PDK tërhiqet nga vendimi, vazhdon koalicioni PDK-LDK

**Guri i Kuq** · 24-11-2009, 02:11

Ja si e interpreteon zenken e fundit ne mes te partnereve te koalicionit te madh "mjeshtri" i madh i intriges nga radhet e LDK-se:
-----
Kryeziu: Dashuria shtohet, pas grindjes

Eqrem Kryeziu thotë se mund të bëhen ndryshime në Qeveri, por me pëlqimin e LDK’së. Sipas tij, bashkëqeverisja me PDK’në do të vazhdojë edhe në të ardhmen. Ai përmend edhe intensitetin e dashurisë që shtohet pas grindjeve. Hajredin Kuçi pohon se stabiliteti i koalicionit nuk është më temë.

Nga Express më 23.11.2009 në ora 19:29

Përfaqësuesit e dy partive politike që përbëjnë koalicionin qeverisës, PDK’së dhe LDK’së, deklaruan të hënën se pavarësisht plasaritjes së fundit, bashkëqeverisja do të vazhdojë edhe më tej, ndërsa partitë opozitare thonë se kjo qeverisje i ka ditët e numëruara dhe për të dalë nga kolapsi qeveritar, kërkojnë zgjedhje të parakohshme.

Përfaqësuesi i Lidhjes Demokratike të Kosovës, Nënkryetari Eqrem Kryeziu i dha, ndërkaq, mbështetje Kryeministrit Hashim Thaçi për të bërë ndryshime në kabinetin e tij, nëse ky i fundit i sheh të arsyeshme, por siç tha ai, vetëm me marrëveshjen dhe me pëlqimin e LDK’së.

“Nëse Kryeministri e çmon se do të ishte më efektive ndonjë strukturë tjetër, atëherë kjo do të analizohet dhe me pëlqimin tonë kjo mund të ndodhë… Rifreskimi i kabinetit qeverisës nuk është një temë tabu, vetëm se kjo duhet të bëhet me pëlqimin e partnerëve të koalicionit”, tha Kryeziu.

Reagimi i Nënkryetarit Kryeziu erdhi pas pyetjeve të gazetarëve se a pajtohet LDK’ja që të këtë modifikime në Kabinetin Thaçi.

“As që jam i informuar për këto ndryshime, por ajo që unë them, është se ndryshime mund të ketë, por vetëm me pëlqimin e LDK’së”, u shpreh Kryeziu.

Ndërsa, sa u përket lëkundjeve të fundit rreth formulës së koalicionit, Kryeziu tha se bashkëqeverisja me PDK’në do të vazhdojë edhe në të ardhmen. Ai tha se pati disa shkëndija, por ato e bëjnë me të fuqishëm përcaktimin e të dy partive për vazhdimin e koalicionit.

“Është njësoj sikur në jetën private, kur të përlahesh me të dashurin ndonjëherë, por kjo nuk e pengon intensitetin e dashurisë pastaj”, u shpreh Kryeziu.

Edhe Zëvendëskryeministri Hajredin Kuçi, i cili ishte deklaruar për mundësinë e prishjes së koalicionit, u shpreh optimist për vazhdimin e bashkëqeverisjes me LDK’në.

“Besoj se gjërat po shkojnë në rregull dhe nuk ka nevojë të jetë temë çështja e stabilitetit të koalicionit”, u shpreh Kuçi, të hënën.

Zëvendësshefi i Qeverisë tha se ashtu sikur është menduar më herët, ka pasur konsultime për risqarimin e pozicioneve në Qeveri. Ndërsa, duke treguar se ekzekutivi është shumë transparent me qytetarët, tha se në momentin kur do të këtë ndonjë ndryshim në kabinetin qeverisës, do të merret vesh menjëherë.

Ndërkaq, në pyetjen tjetër sa a do të ketë zgjedhje të parakohshme, ai tha se kjo është kërkesë e partive që janë radhitur në vendin e tretë apo më poshtë në zgjedhjet e sivjetme.

