Sot Festohet Kurban Bajrami!

[Gimi3]

PRISHTINË - Në Xhamitë e Kosovës besimtarët muslimanë falën Namazin e Kurban Bajramit, ndërsa manifestimi qendror u mbajt në Prishtinë.

Muftiu i Kosovës, Naim Tërnava, në mesazhin e tij ka thënë se Kurban Bajrami përforcon ndjenjën e humanitetit, të solidaritetit dhe të bamirësisë.

Ai ka kërkuar ruajtjen e "vlerave fetare e kombëtare" dhe punë për një të ardhme sa më të mirë të Kosovës, në mënyrë që "interesi i përgjithshëm i vendit të jetë mbi interesat e ngushta personale".

Me rastin e festës së Kurban Bajramit, Presidenti i vendit, Fatmir Sejdiu uroi besimtarët myslimanë dhe Myftiun Tërnava.

"Kjo festë simbolizon sakrificën për të mirën, për paqen dhe lumturinë e të gjithë njerëzve kudo në botë, duke e rritur ndjenjën e dhembshurisë dhe të bamirësisë për njerëzit që kanë nevojë për ndihmë dhe solidaritet", tha presidenti kosovar.

Kryetari i Parlamentit të Kosovës, Jakup Krasniqi uroi besimtarët myslimanë dhe Myftiun Tërnava.

"Me rastin e festës së Kurban Bajramit, ju uroj gëzuar Juve Shkëlqesi dhe gjithë besimtarëve myslimanë në Republikën e Kosovës. Kjo kremte këtë vit koincidon me festën e Flamurit dhe uroj që të dyja të kalojnë në frymë gëzimi, hareje e solidariteti", thuhet në telegramin e urimit të kryeparlamentarit.

Edhe në mesazhin e kryeministrit të vendit, Hashim Thaçi urohet që festa e Kurban Bajramit të jetë edhe një rast për të shpalosur edhe më thellë ndjenjat e dashurisë, respektit, harmonisë dhe vullnetit të mirë të qytetarëve tanë.

Me rastin e Kurban Bajramit sot në Kosovë është ditë pushimi në Kosovë.


TIRANË- Besimtarët myslimanë festojnë sot Kurban Bajramin. Festimi i kësaj feste përbën festën e madhe të mëshirës, të faljes, mirëkuptimit, mirësisë, vëllazërimit dhe paqes. Kremtimi i kësaj dite, siç është bërë traditë, fillon në orët e para të mëngjesit, kur mijëra besimtarë myslimanë falin namazin. Në Tiranë falja po kryhet para xhamisë së Et'hem Beut.

Presidenti i Republikës, Bamir Topi, uroi dje të gjithë besimtarët myslimanë shqiptarë me rastin e festës së Kurban Bajramit. Në mesazhin e urimit drejtuar Komunitetit Mysliman të Shqipërisë me rastin e festës së Kurban Bajramit, thekson se "kjo ditë e shënuar e kalendarit islamik frymëzon tek secili besimtar mysliman ndjenjën e përulësisë ndaj të Plotfuqishmit, shprehjen e forcës së besimit dhe të shërbesës së lartë ndaj tij dhe çlirimin e shpirtit dhe të mendjes nga rëndesat e vështirësive të jetës së përditshme dhe të padrejtësisë njerëzore".

Fjala "Kurban" e ka origjinën nga fjala "kurbijjet" që ka kuptimin afrim. Pra "Kurban" do të thotë "t'i afrohesh diçkaje". Në kuptimin fetar kjo do të thotë ti afrohesh Allahut.

Kurbani ashtu siç ka disa rregulla dhe kushte themelore fetare ka edhe tradita. Pikë së pari personi që bën kurbanin duhet të jetë prezent në therjen e kurbanit. Në raste të veçanta kjo mund të bëhet edhe me autorizim. E arsyeshme është që kurbani të theret nga vetë personi, por duke qenë se këtë nuk mund ta bëjnë dot të gjithë, edhe ky veprim bëhet me autorizim.

Por më e rëndësishmja këtu është shpërndarja e mishit të kurbanit. Kurbani ndahet në tre pjesë. Njëra pjesë i shpërndahet të varfërve, tjetra miqve, fqinjëve apo të njohurve që nuk kanë therur kurban. Kurse pjesa e tretë duhet të mbesë patjetër në shtëpi dhe të konsumohet nga pjesëtarët e familjes.

Karakteristike e kësaj dite janë dhe ëmbëlsirat dhe zbukurimet. Në çdo familje myslimane gatuhen gjëra të ëmbla të cilat duhet t'u serviren edhe miqve. Ndërkohë, të gjithë besimtarët si dhe shtëpitë e tyre duhet të stolisen sa më mirë të jetë e mundur. Besimtarët flijojnë në orët e para të mëngjesit qindra qengja dhe desh për të evokuar ngjarjen e shenjtë, ku zë fill kjo festë, ndër më të rëndësishmet për fenë myslimane.

Në këte ditë njerëzit shkojnë për vizita tek të afërmit, fqinjët, shokët e miqtë dhe i urojnë bajramin njëri tjetrit si dhe shkëmbejnë dhurata të vogla si ëmbëlsira e lule. Ata që nuk flasin me njëri-tjetrin pajtohen, të varfrit dhe fëmijët lumturohen. /Balkanweb/



SHKUP - Besimtarët e besimit islam të sot festojnë festën e Kurban Bajramit, festa e dytë më e madhe myslimane menjëherë pas Fitër Bajramit.

