Kohë çalamane

[mondishall]

Gjithçkaja

Gjithçka perëndon një çast
Në gjithçka dhe unë bëj pjesë
Një çast rilind gjithçka
Dhe unë një çast lind patjetër.

Nga gjithë gjithçkaja që lind
Nga perëndimi i gjithë gjithçkasë
Perëndimi mos pastë perëndim!
Lindja nga rilindja mos ndaltë!

[mondishall]

Pagëzimi i lirisë

Eshtë e drejta ime, sikurse dhe e jotja
Emrin e vetes sime, t'i ve lirisë
Vetëm kështu, besoj gjithë bota
Do ketë lirinë e pafundësisë.

Sepse liria është e pafundme
Përbërë nga e fundmja e lirisë sime
E lirisë tënde dhe e të gjithëve
Ku robëria mbetet jetime.

Ndaj qesh e qaj sot për lirinë
Globalizuar jashtë meje, teje
Ku si gur shahu përdor njerinë
Dhe fitimtar veç mbreti mbetet.

Pagëzoni me emrin tuaj, o njerëz
Lirinë e lindur me ju njëherësh!

[mondishall]

U talla me veten

Dikush sot u pengua këmbëve të veta
M'u kthye, më lëshoi një të sharë të rëndë
Një tjetër s'po thithte dot ajrin, ndaj renda
Vajta ta ndihmoja, më shau ndër dhëmbë.

Tek ecja i sharë, me nënë e motër
U talla me veten, qesha për botën.

@E Sh

[mondishall]

I kthyer në xhind

Si xhindin në llambë mbyll një pjesë të vetes
Atë pjesë të vetes, që kësaj bote stonon
Kujtoj se përjashta i pastonuari mbetem
Por shpejt i zhgënjyer, llambë tjetër kërkoj.

Thyej kështu kushtet e përrallës
Përrallën me xhind, kështu bastardoj
Cënoj kështu, vlerën e llambës
Ndaj hap llambën time, më shumë ta shtoj.

Oh, ç'bëra kështu, nga llamba del xhindi
Xhindi i pjesës së vetes mbyllur
Më thotë të shpreh tre dëshirat e shpirtit
Unë vetëm një kam dhe atë të humbur.

Merrmë më mirë, të tërin me vete
Mbyllmë të gjithin, kthemë në xhind!
Dëshirat e tjera t'i them nëse kthehem
Por nëse kthehem, një bote me shpirt.

@E Sh

[Askusho]

Përshëndetje Edmond,

Poezitë më pelqejnë shumë.

Urime të mëdha
Andi Meçaj
Vlorë

[mondishall]

Ju falenderoj, i dashur Andi, per mesazhin vleresues. Cmoj fjalen tuaj. Ju pershendes, me...


Pjese nga romani alternativ, "Une ne Dy", rradhitur ketu ne formen e nje proze poetike.

27
Jam mes malesh. 1987.
Tre vjet më i vogël se mosha e Krishtit në ditën e kryqëzimit.
Jam para dhe praparendësi i vetkryqëzimit.
Njëkohësisht jam i dërguari, misionari, dishepulli i Krishtit.
Emri?
Thjesht, një dishepull.
Shsht! Vetëm ty po të shprehem kështu, fetarisht.
Jashtë teje?
Jam ekzistenca ime.
Emri?
Thjesht, një misionar militant.
Antishsht! Mund të thërras e thërrasësh sa të duash.
Mes malesh banojnë njerëz që presin të dërguarin, misionarin, pra, mua.
Jo për herë të parë.
Qofsha i fundit!
Dhe nëse vërtet jam i fundit, ç'i pret, ç'më pret, pas tij?
E qara, apo e qeshura, meqë duhet plotësuar popullorçja, "Qesh ai që qesh i fundit"?
Mirë popullorçja, po profecia ç'thotë?
Të dyja bashkë!
Të krishtëruar deri në antiKrisht,
të antikrishtëruar deri në çnjerëzim,
jetojnë prehistorinë e tyre të socializuar,
banorët mesmalorë.
Bashkë me ta dhe unë,
i posaardhuri nga e ardhmja e tyre.
Këtu merr fund profecia.
Profeci e gurosur shpateve malore.
Ironia tallëse e gurshpirtrave dishepuj.
Dishepuj të Judëzuar nga Juda i "Krishtëruar".
Jo, mos më merrni për dishepull, o njerëz që keni mbetur akoma njerëz!
Nuk kam ç't’ju jap më shumë, nga ç'humbët nga e mara deri më sot.
Jam para e praparendësi i vetkryqëzimit!
Nuk ju besoj ju,
as në përshëndetjen tuaj.
Mos besoni as ju në mua.
I vetmi nder njerëzor, që mund të më bëni.
Jam djalli i profetizuar,
sepse dhe ju jeni shikimi i verbëruar,
dëgjimi i shurdhëruar,
shpirti i çshpirtëruar.
Mjer unë për ju - mjer ju për mua!
Kaq ishte misioni militant.
Tre vjet.
Arritur kështu në moshën e Krishtit.
Në minutën, orën, ditën, e kryqëzimit të tij.
I vetkryqëzuari?
Unë!
Të vetkryqëzuar?
Ju!
Bashkë me vetkryqëzimin, ringjallja.
Bashkë me ringjalljen, vetapokalipsi.

