gjovalin Kadeli, u shpreh dje se rregullorja e grupit dhe statuti duhet të zbatohet. “Duhet të ketë një diskutim për zbatimin e statutit dhe rregullores, në mënyrë që të zgjidhet njëherë e mirë zbatimi i rregullores së Grupit. Nuk mund të shkojmë në zgjedhje me anarki e servilizma, duke garuar me njëri-tjetrin, se kush shan më shumë Partinë dhe kolegët merr vlerësim nga kryetari, apo kush di të serviloset më mirë, vlerësohet më shumë”, u shpreh deputeti i Lezhës. Sipas tij, deputeti duhet t’i bindet vendimit të shumicës. “Në të gjitha rastet, kur merret një vendim i shumicës, është detyrim zbatimi i tij dhe askujt nuk i lejohet ta shkelë atë, në të kundërt po i largohesh bashkëjetesës në këtë grup dhe në mënyrë indirekte po kërkon largimin nga grupi. Kam ngritur disa herë edhe në mbledhje grupi që të diskutohej qëndrimi i disa kolegëve, sidomos me qëndrimin e tyre ndaj grevës së urisë, tallja me sakrificën tonë ishte e pafalshme, apo me qëndrime të kundërta me ato zyrtare të PS-së ndaj partnerëve tanë dhe kërkesave tona ndaj institucioneve ndërkombëtare, por kam marrë si përgjigje heshtjen në rastin më të mirë, apo kërcitjen e dhëmbëve në rastin më të keq nga drejtuesit”, shprehet Kadeli.

GRUPI I PS
Të martën do të zhvillohet mbledhja e radhës e Grupit Parlamentar socialist, ku do të merret në diskutim edhe rasti i mungesës së Kastriot Islamit gjatë votimit në seancën e fundit parlamentare. Kjo do të jetë mbledhja e fundit e Grupit për këtë vit, pasi Parlamenti do të nisë pushimet e dimrit.

AGOLLI: DO FLAS PAS GRUPIT TË PS
Patriarku i socialistëve, shkrimtari i njohur Dritëro Agolli, i kontaktuar dje në telefon për debatin e përjashtimit të Islamit nga Grupi i PS, nuk preferoi të bëhej pjesë e këtij debati. Ai u shpreh se do të flasë kur kjo çështje të bëhet zyrtare. “Unë do të flas kur ky problem të diskutohet në mbledhjen e Grupit Parlamentar socialist. Vetë Kastrioti është shprehur se nuk i kanë komunikuar asgjë zyrtare rreth një qëndrimi për përjashtim ndaj tij”, u shpreh Agolli. Shkrimtari i njohur në të gjitha deklaratat e tij të mëparshme përmes intervistave ka kërkuar solidaritet dhe frymë uniteti në PS dhe është shprehur kundër luftërave të brendshme.

ARISTIR LUMEZI
Panorama

[Albo]

Ish presidenti Meidani: Përjashtimi i Kastriot Islamit, kambanë alarmi për PS

Përgjigje Ramës për bashkimin e së majtës: Nuk ka zgjidhje pa u mbështetur në numra.
Ish-presidenti i Republikës, Rexhep Meidani, i përgjigjet replikës së Edi Ramës lidhur me koalicionet e ardhshme të PS-së me LSI-në. I sapokthyer nga një konferencë në Berlin të Gjermanisë, profesor Meidani shprehet dhe për debatin e ndezur në PS që prej të premtes, kur kreu socialist, Edi Rama, kërkoi diskutimin dhe vendimin nga Grupi Parlamentar Socialist për çregjistrim të deputetit Kastriot Islami nga ky grup, për shkak të mungesës së tij në seancën e fundit parlamentare. Për ish-kreun e shtetit, përjashtimet në PS janë kambana të forta alarmi, duke e kthyer këtë parti nga një parti që tërhiqte ndër vite personalitete nga fusha të ndryshme, në një parti ku mbyllen liritë dhe konkurrenca. Për profesor Meidanin, PS-ja “duhet të vazhdojë të ushqejë shpresën e emancipimit politik të jetës partiake, pra dhe të asaj qeverisëse”. Duke iu përgjigjur kryetarit socialist, se “analizat e tij bazohen më shumë në numra dhe më pak në moral”, ish-presidenti shprehet se numrat janë pjesë e strategjive politike të partive. “Numrat duhen kuptuar, duhen ndjerë! Këtë nuk e bën lehtë kushdo, aq më pak ai që ushqen “ide mesianike” apo pretendon frymëzime të ngjashme. Në botën e sotme, siç e theksova pak më sipër, shifrat, shumë e më shumë se më parë, janë bërë një element i domosdoshëm dhe i pandashëm i qeverisjes, madje pa to nuk ka vendimmarrje adekuate politike e publike, apo qoftë dhe të vetë biznesit”, shprehet në intervistën e tij ish-kreu i shtetit.

Zoti Meidani, kreu socialist, Edi Rama, në një shkrim të tij dje hedh poshtë qëndrimet tuaja për domosdoshmërinë e një bashkëpunimi PS-LSI për të ardhur në pushtet. Rama e cilëson si një aleancë “bashkimpazar” që nuk ka moral, dhe përmes së cilës nuk ka vlerë pushteti. Si e lexuat këtë qëndrim të zotit Rama dhe a i qëndroni të njëjtit opsion se e majta duhet të jetë e bashkuar për të fituar mbi të djathtën?

