Postuar më parë nga
Kosovelli
Nga Express më 06.01.2010 në ora 11:03
Banorët e fshatit Rashevc në Serbi, që gjendet afër kufirit me Kosovën, duket se janë alarmuar nga një lopë e humbur, që hyri nga territori i vendit “armik” fqinj.
Një ditë më herët, mediat serbe raportonin se banorët e këtij fshati, “të shqetësuar dhe frikësuar” për sigurinë e tyre, ishin armatosur dhe po patrullonin nëpër fshat. “Në fshat dominon frika. Shumë prej tyre kanë filluar t’i paketojnë gjërat dhe janë gatshëm ta lëshojnë fshatin”, raportonte B92.
Gazeta “Politika” e Beogradit, duke u bazuar në burime të mirinformuara, shkruan sot se “incidenti” në të vërtetë është shkaktuar nga një lopë që kishte humbur dhe ishte futur nga Kosova në zonën e sigurisë. Pasi është errur, ka pasur konfuzion në mesin e banorëve, me ç’rast ka pasur edhe të shtëna sporadike.
Për “incidentin” dje ishte prononcuar edhe ministri i Mbrojtjes i Serbisë, Dragan Shtutanovac. Ai deklaroi se po hetohej çka ka ndodhur një natë më parë dhe i kishte siguruar banorët se Ushtria e Serbisë është tërë kohën e pranishme në afërsi të kufirit.
Të shtëna në kufirin Kosovë-Serbi
Banorët e fshatit Rashevc nga komuna e Kurshumlisë në Serbi, pjesë kjo e cila gjendet në rripin e sigurisë, natën e kaluar e kanë kaluar të armatosur dhe duke patrulluar nëpër fshat. Sipas agjencisë serbe të lajmeve, B92, thuhet se këta fshatarë janë shqetësuar nga të shtënat sporadike, të cilat kanë ardhur nga pjesa territoriale e Kosovës. ‘Të shtënat dhe drita e fuqishme që ka ardhur nga territori i Kosovës, i ka shtyrë banorët e fshatit Rashevc të marrin pushkët në dorë’, thuhet në këtë raport.
Sipas këtyre banorëve, të shtënat sporadike kanë filluar me të rënë terri dhe se, sipas tyre, të shtënat kanë ardhur nga territori i Podujevës, që gjendet rreth 300 metra larg fshatit. Ata pohojnë se policia vetëm u kishte thënë atyre që të rrinë të qetë dhe se për këtë, ata kanë vendosur të vetorganizohen.
Në fshatin Rashevc ka dominuar frika. Shumë prej tyre kanë filluar t’i paketojnë gjërat dhe janë gatshëm ta lëshojnë fshatin.
Gjatë natës ata i ka vizituar zv/kryetari i Kurshumlisë, Dejan Millosheviç, i cili u takua me banorët dhe i bindi ata që mos të largohen nga shtëpitë e tyre.
”Njerëzit janë të frikësuar, sepse lart i kanë familjet. Dy familje janë me fëmijë të vegjël”, tha zëvendëskryetari i Kurshumlisë.
Ndërsa ministri i Mbrojtjes, Dragan Shtutanovac thotë se ende është duke u hetuar se çka ka ndodhur një natë më parë në fshatin Rashevc. Ai konsideron se me këtë rast se nuk ka ardhur deri te rrezikimi i sigurisë së njerëzve.
”Ushtria e Serbisë është tërë kohën e pranishme në atë shtrirje. Ushtria edhe mbrëmë dhe sot është atje, edhe pse nuk është e vendosur në fshat, por në linjën administrative. Konsiderojmë se nuk ka ardhur deri te rrezikimi i jetës së njerëzve, por se do të mundohemi që në bashkëpunim me KFOR-in, të dimë çka në të vërtetë ka ndodhur, nëse incidenti është drejtuar kundër joshqiptarëve, apo ishte diçka që mund të quhet rrugaçëri”, tha ministri serb i Mbrojtjes.
Sipas banorëve, edhe gjatë ditës së martë, janë dëgjuar të shtëna sporadike. Ata paralajmërojnë se do të organizojnë rojtarët derisa të ketë nevojë për këtë.
Nga ana tjetër, zyrtarët e Policisë së Kosovës kanë deklaruar se në mbrëmjen e së hënës nuk kanë regjistruar ndonjë rast të të shtënave në këtë pjesë.
Edhe EULEX-i ka thënë se nuk ka asnjë informacion se ka ndodhur ndonjë incident në afërsi të kufirit, apo se ka pasur “ndonjë provokim nga pala kosovare drejt fshatit Rashevc”.
”Ne jemi në kontakt të vazhdueshëm me Policinë e Kosovës dhe prej tyre ne kemi marrë informacion se diçka e pazakontë ka ndodhur gjatë natës së kaluar”, i ka thënë “Politikës”, Blerim Krasniqi, zyrtar për informim i EULEX-it.
Edhe zëdhënësi i Policisë së Kosovës, Baki Kelani, ka theksuar se nuk ka pasur ndonjë incident në këtë pjesë. Sipas tij, për ruajtjen e kësaj pjese të kufirit është i ngarkuar KFOR-i.
Krijoni Kontakt