“Nuk ka asnjë arsye të ketë zgjedhje të parakohshme në Kosovë, ngase rezultatet e 15 nëntorit e kanë rikonfiguruar pozicionin politik dhe është parë se PDK’ja është e para, është e fuqishme dhe e konsoliduar…dhe ata që pretendojnë për zgjedhje të parakohshme mund të jenë në vendin e tretë dhe më poshtë”, tha Kuçi.
----
Telenovela vijon....

**Guri i Kuq** · 24-11-2009, 06:26

Kështu thoshte PDK në një kumtesë të lëshuar para ca ditësh,pas pendesës për shkurorëzim..!

“Partia Demokratike e Kosovës mbetet fuqimisht e përkushtuar për stabilitetin funksional të institucioneve qendrore të Republikës së Kosovës dhe procesin e shtetndërtimit. Zgjedhjet lokale të 15 nëntorit, të lira, fer dhe demokratike dhe me gjithëpërfshirje, nuk do te mund të ndikojnë në funksionimin e mirë të institucioneve qendrore: Parlamentit, Presidentit dhe Qeverisë së Republikës së Kosovës. Partneriteti i koalicionit në nivel qendror mbetet i konsoliduar dhe i pacenueshëm e funsional, në pajtim me Kushtetutën dhe ligjet e Republikës së Kosovës dhe marrëveshjen e koalicionit deri në zgjedhjet nacionale të vitit 2011."

Por,LDK-ja përmes shefit të grupit parlamentarë z. Lutfi Hazirit ia këthen:

Haziri: Ndryshime brenda kabinetit qeveritar në bazë të partneritetit
--
Prishtinë, 24 nëntor - Nënkryetari i LDK-së Lutfi Haziri ka vlerësuar se zgjedhjet për pushtetin lokal dhe rezultati i dalë nga ato ishte mundësia e vetme për t'i adresuar problemet dhe funksionimin e institucioneve qendrore. Në këtë kotekst ai theksoi se "veprimet e njëanshme të PDK së, si pasojë e rezultatit paszgjedhor, treguan qartë se ka probleme në funksionalitet".
Ndërkaq, për LDK-në Haziri tha se me deklaratën e së premtes së kaluar, ka konfirmuar angazhimin e vet si parti e përgjegjshme në raport me institucionet. "Roli ynë në Parlament dhe Presidencë është i paprekur, është kushtetues dhe garantues, ndërsa sa i përket qeverisë, ka qenë edhe më heret kërkesë jona që riformatizimi i qeverisë është prag i cili nuk mund të kalohet pas këtij rezultati pozitiv që LDK ja ka shënuar", tha Haziri në një intervistë për BBC-në. Ndërkaq, duke folur rreth riformatizimit të qeverisë, ai tha se kjo do të ishte një "analizë e hollësishme" e funksionalitetit të qeverisë, miratimin e ligjit i cili definon qartë përgjegjësitë e kryeministrit dhe të kabinetit të tij. Por në anën tjetër ai tha se ka të bëjë edhe me realizimin e programit qeveritar që do të jetë pjesë e analizës së hollësishme. Në këtë kuadër Haziri tha se LDK kërkon ndryshime brenda kabinetit qeveritar në bazë të partneritetit të vendosur në janar të vitit 2008. Në kostatimin e gazetarit nëse zhvillimet e javës së kaluar çojnë drejt zgjedhjeve të parakohshme, Haziri tha se LDK është e gatshme që të jetë "pjesë e proceseve zgjedhore në Kosovë në çdo kohë". Por, sipas tij, viti 2010 është vit i zgjedhjeve brenda vetë LDK-së, të cilat do të jenë "parakusht për zgjedhjet e përgjithshme në Kosovë".
-----
A di kush,kur është epizodi i ri....?

Partneritet se jo mahi...!