Të them të drejtën nuk e di për ç’shkrim ju po bëni fjalë. Sapo jam kthyer nga Berlini dhe brenda disa minutash i mora vesh të gjitha ngjarjet e reagimet, qejf-mbetjet apo “qëndisjet” retorike në “përrallën” politike shqiptare. Nisur nga indiferenca personale, sa intelektuale po aq dhe politike, ndaj kësaj retorike apo çdo lloj euforie propagandistike, unë në intervistën time televizive fola për bashkim të së majtës, pse jo dhe duke tentuar një bashkëpunim të ngushtë me forca politike në qendër apo individë me peshë politike apo elektorale. Është detyrë e partisë kryesore të opozitës, pra e PS-së, dhe e lidershipit të saj, për të analizuar gjendjen dhe për të gjetur zgjidhjen. Veçse, analizë pa numra nuk ka! Të paktën jo më në botën e sotme të “big data”! Pra, dhe zgjidhjet, pa u mbështetur në numra, në shumën e rasteve, nuk janë fare zgjidhje! Padyshim, jo me atë llafe-turpin e “bashkimpazar”-it të përdorur në pyetjen tuaj, as me atë të shfrytëzuar në disa raste nga vetë kreu i PS-së. Aq më pak me interesa çasti e kërkesa personale pushteti, që në mjaft raste e kanë dëmtuar të majtën në përgjithësi, apo PS-në në veçanti; duke hartuar një platformë programore të përbashkët dhe duke ndërvepruar në procesin politik e elektoral në përputhje me të dhe mbi të gjitha, jo me improvizime e shfaqje mediatike, por në mënyrë të sinqertë, transparente e kolegjiale.

Në shkrimin e tij, ai madje ju kërkon që në opinionet tuaja të përdorni më pak shifra dhe më shumë moral e etikë në idetë dhe sugjerimet që jepni. Si e vlerësoni këtë qëndrim të Ramës?

Ndryshe nga kolegë që përgjigjen thjesht duke u informuar nga zona rrethuese servile, unë personalisht nuk komentoj atë që nuk e kam lexuar me sytë e mi, apo që nuk e kam dëgjuar me veshët e mi. Por, le të ecim më tutje. Numrat duhen kuptuar, duhen ndjerë! Këtë nuk e bën lehtë kushdo, aq më pak ai që ushqen “ide mesianike” apo pretendon frymëzime të ngjashme. Në botën e sotme, siç e theksova pak më sipër, shifrat, shumë e më shumë se më parë, janë bërë një element i domosdoshëm dhe i pandashëm i qeverisjes, madje pa to nuk ka vendimmarrje adekuate politike e publike, apo qoftë dhe të vetë biznesit. Bile, në ditët tona, ato po i bëjnë gjithnjë e më të vështira gënjeshtrat e politikanëve, të qeveritarëve dhe administratorëve publikë. Pse jo, në sajë edhe të medias sociale, duke fituar dita-ditës edhe elementë tepër të rëndësishëm moralë e etikë. Por, në asnjë mënyrë pseudo-etika e pseudo-morali i ngritur mbi retorikë. Ishin pikërisht këto shifra të fshehura nga politika, që rrëzuan disa qeveri në vende europiane, ku “kampion” mbetet deri tani rasti grek, me fshehje shifrash të deficitit buxhetor dhe të borxhit publik në dekada. Madje, prej kësaj fshehje në Greqi ai që falimentoi nuk ishte biznesi e iniciativa private, por ishte vetë shteti, administrata e tij, ishte politika jo transparente e dy krahëve, që luajti në dekada me shifrat ekonomike-financiare, pa më të voglin moral dhe etikë!…

Në mbledhjen e parë të kryesisë së re, zoti Rama në fjalën e tij i ka hapur rrugë Grupit Parlamentar të dëgjojë dhe shqyrtojë mungesën e deputetit Islami nga seanca e fundit parlamentare, duke e cilësuar këtë mungesë thyerje të vendimit politik të Grupit Parlamentar. Si e vlerësoni këtë propozim të Ramës?

Pikërisht, te liria e vetë individëve, anëtarë apo simpatizantë të PS-së, te pranimi i kësaj lirie (në mënyrë të drejtpërdrejtë apo të tërthortë) dhe zgjerimi i hapësirës së saj, te diversiteti dhe liberalizmi i drejtimit të kësaj partie, kjo strukturë politike ka gjetur në vite, veçanërisht në vitet e para të tranzicionit, mbijetesën e ringritjen, forcën e vet reale dhe kurajën reaguese. Ishte ky magnet permanent, relativisht i fuqishëm, që e bëri krejt normale thithjen në gjirin e saj të intelektualëve më me zë të fushave të ndryshme, ndërtoi ekspertizën e duhur administrative-qeverisëse. Por ama, siç njihet dhe në shkencë, kur goditet mekanikisht një magnet apo ngrohet ai tej një temperature të dhënë, ai mund të çmagnetizohet, mund të humbasë forcën e vet tërheqëse; deri bëhet i pa vlerë. Kjo nuk duhet harruar! Aq më tepër për t’i shërbyer një pushteti më të madh personal!…

Zoti Islami dhe zoti Harasani kanë thyer bojkotin e PS-së në Parlament, duke marrë pjesë në seancë dhe duke votuar kundër buxhetit të qeverisë. Përse sipas jush ky qëndrim radikal i kreut të PS-së?

