Humbësit Dihen, Fituesit Ende Jo

[abdulselam]

Në një aspekt, nën diell përnjëmend s'lind kurrë gjë e re. Aq më pak ndër këto farët e fiset tona të prapambetura, ku kufizimet e fuqisë dhe vizionit kanë bërë që armiku gjithnjë të shfaqet me fytyrën e fqiut të parë. Në Siujdhesën Ilirike, politika ka qenë ndër kohëra thjesht grindje qorre fqinjësh, për një lëndinë këtu, një livadh aty e një përrua atje; e druaj se kjo s'do të ndërrojë aq shumë për katër vjet.




Ajo që dallon kësaj radhe është se shqiptarët për herë të parë hyjnë në zgjedhje në kushte relativisht demokratike kudo që rrojnë. Me këtë mendoj se ata kanë përfaqësues që i kanë zgjedhur vet, pra që s'u mohohet dot legjitimiteti. Vota ka sot një peshë krejt tjetër nga ç'ka qenë rasti deri tash: tani e tutje s'ia lëmë dot më fajet "Evropës kurvë".

E pra, rezultatet e para të demokracisë janë bukur kokëçarëse. Merreni shembull, ta zëmë, Luginën e Preshevës. Me fjalët Xhafer Shatrit në këtë numër: "U shkëput prej Kosovës në mbarim të viteve 1950 me një firmosje të Titos, për ta çimentuar kontrollin serb mbi magjistralen jugosllave Beograd-Shkup; u nda me armë në dorë prej Serbisë në mbarim të viteve 1990 për të kërkuar rikthim në Kosovë; e u kthye sërish në Serbi në prag të mijëvjeçarit të ri - kësaj radhe me firmën demokratike të përfaqësuesve shqiptarë"!

Apo merreni, ju lutem, skandalin zgjedhor në IRJM-në (Ish Republikën Jugosllave të Maqedonisë). Atje shumëkush e trumbeton "ngadhnjimin" e guerilit Ali Ahmeti ndër zgjedhësit shqiptarë. Ndërkohë, grindjet ndërshqiptare u kanë mundësuar sllavëve ta zaptojnë shumicën absolute në parlament. Po të mos ish zori i ndihmave perëndimore, ja ata sllavët e përbuzur të IRJM-së sot do ta kishin një qeveri krejt të veten, pa as një shqiptar sa për be. E liderëve shqiptarë s'u kuqen veshët fare të vejnë amani o burra te perëndimorët, bëni sevap me ca poste ministrore edhe për ne.





Merreni me mend vet, ju lutem, se si mund të vejnë zgjedhjet në Serbi, po deshi djalli e vajtën si zakonisht! Apo, pse jo, edhe në Kosovë…

Është, pra, punë bukur e vështirë t'ia qëllosh se kush po i fiton zgjedhjet ndër shqiptarë, meqë fitoreve të paralajmëruara s'u është parë ende as nami, e as nishani. Standardi i jetesës ndër shqiptarët ka rënë gjithandej; e askund më shumë se në Kosovë pas "ngadhnjimit" të mbramë ekonomik, kalimit në euro. Në rrafshin kombëtar, vendimet e "Evropës kurvë" për t'i hapërdarë shqiptarët tani i kanë edhe firmat e shqiptarëve, madje bash të përfaqësuesve të tyre demokratikë: ç'tu thuhet tashti këtyre, me fjalorin fishtian!?

Femrat, humbëset e zgjedhjeve

Përkundrazi, ajo që dihet qysh tani, është ajo se kush do të jenë humbësit e kësaj stine zgjedhore. Në radhë të parë do të humbasin femrat shqiptare, meqë politika shqiptare është sistem i ndërtuar prej meshkujve, e për meshkujt. Në demokracitë e qytetëruara, femra e ka marrë në dorë kontrollin mbi gjenitaliet e veta dhe mbi ciklin e vet seksual prej meshkujve kujdestarë. Shoqëritë e mirëfillta demokratike i shfrytëzojnë tërë resurset e veta, duke mishëruar barazinë gjinore në lëmitë e trashëgimisë familjare, e të drejtave të shkollimit, e të drejtës së prindërisë, e tregut të punës, etj. Njerëzit janë e duhet të jenë të ndryshëm e unikë, por ata duhet të gëzojnë shans të njëjtë në jetë. Nëse dikush ka disavantazh pse ka lindur me sy të kaltër, hundë të gjatë, këmbë të shkurta, a vagjinë në vend të penisit, kësaj i thonë diskriminim.