**daja shneq** · 24-11-2009, 21:36

e luta si hashkali me fisionomi nuk i reh sopata ni vend,po ska faj se minister te jesh ne nje vend te botes se tret si jena na eshte privilegj dhe je vip me shum pushtet

**Guri i Kuq** · 27-11-2009, 12:17

Presioni i dështuar i Hashim Thaçit
--
Nuk mund ta shpallësh prishjen e një koalicioni dhe pastaj të thuash që ishte lojë, sepse kjo dëmton autoritetin dhe besueshmërinë. Në një martesë me një partner problematik, gjykata është hapi i fundit. Nëse e çon çështjen deri në divorc, kthimi mbrapa e bën qesharak çdo kërcënim tjetër.

Nga Armand Shkullaku më 26.11.2009 në ora 12:15

Shkarkimi disaorësh që kreu i mazhorancës, Hashim Thaçi, u bëri javën që shkoi krerëve më të lartë të institucioneve të Kosovës (Presidentit dhe Kryetarit të Kuvendit), u duk se shënoi kulmin e një nervozizmi të akumuluar gjatë fushatës elektorale dhe rezultatit të zgjedhjeve. Me një formë presioni aspak delikate dhe nëpërmjet një skeme bajate të përdorimit të mjeteve publike të informimit, Kryeministri Thaçi tentoi të bënte një diversion, fundin e të cilit ndoshta as vetë nuk e kishte menduar më së miri. Sepse, në përfundim të intrigës politike, Lidhja Demokratike e Kosovës mbeti po aty, AKR dhe LDD u ndjenë të përdorura, AAK’së iu dha një tjetër mundësi për të goditur moralin e Qeverisë dhe qytetarët e zbritën dhe një shkallë më poshtë mosbesimin ndaj institucioneve të shtetit. Ndërsa Hajredin Kuqi, i bindur si zakonisht, pa iu dridhur qerpiku doli përsëri për të thënë krejtësisht të kundërtën e asaj që kish deklaruar një natë më parë. Pra, në vend që të arrinte një rezultat nga kjo manovër politike, PDK’ja mori një kosto jo të vogël që nuk do të kalojë pa pasoja.

Të tilla kosto janë zakonisht rezultat i veprimeve të pamenduara mirë, të dominimit të emocioneve e jo të arsyes politike, të sjelljeve nervoze dhe jo të lëvizjeve elegante. Hashim Thaçi është shquar gjatë këtyre dy viteve për një sjellje politikisht korrekte. Ai ka ditur t’i zotërojë emocionet dhe të japë përshtypjen e një Kryeministri të angazhuar me agjendën e Qeverisë dhe jo me akuzat e sulmet politike. Nuk është përfshirë në polemikat me partinë agresive të Haradinajt, ka ditur ta përdorë me mjeshtëri LDK’në dhe mbi të gjitha të ruajë qetësinë në përplasjet e fundit me këtë forcë politike gjatë fushatës zgjedhore. Në asnjë ditë të vetme gjatë fushatës ai nuk iu përgjigj sulmeve të Isa Mustafës, apo presioneve të Lutfi Hazirit. Gjithnjë nëpërmjet Hajredin Kuqit, lideri i PDK’së u kujdes ta përçojë mesazhin se koalicioni është i palëkundur, se dyshja Thaçi- Sejdiu funksionon më së miri dhe se disa qëndrime të drejtuesve të kësaj partie nuk ishin gjë tjetër veçse shkëndija të fushatës që nuk përfaqësojnë LDK’në e vërtetë.