Kanë votuar kundër buxhetit të qeverisë? Në fakt, ky është pozicioni i çdo opozitari në shumicën e parlamenteve demokratike, kur bëhet fjalë për miratimin e buxhetit të qeverisë. Madje, në mjaft kushtetuta demokratike, kur nuk miratohet buxheti, me një përqindje të caktuar parlamentare (zakonisht 50%+1), bie qeveria dhe kalohet në zgjedhje të reja. Në këtë kuptimin e mësipërm, ata nuk kanë shkelur ndonjë “betim” të mirëfilltë të pakicës parlamentare, sepse janë sjellë tamam si opozitarë duke votuar kundër. Pra, nuk është kjo arsyeja, por ndoshta dhe ajo që mund të ndodhë më vonë, p.sh., në procesin e zgjedhjes së kryetarit të shtetit… Veçse të mos harrojmë amendamentet kushtetuese, që ia hoqën PS-së kartën e fortë në zgjedhjen e Presidentit, nuk i ideuan Islami e Harasani, por z. Rama, siç ka pohuar vetë ai në atë kohë…

Zoti Islami është pjesë e lidershipit të PS-së që në krijimin e saj, kryetari i parë i Parlamentit pluralist, por dhe me karrierë dhe kontribute 20-vjeçare në këtë parti. Me çregjistrime të tilla, cili është mesazhi që jepet brenda në PS, në opinionin e brendshëm, por dhe atë të jashtëm?

Pyetja e juaj, për fat të keq, qoftë dhe si “paradhënie”, flet shumë. Kjo nuk është më punë mesazhi. Por dhe nëse tentohet thjesht trysnia, është përsëri shumë! PS-ja ishte dhe duhet të mbetet simboli i ndryshimit, ajo duhet të vazhdojë të ushqejë shpresën e emancipimit politik të jetës partiake, pra edhe të asaj qeverisëse. Çdo prirje në drejtim të kundërt mund të bëhet mbytëse për vetë politikën, deri duke e shkëputur më tepër prej qytetarit. Kjo është, në thelb, një kambanë alarmi!…

Duket se ka një tendencë që deputetë të PS-së të dorëzojnë mandatin dhe të gjejnë veten në profesionin e tyre apo dhe në detyra të tjera, duke lënë në mes një karrierë dhe një investim 20-vjeçar, si rasti i zonjës Meksi, i zonjës Seseri, apo dhe i zotit Majko. Mendoni se PS-ja duhet të hapë një debat rreth kësaj tendence, dhe sipas jush cilat janë shkaqet e mbylljes së karrierave politike në këtë mënyrë?

Mesa kam kuptuar nga biseda me znj. Meksi, kalimi i saj në Bordin Drejtues të Bankës së Shqipërisë ishte dhe dëshira e saj. Madje, ajo dukej entuziaste për kryerjen e një detyre të tillë, të paktën në këtë periudhë të parë. Për dy deputetët e tjerë, znj. Seseri dhe z. Majko nuk kam ndonjë të dhënë konkrete… Madje, për mua ky informacion është i ri, padyshim nëse është i vërtetë. Sidoqoftë, problemi që ju ngrini është tepër i rëndësishëm, sidomos për dy partitë kryesore politike. Meqë njoh shumë më mirë PS-së, mund të rreshtojë një mori emrash, që për “interesa” apo pakënaqësi të njërit kryetar apo tjetrit, janë lënë jashtë loje, ose e thënë me “gjuhën” tuaj, iu janë mbyllur karrierat politike. Pa pretenduar saktësi, po kujtoj këtu p.sh. emrin e Ilir Zelës, Maqo Lakrorit, Bardhyl Agasit, Moikom Zeqos etj., që gati janë lënë sot në harresë, edhe pse potencialet e tyre intelektuale, politike e profesionale; qëndrueshmëria individuale, etika e morali i tyre partiak e qeverisës, kanë kuota shumë më të larta përkundrejt disa “prurjeve” të reja. Kjo duhet parë, dhe detyrimisht kjo duhet ndrequr!…

Editoriali
Në editorialin e së shtunës, kreu i PS, Edi Rama, iu përgjigj për herë të parë kritikave të ish-presidentit Meidani, i cili ka përsëritur në shkrimet e tij domosdoshmërinë e aleancës zgjedhore të PS me LSI si rruga e vetme për të ardhur në pushtet. Sipas Ramës, koalicionet kërkojnë jo vetëm numra, por dhe moral e etikë. Në këtë editorial Rama nuk la jashtë vëmendjes dhe debatin që u bë për përzgjedhjen e kandidaturës së Avokatit të Popullit dhe rezervave të shprehura nga personat që ishin në garë.

Panorama

[shigjeta]

Çështja ‘Kastriot Islami’

Tanimë është çështje kohe. Kastrioti Islami është një hop apo një hap larg përjashtimit nga Grupi Parlamentar i Partisë Socialiste. Arsyeja?! Sepse është një politikan ‘i pabindur’ ndaj regjisë tashmë dorëhekurt të Kryetarit, apo e thënë ndryshe, sepse është një politikan ‘kokëfortë’ në bindjet e veta.

Dihet, as Rama nuk e do Islamin, as Islami nuk e do më Ramën. Për këtë arsye Kastriot Islami, duhet të largohet!

Përmes një vendimi të njëanshëm dhe një lufte politike që vijon prej kohësh, nga besnikët e Kryetarit, nga vetë Kryetari dhe nga fryma përjashtuese e sendërtuar nga doktrina e re, vertikale dhe autoritare e lidershipit që ka mbërthyer me dorë të fortë, Partinë Socialiste.

Rezistenca personale e Kastriot Islamit, ndaj linjës politike të Ramës, kaloi në dy faza. Përmes Lëvizjes së Mendimit Ndryshe, ku ai ishte maja e ajsbergut e disidencës opinioniste, në Partinë Socialiste ndaj strategjisë politike të Kryetarit, mbas humbjes së zgjedhjeve të vitit 2009 dhe më pas, mbas përçarjes së Lëvizjes, vetmitar, por vetvetja, në qëndresën e tij ndaj pozicionit politik të parazgjedhur.