Humbësit e dytë janë fëmijët, kundër të cilëve ushtrohet dhunë sistematike në familjet shqiptare nën pretekstin e "edukimit (!) të mbarë". Ky është brezi i ri, ai i cili shpresojmë se do ta zhvillojë më tej gjuhën e tolerancës dhe demokracisë. E për çfarë zhvillimi mund të bëhet fjalë, kur, në raste të konflikteve, e vetmja gjuhë që njohin shumica e fëmijëve është gjuha e dajakut!?

Humbësit e tretë janë pleqtë shqiptarë, ata që kanë parë tek u avullohen pensionet e kursimet e tërë jetës. Ata ndjejnë se i kanë mbetur barrë fëmijëve të vet të varfër, ndonës kanë punuar e derdhur djersë tërë jetës së vet të pjekur.

Kuti për ta matur humanitetin e një demokracie s'është tjetër, veçse pozita e shtetasve më të eksponuar të saj. E shtresave të dobëta, si e femrave, e fëmijëve, e pleqve etj, dhe pozita e minoritarëve: e pakicave etnike, e handikapatëve, e pacientëve mentalë, e personave me preferenca tjera seksuale, etj. Më thotë mendja se një shoqëri që s'ka se ç'të rrëfejë as në lëmin e sukseseve ushtarake, as politike, e as ekonomike, e pakta mund të bëhet ca më humane, apo jo?

Ndërsa dhjetëra gra e vajza vriten përvjet për "çështje nderi" (a ka term më të pandershëm!?), ndërsa femra shqiptare diskriminohet në punë, në shkollë, në prindëri e në familje, deri atje sa OKB-ja e vlerëson këtë si "pengesë për zhvillim ekonomik e tjetërfare të shoqërisë shqiptare"; e ndërsa fëmija shqiptare i eksponohet rregullisht të rrahurave si metodë e edukimit: qëllojani, ju lutem, sa parti shqiptare e kanë në rend të ditës çlirimin e femrës, e ndalesën e ndëshkimeve fizike kundër fëmijëve?

Zero. As edhe një e vetme për be!

Vetëm sa për ta kruar kokën, ndoshta, në këtë stinë zgjedhore.

[drini_në_TR]

Abdulselam ke shumë të drejtë!
Mes shekujsh gabimi jonë kryesor ka qënë përçarja mes nesh. Ka qënë paragjykimi mes nesh. Ka qënë padrejtësia mes nesh. Humbësit dihen; janë pupulli Shqiptarë. Fituhesit prapë dihen; janë Serbët, Maqedonasit, dhe Grekët.
Abdulselam, gjthçka që na mungon ne është institucioni i vërtetë i drejtësisë në brendinë tonë. A e imagjinon dot sesi do të ishte kombi Shqiptarë nëse të gjithë vjedhësit, të huaj apo shqiptarë, të korruptuarit, shpifsit, etj do të ishin të dënuar dhe ta vuanin atë? Unë shpresoj që shqiptarët të kutpojnë rëndësinë e Drjetësisë kudo që janë. Që të harrojnë paragjykimet, dhe ti drjetohen shtegut të mirësisë...
me shumë Nderime
drini.

[Nika]

Drini... Pajtohem me Ty, por nuk mund të ndertohet shteti demokratik i bazuar në institucione të qëndrueshme dhe apolitike, nëse na udhëheqin ata që qëllim kryesor kanë pasurimin personal dhe kënaqjen e egoizmave të tyre. Që të vëhet e zbatohet drejtësia duhet të zgjidhen persona shumë të aftë, kompetent dhe patriotë. Kemi problem (nga pasojat e së kaluarës) të krijojm intelektualë e ekspertë të aftë, edhe më tepër kemi problem ti zgjedhim dhe ti qesim në ball për të na udhëhequr. Me nderime.

[abdulselam]

por shqiptaret tani vllezer jan ashtu te koruptuar qe me te vertet ka ardhe koha qe spo mundesh me besu asnjerit me te vertet me nje koh kan qe shum ma besnik se na po ja se di smundem me e kuptu pse e kena humb ate tradit te pasur kombetare nese mundet ma gjersish per kete