Po përse Hashim Thaçi nuk mundi ta ruajë deri në fund këtë sjellje dhe këtë qetësi në raport me partnerin tjetër në koalicion? Pse duhej që në natën e 19 nëntorit, brenda një ore të prishte atë që kishte ngritur për dy vjet? Me gjasë, akti i beftë i Kryeministrit, megjithëse u drejtua ndaj LDK’së, nuk duhet kërkuar vetëm tek sjellja e kësaj të fundit. Ai është pasojë edhe e shqetësimit të krijuar nga rritja e madhe e Aleancës për Ardhmërinë e Kosovës. Partia e Haradinajt gati u dyfishua në këto zgjedhje, duke paralajmëruar kështu një opozitë reale dhe serioze ndaj Qeverisë. Dhe nëse Hashim Thaçi e kishte toleruar LDK’në në fushatë, i sigurt se ajo (ashtu siç edhe ndodhi në fakt) nuk ka ku të shkojë veç sqetullës së tij, nuk u përmbajt kur partia e Sejdiut shpalli koalicione lokale me AAK’në për balotazhet. LDK edhe më parë kishte bërë koalicione në disa komuna me AAK’në, por kjo nuk përbënte problem për PDK’në për sa kohë partia e Haradinajt përfaqësonte vetëm 9 për qind të elektoratit kosovar. Tani gjërat duket se kanë ndryshuar dhe një aleancë e mundshme e këtyre dy forcave mund të përbëjë një kërcënim për PDK’në në të ardhmen. Prandaj reagimi i Thaçit natën e 19 nëntorit ka qenë i tillë. Ai është ndjerë jo vetëm i tradhtuar, por edhe i shqetësuar nga fakti se partneri i tij i koalicionit po shkonte në shtrat me armikun. Si shkak i këtij nervozizmi, ai shkarkoi Presidentin Sejdiu, Zëvendëskryeministrin Manaj dhe gjithë Ministrat, pa konsumuar më parë hapa të tjerë.

Nëse Kryeministri do të ruante gjakftohtësinë, mesazhet mund t’ia kishte përcjellë më me elegancë LDK’së. Mundej, për shembull, të realizonte takime me Behgjet Pacollin dhe Nexhat Dacin dhe pa qenë nevoja fare për komente, mesazhi do të ishte i qartë. Kjo do të kishte qenë në stilin e deritanishëm të Hashim Thaçit, mirëpo këtë herë ai e humbi qetësinë. I përdori të gjithë – Zëvendëskryeministrin, AKR’në, LDD’në e RTK’në për të bërë një presion të pashënjestruar mirë. Një presion që binte mbi LDK’në, por që shkak real kishte AAK’në. Veçse në politikë duhet bërë kujdes. Presioni është një gjë dhe fakti i kryer diçka tjetër. Nuk mund ta shpallësh prishjen e një koalicioni dhe pastaj të thuash që ishte lojë, sepse kjo dëmton autoritetin dhe besueshmërinë. Në një martesë me një partner problematik, gjykata është hapi i fundit. Nëse e çon çështjen deri në divorc, kthimi mbrapa e bën qesharak çdo kërcënim tjetër. LDK e provoi për një natë edhe ndarjen dhe pastaj u kthye përsëri e qetë në “shtëpinë e përbashkët”, tashmë më e sigurt se kurrë që PDK nuk mund të bëjë pa të edhe nëse ajo e ruan raportin paralel me AAK’në.

Thaçi mund t’ia kishte kursyer vetes një pozitë të tillë.

**Llapi** · 27-11-2009, 21:56

Koalicionet janë pjesë e demokracisë

"Koalicionet janë pjesë e politikave demokratike në sistemin parlamentar. Ato formohen në bazë të zgjedhjeve dhe atë që partitë vendosin se cili është interesi i tyre politik", ka thënë të mërkurën në Prishtinë ambasadori amerikan, Kristofer Dell. Ai tha se në sistemin demokratik është normale të formohen koalicionet, dhe pastaj të mund të prishen. "Kjo është normale dhe e shëndetshme në sistem demokratik. Mendoj që kjo është shenjë e vitalitetit e këtij shteti të ri në Kosovë. Janë vetëm sistemet totalitare ato që duan të mbajnë një sistem të ngrirë e të pandryshuar asnjëherë", tha ai.
"Unë mendoj që kjo është një shenjë e mirë se ky shtet është i shëndetshëm dhe i gjallë, ka një dinamikë që është nxitur nga zgjedhjet dhe rezultatet e zgjedhjeve të fundit", tha ambasadori Dell.