Në këto radhë nuk kam ndërmend të mbaj anën e tij, si person apo politikan, bile në mjaft çështje mund të kem bindje të ndryshme, porse rasti që paraqet, tashmë ‘Çështja Kastriot Islami’, është shndërruar në një rast emblematik, në një sinjal të pakëndshëm dhe simbas mendimit tim regresiv, në lidhje me atë që është sot Partia Socialiste dhe standardet e saja të brendshme demokratike.

Sepse padyshim, ‘ndëshkimi’ përjashtues është një kthim mbrapa. Forma e përdorur: ‘divida et impera’, që u përdor nga Kryetari, për të shpërbërë Lëvizjen e Mendimit Ndryshe, e më pas goditja e më të ‘qëndrueshmit’ të këtij grupimi disident, na rrëfen një tension të thellë, në palcë të kësaj Partie të madhe opozitare.

Na rrëfen gjithashtu se Kryetari, mezi e ka përmbajtur zemëratën e tij, në Kongresin Rilindas të paradokohshëm, mezi e ka përtypur ngritjen e fasadës përbashkuese dhe kooptimin e cave dhe mënjanimin e ca të tjerëve, duke synuar me sa duket, krijimin e vetmisë politike të Kastriot Islamit, që më pas, ta asgjësojë atë krejtësisht.

Kjo është luftë politike. Si çdo luftë ka rregullat, taktikat dhe dredhitë e veta. Pjesë e kësaj taktike ishte dhe joshja apo mbajtja pezull e atyre, që e mendonin dhe akoma e mendojnë ndryshe nga Rama, por ndërkohë kanë zgjedhur ‘bindjen’ ndaj më të fortit, bindjen dredharake ndaj Kryetarit idhnak.

Paradoksale është se ndërkohë, Kryetari, ka pranuar dhe e ka shndërruar dhe aplikuar aktualisht në linjë të vetën, argumentet e disidencës së Kastriotit & Co, që lidhej pikërisht me qëndrimet parapolitike dhe politike të periudhës së mbas vitit 2009.

Kuptohet me përjashtim të dorëheqjes si Kryetar Partie të Ramës, mbas humbjes së Zgjedhjeve të Përgjithshme. Dorëheqje e pa lypur drejtpërdrejtazi apo në trajtë kumbuese, nga Islami dhe Lëvizja e Mendimit Ndryshe, ndaj Kryetarit.

Sot Partia Socialiste është në Kuvend dhe jo në rrugë, është ndër Komisione apo salla debatesh dhe jo ndër çadra apo në kafenetë e kryeqytetit, sot Opozita diskuton Ligjin Zgjedhor dhe njeh de facto mandatin 4-vjeçar të qeverisjes, që prodhuan Zgjedhjet e vitit 2009. Siç thamë më lart pra, tezat alternative dhe kundërshtuese të Lëvizjes së Mendimit Ndryshe, në më të shumtat e tyre, janë shënuar në një linjë politike të Partisë Socialiste dhe pikërisht tani e për mos habi, fillon gjuetia e shtrigave ndaj Kastriot Islamit. Sigurisht, është e arsyetueshme se mbas tij, në kohë dhe konjukturë të përshtatshme, do ta pësojnë edhe elementë të tjerë të ‘ish-grupit armiqësor’ dhe kjo e ngroh pa masë Kryeministrin Berisha, që sheh i kënaqur, thellimin e përçarjes së Partisë Socialiste, destabilitetin e saj dhe kuptueshëm e për pasojë, zvogëlimin e influencës së saj në opinion dhe elektorat.

‘Eliminimi’ i Kastriot Islamit, përbën një precedent që bie ndesh me demokracinë e brendshme në Partinë Socialiste dhe i heq kësaj të fundit edhe një ‘asset’ më shumë në performancën e saj dhe sidomos në modelin që ajo parashtron, si kandidate për pushtet në vitin tashmë të afërt elektoral 2013.

Largimi i Kaçit, shënon një largim të Partisë Socialiste dhe Kryetarit të saj, nga zotërimi i vetëkontrollit dhe ul ndjeshëm aftësitë integruese dhe atraktivitetin e këtij subjekti politik. Tashmë forcat centrifugale do të çlirohen gjithnjë e më shumë dhe pa kontroll. Pa kalkulimin e duhur ndërmjet dëmit të imazhit nga njëra anë dhe forcimit të pushtetit personal të Kryetarit, nga na tjetër.

Largimi i Kaç Islamit, anatemimi i Fatos Nanos, përqeshja e Rexhep Mejdanit dhe valët e reja të luftës radikale dhe pasionante kundër Ilir Metës, janë një rrudhje e madhe e kësaj Partie. Një rrudhje që nuk premton dot fitore, porse e largon nga çdo fitore, që dihet, ka në bazën e saj zgjerimin e konsensusit. Deklarate më e fundit trishtake dhe akuzonjëse e Skënder Gjinushit, i pakënaqur nga ecuria, ose më saktë nga lloj bipartiak i ecurisë së negociatës për ligjin elektoral, duke treguar me gisht nga Partia Socialiste, pendesat dhe ndoshta kthesat e Nard Ndokës, kanë sjellë një rrallim të oborrit politik të kësaj Partie.

Duke rritur për pasojë, trokitjet në Portën politike kundërshtare dhe duke thelluar vetminë e pakuptueshme të Kryetarit.

Artur Zheji - MAPO

[Brari]

e mo pun e madhe puna perjashtimit nashti..

rognerin sta ndalon kush.. as bemevenë apo dubain..


dikur ishte se cishte perjashtimi na partia..