@Edmond Shallvari

[mondishall]

Skuqja

Skuqja sjell skuqjen e gjësë që skuqet
Qoftë në materien me shpirt dhe pa shpirt
Veç në të gjallën ndodh që të shuhet
Qenies së gjallë, fytyrës pacip.

Ja, këtë çast, në skuqjen e vajit
Shoh që të skuqen patatet njëlloj
Njëlloj sikur ndjejnë peshën e fajit
Fajit që njerëzit fajtorë si kuqon.

Ku vajti gjaku, ku vajti fytyra?
Ndërkohë patatet, skuqin nga skuqja.

@E Sh

[mondishall]

Nuk fillohet nga fillimi

Nga aty ku kemi ardhur, që e di vetëm Zoti
Gjak njeriu kemi patur, se nuk kishte lindur kombi
Dhe si ne edhe të tjerë, kësaj bote të shpërndarë
Të përzjerë, të papërzjerë, nëpër grupe, fise ndarë.

Përmes frikës dhe besimit, falur shumë perëndive
Perëndi i madhi i fisit, i veçuar prej stolive
Dhe ashtu si pa kuptuar, u ndanë njerëzit pas fuqisë
Mes instiktesh egërsuar, me fytyrë të njerëzisë.

Me fytyrë të njerëzisë, por me shpirt të ngatërruar
Ca me frymë të Perëndisë, ca me frymë të djallëzuar
Më i forti, djallëzori, në zap vuri njerëzinë
Qysh atëhere mbretëroi dhe vazhdon sot mbretërinë.

Kështu lindën gjithë ndasitë, ndarë në gjuhë e zakone
Shtete ishin mbretëritë, ku me fise, ku me kombe
Në mes tyre sigurisht, kanë qenë të parët tanë
Mençurisht e marëzisht, shumë bënë, por pak lanë.

Atë pak, raca e mbetur, nuk e la të zhdukej fare
Bota ka kombe të vdekur, por të gjallë racën shqiptare
Ja kështu të trashëguar, mes të mirës dhe së keqes
Nga të tjerë herë pësuar, herë pësuar prej vetvetes.

Nuk është mburrja, as mallkimi, shpëtimtari i shqiptarëve
Nuk fillohet nga fillimi, por mbi supet e të parëve.

@E Sh

[Agim Doçi]

U talla me veten

Dikush sot u pengua këmbëve të veta
M'u kthye, më lëshoi një të sharë të rëndë
Një tjetër s'po thithte dot ajrin, ndaj renda
Vajta ta ndihmoja, më shau ndër dhëmbë.

Tek ecja i sharë, me nënë e motër
U talla me veten, qesha për botën.

@E Sh

Fantastike keto vargje.
nuk mund t'ia lejoj vehtes qe te te mos uroj megjith zemer. Te lumte miku im.

[mondishall]

Ju falenderoj i dashur Agim dhe pershendes...




Ball-kan-istan

Ky Ball-kan, Ball-kan-istan
Në më t'bukurin vend të botës
Mund të quhej dhe Parajs'
Por ësht' ferr për faj të kokës.

Kokë njeriu, jo ariu
Që ka bërë shumë histori
Dhe jo pak histori fshiu
Ky ballkanasi njeri.

Ky ballkanasi njeri
Ca i lindur, ca i ardhur
Ca klonuar marrëzisht
Nga ata, mbi vete patur.

Se ata, patur mbi vete
Thonë të madh ballin e kan
Dhe në ballë duan të mbeten
Mbi ballkansit në Ball-kan.

Sa shumë ballësa ky Ball-kan-i
Kaq i vogël, si i nxë?
Ku as bibla, as kurani
Nuk i bind dot për asgjë.

Se kanë ballin përmbi Zot
Për të qenë veç të parë
Shesin fe dhe shesin komb
Qofshin grekë apo shqiptarë.

Qofshin serbë apo boshnjak'
Qofshin lindje, perëndim
Qofshin poshtë a qofshin lart
Në Ball-kan-in lesh e li.

Gjithë të ballit të Ball-kan-it
Janë gei, dashnorë të djallit.

@E Sh