Bello: Nuk e djeg mandatin, do të hyj në Parlament
Deputeti i Partisë Socialiste insiston te qëndrimi për thyerjen e bojkotit politik
Deputeti socialist, Marko Bello, pohon se do të hyjë në Parlament në fillim të vitit që vjen, duke thyer në këtë mënyrë vendimin e grupit parlamentar të Partisë Socialiste për të bojkotuar Kuvendin deri në hapjen e kutive. Pyetjes nëse do të kthehet në Kuvend në fillim të 2010, i zgjedhuri i PS për deputet iu përgjigj se do të jetë në Parlament në fillim të muajit janar. "Pa diskutim. Shpresoj të jem së bashku me kolegët e mi. Nuk dua të ndodhë ajo që e ka parashikuar shumë bukur Asheku te libri i tij i famshëm ‘Ushtari i mirë Shvejk‘, i cili thoshte dikur ‘mirë që u çmendën të gjithë gjeneralët e perandorisë, por pse u çmendën njëkohësisht‘?. Nuk dua të ndodhë të kemi një histori kolektive. Shpresoj që PS të gjejë arsyen për t‘u kthyer në Parlament. Unë personalisht do të kthehem në Parlament", u shpreh Bello.
Ai e cilësoi aksionin politik të opozitës, një histeri kolektive që dëmton interesat e vendit.
"Nuk ka një dokument zyrtar, përfshi dhe Kushtetutën e vendit, që është ligji mbi ligjet, të parashikojë bojkotin. Bojkoti është një formë e përkohshme, e cila synon një qëllim të caktuar. Është përdorur edhe më përpara nga PS në kushte krejt të tjera, në kushte të justifikuara. Është përdorur edhe nga PD në kushte të ekzagjeruara. Gjithsesi ka ardhur koha t‘i jepet fund bojkotit. Nuk është rruga që na çon atje ku duam të arrijmë. Bojkoti për fat të keq të jep për momentin një lloj mbështetjeje të militantëve, elektrizon përkohësisht një pjesë të qytetarëve", vijoi ai. Bello tha se qendra duhet t‘i sqarojë bazës socialiste se sa i dëmshëm është bojkoti në kushtet kur pikërisht anëtarësia po përdoret si justifikim për bojkotin. "Sot dëgjova zëra në PS se është baza ajo që kërkon që ne të ngelemi jashtë Parlamentit, por unë do të pyesja: ‘Po roli i elitave dhe udhëheqjes ku është?‘ Nëse ne duam të themi se kështu na kërkohet dhe ne nuk jemi në gjendje t‘i sqarojmë, t‘u shpjegojmë njerëzve pse bojkoti është i dëmshëm, pa diskutim që njerëzit do të inkurajonin bojkotin", u shpreh ai. Është e lehtë të vësh të zemëruarin, është e lehtë të bësh qejfmbeturin dhe të braktisësh institucionet, por nuk fiton asgjë". "Atëherë duhet kthyer në Parlament. Unë e kam thënë dhe e përsëris që nuk kam ndërmend të djeg mandatin të cilin ma kanë dhënë qytetarët shqiptarë", tha Bello. Ky i fundit është deputeti i parë socialist që deklaron hapur hyrjen në Kuvend, pavarësisht se pas këtij vendimi, mund të përjashtohet nga partia, siç ndodhi me deputetët që votuan pro Presidentit Topi në legjislaturën e shkuar.
shqip
Përgjigju Duke Cituar
Postuar më parë nga skuthi_vogel
Krijoni Kontakt