--

ja pak histori nga fati i nje vajze.. te pafajshme..

--


Unë, vajza e dy ministrave, e persekutuar 35 vjet
Une Gruajae Dielë, Dhjetor 18th, 2011

E bija e Naxhije Dumes dhe Nesti Kerenxhës rrëfen pjesën dramatike të jetës së saj. Si përfundoi familja nga zona e ish-Bllokut në kampin e internimit në Selenicë të Vlorës, dhe persekucioni gati 35-vjeçar

Teksa rreket të kujtojë të kaluarën e saj familjare, dramat që përjetuan të dy prindërit dhe dyert e persekutimit në të cilat shkeli kur ishte vetëm pesë vjeçe, Dita Kerenxha nuk e ka aspak të lehtë këtë pjesë. Në fakt, tingëllon e përligjur, për sa kohë që vuajtjet e gjata i ka përjetuar nën lëkurë. Prindërit e saj ishin dy personalitete zyrtare për kohën… E ëma, ministrja e parë femër e shtetit shqiptar, ndërsa i ati ministër i Brendshëm i pozicionuar në këtë post pas arrestimit e burgosjes së Koçi Xoxes. Por, menjëherë pas shkëlqimit, trokiti rënia e figurave të tyre. Akuzat e rënda të Enver Hoxhës do të përcaktonin përfundimisht dhe fatin e familjes Kerenxha. Kalvari i gjatë i vuajtjeve dhe persekucioni shumëvjeçar vjen sot në vëmendjen e vajzës së tyre, Dita Kerenxha, e cila ka detaje interesante për të rrëfyer.

Nexhmije Hoxha para pak kohësh botoi librin me titull “Lufta jonë çlirimtare” dhe mes figurave të shquara që morën pjesë në lëvizjen komuniste deri në krijimin e Partisë Komuniste, përmenden edhe emrat e prindërve tuaj, Naxhije Dume dhe Nesti Kerenxha. Ç’përshtypje ju ka lënë ky botim?

Nuk e kam përfunduar të gjithë librin për të dalë në përfundime të caktuara, por kur mes rreshtave gjeta dhe emrat e prindërve të mi si dy emblema dhe figura të rëndësishme të Partisë Komuniste, për një moment ndjeva keqardhje… Prindërit e mi dhe e gjithë familja jonë e pësoi keq nga ai regjim i mbrapshtë. Vite të tëra nën presionin ideologjik, persekutim dhe internim shumëvjeçar, derisa prindërit e mi mbyllën sytë, të pavlerësuar nga asnjë pushtetar. Ndjeva keqardhje për pasojat që prindërit provuan nën lëkurë, ndonëse punuan në shërbim të shoqërisë dhe të vendit. Megjithatë, për sa kohë që emrat e prindërve janë dëshmi e historisë dhe Nexhmija i ka përmendur në librin e saj, është për t’u vlerësuar.

Mamaja juaj ka qenë shoqe e ngushtë me Nexhmije Hoxhën dhe për vite të tëra ato kanë studiuar në të njëjtin konvikt, apo jo?

Është e vërtetë. Mamaja më tregonte shpesh histori të jetës së saj, miqësi të ngushta të cilat dëshironte t’i ruante me fanatizëm. Miqësinë e nënës sime me Nexhmije Xhunglinin e përforcoi më shumë edhe fakti që ato studiuan në të njëjtën shkollë për cikël të ulët dhe më pas Pedagogjiken. Ishin të dyja konviktore në institutin femëror “Nëna Mbretëreshë”, në periudhën 1933-1941. Ndërsa, njohja e tyre kish nisur më herët me lindjen e lëvizjes komuniste, ku ime më ishte aktiviste për të vënë në jetë detyrat e partisë. Mamaja më tregonte shpesh herë me nostalgji se si ato të dyja bashkëpunonin për të shkruar në makinë shkrimi traktet e organizatës komuniste, se si i shpërndanin dorazi. Punonin së bashku për të studiuar ndonjë libër që vinte nga Rusia, ose ndonjë manifest komunist. Në këtë institut, mamaja ka pasur edhe shumë shoqe të tjera, si Liri Gega, Fiqirete Sanxhaktari, Liri Belishova, Margarita Tutulani etj. Kanë pasur një marrëdhënie tepër të ngushtë, por me kalimin e viteve idetë e tyre u përçanë, dhe pasojat nuk vonuan për familjen tonë.

Çfarë e “minoi” lidhjen e prindërve të tu me figurat qendrore të Partisë Komuniste, qoftë me Nexhmijen apo Enver Hoxhën?

Ime më ka pasur një memorie për t’u admiruar, dhe deri në moshën 83-vjeçare, kur ajo mbylli sytë, diskutonim shpesh për tema që i përkisnin të kaluarës. Për jetën e saj si ministre, për njohjen me babanë, për marrëdhëniet me Enverin e Nexhmijen, si dhe shumë personaliteteve të asaj kohe… Në vitin 1943, kur ajo ishte vetëm 23 vjeçe, mori pjesë në konferencën e parë të PKSH-së, dhe u zgjodh anëtare e Komitetit Qendror të PPSHsë. Duke qenë aktive në lëvizjen komuniste, ajo u shënjestrua nga kuestura dhe gjithë kohës iu desh të punonte në ilegalitet. Por, në konferencën e parë të Tiranës, e zhvilluar në vitin 1948, nisën të gjitha goditjet e njëpasnjëshme për prindërit e mi. Idetë dhe pikëpamjet e tyre Enveri i cilësoi si kërcënuese, e kjo solli pasojat. Ime më, në deklaratën që kishte mbajtur, ishte shprehur për gabimet e plenumit të tetë të Komitetit Qendror, duke thënë se për zhvillimet mbanin përgjegjësi të gjithë. Kjo u etiketua si një shënjestër që piketonte të gjithë krerët dhe eprorët e Partisë Komuniste. Menjëherë pas kësaj konference, nisi persekutimi i gjithë familjes sonë.