Me namazin e mëngjesit, e pastaj edhe me namazin e Bajramit fillon festimi treditor, në të cilin respektin ndaj Allahut, myslimanët e shprehin me therrje të kurbanit.

Kjo ka të bëjë me sakrificën që bëhet në emër të profetit Ibrahim. Kjo sakrificë është prerje e një kafshe (dele, qengj ose cjap) si kurban. Sipas rregullave kjo kafshë duhet të jetë së paku një vit i vjetër. Pas sakrificës së kafshës, sipas Kuran-it, mishi duhet të ndahet në tri pjesë: Një pjesë për të varfrit, një pjesë për të afërmit dhe fqinjët dhe pjesa e fundit për familjen tënde.Me këtë festë kurorëzohet edhe haxhi, që është kushti i pestë i islamit, i cili është dëshmi për solidaritet dhe mirëqenie.

Kryetari i Bashkësisë Fetare Islame Reis ul Ulema Haxhi Sulejman ef. Rexhepi me rastin e festës së Kurban Bajramit sot i dërgoi urime qytetarëve të besimit islam.

"Më paraqet nder i veçantë që me rastin e festës së Kurban Bajramit, në emër të Bashkësisë Fetare Islame të Republikës së Maqedonisë dhe në emrin tim personal, t'ua uroj këtë festë islame, duke iu drejtuar me lutje Mëshirëplotit për ndihmë, mbarësi, shëndet dhe lumturi. Festa e Kurban Bajramit është kremtim i kryerjes së shtyllës së pestë islame- haxhit që njëherit është tubimi i myslimanëve nga të gjitha anët e botës në vendet e shenjta në mesin e tyre edhe hanxhinjë nga vendi ynë në krye me Reis ul Ulema H.Sulejman ef. Rexhepi", thuhet nw urim. Kryetari i Bashkësisë Fetare Islame Reis ul Ulema Haxhi Sulejman ef. Rexhepi i porosit besimtarët që t`i shfrytëzojnë ditët e festës së Kurban Bajramit që t`i zbatojnë porositë e Krijuesit tonë, të njihen mes veti e jo të urrehen.

Liderët mesazhe urimi për festat

Liderët e partive politike kanë shprehur mesazhet e tyre përgëzuese me rastin e festës së 28 Nëntorit, ditës së flamurit kombëtar dhe festës fetare të Kurban Bajramit. "Gjatë historisë sonë sa të dhimbëshme aq edhe të lavdishme, padyshim data e 28 Nëntorit 1912 është një nga datat ku në vehte ngërthen përpjekjet e brezave të tërë jo vetëm për rruajtjen, por edhe për kultivimin e vlerave kombëtare, që kulmoi me shpalljen e mëvetësisë së shtetit shqiptar nga ana e Ismail Qemalit në Vlorë. Duke kujtuar të gjithë, datën e 28 Nëntorit, ne marrim kurajo, bëhemi më këmbëngulës, më aktiv, në përmirësimin e pozitës sonë si komb.Sot, ne e kemi Shqipërinë anëtare të aleancës më të fuqishme -NATO dhe me hapa të sigurtë Shqipëria hapëron drejt Unionit Evropian, ndërsa Kosova është shtet i pavarur e sovran dhe i pranuar ndërkombëtarisht. Ne si shqiptar në Maqedoni jo vetëm që kemi potencial kombëtar për kultivimin e vlerave të mirëfillta kombëtare, por ne nuk do të lejojmë që kushdo qoftë, të tentoje ti zbehë e aq ma tëpër ti nëpërkëmbë këto vlera", theksohet në mesazhin e liderit të PDSH-së, Menduh Thaçi, ku ndër të tjera theksohet se data e 28 Nëntorit na mëson më së miri se ja vlen të qëndrojmë, ja vlenë të luftojmë për të drejtat tona kombëtare dhe padyshim se në këtë betejë, ne si shqiptar do të jemi fitues.

Mesazhe urimi ka lëshuar edhe kryetari i BDI-së, Ali Ahmeti, i cili në telegramin e tij për festën e Kurban Bajramit ka uruar të gjithë besimtarët mysliman.

"Me rastin e festës së Kurban Bajrami shfrytëzoj rastin që në emrin tim personal dhe në emër të anëtarëve të Bashkimit Demokratik për Integrim (BDI) të gjithë besimtarëve të konfesioni islam t'ua uroj këtë festë duke dëshiruar që kjo festë të kalojë në shenjë të solidaritetit ndaj njëri-tjetrit dhe në shenjë të harmonisë vëllazërore", thuhet në telegramin e kreut të BDI-së. Edhe partitë e tjera politike dhe krerët shtetëror duke filluar nga presidenti Gjorgje Ivanov kanë uruar besimtarët islam me rastin e Kurban Bajramit. (INA)

[Gimi3]

Ditet e Festes se Kurban Bajramit le te jene 1 mundesi me teper per te uruar njeri-tjetrin qe: shendeti,dashuria,lumturia & suksesi te na prijne edhe ne te ardhmen.
Urime te gjitheve Festa e Kurban Bajramit