Kohë çalamane

[mondishall]

Shishja e jetës

Oqeanit të universit hodha shishen e mbyllur
Dallgët kozmike e përpinë me uri peshkaqenësh
Brenda shishesh jetën time kam futur
Koduar grimcash të boshllëkut të qelqtë.

Nuk bëhem merak për fatin e hedhur
I hedhur nga fati a s'jam kësaj jete?
As kurioz nuk bëhem kush ka për ta gjetur
Qoftë dhe Robinson në ndonjë ishull komete.

Mbase një kohe të kohës së pakohshme
Tokës do kthehet shishja e jetës
Dikush për rrëfenjën e xhindit do kujtohet
Dhe unë tre dëshirat do ja plotësoj patjetër.

[Agim Doçi]

Te lumte penda Poet i dashur.

[Ke-ler]

Jashtezakonisht e bukur,te lumte shpirti.

[mondishall]

Miq te dashur e te nderuar, Agim dhe Ke-ler, ju falenderoj dhe pershendes...



Kësaj bote të marë

Ti je dhe nuk je i vërteti i vetes
Prej kohësh e vërteta dyshon veten e saj
Një gjë është e vërtetë, që bashkë kësaj bote erdhët
Por kurrë nuk qëndruat njëlloj pranë, më pas.

E ç'rëndësi ka të dish, kush e nisi më parë
Rëndësi ka të dish, sa i vetvetes je sot
Vështirë ta gjesh përgjigjen, kësaj bote të marë
Sepse jo pak i marë dhe ti botës jeton.

[mondishall]

Rrëshqitja

Kujdes nga rrëshqitja jashtë stinës së dimrit
Ku qejfi me dhimbjen bashkjetojnë të lumtur
Nuk ka më keq se rrëshqitja e shpirtit
Që shpirtin ta thyen dhe stinës më të bukur.

S'ka fasho, s'ka gips, s'ka terapi shërimi
Të ngjitë sadopak, kockën e shpirtit.

Selanik, 21 qershor 2012

[mondishall]

Ti, i kamuri!

Sot kur e vërteta e kamjes hidhësinë shfaq
Ti, i kamuri, zhdukmu nga sytë!
Unë kurrë zili s'të kam patur, s'të kam
Por dot s'të duroj, hipokrizisë së ndyrë.

Ti i kamuri, nga moskamja ime
Pa të cilën sot ti, mund të ishe lypsar
Mundohesh mëshirshëm, të lëmoshësh thërrime
Ato thërrime, që kursej çdo vaft.

Ndaj hesht, ti i kamuri, me shpirtin e varfër!
Lena të qetë, në varfërinë e trupit!
Sa larg je ti, shpirtit tonë të pastër
E vetmja pasuri, e fillimit dhe fundit.

[mondishall]

(Pa)Durimi

Thonë durimi paska kufi
Unë them kufiri është vetë durimi
Nuk di më tej ç'mund të ketë pas tij
Veç mos kujtoni se është shpëtimi.

Nuk ka torturë më keq se durimi
Mençuri më shumë se durimi nuk ka
Një jetë durueshëm jeton njerëzimi
Durueshëm jeton, padurimin e madh.

Eshtë çmenduri të jesh i duruar
I paduruar të jesh, është normal
Mendoj që Zoti kur na ka krijuar
Patjetër ka qenë durimit maksimal.

[mondishall]

Arti politik

E besoni, që sa herë për Atdheun dua të shkruaj
Më tremb mendimi mos imitoj ca poetë
Ca poetë vërtet të mëdhenj, që i dua
Po aq më mërzitin, për ç'ka shkruan në letër.

Se ja, e nisën vargun për mëmën Shqipëri
Por dashnore i bënë kulte individësh
Sikur ajo të ishte kurvë në dashuri
Që ata, vetëm ata, duhej t'i mbante përsipër.

Tani kur rilexoj të tilla pornira
Veshur shëmtuar me petkun servil
Ndjej sa e përdhunuar ka qenë Shqipëria
Nga kulte individësh në artin politik.

[mondishall]

Kaq jetimë Zoti na la?

Në ka Diell e në ka Hënë
Në ka yje gjithësisë
Në ka tjetër të pathënë
Në kërkim të fundësisë
Vetë Zoti ja ka lënë
Amanet veç njerëzisë.

Po ku vajti amaneti?
Njerëzia vallë ku vajti?
Mençuria thonë mbeti
Çmendurisë si tek kasapi
Posi engjëll djalli erdhi
Njerëzisë demonët ngjalli.

Çfarë u bë e çfarë u tha?
Kaq jetimë Zoti na la?

Selanik, 14 korrik 2012

[mondishall]

Kaq jetimë Zoti na la?

Në ka Diell e në ka Hënë
Në ka yje gjithësisë
Në ka tjetër të pathënë
Në kërkim të fundësisë
Vetë Zoti ja ka lënë
Amanet veç njerëzisë.

Po ku vajti amaneti?
Njerëzia vallë ku vajti?
Mençuria thonë mbeti
Çmendurisë si tek kasapi
Posi engjëll djalli erdhi
Njerëzisë demonët ngjalli.

Çfarë u bë e çfarë u tha?
Kaq jetimë Zoti na la?