Përse u akuzuan?

Tërësisht tjetër arsye u parashtrua nga Enver Hoxha dhe Mehmet Shehu, çka më pas çoi në “zhveshjen” nga të gjithë postet e mamasë dhe të babait. Sipas akuzave të tyre, ime më jepte mësime projugosllave dhe antisovjetike. Kjo ishte një akuzë e rëndë që e goditi menjëherë, e pasojat nuk vonuan. Menjëherë agjentët e Sigurimit të Shtetit u vunë në ndjekje këmba- këmbës të çdo lëvizjeje apo takimi që prindërit e mi zhvillonin, për të mbërritur tek arrestimi e tek persekutimi i tmerrshëm.

Por le të kthehemi më larg në kohë, si u bë ministre Arsimi?

Sot, kur e kujtoj me gjakftohtësi, dhe jo me mllefin e pasojave që përjetuam në lëkurë, e shoh si vlerësim dhe si arritje profesionale të mamasë. Ishte shumë e re në moshë kur mori postin e rëndësishëm të ministres së Arsimit. Puna e saj konsistonte në arritje konkrete të sistemit arsimor në vend, dhe përpara i dilnin detyra të mëdha. Lufta kundër analfabetizmit, kualifikimi profesional i mësuesve, literaturë, mjete didaktike dhe një vëmendje e veçantë nevojitej ndaj sistemit shkollor nëpër zonat rurale të vendit. Ime më u zgjodh në postin e ministres më 6 shkurt të vitit 1948, ndërsa prej dy vitesh ajo ishte deputete e Kuvendit Popullor. Emërimi i saj është bërë pasi Koçi Xoxe dhe Enver Hoxha e thërritën në zyrë për t’i komunikuar vendimin e Byrosë Politike, se ajo ishte emëruar në postin e ministres së Arsimit. Mamaja e kujtonte me shumë nostalgji dhe emocion këtë moment, sepse ishte një detyrë shumë e vështirë dhe plot përgjegjësi që i caktohej. Me gjithë formimin e saj profesional, dhe njohuritë që kishte, ishte barrë e rëndë, më shumë se prestigj të mbajturit e një posti zyrtar. Prej asaj dite ajo ishte në përgjim të vazhdueshëm të çdo lëvizjeje.

Gjithsesi, dhe ju keni pasur periudhën tuaj të “mjaltit”, si ishte jeta në Bllok?

Pas emërimit të mamasë në postin e ministres, ndërkohë që babai ishte zv/ministër i Mbrojtjes, ne jetuam për një periudhë të shkurtër në zonën e Bllokut. Ishte privilegj për atë kohë të jetoje në Bllokun e udhëheqjes, por ime më nuk e përjetoi mirë këtë vendim. Të jetoje e rrethuar nga truproja, dhe nga njerëz të pushtetit, të ishe e izoluar nga shtresat e tjera shoqërore ishte si një lloj survejimi i plotë që nuk të linte të merrje frymë lirisht. Dhe, në konferencën e parë të Tiranës, mamaja u atakua me Enverin për këtë detaj, duke shprehur pakënaqësi ndaj të jetuarit në Bllok, në një kohë që ata ishin njerëz që vinin nga populli. Kjo gjë nuk i pëlqeu Enver Hoxhës, duke e cilësuar si përpjekje për të qenë i lirë ndaj çdo ruajtjeje apo survejimi që ishte në detyrë të Partisë të bënte ndaj figurave që punonin për të. Ideja: dëshirë për sabotim të frymës komuniste.

Pas Naxhijes, ishte radha e Nestit, babait tuaj, që të zhvishej nga të gjitha detyrat e postet zyrtare…

Shumë keq e pësoi edhe im atë. Nesti ishte njohur me Enver Hoxhën në qytetin e Korçës, kur ky i fundit jepte mësim në Liceun Francez si pedagog i jashtëm. Më pas e forcuan lidhjen e tyre gjatë periudhës së Luftës e lëvizjes komuniste. Duke pasur interesa dhe ideale të përbashkëta, miqësia mes të dyve u forcua së tepërmi. Babai ka qenë ndër anëtarët e parë të PKSH-së që me themelimin e saj. Është angazhuar herët me lëvizjen komuniste dhe ka luftuar bashkë me grupin komunist të Korçës për çlirimin e vendit. Duke parë angazhimin e tij, e pasi u bë anëtar i PKSH-së, ai asokohe ishte bashkëveprues në të gjitha zhvillimet. Me unifikimin e Ministrisë së Brendshme, emërohet zv/ ministër i Brendshëm me epror Koçi Xoxen, ndërsa pas arrestimit dhe burgosjes së këtij të fundit, ai vendoset në postin e ministrit për periudhën kohore prej një viti. Pas kongresit të parë, ai u zhvesh nga detyrat zyrtare së bashku me mamanë, dhe përfundoi drejtor në minierën e Selenicës, e nëna mësuese e thjeshtë.

Ç’ndodhi më pas?

Jeta jonë nuk ishte më ajo e para. Me gjithë postet zyrtare, prindërit dhe familja ime kanë qenë gjithë kohës në ruajtje të vazhdueshme nga agjentët e Sigurimit. Nuk bënin dot asnjë veprim sipas kokës së tyre, sepse kjo cilësohej menjëherë si goditje kundër pushtetit popullor dhe interesave të tij. Prindërit kanë punuar pa u lodhur, dhe nuk e meritonin fundin që patën. Në vitet 51’-53’, Naxhija punoi si drejtoreshë e Muzeut Arkeologjik dhe Etnografik, e më pas në vitin 1956, drejtoreshë e Bibliotekës Kombëtare. U duk se gjërat nisën të përmirësoheshin, por dora e hekurt e pushtetit nuk vonoi të binte sërish mbi prindërit e mi. Mamanë, me një urdhër që nuk dihet se nga erdhi, e degdisën në Cërrik, ku mbeti pa punë, e disa muaj më vonë përfundoi mësuese e thjeshtë fshati. Ndërsa, babait i vjen një letër në zyrë e firmosur nga Adil Çarçani, i cili i komunikon pozicionin e ri të punës në rafinerinë e naftës në Selenicë. Kujtoj shumë vuajtje dhe shumë mundime të prindërve, që u përplasën keqas me pushtetin. Vështirësitë e jetës së tyre nuk kishin të sosur. Persekutimi dhe internimi në Selenicë të Vlorës ishin pjesa tjetër e dhimbshme e jetës së tyre.

Ishit fare e vogël kur shkelët në Selenicë, ju kujtohet diçka rreth asaj kohe?

Në fillim na internuan në Mavrovë të Vlorës. Mbaj mend që atë ditë erdhën në shtëpi disa njerëz trupmëdhenj, të veshur me rroba të errëta dhe na morën në një makinë për të na çuar në fshatrat e Vlorës. Unë nisa të qaja, sepse isha fëmijë dhe nuk e kuptoja shumë situatën që po ndodhte. Në makinë na hipën mua me mamanë dhe dy vëllezërit. Babai prej një viti gjendej në hetuesinë e Tiranës, sepse merrej në pyetje çdo ditë nga njerëz të Sigurimit. Nesti u burgos për një vit, dhe më vonë u bashkua me ne në kampin e Selenicës. Fëmijëria ime kaloi në ato kushte të vështira nëpër fshatrat e Vlorës.

Si shkoi jeta në kamp, si u rritët?

Isha shumë e re kur u futa në punë. Punoja tokat me bel, hapja kanale vaditëse dhe ujitëse, shpeshherë edhe me dorë. Më kullonin duart gjak nga puna e lodhshme dhe e vështirë për një fëmijë ende të parritur si unë. Ishte një jetë tepër e kufizuar. Vetëm punonim, shihnim problemet tona familjare. Por, edhe atje ishim të gjurmuar e të persekutuar gjithë kohës. Babai një periudhë kohë u sëmur keq nga një dhëmballë, e cila iu infektua dhe infeksioni i rrezikonte shëndetin, por mjekët nuk e preknin me dorë. Ti je Nesti Kerenxha, i thoshin… Mamaja gjithashtu u sëmur rëndë dhe zuri shtratin për muaj me radhë, por nuk i siguronim dot ilaçe. Nuk na jepte njeri ilaçe dhe ajo lëngonte në shtrat për muaj të tërë. Kaluam 35 vite të mundimshme në persekutim.

Sa i ndjeni sot pasojat?

Jeta ime ka qenë tepër e vështirë. Unë dola nga persekutimi në prag të 40-tave. Sot kam krijuar familjen time, dhe plagët nuk më janë shëruar ende. Mamaja dhe babai, megjithëse ishin personalitete për kohën në të cilën jetuan, e pësuan keq nga ai regjim i egër, dhe mbyllën sytë të pavlerësuar nga askush. Ata dhanë aq shumë për këtë vend, dhe në fund morën “shuplakën” në fytyrë.

ERMIRA ISUFAJ

panorama..

.

lavdi azem hajdarit e berishes me shoke.. qe e cmontoj at sistem makaber..

..

[pirro10]

Kastriot Islami nuk duhet te rrije ne drejtim por nuk mendoj se do te perjashtohet

[Edvin83]

Lajm i fundit|Shekulli
20/12/2011 09:20
PS voton sot përjashtimin e Islamit. Berisha e fton në PD

Berisha bashkë me Fatos Nanon dhe Ilir Metën

(I përditësuar)- Sot pritet që grupi parlamentar i PS-së të diskutojë dhe të vendosë në lidhje me përjashtimin e deputetit Kastriot Islami. Diskutimet dhe votimin për përjashtimin e Islamit do t`i drejtojë kryetari i grupit të Partisë Socialiste Gramoz Ruçi.

Në mbledhjen e kryesisë, Ruçi u ngarkua që të thërriste deputetin Islami për të sqaruar mungesën e tij, në votimin për kreun e KLSH-së, Bujar Leskaj, në seancë plenare. Mbledhja e grupit parlamentar të PS-së, pritet të mbahet sot në ora 13:00.

Ndërkohë që lideri i opozitës Edi Rama zhvilloi dje, takime me anëtarë të kryesisë së PS-së dhe me deputetë të ndryshëm, me të cilët ka diskutuar veç çështjeve organizative, edhe çështjen e përjashtimit të Islamit.
************

Berisha fton Kastriot Islamin që të bashkohet me PD

Sali Berisha, kryetari i Partisë Demokratike – ashtu siç bën vazhdimisht – ka komentuar mbi zhvillimet e fundit brenda opozitës. Këtë herë ai ka folur për Kastriot Islamin, për të cilin grupi parlamentar i Partisë Socialiste mund të marrë vendimin për përjashtimin e tij nga grupi.

Berisha, gjatë një ceremonie për promovimin e librit biografik për Enver Hoxhën të Blendi Fevziut, i ka bërë “ftesë” Islamit që t’i bashkohet PD-së. Me doza sarkazme, Berisha është shprehur se në PD nuk bëhen përjashtime ndaj edhe i sugjeronte Islamit një gjë të tillë. Vetë Kastriot Islami në rrjetin social “Facebook” ka përgënjeshtruar një gjë të tillë.

Berisha edhe pse vazhdimisht është shprehur se nuk dëshiron të ndërhyjë në punët e opozitës, nuk lë rast ti shpëtojë pa komentuar zhvillimet brenda saj.

Në rastin e drejtimit të një sfide të kreut të PS-së Edi Rama për debat publik me të, Berisha reagojë duke thënë se nuk dëshironte pasi kështu do të ndikonte në kongresin e PS-së.

Berisha ka përdorur vazhdimisht divergjencat brenda radhëve të PS-së për ti kthyer ato në kapital politik për partinë e tij.

[Brari]

pirrua.. e paska quajtur zhaqet te vjeter kacin.. kastriotin.. .. e zhaqet te re..edvinon..


mendoj se.. zhaqet te vjeter apo te re.. ne politike o pirro.. nuku te ben mosha..

jan mendimet e qendrimet qe percaktojne..

mund te jet 80 vjec dikush e mund te jet "zhaqet e re" ne politik..
ose mund te jet 21 vjec dikush bile dhe 15.. e te jete primitiv e zhuber e zhaqet e mykur dhe e shqyer..

varet nga kendveshtrimi..

ne rastet edvin e kastriot.. eshte i qarte fare.. etiketimi..

kastrioti zgjodhi.. stabilitetin.. rregullat e parimet kryesore te shtet-funksionimit..

kurse edvinua zgjodhi perleket e 21 janaRIT..

PRA TOTALISHT ESHTE .. I RI kastrioti ne kte periudhe..dhe i mykur barbar e skicofren e i rrezikshem.. edvinua..

21 janari o pirro i ndau gjerat qart..

eshte guri i proves..

kush u solidarizua me bandat e edvin ruc dulakut..eshte baRBARIA VETE..

PRA O PIRRO..ESHTE E QARTE SE KUJT I THUA TI ZHAQET E VJETER DHE TE RE..

SHTAZERISE E BARBARISE.. HIPOKRIZISE E DEMAGOGJISE I THUA ZHAQET E RE..

urtesise..konstruktivitetit e paqes e prosperitetit i thua zhaqet e vjeter..
zoti na ruajt nga te tille demagoge me hanxhar fshehur mes fletve te shkruara bukur..
tmerr..

[Albo]

Edi Rama po e kryen me sukses misionin e tij, te pastrimit te PS nga te gjithe intelektualet e nderuar. Te njejten gje beri edhe shoku Enver ne 1945. Ne Parti nuk kemi nevoje per intelektuale e matematiciene qe na tregojne numrat e votave, ne na duhen njerez te degjuar e te besuar te Partise, qe kur Partia e shoku Edi u thote te hidhen ne zjarr, keta nuk e lene fjalen te bier pertoke, por hidhen.

Zhvillime te tilla ne PS, vetem sa hidherojne themeluesit e PS dhe elektoratin qe i ka votuar keta njerez ne 20 vjet, dhe gezojne Ilir Meten dhe Sali Berishen. Ilir Meta do ti afroje keta njerez ne LSI dhe bashke me ta do te vijne edhe mandate deputetesh, edhe votat e elektoratit te tyre te besuar.

Ceshtja ne kete pike shtrohet: Edhe sa kohe do ta durojne socialistet e thjeshte budallain ne krye te partise se tyre qe po e cmonton kete parti cdo dite me vendimet e tij?

Albo

[Uriel]

Zhvillime te tilla ne PS, vetem sa hidherojne themeluesit e PS dhe elektoratin qe i ka votuar keta njerez ne 20 vjet, dhe gezojne Ilir Meten dhe Sali Berishen. Ilir Meta do ti afroje keta njerez ne LSI dhe bashke me ta do te vijne edhe mandate deputetesh, edhe votat e elektoratit te tyre te besuar.

Dakord deri diku, por ky fenomen i ''lëvizjeve'' nuk mund të ndodhë si pa të keq derisa presupozohet se ekzistojne dy filozofi: ajo e majtë dhe e djathtë. Por, meqë në arenën politike shqiptare, kjo vijë ndarjeje është inekzistente, dhe meqë tek elektorati vlen ende ndarja e vjetër ''komunist'' dhe ''demokrat'', e shoqëruar nga paaftësia për të shquar një program të vërtetë elektoral, në bazë të pozicionimit të tyre në shtresat përkatëse të shoqërisë shqiptare, atëherë sigurisht që fenomene të tilla, madje pa nevojën e zgjidhjes së ngërçeve modus vivendi, kanë mundësi të ekzistojnë. Aleanca e vështirë Meta-Berisha nuk vjen si pasojë e gjetjes së një zgjidhjeje alternative për të vënë më së miri në praktikë programet e tyre politike, por si mënyrë efikase kundërvënieje ndaj figurës imbeçile të Ramës, si dhe mundësive pa fund për fitore të njëpasnjëshme. Në këtë pikë, situata është po aq për të qeshur sa dhe për të qarë, ku një individ sillet si ''pronar'' absolut i një force politike, përkundrejt figurave politike që lëvizin si futbollistë gjatë mërkatove të dimrit dhe të verës, dhe së fundmi me elektoratin shqiptar në sfond që nuk percepton dot se çfarë ndodh.